1 Jn 3 - Sinia' Jlamtis 1994

Sinia' jilis

¹ 'Yena ki iyo ni jlemijnaye ni Sinia' ti je jlase' ti yints'e'm; yamitits'eme ti iyo jilisats'e'm. Ijiatjliyi sa'am ti Sinia' jilists'e'm. Tempi it'imina siunapo tajle pet ni ajnat ti je itiant'iets'e, kajeyepa ti je itiant'iejesi pi Sinia'.

² I'lijwas ti yimijna', 'nakayi ijiate Sinia' jilists'e'm, ejlo'o jiwekie'e ti je kastant'iejliyi'iji siupi jats'oniyeja' ka pajata. Lapakawo ti kasts'ajane siuti jankaj pi Sijwajieti Jesús, jayok'iate ti jla'am, ja'wina siupi ja k'iejliyeyi.

³ I'nio' ni je iliyi ti its'iujwink'iye siupi iyo pi Sijwajieti Jesús inilesanayiji pet k'iye niwa wask'i'nelaja'n je isis, iyoye'ate ti jla'am pi Sijwajieti Jesús ti 'es.

⁴ I'nio' ni iyo ni jike' iliaki niwa Sinia' jlamtis, kajeyepa siuti kia'iyo ti alakik 'yaka ti awoki siunie ti wuj ti je 'es.

⁵ Asa'am pajk'i ti 'najanayi pi jiwonayi ti Sijwajieti Jesús 'nes 'ne ajnat'e ti tajlane siuniwa inkeyis, jla'yi jla'am laj jikeye'.

⁶ I'nio' ni yijap, je iyo ni jike'. Jlampet siunie iyo ni jike', nak je i'wi'in jla'yi ti je itiant'ieje.

⁷ Japo ilis, ja ke inejna'a ts'e papo ka inkajmanats'iji'n. Siunie i'nio' ni iyo ni tijnajyi, je int'ayiji'n pet ti tijnajyi ni i'nio', iyo'ate iyo pi Sijwajieti Jesús ti tijnajyi.

⁸ Jlampet ni i'nio' ni iyo ni jike', kia'iyojliyi je int'ayiji'n ti naka tajle pet ni imosik. 'Najanayi, siunie imosik tajlap'e ta'a ti 'nelanjie'e ti iyo ni jike'. Naka ti it'imina ti 'nes ajnat'e siunie Sinia' jlas, ti initiajnate'n siunie jikijmaye iyo ni imosik.

⁹ Siunapo ti Sinia' jilis je iyoyi ni jike'. Tepa janwo ka kiak je iwo ti jla'am ti tajle pi Sinia', it'imina ti je 'yu'we kanwoyi nak je 'es, ti Sinia' jilis.

¹⁰ Je istie' pet siunapo Sinia' jilis, kia'iyojliyi siunapo jilis pet ni imosik. Siuti po'o ni i'nio' je iyo nak 'es, ni'ne ka nakaye siunie je 'namaja ni jikiecha, je tajle pi Sinia'.

Janinemina

¹¹ Siunie inka'niye ti jiniajnata ti jik'iuyeyi 'naka siuti iyo'ate pi Sijwajieti: “Ninemina'”.

¹² 'Esiji ka je iyok'iate pi Caín ti ilia'an pi ji'yini, 'yina ti jla'am ti tajle pi imosik. ¿Tempi itiajlata? Lajk'ipa ka intajlata ti i'wi'in siupi iniwone pi ji'yini, i'yejne'n ti wuj ti 'es siupi iyo. Jlampet ti jla'am wuj ti je 'es siupi jikijmaye iyo.

¹³ I'lijwas, ajwel'ni je inesi'lieta siunie iyo'nase napo taj'le pet ni ajnat ti ne'wa'ase'm.

¹⁴ Sa'am pajk'i ti ajwayeje jana ts'ajlati, sekyi'i ti awakieja'ajme jana si'wasankiye. Semijnaye ena'a napo si'lijwas it'imina ti kasts'ajane pi awonaja. I'nio' ni je 'nama 'yaka ti je t'ekijyi ki iyo ti yiji jana 'najlati.

¹⁵ Siunie i'nio' ne'waja'm ni jikiecha, nak i'nio' kalankijieta. Siojona in'wasankiye ti t'o'n je yiji.

¹⁶ Siunie inemijnaye kastant'ieje, siuti Sijwajieti Jesús iniwe'n sitipe'e nak 'yakajanit. 'Yina kiak janiwonaja'ni pet, ka iniwena ape'e napo si'lijwas.

¹⁷ Siuti po'o ni i'nio' jwajla i'wi'in, 'yina i'winata ni jikiecha ti p'ijliusie pet, ka pakayeyi ka inwejna'm pet siupi isitia'n. ¿Tepa janwo kanjwe'el ka Sinia' jlemijnaye nejyi ni jlosik?

¹⁸ Ilis, 'esiji ka je si'lijak'i wekie'e siunie semijnaye. 'Esiji ka 'yakajanitie siupi jalisanaja.

Ja ke inikiwita jitieyi'i pi Sinia'

¹⁹ Nak jant'emina ti ja kasts'ajane pi jayonaja ti atajlaje nak ijiatk'i, siuti jayoki, ja ke inikiwitajana'a jitieyi'i pi Sinia'.

²⁰ 'Wanjliyi ka kia'iwo pi sitienkiujnieyeja' ti jajwila ka je kasts'isis jitieyi'i pi Sinia'. Sinia' ti je istiejenit paka k'iejliyeyi, 'yijene pi iyone, jijweye 'yaka'm ape'e niwaka.

²¹ I'lijwas ti yimijna'ase'm, siuti ja ijiatayi ka lajak'ipa ka sitiej wujwak'i ka iyoki, ka je 'esie', 'yina ja lajak'i pet pa ka itijnisiejejyi'n jitieyi'i pi Sinia'.

²² Siupi jasitiana janwents'e'm siuti ja'yejlaja, lapawo ti awoki siunie ji'lij jla'yi ti awoki siunie itiliaja ka iyoki.

²³ Siunie ji'lij ti iwints'e'm naka ti iyotajank'iye ka je 'yakakiuk pi jlas Sijwajieti Jesús, siu'neje ti iyotajank'iye ka inikimaja siunie inemijnaye, iyo ti ijliutiejets'e'm.

²⁴ Siunapo its'iuye ki iyo, yiyisiap pi Sinia', Sinia' kia'iyojliyi yijap pet. Ka lajak'i jla'am janak jikimet ti jla'am ti iwints'e'm, janak 'yakajanit.