2 Corintios 11 - Sinia' Jlamtis 1994

Pablo siu'neje papo je ijiat ka injlojwajnasa'

¹ ¡'Esieyijinie'e kanilayitieyi siunie jayoyi, 'wanjliyi ka je 'esiek'i! ¡Ijiatjliyi janilayitieyi!

² Ijiate ti akajien'ni astepe'e jayoyi, 'yina siunie ti ikajiejnaye po', tal Siniayi. 'Yina pajk'i ti ateme ti 'otata ta'a k'iye pet pa Sijwajieti ajalas ka neyi ts'ijiye, awoye 'ate iyo jana jlosie ti je itiant'iejliyi'ijyi pi ayinie, ti laj jikeye, jak je iyoyi janjwanjli siunie ja ayeyi, naka Sijwajieti jayo.

³ Sikiwit'ase'm kawoye 'ate iyot'iyipi japa Eva ti siupa injla jitiok ik'emijiete siupa jloski'la, ka leyeyi siupa asemijnaye ti ijiat ti jlena'yi, siu'neje ni Sijwajieti ka je 'esie ni astankiujnieye.

⁴ 'Yina je jiwoyi ka wet'ianayi ti potie siunie ijio'wase ti iyo jlamtikie' siunie Jesús ti je naka siunie Jesús ti pajk'i ti awoki samtikie'. Jla'yi ti siojona jlena'yasap je janak siojona Sinia' jikimet ti pajk'i ti yi'ase. Siu'neje ti jikima'yi ilia'm siunie inka'niye ti je naka ni siunie inka'niye ti pajk'i ti yi'ase.

⁵ Ijiatjliyi napoka siunapo ‘injlojwajnas’ ti jijwela' ka napok ijiatayiji ka injlojwajnasa, 'yina je 'yaka'm itipe'e.

⁶ Ent'a ijiat'iyiji ti je ts'ajane ti amti, 'yina je kia'iyo wek ni iyo ti ts'aja'n ijiusiki. 'Yaka ijiate naka kajeyepa ti je ijwienjliyiji ka je i'winki'nasem'ni, siukia iyo ti ajwe'el.

⁷ Siuti ajwelaye'asempe niwa Sinia' jlamtis je k'iejliyi japa ka 'yejla'ase'm ka iyo lajaye, je jla'm awo ti anijlasat isia'm ti awo ka inwunitieja pet. ¿Ent'a jijwela ka je 'esieyiji?

⁸ Ti jika wikiniet'aj ajajlane japo Sinia' jilis jakiakaye ti ts'esi ti akijme'n aska kiowe'e. Awoyi kajeyepa ti aki'm ilia'm.

⁹ Siuti a'yi aska kiowe'e ti lajatak'ipa ka'wi'in, 'yina je asam'ne ka i'winakitie'ni ka k'iejliyeyi japaka 'yasane, jla'm ijiatayi wek jla'am siunapo yi' Macedóniaja ti po' siojokia atajlajaje jakiaka'ne ti ts'esi. 'Yina awotajank'iye ka je iliki siunie aniwonaja ti je a'wenakitie'ni.

¹⁰ Je tak'emiyeje siunie awoyi, kajeyepa ti sitiant'ieje ts'ajane pi awone ti Sijwajieti jla'am ti iwink'i'm ni ji'lij, jak je iyoyiji ti 'yiniye ka iniwuniti ti awo'ate ti je jlamis ka iyi kiajwe, siuti ayeyi siuniwa ajnatis yi' Acáyaja kiak jawo'ojyi ja lajak'ipa ka ijnalk'i siunie aniwone.

¹¹ ¿Yot'iyi'ni ti i'lij kiak awone? ¿Ent'a jitijnisieje ka je yimina'? ¡Sinia' 'yijene ala ti ijiate ti emina'!

¹² 'Yina ekiajlayi'iji ti awo'ate ti je awo ka ilik'i siunie ti je awo ka 'winakitie'ni, ja 'nakayeyi ti ja ke 'najanisi paka ji'lij inojwatits'i napoka napo ‘injlojwajnas’ ti jijwela ka napok ijiatayiji, ti iniwunitisi siunie ti askijmaye, siu'neje ti jikijmaye jiniwomayi. 'Yina ti iyotajasink'iye pet ka kiak iniwonaja ka iyok lajaye siunie sikijmaye ka iyok'iate iyo jlamis t'ajla'ni napo i'nio' pi k'iejliyi ti iyotajasi.

¹³ 'Yina je napoka napo ti ijiateje ti Sijwajieti jijliujwajnas, napoka napo ti je ijiat ka injlojwajnasa'. Iliaki napo i'nio' ni iyo ni jloski'la, jla'm initewitanisisk'i siunapo Sijwajieti jijliujwajnas.

¹⁴ 'Yina nak je kaskelit kajeyepa ti sitiejiejwa imosik iniwojwa'n injlojwanik poli jleliye ti jlal po'.

¹⁵ Jak je iyoyi siunapo napo i'nio' yamk'i pet kia'iyo pit ini'yenayisiap jiwek siunapo ti ijiate ti isis. ¡'Yina siunie jlaj janakaye ni siunie ti jano'we ni iyo siuniwa iniwonisi!

Jiliaye iyo pa Pablo ti jla'am ti injlojwanik

¹⁶ Ekiajlayi'i ti ajwe'lase'm ti awo'ate: Ká ajwela ka jlam yamti'ni jiwekie'e ka iyo'ate siunie jitiej je 'es. 'Yina siuti sena'yi ka kia'iyo, jakajliete sena'yate ka yamti'yase'm 'nakayi ti jwamjla'a pet ti janiwunit.

¹⁷ Siunie aniwone ti aniwunit, je tajle pa Saka'niona, 'wenajliyi jla'am siunie aniwone jiwoyeyi ti sijwela' ti itiej je 'es.

¹⁸ ¡'Esiji ala ti po' siunapo ti kia'iyo iniwunitisi pi k'iejliyi ti 'yotate, 'yina kiak jayo pit janiwunit pet!

¹⁹ Asa'am ti jijwela' ka ijiatayi ka 'najanajyi'n, jlam'ne'eje ti potie siunapo jijwela 'ne'lias, jlenaye'yaje 'ate sekyi'i jiwoye 'ate, “'Esiji.”

²⁰ Jininenayi 'ate ti tiwoki inkawosa'ase'm ti t'ajla'ase'm pi k'iejliyi ti inlakiye, siunapo ti je iyo asjaye, siu'neje ti impajatie.

²¹ ¡Ts'ajwejle ka pichi'nase, ijiatepe ti awet'ianaja ka kiak iyo'nase naka! 'Yina ti po' siunapo kiak iniwone ti iniwunitisi, 'nakayi 'yiniye kayo 'ate ni siunie jitiej je 'es, ti amti'ni ti awo'ate, “kiak jayo'ni pet janiwunit'ne pet.”

²² Hebréojos napoka, 'yina kia'awo pet. Israel jika kia'lis napoka, 'yina kia'awo pet. Pak tajlisia'm pa Abraham, kiak awo pit.

²³ Sijwajieti jikawos napoka, 'yina kia'awo pit. Ya'm ijiatayi ya'am ti aka'm ape'e, ejlowek siukia awoyi ti ajwe'el 'yiniye pa ti itiej je 'es. 'Yina siunie isijmaye 'yaka'm ape'e ni jikijmaye iyo. Je ijwienjliyi ka je iyi'ni insat jiweje, 'yina kia'iyojliyi naka aka'm ape'e. Siunie tiwonak'i siuti sak'ajak'ni je ijniujliji; siukia tiwonak'i je ijwienjli ka je ijlien'n ajnata'm.

²⁴ Ijwienjli sikio' itij'we'ni ti Judíojos ts'ot'ni a'laja'm, sekyi'i sak'ajas'ni, 'yina treinta y nueve ti tekiajlajak'im'ni ja ink'ajnat.

²⁵ Najapeji'ni ti a'la' tikienak'i'ni ti sajak'ni, 'yina jla'am ijwienjliyi jiwek ti sisajas sitietajajan'ni. Najapeje'niji ti semk'anaja'n ti 'yu'yisia'm siujlieja awaki kasejkana. Ajnaj ijwienjli siu'neje ki jloma ijwienjli ti apan'ni ape'e ja i'niat lajlik'i.

²⁶ Je ijwienjliyiji ti askiujni'n ape'e 'ni ajnat, ni'ne ti iliaye yitaja niwa tewukis, ni'ne ti napoka kajlajnatas, ni'ne ti napoka siunapo ya'm ijia Judíojos ti ijwienjli jana ajnat si'wet pi iyonk'i, napoka 'neje siunapo 'wena jana ajnat tajla'm. Siu'neje ti iliaye ataltajajam'ni jana isi', siu'neje ni ajnat laj i'nioye'e, i'niat lajlik'i kia'iyojliyi, siu'neje ti iliaye ataltajaja'ni siunapo ijwil ka ijiatayi ka napokaye si'lijwas Sinia' jilis iyo ni iyonisk'i.

²⁷ Yi'i ti ijiate ti ikanowe silia'an ti akijme'n, siu'neje ti ijnieti anilankine. Nel'lia siu'neje ni na'la. Po' kiwa jlomas ti je a'yekiu'n, je ijwienjliyiji ka wi'yit je sijlien'ni, ni'ne ti ijiate ti lajk'ipa ka 'yuts'i.

²⁸ 'Yina je niwakata niwaka, siu'neje niwa ijia 'neje ti po' siojona jloma ti itienkiujnieye silia'an ti awoyi ijliak'aliye napoka Sinia' jilis pet.

²⁹ Jak je iyoyiji siuti po 'ni laj jit'iuniye kia'awoye'ijyi pet 'yiniye ka ijiatayi ka yama ka laja it'iuniye. Siuti po' pa ti jlam it'imina pi jikiecha ti yija'm pi jike', naka ti wujwa'aja ti sijwesie pet.

³⁰ Siuti kia'iyo po' siupuwa aniwuniti, 'yina je 'wena pet puwa ka iniwuniti niwaka pet ti janiwuniti siuniwa awoyi ti 'yakajanit siunie ti je anijwe'el, ka ya'am ijiatayiji ka 'yam pijia'm.

³¹ 'Yina pa Jinia' pa Saka'niona Jesús ti Sijwajieti, ti jla'm ijiate ka tiwunitie jajnok'i'ni, je iyo'ate ka je 'najane naka iyo ni ajwe'el.

³² Siuti ayepe Damáscojo, siojo anechiyas iniuyeje'nijpe jak anechiyas Aretas, jika tokis itijwits'i siojowa 'najia jlajak isi' ti inijijwiyisi'n its'ioye, iyotaja ka ts'otis a'laja'm.

³³ 'Yina ti pope pet japo i'yenk'i'm, ti po' jlaja senisi ti siniajmanists'isia'm ti ts'otisi siojo jika 'wuk kiwet tomi pijia'm jlaja isi', siu'nie tiwasokiap. Sekyi'i ajwajyi'ne japoka ti iyoyista ka inkimisk'i'm, 'yina je si'yakanis jakayi.