1 Jn 4 - Sinia' Jlamtis 1994

Sinia' jikimet, siu'neje japa jikimet pet pa Sijwajieti jitiejiejwa

¹ I'lijwas ti yimijna', ká a'wenayeyijap'ni ka k'iuyeyi siunapo i'nio' ijwi'il ka nejyi siojona Sinia' jikimet. Janajnata ti ja'yena siuti ja ijiatayi ti jantajle pa Sinia' siojopa jikimet yiji. Je pini' napo injwejlanawos ti je ijiate ape'e 'ni ajnat ti t'iskiunk'iji'n, it'imina ni awo'nase.

² Je int'ayiji'n siunie yiyi janak Sinia' jikimet, naka ni i'nio' ti je 'yakakiu pi Sijwajieti Jesús, ti iyo'ate: “Jesús jlam ti Injwajietiwo ti tajle pi Sinia', ti iniwojwa'n i'nioye, ti 'nest'ipi ajnat'e”.

³ I'nio' ni kia'iyo, ti takakiuni pi Jesús ti jla'am ti Sinia' ijliu', siojona jikimet ti tajle ni Sinia' je yiyi. Siojona yiyi tajle jla'am pi jitiejiejwa pi Sijwajieti. Pajk'i ti 'najanayi pi jiwonayi naka sitiejiejwa ti ja'nes 'ne ajnat'e, ijiatjliyi yi'ne ajnat'e.

⁴ Ilis, asa'am ti Sinia' jilists'ase'm. Je inkajla wekie'e ka intojmatayi'ni isia'm napoka i'nio' ti je ijiate pa kanjwelis. Tepa janwo ka kiak je iwo ti je jlase' ni jijweye siunie yi'asap, 'yaka'm ape'e siunapo yi' ajnat'e.

⁵ Ijiate ti jlamis ti taj'le ni ajnat, it'imina napo yi'i pet ni ajnat ti inka'a pet ti its'iuyisie.

⁶ Jlam pet ti sa'am ti atajlaja pi Sinia'. Siunapo itiant'ieje pi Sinia' its'iuts'e'm, jlampet siunapo je itiant'ieje pi Sinia' je its'iuts'e'm. It'imina ti je astajanitie siunie i'nio' yiyi janak siojona Sinia' jikimet, kia'iyojliyi siojona tajle pet siunie ti je ijiate, ti 'yakajmank'iji'n napo i'nio'.

Sinia' jla'am ti inemijnaye

⁷ I'lijwas ti yimijna', 'esiji ka aninemina'. Tepa janwo ka kiak je iwo ti Sinia' jla'am ti tajle ni inemijnaye. I'nio' ni jlemijnaye po'o, nak Sinia' jlas jla'yi ti itiant'ieje pi Sinia'.

⁸ Jlampet siunie i'nio' je 'nama, je itiant'ieje pi Sinia', ti jla'am ti inemijnaye.

⁹ Sinia' 'yakajanit ni jlemijnaye ti yints'e'm, pakat'iyijpe ti ijliu' pi jlas 'ne ajnat'e ti iyo ka si'wasankiye poye.

¹⁰ Nak jitis ni siunie inemijnaye: 'yina je sam'ne ka inianaja pi Sinia' ka yimina, jla'am ti iniane ti kassemijne'n. It'imina'ne ti ijliu' pi jlas ka iniwen sitipe'e ti 'ya'al, 'nakayi ti Sinia' janetiajnat niwa sakeyis, sekyi'i jiwak nojwi'ni.

¹¹ I'lijwas, siuti kia'iyo pi Sinia' ti wuj ti kassemijne'n, 'yina kiak janiwonaja'ni pet ti janinemina.

¹² Sinia' je ti'wenajata ka paja. Lapajawo siuti janinemina, Sinia' yi siwa'm, 'yakaj siunie jlemijnaye ti yi siwa'm.

¹³ Ka lajak'i siojona 'yakajanit ti yi siwa'm, janaka jikimet ti iwints'e'm.

¹⁴ Sampe ti a'wena ti Sinia' ijliuye ni jlas ti iyoyeyi ka injwajiete'n napo i'nio'. 'Naka'ne ti awoki samtikie'ase.

¹⁵ I'nio' ni iyo'ate, ti je 'yakakiu, “Jesús jla'am ti Sinia' jlas”, nak i'nio' yiji pi Sinia'. Sinia' kia'iyoyeyi pit yiyeje pi i'nio'.

¹⁶ Sektaj'le'ne ti kasts'ajanayi, jla'yi ti je akakiuniejayi ti Sinia' wuj ti kassemi'n. Sinia' jla'am ti inemijnaye. I'nio' ni jlemijnaye po'o, nak yiji ni Sinia', Sinia' kia'iyojliyi yiji pet nak i'nio'.

¹⁷ Ti wakal siwa'm ni semijnaye, jant'eminajna'a ka je inikiwita siojona jloma ka Sinia' in'yentajna'a napo i'nio' jitieyi'i. Lapakawo ti Sinia' jikawosts'e'm awokie 'ate pi Sijwajieti Jesús ti awak'i 'ni ajnat.

¹⁸ Siuti inemijnaye po'o, laj ijnots'inaye. Siuti wakal ni jlemijnaye ti yiji ni i'nio', je 'yakaj'l ilia'm pet siunie jlots'ini ni i'nio'. Siunie i'nio' je ijwijyi, lapakawo ti 'yijene ta'a siunie ja tiwonaja ti ja tisiejek'i ja tiwonaja. I'nio' ni je ijwi'ni, kajeyepa je wakal siunie jlemijnaye ka nejyi.

¹⁹ Inia'an pi Sinia' ti kassemi'n, it'imina pet ti aninemina.

²⁰ I'nio' ni iyo'ate, “Emi'n pi Sinia'”, jlam'ne ki iyo ti ne'waja'm ni jikiecha, wuj ti iyo sintiye. Siuti je yimi'n ni jikiecha ti i'winata, ¿tepa jawo kanjwe'el ka nemi'n pi Sinia' ti je ti'wena?

²¹ Sinia' iwints'e'm ni ji'lij ti iyo'ate, “I'nio' ni yimi'n ni Sinia', kiak janwo'ojyi pet, 'esiji ka nemi'n ni jikiecha”.