1 Pedro 3 - Sinia' Jlamtis 1994

Siunie jota wo napo jijwa'yis po'

^1-2 Siupet ti asa'am ti asejnia'ase'm, ti asjwa'yis po', 'esiji ka k'iuyeyi napo asjwa'yis, lapakawo ti jleye kiajwe napo asjwa'yis. Ja 'nakayeyijna'a siunapo je iyoyi kiwa Sinia' jlamtis jaleyeyijna'a ti 'yakakiu pa Sinia', 'wanjliyi ka je amtiye'yi napo asjwa'yis. Jansets'ia kajeyepa ti jan'wena ti jiwoyeyi ni 'es, jla'yi ti jik'iuyeyi.

³ Ká ajwela ka insisieyi siunie jiwoyeyi ti jinilesana' siunie ti 'yaka ape'e siuniwa jit'itayijamk'i niwa asete'l, siuniwa asyiki ti wikinie maja ti 'najli siu'neje niwa as'wuye ti isis.

⁴ Jla'm ijiate jla'am siunie je 'yaka ape'e ti yiji ni asosik jawo 'ate iyo ti jinilesana'. Kiak wonayi pit siunie ti ja ke inetia'n, janaka siojona ti ja ke jwesieja', jla'yi ti jankama. Nak jla'm ijiate ti 'es laja po', Sinia' ijiunit japaka ti iyoyi.

⁵ Kiak iniwonisi siupapo asejnia inia'an, siupapo isis, jlomas pet ti jinijijwiye poyi pi Sinia', ti its'iuye papo jijwa'yis.

⁶ 'Yina siojopa Sarajimpe kiak iniwone, ti iyoyi siupa jik'iemjla iyo ka woyi, it'imint'iyijpe ti kiak iyone'ni pi jik'iemjla Abraham, “Ika'niona”. 'Yina japak aset japa Sara, siuti jiwoyeyi ni 'es, je k'iejliyi paka je injweyets'i.

⁷ Jlampet ti asa'am ti ayijniests'ase'm, 'najanitie ilia'm siunapo asjwa'yis, jla'yi kawoye lajaye, 'yina ti jla'am ti je t'o'n. Siu'neje jana ji'wajietayis ti Sinia' ijwijla'm je t'an pijia'm, kasjnojlits'i siunie iyo pit jana tijwela'ase'm janaka as'wasankiye. Sek jane'yi ka lajak'ina'a pet paka inalk'a k'iye siuniwa asts'ajlayejes.

Siunapo ti ijiate ti inilayiti ape'e siunie 'es

⁸ Jlaja, 'napo i'lijwas, 'esiji ka ijnojli wita'm siunie ja woyeyi, siunie askiowe kia'iyojliyi, 'yina ti injwanjliyek'i. Ninemina, akiowe nit'onitieyik'i wita'm, 'yina ká anitonitiejyi'n.

⁹ Siuti po' ni je 'es ni iyo'nase napo as'lejwas, 'esiji ka je atayitieyi. 'Yina ja 'wenajliyi pet ti ja ekiajlayi ilia'm ni 'es, siunie akap'ijliuskiyeyi ti ja ena'yi, 'yina naka ti Sinia' tana'ase. Siuti kiak janiwonayi, je jwel ka kiak je iwo'nase pit ni Sinia' ka imp'elisinajyi'n.

¹⁰ Siuniwa inamtis t'ipi iyo'ate: “Siunie i'nio' ja 'namaja jana ji'wasankiye jla'yi ti iyojonk'iye ka'we'en ni jinikanitieyi, 'esiji kan'yena ni jikiwet, ja lajak'i puwa siuniwa je isis jika sintijieyis ti jantajlat jikiwetk'i.

¹¹ 'Esiji kanleyi ni siunie je 'es, sek jane'yi jawoyeyinie'e jla'am ni 'es. Jawojyi'n ni jikamankiye, sek jane'yi janekk'i naka.

¹² Saka'niona je isiwaliyi'i pet siunapo isis ti i'yena, jik'iote itiyi ti iyoyis t'ajlayeja', 'yina teje pet ilia'm siunapo iyo ni je 'es.”

¹³ Siuti askio' ja ena'yi ni siunie 'es ka woyeyi, ¿tent'ipa jankajli ka k'iejliyeyi paka iwo'naja ka je 'esie?

¹⁴ 'Wanjliyi ka kiak awoyeyi ti jane'ase ni asjlak'ali 'yina ti jiwoyeyi ni 'es, ijiate Sinia' janoye'ase'm jamp'elisina'. Ke ijnots'inayi paka k'iejliyeyi. Ká awoye asjlak'aliye,

¹⁵ ja'wenajliyi ti ja ekiajlayi niwa asosikis pi Sijwajieti, jonitie ti jla'am. Niwakajlanitie ta'a ilia'm siunapo jan'yasajyi'n ki iyo ti po' ni asnejejwijiye.

¹⁶ 'Yina ja ke anitonitiejyi'n, lesanayiji ti jakiujlieyi. Nilesanayiji, 'nakayeyi ti ja lajak'i paka astesa' ilia'm pa Sinia', siu'neje napo i'nio'. Jak je iyoyiji ja jwejlanatak'i wita'm siunapo i'nio' inlakiye ti injwela ti je 'es siunie jiwoyeyi ti jiniuyeyeje pa Sijwajieti.

¹⁷ Siuti ti tal Siniayi naka ka kiak awoyeyi, ejlo'o wekie'e ka anilayitieyi, jlam'ne je niliak siunie jiwoyeyi. Je nak kant'emi'nase, ni siunie je 'es ti kiak jiwoyeyi.

¹⁸ 'Yina Sijwajieti jla'am ti inilayiti ape'e niwa jikeyis napo i'nio' ijwienjliyik'i wek pakatajaje. Jla'am ijiate jla'am ti 'es, 'yina je iyojliyi ti iniwe'n ape'e napoka i'nio' ti je isis ti iyoyi ni jike', kajeyepa ti iyojonk'iye ka intonayi ni Sinia'. 'Yina ti i'nio', ti tilianaja, 'ya'al; jlampet ti Sinia' i'wiesankit pet pi jisiak'al, 'yina ti yiji pi jisiak'al.

¹⁹ 'Yina siuti kia'iyo jisiak'al, ijioyi puwa insak'alis ti inkipijnas, ti iyo jlamtikie'.

²⁰ Papoka siupapo i'nio' t'ipi, yiji pet siupuwa jlomas yiji pa Noé, ti je its'iuye pa Sinia'. Wuj ti inilayiti paj ti wakajla t'ipi siojopa kasejkana ti wuj, ti Noé ilisane. Ijwienjli ni sikio' itij'we najape tom'niji pa nojt'ijiampe jiwek, papok i'nio' ti tijwajyi'n ka lajak'i pa i'niat.

²¹ Paka i'niat t'ipi, pak ti'yenajap pet ni i'nio' ti tiniejiena, naka'ne ti it'imina ti jijwaye 'nakayi. Siunie ti tiniejienapa je ka inlej niwa 'najwes, 'najata ti t'ajlajaje pi Sinia' siunie ijnosik ti ink'ie' ti 'najleje'n. Siu'neje ti kasjwajiet pa Sinia' ti kasts'isisi pi Saka'niona Jesús ti iniu kisie'e ti tajli pi a'no',

²² ti ijio poliyi, ti yiji'n 'nijiye jlepi pa Sinia' ti tome jijweyeje. Ti injlojwajnas poli jlele jika anechiyas, siu'neje puwa injweyejes ti yiji ni poli, siu'neje puwa inwunitieyejes wikie'eyi ti yi' kiajwe.