1 Corintios 8 - Sinia' Jlamtis 1994

Siuniwa inkas ti tilisana ti titiejietajape pet siuniwa tiwoki diosisa'

¹ Jayiyi'ni ti jajwi'il siuniwa tilianajan'ni ti titiejietajape ti tiwunitieje siuniwa tiwoki diosisa'. Ijiatk'i siunie as'lej ti jiwoye'ate, “Kaswikie'eyi ti kasts'ajan jwajla'aja.” 'Yina siuti ajwela ka kasts'aja'n jwajla'aja, yiyits'iji ti ts'ot apajakieyi ti anitonitieje; jlam'ne pet ti semijnaye po', naka pet ti iniuyeje ni sosik it'iminayi ti 'es.

² Siuti po' ni ijwil ka 'naja'an, 'yina ya'am awo'ate, mawat je ijiate ka ijiatayiji ka 'najane.

³ Siu'neje na ti 'namaja ni Sinia', Sinia' itiant'ieje pet.

⁴ Jlampet niwaka inkas ti titiejietajape niwaka diosis ti tiwunitieje, nak je kast'ayiji'n pet ti ijiate ti jiniliaja ape'e 'ni ajnat, kajeyepa ti ijwienjli jla'am pa Sinia' ti po'.

⁵ 'Wanjliyi ijiatataja wek ti po' siuniwa napo i'nio' ti iyoyi jika diosisa' 'niji poliyi, siu'neje ti yi'i 'ni ajnat awak'i, siu'neje niwak ti iyo jikimita' ti isie'e,

⁶ 'yina ijwienjli jla'am ni Ina'a ti Sinia', jla'yi ti jitis wikie'eyi niwa wask'i'nelaja, jlampet ti sa'am jikawosts'e'm jiwek pet. Jla'yi ti ijwienjli ni Saka'niona, naka ni Sijwajieti Jesús, 'yina nak jitis wikie'eyi niwa wask'i'nelaja, jla'yi ti sa'am kia'iyo naka ti sitis.

⁷ 'Yina je wikie'eyi napo ka 'najane paka iwone niwaka. Jlajmiliet ti po' siunapo si'lijwas ti 'yakayank'i kiaka, ti jitiej iyoma niwaka ti iyoyisipe jika diosisa'. Ijiate, yi'i jakia jloma ti iyoyi ki inamtik, 'yina je t'oni ka jiatayiji ka intankiuni pi Sinia', jak je iyoyiji ti itiuwisieta niwaka ajwel'ni ti titiejietajape, sekyi'i isipits'i'ni. Iyoyisie'eje 'ate, “Siukia atowa titiejietajape siuniwa tiwoki diosisa', 'yina ti itimisi napo i'nio' ti ijioyisi ti iyoyis t'ajlayeja'. Ent'a ja sakajyi'n.”

⁸ 'Yejne'n, je nak ka kasts'isisi, siuti alekk'i ti atowa niwaka, ni'ne ka nakaye siuti ajejlitajataja'm naka ti tejeye pi k'iejliyi ti intaj tiwomaja tiwoki diosa', ti a'yakanaja pi Sinia'.

⁹ 'Yina joskiyeyi, 'yena siunie jiwoyeyi. Je 'es ka asama ka at'eminayi napo as'lejwas ti k'iejli jijweye t'ontiek'i ti iyoyi ki Sinia' jlamtis, ti janwoyi ni jike'.

¹⁰ Siuti a'am ti jijwel ka 'najane paka awone niwaka, ti jloyetaja siunie ininene'e'ni napo ti iyoyis jiliakijnieyeja' ape'e niwaka diosis, sekyi'i akiecha ti k'iejli jijweye t'ontiejek'i ti iyoyi niwa Sinia' jlamtis, in'yen'ni, sekyi'i ti kiak iyonayi pit pi jitienkiujnieye, “'Esp'aniji, kiak jayo, jatiujw pet.”

¹¹ 'Yina siunie ti a'm ti jwajla'a ti 'najane pi jiwone ape'e niwaka, naka ti it'imina siunie akiecha ti k'iejli jijweye t'ontiejek'i ti iyoyi niwa Sinia' jlamtis ti je itiej jana ji'wasankiye, siunie ti Sijwajieti itime ti ininekiaj'l ape'e.

¹² It'imina ti kiak awoyi ti ajwela, ti ijiate ti jitieye'yi ilia'm ni Sijwajieti, kajeyepa ti je 'es siunie aske' ti jiwoyeyi, 'yina jikajyina' napoka as'lejwas ti k'iejli jijweye potie ti iyoyi niwa Sinia' jlamtis.

¹³ Jak je iyoyiji, siuti naka ti it'imina ni isiecha ti k'iejli jijweye potie ti iyoyi niwa Sinia' jlamtis, ti ya'am ti a'wenkina ti iyoyi pit ni jike', ajwel'ni 'esiji ka iliyi ti atojw ni wakia t'isie'n, ni'ne ka sonta t'isiena pa, ja 'nakayeyi ti ja ke yama ka it'imina ni isiecha ti iyoyi ni jike'.