1 Corintios 9 - Sinia' Jlamtis 1994

Pablo 'yutie'e jla'am ka tiwenaja'm paka k'iejliyeyi ka 'esieyi ka jwesiejayijink'iye

¹ Ajwel'ni lajk'ipa ka sakakiuyi siu'nie a'yi ti ya'am injlojwanikk'i'm, siu'neje ti ya'am ti a'wenpe ja Saka'niona Jesús ti ini'wenkink'i'm. Siunie a'yakane ti anoyeje ni Sinia' iyo ni jikijmaye, lajk'ipa jikiechaye ti asa'am ti jiwoye Sinia' jilisa'. 'Yina lajk'i'ne paka intomi'ni ijyik'i siu'nie awoyi ti jijliujwanikk'i'm.

² Ent'a po' papo iyo'ate, “Pablo je injlojwanik”. 'Yina nak je sakakiuyeyi, kajeyepa ti yampe ti ato'niase ni 'es, it'iminape ti jiwoye asosikis ink'iejyisa'. 'Yina nak ijiate ti 'yakajanit itipe'e ti jlam je aniwone wek siu'nie awoyi, ti injlojwanikk'i'm.

³ Siunie jayo ti jasiujlie pet siunapo ti sakakiuyisi siu'nie awoyi:

⁴ 'Yejne'n, je aka'ajwejlasa'n ka tiwenak'i'm pa ka k'iejliyeyi pa ka itiujw, jla'yi ka k'iejliyeyi pa ka i'yaje,

⁵ jla'yi ti 'esiji ka poye japaka its'iemjlaye ka iwoyi kiwa Sinia' jlamtis ka ya'yikiye'ni ti askiunietaja'n, iyo napo ijia injlojwajnas, iyo ja Pedro, iyo japo Saka'niona jik'ijnis.

⁶ 'Yina, ¿ijiatt'iyi ti samkata, ti ya'yi ni Bernabé, ka je 'esieyiji ka poye japa ka inwents'e'm napo i'nio' pa ka k'iejliyeyi ka kasts'isisi pet?

⁷ ¿Ent'a ji'wena' pa ti iyoyeta tokisie', ti jla'am ti takat'i'n ape'e siupa jlak ti iyo tokisie'? ¿Tepi iyo ni i'nio' ti jla'am ti yikiaj'l isia'm jana ts'ejniet'io, ma pot'i pa tomik'i'ni ti iyo ka intojw puwa jla' ti wakajlata? ¿Tepi iyo ni i'nio' ti i'yena niwa sontas, ma jet'i i'yaja ni jikat'ios ti i'nijwojnits'i?

⁸ Ká ajwelanie'e ka yama ka intalk'i, jla'yi ka yama ka itienkiujnieyeja' jiwek, 'yina siupi Moisés jika'neyasajnaye yiyiji 'neje naka.

⁹ Po' siunie jiwa niwa Sinia' jlamtis ti iyo'ate, “Ká awo jikiwet t'akaye siunie alajwa wakia ti inkijmayewo ti jikijmajne'n, ti t'ask'i'ni ni ipiata tiok ti t'ejes ilie'ne.” 'Yina Sinia' je ka injlak'ajlap'ni ni wakia siuti kia'iyo,

¹⁰ 'wenajliyi ti iyo sa'am ka kasts'isisi, jla'yi ti it'imina ti po' kiwak Sinia' jlamtis. Siunie i'nio' ti iwiets'ilat pijia'm 'ni ajnat, siu'neje ni t'ejes ilie'ne ni ipiata tiok, 'yijene pi iyone ti japoye siojona jansaka'n ts'iji siojona jantajlaja'm ni jikijmaye iyo.

¹¹ 'Yina kia'iyoyi siuti po' jana inseliaki ti akawijnanajats'i niwa asosikis ti insisieyi, ¿ma aka'ajwejlasanat'e ka 'yejlaja'ase'm pet siojopa ka ts'esi?

¹² 'Yina siuti po' siunapo ti iyo ka anoyeyeje, je jlenajia'm. ¿Tepi iyo pet ti sa'am? ¿Ma aka'ajwejlasanat'e? Mejla'ala ka nakaye ka iyokijyi'n, 'yina wuj ti anilayitieje niwaka, ka lajak'i ki iyo ni yits'e, ti je 'es ka i'winki'nase'm naka, ka najataja ka intajli'yi ni i'nio' ni asetiana, siu'neje ti awoktajank'iye ka inkamajas ka ink'iuyisi niwa Sinia' jlamtis ti ijwi'il pi iyo pa Sijwajieti Jesús.

¹³ 'Najanayi pi jiwonayi siunapo i'nio' ti isijme'n kiajwe jana 'najla'wet ti yi' Jerusalenne, 'esi pet siuniwa yi' kiajwe. Ajwel siunapo i'yena jana altar, tenaja'a'ni ni k'iejliyi ti tiwunie k'iye pa Sinia' pak 'esi papo sek isi'meje'n, ti itiujw pet pa t'isie'n pa k'iejliyi ti tisiniana.

¹⁴ 'Yina kia'iyoyiyi siunapo ti iyo jlamtikieyi napo i'nio' niwa Sinia' jlamtis, siupi Saka'niona iyo'ate, “'Esiji ka intajlaja'm pet ni i'nio' jikijmaye pi k'iejliyi pi isitia'n.”

¹⁵ Ijiate ti 'yuyetak'ime ka kiak iniwone, ka iyo ka isime naka. Siuti ayiji naka, je ajwel ka ijialaskinayi ka poye pa ka k'iejliyeyi ka wenak'i'm. Je nak ka int'emina ti kia'awo, jeyi kat'aja. ¡Ijiate ti je awo ka poye pa ka ijnalk'i, ti je sakajla pet ti je ajlak'alinitie, 'yina ti si'wasanjlikiu'!

¹⁶ Siuti ya'am je aniwuniti ti awo yamtikieyi napo i'nio' ti ajwejla'm niwa inamtis ti isis, kajeyepa ti naka ti isijmaye ti je 'es ka je iyoyi. ¡Ijiate ti iwit'ia janejyi siuti ja ke iyoyi yamtikie'!

¹⁷ Siut'itie ka yama ka intalk'i siu'nie awoyi ti akijme'n, jlam potie'ne japa ka ikajliji. 'Yina ti jla'am pa Sinia' ti soniti ka iyoyi siunie jikijmaye, jla'yi ti sijliunkine,

¹⁸ 'yina, ¿tent'i siojopa 'yakaja? Naka ni inkanitiejeye, ti je awo 'yakajaye ti akiji napo i'nio' niwa inamtis ti isis. Ka iyot'e 'ate, ti 'yiniye ka 'yakawoye, siunie iyo ni i'nio' kiak jikijmaye iyo ti po' siojona 'esi ti tejeye ni jikijmaye, 'wanjliyi ka kiak iwo ka je tijwelak'i'm japa ka yak lajaye pet, ti akietaja niwa Sinia' jlamtis ti isis.

¹⁹ 'Yina siuti ya'am je inkipinikk'i'm, yo'otieje ti jla'm aniwone ti aniwone jikipinikie' wikie'eyi napo i'nio', kajeyepa ti awo ka 'lojwa papo ka 'yakajlits'i ka iwo jlosik ink'ieye ka intankiunisi pi Sijwajieti.

²⁰ Siuti ajyi napo Judíojos, 'yina aniwojwa'aja pet Judíoja', ti awo ka 'yakajlits'i. Siu'neje ti jayo'ate, 'wanjliyi ijiate ti ayetajapi naka iyopi ni inka'neyasajnaye, 'yina ti pajk'i ti aleyi, lapakawo ti ajalas ka 'yaka'n siunapo yi' kiajwe naka inka'neyasajnaye, it'imina ti kiak aniwone ti ajwel ka iyi' kiajwe pet.

²¹ Jlampet ti awo ka i'yaka'n napoka siunapo je Judíojos, siunapo je yiji naka Moisés jika'neyasajnaye, kia'iyojliyi kiak aniwonayi'iji iyo jlamis. Siuti ajyi napoka, je'ne ka itiajli pet siunie Sinia' jika'neyasajnaye, kajeyepa ti ya'am ti Sijwajieti jikipinikk'i'm pet.

²² Kia'iyojliyi ti ajyi siunapo ti k'iejli t'oni ti iyoyi kiwa Sinia' jlamtis, 'yina kia'awoye'ijyi pet ti ajwel ka je sit'iuni kiwa Sinia' jlamtis ti awoyi, kajeyepa ti awo ka 'yakajli ka iwoyi kiwa Sinia' jlamtis. It'imina ti awo'ate, 'wanjliyi ka i'nio 'wenayeyi papo ka initewitanik'i, lapakawo ti ajalasta ka i'yaka'n ka ijwiejiet jiwek paka ine'yi napo i'nio', je awet'iantaja ka nak inojwaja'm jiwek papo ka isiaka'n.

²³ 'Yina lajk'ipa ka int'emina siunie aniwone, kajeyepa ti niwaka jla'am niwa Sinia' jlamtis ti isis ti awojonk'iye pet ka ts'esi, siuniwa isis Sinia' tajle ni jikap'ijliuskiye iyo.

²⁴ 'Najanayi pi jiwonayi siunapo i'nio' inito'om, ijiate ti wikie'eyi ti t'osi'ni, 'yina je wikie'eyi ka tiwenaja'm siojona jankajli ni siunie ja ke titieyeje. Ijwienjli jla'am siunie ti pansa, ti 'yakaj ti 'yaka'm ape'e napo ijia, nak ja tiwenaja'm jana siojona tena ajnat'e k'iye. Jak je iyoyiji ti kiak awo'nase, kiak niwonayiji, woye ayijniesa' ti ja 'osiye'ni, ja 'nakayeyijna'a ti ja akajlajyi siojona tena ajnat'e ask'ioye.

²⁵ Iyo'ate siuniwa ijia inlakijie, siunapo janlaki jlomas ti initejlitis'ni ti iniwakajlanitis ta'a, sekyi'i wuj ti i'yena ni t'ajwes, je isime paka k'iejliyeyi. Tepa jawo ka je kiak iwo ti iyo pet ka je titieyeje, ti iyo ka i'yaka'n siunie a'lak'as ti tijweniejek'i ti tena jletik'i ni i'nio' ti t'an pijia'm, jlam'ne je t'on wata'a. Sa'am jeyetaja siu'nie awoki, ti jlajma ja ke inilana'a jiwek, kajeyepa ti awokink'iye ka 'yakajlaja siojona tena ajnat'e sik'ioye ti ja ke paja jla'am ka inetia'n.

²⁶ Jlampet ti ya'am, siuti 'osi, jlam je 'osi'ni jiwek, 'yina ts'ajane siunie jajiojwi. Kia'iyojliyi ti anila'an, jlam je pak at'owask'i'ni jiwek.

²⁷ 'Yina asa'a 'ni 'isie'n, jla'yi ti ajalas ka iwoyi siu'nie awoyi, kajeyepa ja 'esieyi napo i'nio' siuniwa Sinia' jlamtis ti ajwejla'm. Wuj ti je 'es ka sinitia'n, kajeyepa ti ya'am ti 'eyasajne'n.