Apocalipsis 12 - Sinia' Jlamtis 1994

Siojopa asejnia siu'neje pa pinitiok wuj ti iyo'ate ni ajliutie

¹ Sekp'an yi'i ti 'yakajayi pet ts'iji poliyi ti inia'an k'iye siunie jawoyi ti japoye ti je jwajla'a. 'Yina asejnia jla'a initoti wita'm jla'am ni kilie' ti iyo ji'wuye, siunie we'la yi' jisietis kiajwe, jlampet siojona jikawonta itijwa'm niwa sikioye times tom'niji ni siuniwa katese'l niwa yi' ape'e.

² 'Yina isiu'ujnie'n jlajak asejnia, jlajlas ijiok'i'ni, kajeyepa ti jlas yokie.

³ Sekyi'i ti 'yakajayi'iji ni jikiecha siunie iniank'iye ti japoye; po' ni pinitiok wuj ti iyo'ate ni ajliutie kejlikiamt'e insatk'i, ijwienjli sikio' itij'we times tom'niji niwa jlete'l, 'yina siuniwa jik'iulis jla'am itijwa'm 'niwa sikioye, 'yina siojowa tena jlete'le iyo'ate siojona tena jletik'i na anechiyas.

⁴ Jikias itietajap ts'iji niwa katese'l ijliena kajnewita'm jikiowe'e kiwa itijwk'i, sekyi'i ti itietayi ajnat'e. Jitieyi'i jlajak asejnia ti jlas yokie, sek yajapa'aja'n ti i'ye'en ka ine wek kisie'e ja kia'le ti iyota ka intojw.

⁵ Siuti yiyeje'n ki jlas ayinie, janakaye ni siunie ti anechiyasa k'iye siuniwa wikie'eyi ajnatis, 'yina ti je jlase' ni jijweye. 'Yina siojo kia'le talaja jikiojyi jlaja jlet, sekyi'i ti tokiji ni Sinia' siu'neje ni siunie ji'wet ti iyo anechiyasa'.

⁶ Sekyi'i yama pet jlaja i'nioki ti i'yiltane ni ajnat laj i'nioye'e siunie ti Sinia' pajk'i ti iwiakajlanit k'iye. Mil doscientos sesenta puwa jlomas yijni ti sek yi'i, je lajk'i jla'am ti 'yakojnie'n.

⁷ 'Yina yam'niji kiaka, poye napo inilajne'n ts'iji poliyi. Miguel, injlojwajnas poli jlele jika anechiyas, jla'yi napo jikawos, ti inilanisi ja ajliutietiok siojo wuj. Kia'iyojliyi pit ja ajliutietiok jikawos po' pet, ti inilajne'n.

⁸ 'Yina siojo ajliutietiok siu'neje japo jikawos je itie, jak je iyoyi ka ji'wet poyeyi ts'iji poliyi.

⁹ Sekyi'i ti totieja kisie'e ni ajliutietiok, siojo ti 'nelanjie'e iyot'ipi injlatiokie'; Imosik, jle' 'neje ni iyo'ate Sitiejiejwa, siunie ti ik'emijiet wikie'eyi napo i'nio' yi' ape'e 'ni ajnat. Tijwanaja'a papo jikawos injlojwajnas poli jlelejimpe ti 'nelanjie'e, ti titietajak'i isia'm ajnat'e.

¹⁰ Jakap'anik'i ti ape'yayeyi ni i'nio' ti tojma'm ni poli, jla'lap ijiok'i'ni, ti iyo'ate: “¡'Nes jana injwajieti ti tajle ni Sinia', siu'neje ni jit'iuni, siu'neje ni jika anechijiayas, siu'neje ni jiniwunitieye naka jijliujwanik ti Injwajieti! Kajeyepa ti totie kisie'e siunie ti iyo'ni jitisa' napo si'niayi ijwienjliyi, siunie ti jlomas, ajnajas ti takasitin'ni jitieyi'i ni Sinia' ti iyojwan'ni jitisa' napo i'nio'.

¹¹ Sa'm ijia itiete isia'm, ka lajak'i ni ji'woyis naka 'wolepo 'woma ti tisa'ni, siu'neje ni inka'niye ti 'es ti tajle ni Sinia' ti ijwilisi pijia'm. 'Yina ka kia'iwo ka ijnots'ina jana 'najlati, 'wenajliyi jla'am ti inite'em ta'a k'iye naka.

¹² ¡Asa'am poliyis, inkasajyi'n, asam 'neje pet ti jleyejyi niwaka, kiak woyeyi! ¡Ijiate, as'wet'ia po' ajnat, i'niat lajlik'i, kajeyepa ti siunie imosik je pa tojwa'a ti janojwik'i siunie jika jloma, jak je iyoyiji ka jiwak je poyeyi, tisiojmajyin'ne ti jant'eki'ni aswa'm!”

¹³ Siojo ajliutietiok i'wi'in ti t'ojmak'i ajnat'e, sektajla'a pet ti ijian'ni siujlieja ti k'iejli jlas yiji'n.

¹⁴ 'Yina lapakawo ti tiwok ta'a pet jijwesisa' jlajak i'nioki, siunie ajwejnas jikie' wuj jijwesis niwa tiwenaja'm ti je lis, 'nakayi ti janjwe'ya pet ti jantajla siojo injlatiok ka injwe'yayi siojo ji'wet laj i'nioye'e, jika najkapis najapeja ijwienjli jla'a ijyiwita'm ja yi'i 'yina nel'lia je inope kajeyepa ti takojniena.

¹⁵ 'Yina siojo injlatiok ta'a ti isienataja ni i'niat ti iyojta tewukie, ti itiajlat jikiwitk'i, ti iyotaja ka i'niat inekk'i.

¹⁶ 'Yina ti po' ni ajnat iyojliyi jla'am pi iyo ti its'iujwa'm pi i'niat, sekyi'i ti 'yima isia'm.

¹⁷ Sekyi'i'ne siojo ajliutietiok kat'ajayi ti a'tiejam'ni jlajak i'nioki. Sekyi'i ti yamayi ti jiwak yikiaj'le siunapo jilis jlajak i'nioki ti t'ekijiam'ni, napoka siunapo i'nio' iyoyi niwa Sinia' jlamtis, siu'neje napo i'nio' ti je paj ka inleyi ti ijwi'il ni Jesús.

¹⁸ 'Yina sek t'asa'a isia'm ja ajliutietiok jikiuts'i ni i'niat lajlik'i.