1 Tesalonicenses 5 - Sinia' Jlamtis 1994

Niwakajlanit k'iye pa Saka'niona ti ja'nes

¹ I'lijwas, jlampet siojopa jloma ti ja'nesi pi Saka'niona, je sitiana ka 'najanayi ka yi'ne ni siu'nie ip'isinik.

² Je iyo'ate ka je 'najanayi siunie jawo, ka inapitiemet jawoyena'a 'ate ni kajlajnata, ti ajnaj pet ni ininejni ti 'nese japa 'wuk ti iyo ka inkajla'n. I'ye'en ti je itijnisk'i wita'm papo jika'nionajas.

³ Japakayeyi ti jawo'ate napo, “'Esiji lapakawo ti akajmak”, sek jane'yi ka jla'm iwoyena'a pet 'ate siunie jawo ni jiwet'ia ti jano'we ti janetiajne'n ti janesi'liet napo i'nio', jawoyena'a 'ate jana i'nioki siojona jloma ti ijialas kisie'e ni kia'le iyo ni ji'wok ti yiyetaja. Ja lajak'iyi paka iwoyi ka injwe'el ka injwayisi.

⁴ Siuti asa'am, 'napo i'lijwas, mejla'a ka ayejyi nak ajnatiok, 'wanjliyi siuti kiak jawo ti janeyi janak jloma ti ja'nesi pi Saka'niona ja ke inesi'lieta ka iwo'ate ni kajlajnata.

⁵ Wikie'eyi ti jitiajlayi ni jla'al jana kates siu'neje ni jloma, nak jitiajlayi jilists'ase'm pet. Je ajnaj jlelets'e'm ni'ne ka napokaye siunapo yimi'n ni ajnatiok.

⁶ Tempi it'imina ti je 'es ka imiakk'iji'n ka iyok'iate napo ijia i'nio'. 'Esiji ka 'yukk'iji'n, ja ke kaskiwali. 'Esiji ka iyoki ni siunie si'niayi ni tijnajyi.

⁷ Ti imiak'iji'n napo, kajeyepa ti yiji pet ni ajnaj. Siunapo ijiujme'n, ajnaj ti i'yayis.

⁸ Sa'am ti awaki ni jloma, 'esiji ka je ilik'i pet ti anokk'i nak si'niayi ti tijnajyi. 'Esiji ka i'yuki siunie jip'ot ni ts'ot naka ni sitienkiujnieye ti 'es, siu'neje ni semijnaye; siunie jip'ot jla'a setik, 'esiji ka iyina'a naka pet ni siunie ka inijijwijyink'iye pet ka ijwieye.

⁹ Lapakawo ti je naka ti Sinia' isimats'e'm ka jiwak inents'e'm, 'wenajliyi ti iyotajank'iye pet ka itiejek jana sijwajiete ka itiajlajaje pi iyo pi Saka'niona Jesús ti Sijwajieti.

¹⁰ Jla'am ti iniwen sitipe'e, jak je iyoyiji sam pet ti kas'wasajne'n, ni'ne ka pajak'i ka iliki 'ni ajnat, ka'nesta ijiate jawiekiap jajnok'i'ni niwa jlomas.

¹¹ Tempi it'imina ti kiak jayo'nase, ti jayo'ate jwajla'a paka woyeyi: nikelayi ki iyo niwak inamtis, ni'yena, 'esiji siunie jiniwonayi, ká aleyeyi.

Pablo ijliu' ape'e papo ijia

¹² I'lijwas, anip'elisi'niase ka k'iuyek'i'm siunie jayo: 'esiji ka woye lajaye, k'iuyeyi siunapo yi' aska kiowe'e ti isimk'iji'n, siu'neje napo i'yena napo ijia Sinia' jilis, ti 'neyasanayi niwa Saka'niona jlamtis.

¹³ 'Esiji ka wujwa ka k'iuyeyi, woye lajaye, emina', lapawo ti ji'wena ni jikijmaye iyo. 'Esiji ka akamaja.

¹⁴ Kia'iyo, i'lijwas, siunapo 'netaj ka inkimk'iji'n, jloye ka woyi ni jikijmaye. Siunapo t'ask'i isia'm ti isimtak'iji'n, noyeje. Siunapo laj jit'iuniye siupi ja k'iejliyeyi ti janeyi, 'esiji ka inilayiti.

¹⁵ Joskiyeyi ja lajk'ipa ka intayiti pi jikiecha siuti k'iejliyi pi iyone ti je 'es. Ja 'wenajliyi ti ja injwesiejayiji'n siunie 'es ka akimayi, jla'yi ka ena'yi wikie'eyi napo i'nio'.

¹⁶ 'Esiji ka je awoye jlaja siunie jiniwonayi ti inkasajyi'n.

¹⁷ Je paj ka aleyeyi ti jiwoye asts'ajlayeja'.

¹⁸ Ja k'iejliyeyipe pa, 'esiji ka awoyeyi asnikanitieyejayi pi Sinia', 'yina niwak iyojonk'iye ka awoyeyi ti asa'am ti je jikakiuye pi Sijwajieti Jesús.

¹⁹ Ká 'ojmata'yi ni jla'al jana Sinia' jikimet ti yiye aswa'm.

²⁰ K'iuyeyi woye lajaye siunie inka'niye yameje'n siunapo ti ijwi'il ki iyo jana Sinia' jikimet ti 'es.

²¹ 'Esiji ka wujwa ka'yena niwaka ti kia'iyo, siuti ja'wena ti 'es ti jajejlitayi, niwak kimayi.

²² Ká akiejnata'ya'm ni siunie je 'es.

²³ 'Esiji ka Sinia' siunie tajle ni jikamankiye, ka wujwa ka inlesana', ka insisie, kan'yena ni asosik jla'yi ki iyo niwa 'asjwes, jla'yi ki iyo ni astankiujnieye, ja 'nakayeyijna'a ka lajak'ipa paka astes iwo ka i'nesta pi Saka'niona Jesús ti Sijwajieti ti janapimet.

²⁴ Jla'am ti ta'nase, je ka inwo sintiye, je ijiat ka je iwoyi ni siunie ijwi'il.

Jlaj yi'i kiwa Pablo jlamtis

²⁵ I'lijwas, kia'iyo jwanets'empe ka kasts'ajlane pi Sinia'.

²⁶ 'Esiji ka anitejwilapi jla'yi ti janik'iewa', nak jankajanit ti Sinia' jilists'ase'm.

²⁷ 'Esiji ka amtijiena k'iye papo si'lijwas siu'nie ip'isinik, 'yina ti Saka'niona ji'lij pet ti yikialk'i siu'nie awoyi.

²⁸ Ka Saka'niona Jesús ti Sijwajieti ijiatayi ka insa'yi astepe'e ni jikap'ijliuskiye.