Apocalipsis 13 - Sinia' Jlamtis 1994

Pinitiok siupa i'niat lajlik'i jlele

¹ Sekyi'i ti a'wenayi ja pinitiok i'niat lajlik'i jlele ti 'nes pijia'm, ijwienjli sikio' itij'we times tom'niji jawa jlete'l, 'yina itijwa'm niwa sikioye ja nojwa'm jawa jik'iulis, 'yina ijwienjlijamk'i'ni siuniwa tena jleti'le napo anechiyasas jawa jik'iulis. 'Yina siojowa jlete'l kia'iyo jleyis ijwienjlijamk'i'ni tekiajla'ak'i siunie tiwonaja ni Sinia' ti tiliakik, siu'neje ti titieye ilia'm.

² Jaka ja a'we'en pinitiok, siojo k'iejliyi iyo'ate ni kiunie, jlampet jawa jisietis iyo'ate jana so'olie niwa jisietis, siojo jikiwet iyo pet 'ate ni k'iwajla ni jikiwet. Sekyi'i siojo ajliutietiok jijweye iwijna'm pet siojo i'niat lajlik'i jlele, siu'neje ti ijniejiet'e ti isie' ape'e puwa ajnatis, siu'neje ti yikiajle pi jle' iyo ti iyo anechiyasa'.

³ 'Yina jletik ijwienjli jlaja ti ijiate ti jet'i 'esijipe siukia jikiet'i iyopi, je 'yu'we ti 'wanjle'e kajeyepa, 'yina 'napejli jiwek. Jak je iyoyiji napo i'nio' ti i'winayis jnots'inayijits'i'ni, wikie'eyi napo yi' ape'e 'ni ajnat yamayisk'ijin'ni.

⁴ 'Yina ijiunitieyis ja ajliutietiok kajeyepa ti jla'am jijweye iwijna'm siojo pinitiok i'niat lajlik'i jlele. Sekyi'i ijiunitieyis ts'iji jaka ti iyoyits'i 'ate: —¿Tempa ka wo'ate iyo siu'nie pinitiok? ¿Tempa jantayi kajwe'el ka int'ekiye?

⁵ Jaka pinitiok tenaja 'ate ka iwoyi siuniwa jlamtis jiniliaja, 'yina ti initoniti ni ji'lij. Yeje'ni ni Sinia', siu'neje ti we'lajas ti cuarenta y dos niwa tenaja ti tekiajlaja ka iwo anechiyasa'.

⁶ Ijiatjliyi, iyo siukia iyo ka woyi ti iliaki ni Sinia', siu'neje ti tak'etiasane, siu'neje ti ijwiene'e jana ji'wuk siu'neje napo poli jlele pet.

⁷ Tekiajlaja 'neje napo Sinia' jika kia'lis ka intayits'i ilia'm, 'yina ja ke intayitisi ti janjwelis ka inilanisi. 'Yina tekiajlaja 'neje ka wikie'eyeyi napo i'nio' siunapo 'wenayi ti inijle'en niwa jlonijies iyo ka ne kiajwe, siunapo ji'lij 'wenayi ti yijits'i wikie'eyi niwa ajnatis.

⁸ 'Yina siunapo i'nio' yi' ape'e 'ni ajnat siunapo jleyis je yi'i naka imp'esinik, jip'esinik ni i'nio' 'wolepo 'woma siunie ti tilianape, ja wikie'eyeyi ti janwunitis jaka pinitiok. Naka ni siunie imp'esinik ti jleyis yi'i napoka ti pajk'i ti yiyi janak ji'wasankiye ti t'o'n, pakayi ti 'nelanjie'e Sinia' ilisanayi ni wask'i'nelaja.

⁹ Siunie i'nio' jik'iot tiojwa'l po' kank'iuyeyinie'e siu'nie:

¹⁰ “Jlampet siunapo ti tiwoki inkipijnasa', napoka ti ja t'otiek'i a'laja'm, jlampet siunapo ti sijnat tiok ja tikienaja ti ja tilianaja'n, ja ke 'wenaye paka tikienaja janakaye na sijnat jitiok.” Naka ti it'imina ti siunapo Sinia' jilis 'esiji ka ini'neti'n siu'neje ti jikiowe jant'oniti ni Sijwajieti.

Pinitiok ti tal ajnata'm

¹¹ Yam'niji kiaka, sekyi'i a'wena'aja ja pinitiok jikiecha ti tal pet ajnata'm, jik'iulis times jiwek jla'am iyo'ate na 'wolepo 'woma niwa jik'iulis, jlam pet siupa jla'lap iyo iyo'ate ni ajliutietiok.

¹² 'Yina ipijlati'n jiwa'm siojo jijweye ja siojo pinitiok inia'an ti yina jitieyi'i, jak je iyoyiji ti kia'iyo ti siunie ajnat, siu'neje napo yi' ape'e, ijiunitis, pinitiok siojo jata'nalpe 'yina ti tijwajyi.

¹³ Je jlase' 'neje siunie iyo ti i'winki'n siuniwa iniank'iye siunie ja 'nakaj, jak je iyoyi ti yisi'liete napo i'nio' siunie jlots'ini. 'Yijene pi iyone ti isia'yi isia'm ni jwat ti tal poliyi, 'yina wikie'eyi napo i'nio' ti i'winis ti kia'iyo.

¹⁴ Jak je iyoyiji siuti iyoyi siunie i'winki'n, ti tiwenaja'm ka kiak iwoyi jitieyi'i siojo pinitiok ja inia'an, wuj ti ikajmank'iji'n napo i'nio' yi' ape'e 'ni ajnat. Sekyi'i ti ijliuyeyi napo i'nio ka ilesanisi pa jipela' siojo pinitiok ja inia'an ka jakaye ka jitiej iwoma 'yina ka iwunitis, siojo sijnat jitiok tikienat'iyipe ti tijwajakia'm 'yina ti 'napejli wek ki ji'wet.

¹⁵ Jaka siojo tomi pijia'm pinitiok jijweye tiwenaja'm ka jiyel ijnojwata'm jaka jipe'el ja pinitiok siojo inia'an, 'nakayi ti jantamti. Jankajliunieyi ka tilianaja'n wikie'eyi siunapo je iyo ka t'opiyi kiajwe ka ijnonitis.

¹⁶ Sekyi'i ti takajlunie ka tip'esina wikie'eyi yi'i ni jitiokiots'i ni'ne ka nakaye jikio' jijweyeje; siunapo i'nio' jleyis po' ti anechiyasas, siu'neje napo ti lajk'iyi pet pa ka wo; i'nio' jiniliaja; siunapo i'nio' jwajla'a i'wi'in; siu'neje napo i'nio' ti p'ijliusis pet; siunapo i'nio' inkipijnas, siu'neje napo je inkipijnas.

¹⁷ 'Yina siuti lajk'i japa ka tena'a ka ne'yi ni i'nio', ni'ne ka jleye siunie pinitiok ni inia'an, je 'esiji ka ink'iajwa, je 'esiji ka inkawejna'n, siu'neje japa jijwukis ti jikimet peyit siojona jle' ka lajak'i japa ka ineyi.

¹⁸ 'Esiji ka 'najane ape'e siu'nie iyoyi. Siunie i'nio' 'yijen jlosiki, 'esiji ka jitiej inene 'ate siojona jijwukis iyo naka pinitiok ti i'nio' jijwukis janaka. Janaka seiscientos sesenta y seis (666).