1 Jn 1 - Sinia' Jlamtis 1994

Inamtik ti in'wasankiye

¹ I'lijwas, ajlok'iase siu'niwa yamtis, ti awoktajank'iye ka 'najanayi siunie ti iyo'ate Inamtik ti in'wasankiye. Siunie Inamtik jlam po'o ta'a ti 'nelanjie'e je wakaljli'ijyi niwa wask'i'nelaja yi' ape'e 'ni ajnat. Naka ni pajk'i ti ape'yak, sitiete i'wi'in, a'yena'nijpe jla'yi ti akiesa'ape.

² Siojona in'wasankiye inikajanit. A'wena, sekyi'i awoki samtikie'. 'Nakayi yi'ase pet ti ajwela'yase'm janak in'wasankiye ti t'o'n, ti jlam pajk'i ta'a ti yijap pi Sinia', 'nakayi ini'wenki'nase'm.

³ Ekiajlayi'iji ti awo'ate awoki samtikie'ase naka siunie a'wenape jla'yi ti ape'yak, 'nakayijna'a ti ja kasjwanjliyik'i siunie awoki, jawoyena'a 'ate awoki pet ni Sinia' jla'yi pi jlas Sijwajieti Jesús ti kasjwanjliyik'i.

⁴ Ajlok'iase niwaka, ti awoktajank'iye pet siunie sinikanitiejeye ka impots'e.

Sinia' jla'am ti 'esi'

⁵ 'Naka'ne siunie inka'niye ti Sijwajieti Jesús kasts'eyasane ti ajwela'yasem pet: ti Sinia' jla'am ti 'esi', siunie ajnatiok je yiji.

⁶ Siuti ajwela ka kasjwanjliyik'i, jlam'ne mawat je atajlaje siunie ajnatiok, awok sintijyisa', ki iyo niwa samtis yame'e ni sikijmaye ti je 'es.

⁷ Jlam'ne pet ti jawieki ni jla'al jana 'esi', iyo'ate ni Sinia' ti yiji janak 'esi', kasjwanjliyik'i. Siunie jlas Sijwajieti Jesús kaslejayi ni ji'woyis ki iyo niwa sakeyis.

⁸ Siuti ajwela ka laja sakeye', sam sa'am ti anilakik, siunie ijiatk'i je yi siwa'm.

⁹ Lapajawo siuti ja ijiatayiji ka inijwelaja siuniwa sakeyis, sitiej jayomaja ti jla'am ti jajnajyi siunie janwo, sek jane'yi kanetiajnatana'a na sitis, ka ijnalats'ijna'a wikie'eyi siuniwa je isis.

¹⁰ Siuti jajwila ka lajk'ipa ka sakeye' ka iyoki, awokieyi sintiye' pi Sinia', siuniwa jlamtis ajotieja ts'ijiye.