2 Tesalonicenses 3 - Sinia' Jlamtis 1994

Pablo iyotaja ka t'ajlana'ni siu'neje papo jla'yis

¹ 'Najatajana'a, japo i'lijwas, 'esiji ka ts'ajlana'nipe ja 'nakayeyijna'a niwa Sinia' jlamtis ja ke inayena'a ti janeki'n ape'e 'ni ajnat, ka wujwana'a ka tiwok lajaye ka kia'iwo ka inetieje napo i'nio' jla'yi ti jankimits'i, kawoyena 'ate iyopi pet ti asa'am.

² Jwelayi pi Sinia' 'nakayi siunapo i'nio' ijiate ti jwesis, siu'neje napo je iyoyi niwa Sinia' jlamtis, ja lajak'ipe pa inwonts'e. 'Najanayi pi jiwonayi ti je wikie'eyi napo i'nio' ka jitienkiujnieye poye ka ijiatayiji ka je inkakiuyis pi Sinia'.

³ 'Yina Saka'niona je iyo'ate pi jikiecha, jlam ti je wekie'e siunie iyo ka woyi janoye'ase'm, jan'ye'nase'm ti ja ke inkiejnat'ase'm ni siunie je 'es aswet'ia jota iwo.

⁴ Wuj ti sitiej awomaja pi Saka'niona, ti asa'am ka jlamana wek ti ja akajlajyi ti ja awoyeyi siuniwa ajwe'lase'm jla'yi ti ja akiniejliyi ti ja awoyeyi.

⁵ 'Esiji ka Saka'niona 'wenki'nase'm pet siunie iniwoneje ti jlam ti tajle ki iyo ni jlemijnaye ti po', jla'yi ka iwoye asjweyeja' ti jiwayeyetaja ni asjlak'ali ti wuj ti jinilayitieyi iyot'iyipi jla'am ti iniane ti inilayiti.

Wuj ti 'es ka wikie'eyeyi napo Sinia' jilis ka inkimk'iji'n

⁶ I'lijwas, siuti jlam je aniwonaja wek siu'nie awoki, kajeyepa ti Saka'niona yikialts'e pet ka ijliuk'i astepe'e. Ijiatjliyi siuti po' ni sikiecha ti je ats'ilkaja ni jikijmaye, siu'neje ni je iyoyi ka inki'me siunie inka'neyasajnaye ti 'eyasanataja, leyeyi ti jikinieyets'ijin'ni.

⁷ Je int'ayeyiji'n siunie 'es ni janiwonayi, ka woyeyi ni siunie sikijmaye iyoyi. Siuti awakpe asap akimak'iji'n.

⁸ Jak je iyoyiji siukia atowa akinieje, kajeyepa ti laja po' kiwa jlomas ajnajas ti akimak'iji'n, paj ti je kasts'isisieyi. Jak je iyoyiji ka poye paka inila'ne ka ink'ipi'ni sajap ka wojyi'n paka itiuwa.

⁹ Ijiate je ajwelata ka je 'esieyiji siuka ti jik'ipajyin'ni sajap, 'yina ti awoki ka 'yiyasanayi siunie aniwonaja. It'imina ti je ak'ijlinitieje ti akimak'iji'n.

¹⁰ Siukia jloma ti sek awaki aska kiowe'e, jloma ti kiak awo'nase ti awo'ate, “Ni i'nio' je iyo ka inkijme'n, je 'esiji ka in'yasane pet paka intojw.”

¹¹ Awojlitieje ti ajieye'ase ti po' papo ti asa'am, kajlojoties je iyojyi'n pa kantojw, 'najata jla'am ti i'yenis siuniwa iyo napo ijia.

¹² Napoka ti si'lij poyi pet, 'yina ti kia'iyo Saka'niona Jesús ti Sijwajieti, yikialts'e ni ji'lij ka iyoki ti jayonaja 'ate, “'Esiji ka akimats'iji'n, 'yina ja lajk'ipa ka atejnisieyiji'n, 'nakayi ti ja ke asetiana pa ja k'iejliyeyi.”

¹³ Ijiatjliyi, napo i'lijwas, ke ink'ijliaye'ni ti jiwoyeyi ni siunie 'es.

¹⁴ Siuti po' ni akiecha ti je its'iuyi ti je iyo lajaye siunie 'eyasanayi, siunie yi'i 'ni sip'esinik ti ajlok'iase, 'ye'en ni akiecha ni iniwoneje; siuti je inteliaja leyeyi ti jlekiets'ijin'ni ti jiwoye asa'yija. Siuti kiak jawone ja wujwana'a ti ja 'najwel jitipe'e jla'am.

¹⁵ 'Yina ká ata'yi ilia'm, kajeyepa ti je 'wenayeta askiecha 'wenajliyi ti jajloyeyi'ni. Jloyeyi ka je inkakiu ni siunie amtiyi.

Pablo sek jla'a pi iyoyi

¹⁶ 'Esiji pi Saka'niona ti tajle ni inkamankiye jlomasak'i kanwe'nase'm ni siunie 'es. Sekjane'yi ti ja akamaja ti ja k'iejliyeyipe pa jawoyeyi, 'esiji ka inoye'ase'm. 'Esiji ka inwikie'eyeyi ka kiak inwo'nase ka ne'yasap.

¹⁷ Ya'am ti Pablok'i'm, ya'am ti ilisajna' ni yi'i ni imp'esinik, kiak ilisajna' iyo pit jla'yi ti yi' e'ne.

¹⁸ 'Esiji ka Saka'niona Jesús ti Sijwajieti imp'elisinape inwikie'eyeyi ni jleye'yi.