1 Corintios 6 - Sinia' Jlamtis 1994

Napokata ijnosikis jiwos ti yiji napo Sinia' jilis ti 'esiji kan'ye'en ti potie pa jiwet'ia po'

¹ Siuti po' ni iyojonk'iye kan'ye'en pi k'iejliyi ti itiajlata ni jikiecha, ¿yot'iyi'ni ti je ijwile napo ijia Sinia' jilis kan'ye'en, 'yina ijioyeyi'ijyi siunapo ijia 'neje ti 'wenayi ti Sinia' je lis?

² ¿Jet'i 'najanayi paka wonayi ti Sinia' jilis janapokaye ti ja 'nakajanit siunapo i'nio' yi' ape'e 'ni ajnat? Jlam'ne ja asama ti ja'yena' naka, ¿yot'iyi'ni ti je 'yena', jlam'ne je 'esijiyi naka, jiwet'ia iyo?

³ ¿Jet'i 'najanayi paka wonayi ti kiak jawo siunapo injlojwajnas poli jlele, ti ja sama'aja ti ja'yena siunie jiwet'ia? ¡Jak je iyoyiji 'nakayi ti po' niwaka, je akamak'iji'n kajeyepa ti sa'am ti tijnats'e'm ka 'yena!

⁴ Siuti po' pa ti it'imina ti kiak jiwoyeyi ti jitieyets'i wita'm, ¿yot'iyi'ni ti jijwela' ka ataj awomayi napoka ti je Sinia' jilis ka noye'ase'm?

⁵ 'Yejne'n, ataj enayi 'ate siukia awoyi, 'yina ti awo ka ijnajwejlats'i siunie jiniwonayi. ¿Ijiatt'iyiji ti lajk'iyipa ka 'naja'an kan'ye'en k'iye napo ijia ti kia'iyo pi jiwet'ia, ka 'nakayeyi jansesk'i wita'm?

⁶ ¡Ijiate wat ti je 'es ti kia'iyo! Kajeyepa ti je najata wek ti po' pa iyoyi jitisa' pi jikiecha, jlam'ne pajk'i ta'a ti ijioyi napoka ti je Sinia' jilis kan'ye'en.

⁷ Siuti kiak jiwoyeyi ti jinilanajyin'ni, nak 'yakajanit ti wuj ti je 'es siunie jiwoyeyi ti yi' aska kiowe'e. Awo'ate, 'esiji ka wujwa ka anilayitieyi siunie iyo'nase napo as'lejwas ti takajla'n askiajwe.

⁸ ¡Je 'esiji ti asa'ameje ti asa'am ti jikajlana kiajwe napo as'lejwas, wuj ti je 'es ni jiwoyeyi!

⁹ ¿Jet'i 'najanayi paka wonayi ti siunapo i'nio' ti iyoyi ni je 'es, je 'yu'we kanejyi siunie Sinia' jika anechijiayas? Ká anik'emijietayi naka, jlam'ne siunapo iyoyi naka, ti 'yuyijk'i'ni napo ijiajwa'yis, siu'neje napo jitiej iyoma siuniwa iyo jika diosisa', siu'neje napo ti ijioyijin'ni japa ti je k'iemjla, siu'neje napo ti iyoyi ni siunie ti wuj ti je 'es ti ayijniesk'i wita'm,

¹⁰ siu'neje napo kajlajnatas, siu'neje napo i'nio' ijialas kan'we'en niwa wask'i'nelaja, siu'neje napo 'yatas, siu'neje napo ti ji'lij je i'yenk'i ti ipichin'ni napo ijia, siu'neje napo ti iliaki napo ijia, ti 'yakajmat ape'e siupi yijni pi k'iejliyi ti iwi'in - wikie'eyi napoka je 'yu'we kanejyi siunie Sinia' jika anechijiayas.

¹¹ Ti pajk'i, siuniwa ajwel'ni je awo'ate je woyeyipi, siuti asa'am po' siunapo yit'ijyipi. 'Yina 'nakayi insisie kajeyepa ti Sinia' pajk'i ti inlejajyi'n, jla'yi ti initiajnat ask'ioye ki astes iyo, ka lajak'i pet ni jle' iyo ni Saka'niona Jesús ti Sijwajieti, siu'neje japa Sinia' jikimet.

Sinia' jikimet ti 'es ji'wet ni ts'isie'n

¹² Po' ni i'nio' ti iyo'ate, “Lajk'ipa ka intomi'ni ijyik'i siu'nie awoyi, 'yina ti isimet ya'am.” Ijiatataja wekie'e, 'yina po' siuniwa awoki ti je kasts'isisi. Ijiate ti ya'am ti isimet siupi awoyi, 'yina ja ke inine'nate k'iye paka k'iejliyeyi paka wo ka inka'm itipe'e.

¹³ Siunie jikiecha iyo'ate, “Siunie sak ijiojwa'm pet jla'a sits'i', jlampet jana sits'i' tejeye pet siunie sak.” Nak je takakiunieje ti kia'iyo, 'yina jane'yi jana jloma ti Sinia' janetiajnat niwaka. 'Yina 'wenayiji pet siunie, ti siunie i'nio' ni iyo ti je ilisaniji ti tijwa'yi; kajeyepa ti je naka ka Sinia' kia'iwone ka intaye siunie ts'isie'n, 'yina tejeye pet siunie Sinia' iyo ka tiwoki ti 'es.

¹⁴ Siupa iyont'iyijipi pa Saka'niona Jesús ti iniujwa'n kisie'e ti tajla'm pa a'no', 'yina kiak janwonts'eje pit ti sa'am, ti ja kasnojwank'i kisie'e ti jatiajlaja pa a'no', ti jankients'e pi jijweye iyo.

¹⁵ ¿Jet'i 'najanayi paka awonayiji naka, ti 'wena je tiajla'yi ti Sijwajieti jijwa'lase'm? ¿Mi 'esiji ka iyiki siu'nie Sijwajieti t'isie'n jiwa, ka ijioyiji janaka i'nioki ti ijiuski'la'n ka 'yupijieteje ni 'isie'n janaka? ¡Jeyi kat'aja! ¡Wuj ti je 'es!

¹⁶ ¿Jet'i 'najanayi ti siunie i'nio' ti isienata'a janak i'nioki ti ijiuski'la'n, sekyi'i ti ts'ijiye ijwienjliyik'i ni siunie t'ajwes? 'Yina siuniwa Sinia' jlamtis iyo'ate, “Siunapo times 'yiniyijna'a ka injwanjli ni i'nio'.”

¹⁷ Jlampet ti po' ni i'nio' ti ini'nopijiete wita'm ni Saka'niona, sekyi'i kia'iyo ts'ijiye ijwienjliye pet ni t'ajwes, iyone jana Sinia' jikimet.

¹⁸ 'Yiltana'ni k'iye naka ti wuj ti je 'es, ijnoski'la ti yiji ni i'nio' ti ijiajwa'yis jiwo. Ka ne'yi pa siuniwa inkeyis ijia kanwoyi ni i'nio', nak je 'yakajyi'n ni t'isie'n siunie iyoyi. Jla'm ijiatayi jla'am siunie iyoyi naka inke', ti 'yuyi'ni napo ijiajwa'yis, ti teje'yi ilia'm ni t'isie'n ni i'nio' kajeyepa ti je ilisaniji.

¹⁹ ¿Jet'i 'najanayi paka awonayi ti siojona Sinia' jikimet ti 'es ti iwi'nase'm ni Sinia', janak ji'wet niwa 'assienis, jla'yi ti yi' aswa'am janaka Sinia' jikimet? 'Yina je askimet siojona as'wasankiye ti yi'ase.

²⁰ Ijiate Sinia' pajk'i ti takat'i'n astepe'e, kajeyepa ti jla'am ti ya'mase. It'imina ti kiak awo, ti awo'ate, wunitieyi ni Sinia' niwa 'assienis ti jla'am ti jikimet.