1 Pedro 4 - Sinia' Jlamtis 1994

Nak 'esiji ka inwoyi napo Sinia' jilis ni siunie iyo kanwoyi ni Sinia'

¹ Siupi iyot'iyipi pa Sijwajieti ti inilayiti pi iyo pa jiwet'ia, kiak jawoyeyi pet. 'Esiji ka niwakajlanitie ta'a k'iye siunie asjlak'aliye ka netie'ase. 'Yina ti siunie ti ijiate ti inilayiti, nak iliyi pet 'nijiye ni jike',

² 'nakaye'eje pet siunie iyoyi ni Sinia' iyone, je pa jlama ka iwoyi siuniwa itiliaja pet ka woyi 'ne ajnat'e.

³ 'Etsaka ki siukia jiniwonayi iyo ni jike' siunapo i'nio' ti je itiant'ieje pa Sinia'. Jinisayeyi siunie aske', siuniwa ti inteliajayi jlam'ne je isis; jiwoye at'es jiwosa', jilisanayi jana aslakijnieye ti jikanitiejyi; jlam jloyejliyi siuniwa jiwunitie ti jiwoyeyi aska diosisa' ti niwaka ti ijiate ti je isis.

⁴ 'Nakayi ti je jleyejyi napoka, ti iyoyi naka ti wuj ti je 'es, sekyi'i jlam jnots'inayijits'i'ni, sekyi'i inlakiyeyi siunie jiwoyeyi.

⁵ Jlam'ne ki jawo, siupi ji'lij jawoyi jitieyi'i siunie ti wakal ti jan'ye'en wikie'eyi napo i'nio' pi iyo pi jitis, siupapo 'yajle'n siu'neje napo 'wasajne'n ja wikie'eyeyi.

⁶ Siupapo 'yajle'n jlam pajk'i ti tijwelaja siunie inka'niye ti 'es, jlampa Sinia' intemayijna'a ti jan'ye'en siupi jitis iyot'iyipi ti je t'ekijli kiu' ape'e 'ni ajnat. Sek jane'yi ka nekiajlana'ak'i pijia'm puwa jisiak'alis, iyo jla'am ni Sinia' ti tajle jana in'wasankiye.

Jasijmanaja'n siunie sijweye ti Sinia' iwints'e'm ti iyo si'wajieta'

⁷ Je pa tojwa'a ni jlaj jane'yi wikie'eyi siuniwa wask'i'nelaja. It'imina ti kiak awo'nase, nilesanayiji. 'Esiji ka asa'am ijiatayi ka woyeyi ni asts'ajlaye.

⁸ 'Yina siunie ti jla'm ijiateje ti laja po' naka ti janinemina, jlam'ne naka inemijnaye ti initiajnat niwa inkeyis.

⁹ 'Ye'n ilia'm ni akiecha ti ijio'wa, ja ke poye paka a'leja ka jiniliakie' ilia'm.

¹⁰ Siuti asa'am ti Sinia' iyo jiwosa' niwaka ti iyo ji'wajietisa' napo, kijmanayiji'n pet niwaka, ja 'nakaye ti ja 'esieyi pet ni akiecha siupi Sinia' iwi'na'm pet. 'Yina ti ijwienjli je k'iejliyik'i siuniwa Sinia' yikiaj'lase injweyejes.

¹¹ Siuti po' ni iyo jlamtikie', 'esiji ka niwakaye Sinia' jlamtis ti janamtiyi. Siunie Sinia' yikiaj'la pit ka noyeje napo a'lejwas, 'esiji ka inwa'asitieyiji'ni 'yina siunie ajweye yi'a ti Sinia' jlam ti yikiaj'la. Ja k'iejliyeyipe siupi jawoyeyi, siuti jawoyeyi siunapo i'nio' pak janwunitis pa Sinia'. Siunie ti jawunitie, woyeyi 'niayija' pa Sijwajieti Jesús, ti jla'am ti 'yu'we ti ka kiak tiwonaja, ka tonitie, siu'neje ni jijweye iyo, jajnok'i'ni. Amén.

Jijliak'ali napo Sinia' jilis ti janilayiti

¹² I'lijwas ti yimijna', 'otale t'onitie k'iye siunie asjlak'ali ti janilayitieyi, 'yina ti janakaye ti inkajejlasaye ti jawo'ate ni jwat ti wuj ti a'tiejak'i ka netie'ase, 'yina jlam kiak jawoyi.

¹³ 'Wenajli wek ti ja anikanitiejyi'n, lapakawo ti yiye'ase pit naka inkajejlasaye ti inilayitt'iyijpe pi Sijwajieti ti kia'iyo, ja 'nakayeyi ti jampo'ase ni asnikanitieyi, ka 'nakajta ni siunie iyo ni jijweye.

¹⁴ Siuti kia'iyo po' napo inlakiye ti jikiniets'i pi Sijwajieti, Sinia' nak ijiate ti imp'elisina', 'yina nak 'yakajanitie pet ti je taj'l astepe'e siojona jikimet ti 'es ti jiwunitieye po'.

¹⁵ Siuti po' ni kia'iyo ti inilayiti pi jijliak'ali, je 'es ka nakaye ka int'emina, ti jankalanki ni i'nio', ni'ne ka inkajla'n pa', ni'ne ka nakaye siuti ini'noti siupa iyo papo pi jiwet'ia.

¹⁶ Jlam ti janakaye ti jleki ni Sijwajieti iyo ti jant'emi'na, ke ijnajwel, 'wenajliyi ti jawunit pi Sinia' a'm ti jlekk'i pi Sijwajieti iyo.

¹⁷ Lapakawo ti yiyi siojona jloma ti ja kas'yena, sam kasjnajnata ti Sinia' jilists'e'm ti kas'yena. 'Yina siuti kia'iyo, ¿tepat'e jawo pit siupapo ti ijiate ti je its'iuye ni siunie Inamtik?

¹⁸ Siuti iyo'ate niwa Inamtis t'ipi: “Ijwil kawo siunie i'nio' ti 'esieta, ti t'o'ni ka injwa', ¿tepat'e jawo pit siunie je 'es, siu'neje ni inke' jilianik?”

¹⁹ Ijiatjliyi, siunapo ti jlampa Sinia' ti tajle naka ti inilayiti siunie iyo ni jijliak'ali, 'esiji ka je ink'ijliayis'ni. Janekjliyisi ka woyi ni siunie 'es, jlam ininekialjliyispe jikiojia'm pi Sinia', ka wujwa ka'yena ti jlam ti jilisajna', ti jlam ti je paj ka netiajni siunie iyo ka woyi.