Apocalipsis 11 - Sinia' Jlamtis 1994

Siupapo times Sinia' jijwejlanawos

¹ Sekyi'i ti tiwenajak'i'm siojo a'la' inkajnojliejnat ti 'yiniye ni sisej, 'yina iyonk'iji'ne 'ate siojo iwink'i'm: —Maj jnojlietk'i ni siunie jikie' pa k'iejliyi ti tijniujlietak'i'ni. 'Ye'en pa k'ie' jana Sinia' ji'wuk, siu'neje jana altar, 'yina etiti'n pa nojwa'm napo i'nio' sekyi'i, ti iyunit ni Sinia'.

² Jlampet siunie jitiowe tomi kisie'e janak je awojonk'iye ka akio' 'oti ka 'ye'en pi k'ie'. Lapakawo ti pajk'i ti ekiajle ta'a siunapo i'nio' 'wenayi ti jiniliaja, 'yina cuarenta y dos (42) niwa we'lajas, ka yot'i 'neje 'ate mil doscientos sesenta (1.260) niwa jlomas, niwa janejyi ti ja kiak jawonisi ti jant'asisk'i'ni janak isi' ti 'es ti janlakiyis.

³ 'Yina sek jantajlisiap'e siuniwa cuarenta y dos we'lajas ajwel'ni paj ka ineyik'ina'a, ti janwoyi jlamtikie' siuniwa yamtis siunapo ti jijweye jawijna'm. Napoka times i'nio' 'yakawosa', ti ji'wuye jiniliaja niwa 'yuts'iji'n ji'wuye iyo napo ti jika amejyi po'.

⁴ Siunapo Sinia' jijwejlanawos times napoka pet siuniwa times a'la' olivok, siu'neje niwa times katese'l ji'wet ti yi' ts'e jitieyi'i ni Saka'niona ti ajnat jika'niona.

⁵ Siuti po' napo janjwe'el ka k'iejliyeyi paka iwone, 'yina ti jwat siunie itiajlatk'i niwa jikiwitawa, sekyi'i nak isienayi napo jitiejiejwas ti jwat iliankine. 'Yina kiak jawone siunapo teje'yi ilia'm.

⁶ 'Yina Sinia' jijweye janwejnamk'i napoka ka imp'ojna'm ni poli janakaye siunie jloma ti jankatatisi ti jawoye jlamtikie' niwa Sinia' jlamtis, jajnojlietisk'i pet ti ja ke i'najlitk'iye ni pejla ka neki'n. Jla'yi ti jijweye japoye ka inkajyi'n ni i'niat lajlik'i ka iwojwa'n 'woyisa'. Siu'neje ti ja 'najane pi jawone ka k'iejliyeyi paka iwo jiwet'iaye 'ni ajnat ka wejnamk'i napo yi' ape'e, jane'yi japa jloma jawo jla'am ka inejni.

⁷ Jantemisiji ti jawoyis jika'niyejayi papo tijliuki, sekjane'yi ka inoyena'a kisie'e siunie pinitiok ti jantalk'i siunie kiawe ti je ti'wena k'ioyi, ti jant'ekiye napoka, sekjane'yi ka ilanajanna'a 'yina ti ja ke intayisi.

⁸ 'Yina napok i'nio' mases janoyik'iji'n ts'e yi'i niwa jika'wulis jana isi' wuj, tenat'iyi'ipe kia jika anechiyasis ti tik'iejwata'a pijia'm japa cruz. 'Yina yikial pijia'm janak isi' siuniwa jleyis t'ipi pet niwak isi'il Sodoma siu'neje jana Egipto.

⁹ 'Yina jlomas ja najapeja ja nesitaja'm 'neje wek siojopa jikiecha, siunapo i'nio' ji'wetis 'wenayik'i, siunapo ji'lij 'wenayi, wikie'eyi ape'e 'ni ajnat jan'yenayisinie'e niwa t'ajwes mases, 'yina ja ke iwenis ka titijikk'iye.

¹⁰ Ja jlam'neja pet napo i'nio' yi' ape'e 'ni ajnat jampeniyeyisk'i'nina'a ti 'yajle'n kiapoka Sinia' jijwejlanawos ti times. Ja inkasajanna'a, sekjane'yi ka initesiek'ina'a ti jawo ji'wajieta', lapakawo ti siukiapo no'we kiapoka ti jijliak'ali iwijna'm napo i'nio'.

¹¹ 'Yina yam'niji siukiwa najape jlomas siu'neje jakia yisitaja'm, Sinia' jiyel yikiajlamk'i. Sekyi'i ti 'wasanaja'neje, iniyek'i pijia'm papoka. 'Yina wikie'eyi siupapo i'nio' ti i'winis wuj ti jnots'ijnits'i.

¹² Sekyi'i papok times injwejlanawos ipi'yayeyisi pi jla'lap pa tom poliyi ti tiwonaja 'ate: —¡Joniemit 'ne! Sekyi'i ti yamayis pijia'm ti yiyisi jlaja poli ti ijioyis poliyi, 'yina siojopo jikojwas i'winisk'i.

¹³ Jakayi'ne ti ajnat ti'wesiye ti ijiat ti pansak'i, 'nak k'iek'i pa no'we siojopa isi' ti iwiests'isia'm, 'yina ijwienjli sikio' itij'we times tom'niji puwa mil papo i'nio mases no'we. Jlampet siojopo 'wanjle'e je jlase' ja iyo ti jnots'ijnits'i, sekyi'i 'yaka jla'm iwo ti iyunitieyis pi Sinia' ti yi' poliyi.

¹⁴ Jlampa inwet'ia timesie kiwa yam'niji. 'Yina ja ke pajayi wat ka neyeyinie'e siunie jikiechaye'eje, nak ja najapayiji'ne.

Siupa to'm jlaja injlojwanik poli jlele ti ipiejwuyek'i pet japa ji'woso'

¹⁵ Sekyi'i siojo injlojwanik poli jlele ti tomayi jlaja, jlampa ijwienjliye 'ni sikio' itij'we times tom'niji japo yam'niji, ti ti'wosojyi'n, 'yina pesiejayi papo tom'niji poliyi, jla'lap ijiok'i'ni ti iyoyits'i 'ate: “¡Siunie ajnat wikie'eyi siuniwa isie pet ape'e 'nakayi yi kiajwe pet ni jijweye ni Saka'niona, siu'neje ni Injwajieti ti jijliujwanik. 'Yina napoka ti anechiyasas jajnok'i'ni ti kiak jawo!”

¹⁶ 'Yina sekyi'i siojopo veinticuatro i'nio' ti jwajla iyots'i'ni, ti yiyisijyi'n siojowa ji'wetis ti anechiyasas jitieyi'i ni Sinia', t'akosjlete'l itiyejayisiji'n ti iyunitis,

¹⁷ ti iyoyits'i 'ate: “Siuti sa'am sinikanitieyi ekiajla'a, Saka'niona, ti Sinia'a'm, ti lajk'ipa ka ijnoj'lia, a'm ti pajk'i ti impo' ta'a, siu'neje ti je jit'iki ka paja, lapakawo ti yi' akiojyi ni ajweye ti je jlase'.

¹⁸ Wikie'eyi napo i'nio' yijits'i niwa ajnatis jwesis, 'yina jlam'ne yiyi pet siojona jloma ti awak yiji, ja'ye'en siupi iyo siunapo ti pajk'i ti 'yajle'n. 'Yina siunapo ajwejlanawos, napoka ti ja en jikiojyi siojona ti i'yakanis, wikie'eyi 'neje siunapo ti aka kia'lis, siu'neje napo ti inwunit, 'wanjliyi ka napokaye siunapo i'nio' ti jle' po' ti anechiyasas, napoka 'neje siunapo ti i'nio' jiniliaja ti lajk'iyi paka woyi. Kia'iyo janetiajnat napoka i'nio' ti ikajyijne'n 'ni ajnat.”

¹⁹ Jak je iyoyiji yajmi wek 'niji kiaka, sekyi'i ti 'ajlaja'm ja ji'wuk kiwet jlaja Sinia' ji'wuk yi' poliyi, sekyi'i ikajayi jlaja a'la' t'aj siujlieja ti 'yakajanitk'i siupa iyot'iyipi pa Sinia' ji'lij, ti yi' kiajwe jlajak Sinia' ji'wuk. Sekyi'i ti poye siojowa tak'ajyits'i siu'neje puwa ina'lapis ti pesieje, siu'neje ti yek'isia'm, siu'neje ti ajnat ti'wesi, siu'neje ti je jlase' jawa alatiu'.