2 Timoteo 4 - Sinia' Jlamtis 1994

“Woyi amtikie' niwa Sinia' jlamtis”

¹ 'Yejne'n, jlam enjliyi ape'e ti ajlo'wa'm, jitieyi'i pi Sinia', jla'yi pi Sijwajieti Jesús, siunie anechiyas ti je ijiat ka je i'nes ti janapimet, ti jankajanit ni jitis iyo napoka siunapo 'wasanjliyine, siu'neje napo pajk'i ti 'yajle'n.

² 'Esiji ka woyi siunie ajloye'a'm, 'esiji ka woyi amtikie' niwa Sinia' jlamtis. Siuti po' jana jloma ti a'wet poyi wata'a, siuti ja laja a'wetayi ejlo'o wek. 'Yina ja inwakal jiwekie'e. Lesaniji siunie jlamtiyi k'iye napo i'nio', 'nakayi ti jan'wenis pet ti ijiate siunie jiwoyi. Wo jlosikie', jalaskine, ke ineyate'e siuti jit'iyasajne'n.

³ Japoye siojona jloma ti jawo'ate napo i'nio' ti janjwelis naka inka'neyasajnaye ti 'es ti tajle ni Sinia', “Siuniwa inamtis wuj ti kiojieti.” 'Yina ja wa'asitieyijits'i'ni ti jampe'yayis siupuwa inka'neyasajnaye ijia, jajnotiena'a wita'm napo inka'neyasajnawos ti ijyiwiteje siunie ijialas kawoyisi ti yiminis ka woyisi.

⁴ Ja ke ink'iuye niwa Sinia' jlamtis, ti ijiate jla'am ti ijiatk'i. Janajatajana'a jla'am siuniwa iyot'iyipi papo kijilas mases, ti jan'yenis.

⁵ Ke wujwa ka awoyi ajlak'aliye, ti k'iejlitieje pa; siunie ajlak'ali nilayiti; woyi amitikie' siuniwa Sinia' jlamtis ti isis; nilesaniji ti jiwoyi ni akijmaye, ti a'm ti Sinia' jikawo'wa'm.

⁶ Je pa tojwa'a siojona jloma ti jaliyi 'ni ajnat. Wakal ti ja siliana, jayo'ate siunie at'es ti tiwoki ji'wajieta pa Sinia' ti tisiaye'ni ape'e jana altar.

⁷ Wuj ti 'es ti anila'an ijwiye po', lapakawo ti ats'i ni jlaj yi'i 'ni 'nayi ni anok'i. Kajeyepa wuj ti alesaniji siu'nie awoyi ti 'es.

⁸ 'Nakayi ti tiwakajlanitie ta'a its'ioye siojona akajli, siojona ti Saka'niona, ti jla'am ti tijna'yi siunie ti jan'ye'en napo i'nio', ti ijiate jla'am ti 'es, ti ja'yakajli ti anilesaniji, ts'iji ka netiejenie'e siojona jloma yi' jlaja. Ja ke yamkataja ti janwenk'i'm, kia'iyo janwejna'm wikie'eyi siunapo ti yimi'n, jla'yi ti je iliyi ti inijijwijyink'iye.

'Niwakata Pablo jlamtis

⁹ Kets'ik'i kiu wat ka'yenk'i.

¹⁰ Demas lapakawo ti yimi'n siu'niwa wask'i'nelaja yi'i 'ni ajnat, it'imina ti ilik'i, 'nakayi teje 'niji Tesalónicaja. Jlampet ja Crescente ijio 'niji Galáciaja, 'yina Tito teje Dalmáciaja.

¹¹ Ijwienjliye jla'am 'ni Lucas ti je taj'l ijiap. 'Esiji ka wojyin'ni ja Marcos, a'asina'a, janoyijk'imna'a ti awoyeta yamtikie'.

¹² Jlampet ja Tíquico ajlo' 'niji Éfesojo.

¹³ Ka anamta ataj wunitiejna'a ja i'yu' aleyijpe ts'iji yi'i jla'a ajnat Troas ji'wet'e ja Carpo. Siu'neje jawa ip'isijna' siu'neje jawa ti ijiate ti asetia'n, inamtis ji'wet, ti a'naj.

¹⁴ Siojo wikijnies jiwo Alejandro, wuj ti je inilesaniji its'ioye. 'Yina je yam'ne ka iyo lajaye siunie je 'es iyoyi. Jla'am pi Sinia' ti jan'ye'en.

¹⁵ Joskiyena'a. Awo kajeyepa ti 'yakaja'a ti teje'yi ilia'm siunie akiniejeje'n ti ajwela.

¹⁶ Siojokia jloma ti 'nelanjie'e senaja jitieyi'i napo i'nio' anechiyasas, tiwet'ianaja ka poye paka inoyijk'i'm ka intamti pet itipe'e, ti si'yasaja'ni. 'Yina pajlat'nine ti yam'ni ti iliyisk'i. 'Esiji ka Sinia' je iwoyi jitisayi kiaka.

¹⁷ 'Yina Sinia' yi' ijiap jakayi. Iyo ijwiyeja' ti awoyi yamtikie' kiwa jlamtis, ti atoni napok siunapo je Judíojos ka impe'yayis pet. Siukia iyonk'iji ti sijwajiete ni Saka'niona k'iye ni jikiwet ni k'iwajla.

¹⁸ 'Yina kiak iyo je ijiat ka je sijwajiete wikie'eyi siuniwa wask'i'nelaja ti je isis, jajnok'i'ni ti jan'yenk'i'm paj ka iyiyeyinie'e ni siunie jika anechijiayas ti yi' poliyi. ¡'Esiji ka jlam kiajatak'i'ni ni jiwunitieye iyo! Amén.

Jlaja ti Pablo itijwila'aja jla'yi pi jikap'ijliuskiye iyo

¹⁹ Atejwile ja Prisca, siu'neje jlaja Aquila, Onesíforo kia'iyojliyi japo ji'wet jlele.

²⁰ Erasto 'wanjle pet Coríntojo, jlampet ja Trófimo aleyi pet Milétojo, kajeyepa ti a'we'en ti je 'esie'.

²¹ Siuti je wi'yitipjli'ijyi, kets'ijyinna'a ka'yenk'i. Eubulo, Pudente, Lino, Claudia, wikie'eyi napo si'lijwas, itijwi'lase pit.

²² 'Esiji ka Saka'niona inejiap ni ajosik, jla'yi ka wujwa ka imp'elisina.