1 Timoteo 4 - Sinia' Jlamtis 1994

Siunapo janleyi ni inamtik ti janwoyi

¹ 'Yakajk'i ki iyo jana Sinia' jikimet ti 'es, ts'iji jlomas niwa tome jlaja japoye siunapo janleyi ni inamtik, ja 'wenajliyeyi jlam ti janeki ki iyo niwaka siuniwa imose'l, ti jank'emijietk'i napo, jla'yi ti janeki ki iyo siunie t'eyasajnaye niwaka.

² Jank'iuyeyisijna'a siunapo ti jank'emijiet, siupi janwone, siu'neje napo sintijyis. Napoka siunapo ti ja jlosik ja netia'n, ja ke 'najane pa kanwone ti ent'a 'es ni'ne ka je 'esie siunie iyoyisi.

³ Janapokaye siunapo ti ja ke inwejna'm napo ka injwa'yits'iji'n. Kiak jawo janeyiji siunie k'iejliyi ti itijw napo, ti janjwe'el ka je 'esieyiji ka titiuwa. Jlam'ne Sinia' jla'am ti ilisane niwak wask'i'nelaja atowak'i'ni sik'ioye ti sa'am ti atankiunieje, jla'yi ti kastant'ieje ni siunie ijiatk'i, siuti jatiuwa, sek jane'yi ka iyokiepe sinikanitiejayi pi Sinia'.

⁴ Jlam'ne wikie'eyi siuniwa Sinia' ilisant'iyijpe isis. Je 'esiji'ne pet ka iwit'ianaja, 'esiji ka isima ilia'm. Jayokiepe sinikanitiejayi ti jla'am,

⁵ kajeyepa ti siuniwa Sinia' jlamtis, siu'neje ni ts'ajlaye, niwaka ti ilisa'n.

Sijwajieti Jesús jikawo ti 'es

⁶ Siuti kiak jawo ja 'eyasane papo si'lijwas niwaka, ja ama' siunie Sijwajieti Jesús jikawo'wa'm ti 'es. Jawoyi ajosik jlaka niwak inamtis ti tajle ni je akakiunieje, siu'neje ni inka'neyasajnaye siunie 'es ti impaja ti jleki, 'yina jleyeyeyi 'nijiye.

⁷ Ká ani'noti siunapo yamtiyi siupapo pajt'ipi siu'neje niwa yi' ape'e 'ni ajnat ti laj lajaye, 'wenajliyi ti ja ani'neti pet siunie 'es 'nakayeyijna'a ti ja'nesi.

⁸ Siuti anijnejlitie'ni, nak 'esi pet niwa ts'ajwes. 'Yina kia'iyo'ni pet ni sosik, siuti ani'netieje pa Sinia' jla'm ijiatayiji ti kasts'isisi, kajeyepa ti iniuyets'e'm 'nakayi jla'yi ts'ijiye.

⁹ Ijiatk'i siuniwa inamtis, 'esiji ka wikie'eyeyi napo i'nio' ka jitiej inwoma.

¹⁰ Nak it'imina ti awok sikijmayeja' jla'yi ti anilanajan'ni ape'e, 'yina ti jlam pajk'i ti ena'a ni sinijijwiye pi Sinia' ti jlam ti je paj ka netia'n. Siunie Sijwajieti, jla'yi wikie'eyi napo i'nio' ti Jijwajietiyis 'esi siunapo ti je 'yakakiuyis.

¹¹ 'Niwaka'ne siu'niwa ti jota jajwejla'm napo i'nio', jla'yi ti ja 'eyasane.

¹² Nilesaniji, 'nakayeyijna'a ti ja lajak'i paka injwel ka laja lajaye siunie jiwoye, ti a'm ti jwemik'ia'm. Siunapo Sinia' jilis ti jan'we'en siunie jiniwoneje, ti jlamtiyeta ape'e napo i'nio', siunie akijmaye ti 'es, siunie emijnaye, siunie atankiujnieye ti 'es, je 'es ka woyi paka k'iejliyeyi siunie je 'es, ka kiak iniwonisieyijinie'e pet.

¹³ Siuti je ajli'yajyi katate niwa Sinia' jlamtis ka'yen k'iye napo jilis, 'nakayi ti jampe'ya. 'Ejie'ne ka woyisi, 'eyasane.

¹⁴ Lesaniji siunie Sinia' iwi'na'm, ti iyo a'wajieta', jakayi ti yamtijie'n japo jikawos, siojo iyo ja ijwi'la'm ti jikioye yi'n ape'e japo ijiate jla'am ti Sinia' jilis.

¹⁵ Nayi wita'm ni akiowe ti ataj ja eni'ni 'ate niwaka, 'nakayi ti jan'we'en napo i'nio' ti ijiate jikajli niwaka.

¹⁶ 'Esiji ka wujwa ka in'ye'en, siu'neje ni 'eyasajnaye jiwoneje. Katate siunie jiwoyi. Siuti kiak janiwoneje janijwajiet jiwek a'm, siu'neje napo ti its'iu'wa'm.