1 Corintios 3 - Sinia' Jlamtis 1994

Sikijmaye ijwienjli ti anokieje pa Sinia'

¹ I'lijwas, ijiate ti je 'esiji ka iyone 'ate siunapo i'nio' ti Sinia' jikimet t'eyasajnas, ti amtiyeta'asempe. Tepa jawo ka kiak je iwo ti je liyeyi ti jikiniets'i siunie iyo ni yi' ape'e 'ni ajnat. Jlampet siunie astankiujnieye ti jlena'yi pi Sijwajieti, iyoye'ate napo kia'lis pi jitienkiujnieye ti potie ti je 'esijiyi.

² Siunie ti 'eyasanayijpe je istieyiji, iyoye'ate siunie kia'le ti je iliyi ti itipis, jak je iyoyijipi ka 'esieyiji ka tiwena'ase'm siunie asak ti kiojieti ka towa. 'Nakayi jikiniejliyi ti je 'esiji ka atowa paka kia'iwo,

³ kajeyepa ti i'wanjliyeyi ti jikiniets'i siunie iyo pit ni yi' ape'e 'ni ajnat. 'Yina niwak 'yakajanit ti je liyeyi niwak astankiujnieye ti asa'am ti taj'lase ti jiwoyeyi, siunie ti jinitolsinak'i wita'm, siu'neje ti je ijnojliejyits'i siunie jiniwonayi, ka 'wena ajoyejiap'e wata'a siunapo i'nio' je tajli ni ajnat jikijmaye.

⁴ Kajeyepa ti po' ni iyo'ate, “Ya'am akk'i ni Apolos”, jikiecha pa ti iyo'ate, “Ya'am akk'i pet ni Pablo”, 'yina nak 'yakajanit siunie ti je liyeyi ti asa'm asa'am ti astankiujnieye ni jiwoyeyi.

⁵ Siuti jletinats'i'ni napoka, ¿ten na Apolos?, ¿siunie Pablo, ten na? Jlam'ne ni awoki ti inka'neyasajnaye jiwosts'e'm jiwek, 'yina sa'am ti insisieyi it'imina ti jitienkiunieyi pa Saka'niona. Ijiatjliyi ti sa'am je 'wena pet paka inkima, 'yina isima pet siupa k'iejliyi siupa ti Saka'niona yikialts'e.

⁶ Jayo'ate, yam ti akawijna'n, Apolos nak i'niat isiayits'i'ni pet, jlampet siunie i'yena, jla'yi ti it'imina ti wuj pijia'm siojona inwomki, naka pet ni Sinia'.

⁷ Ijiate, poyeta siunie 'yut isia'm jana inseliaki, siu'neje ni i'niat isiayits'i'ni, 'yina ti je napoka ka intajle siunie ti ijlias'ni pijia'm jana inwomki, 'wenajliyi jla'am pi Sinia', iyonjliyi jla'am pi iyone ti i'yena.

⁸ Siunapo ti tijna'yi pet ti takawijnajne'n, siu'neje napo i'niat isiayits'i'ni, lajk'ipa ka jwajla'aja ka int'an'ni pijia'm. 'Yina siunie ti Sinia' jankat'i'n ape'e pi jikijmaye iyo pi i'nio' nak jan'wenayi pet siojopa jikaja janwo.

⁹ Siuti ya'am siu'neje napo iniuyijk'im'ni, sikijmaye je 'wena ti anokieje ni Sinia'. Jlampet ti asa'am, asa'am siunie Sinia' jlak ji'wet siunie isi'meje'n, siu'neje ti asa'am siojona 'wuk ti je iliyi ti ilisane.

¹⁰ 'Yina siunie iyo pit ni Sinia' ti sip'elisi'n, ti yikialk'i naka, ti ya'am ti anane ti e'ne janaka 'wuk, kajeyepa ti ya'am ti jiwok'i'm. Sekyi'i ti poye pet siunapo ti 'wanjlik'i isia'm ti iniuyijk'i'm, ti its'iuyeje ti isima. 'Yina siuti po' ni isima pet, 'esiji ka wujwa ka 'ye'en siuti yinata'a.

¹¹ 'Yina ja lajak'ipa ka injwe'el ka ine'n ape'e siunie ti pajk'i ti wakal, siunie ti to'm isiamk'iye, naka ni Sijwajieti Jesús.

¹² Ape'e siunie inia'an ti to'm isiamk'iye kawo paka ine'n ape'e paka k'iejliyeyi ka ilesane. 'Esiji, ni'ne ka nakaye wikinie maja ti 'najli ka ine'n ape'e, ni'ne ka janakaye wikiniet'aj, ni'ne ka niwakaye siuniwa sisajas ti isis, ni'ne ka a'laye, ni'ne ka niwakaye jop, ni'ne ka niwakaye paletis.

¹³ 'Yina je ijiate ka je 'nakaj siunie jikijmaye iyone ni i'nio', ka netiejenie'e janak jloma ti ja ti'yena napo i'nio'. Kajeyepa janak jloma ti jana'm siunie jwat, ti jajnejlit wikie'eyi ni jikijmaye iyo ni i'nio'.

¹⁴ Siuti japoye ni siunie jilisanki jana je tikiwitaja ti t'o'ni, ti iwiakajlanit k'iye ni jwat, janakaye pet ni ja tiwok jikajaye.

¹⁵ Jlampet ti jwat jane'yi siojona 'wuk jilisanki, 'yina jano'we, kajeyepa ti ja'nojwi. Janjwa' jiwek jla'am ni i'nio', 'yina siunie jwat jijlienikie ni i'nio'.

¹⁶ ¿Jet'i 'najanayi paka wonayiji ti asa'am ti Sinia' ji'wuk'iase'm, jla'yi ti siojona jikimet yi' aswa'am?

¹⁷ Siuti po' ni initiajnate'n janak 'wuk, ti Sinia' ji'wuk, Sinia' jajlama pet ti jan'ye'en siupa janwone. Kajeyepa ti Sinia' siojona ji'wuk ijiate ti 'es, janaka jana 'wuk siojona ti ajwe'el, je 'wenayi paka ijwi'il kaswikie'eyi ti sa'am.

¹⁸ Ká anik'emijieta. Siuti po' na ti asa'am ti ijwi'il ka ijiatayiji ka 'naja'an, iniwone siunapo i'nio' ti iyoyi ni ajnat jikijmaye. Je 'esiji ka aniwonayi 'ate siunie ti lajk'iyi paka iwoyi ti je 'yije'en jwajla'aja, ja 'nakayeyijna'a ka ijiatayi ka wo'ate siunie ti je jlejliyik'i wek ti 'yije'en jwajla'aja.

¹⁹ Siunie iyo napo i'nio' ti yi' ape'e 'ni ajnat, Sinia' je iyo lajaye. Naka'ne ti iyo'ate niwa inamtis t'ipi: “Sinia' yikiaj'le jla'am siunie iyo ti 'yijejne'n, ti isi'mik'i.”

²⁰ Siunie jikiecha 'neje iyo'ate: “Sinia' 'yijene pi iyone siunapo i'nio' ti 'yijejne'n, ni jitienkiujnieye ti laj lajaye.”

²¹ Tempi it'imina ti je 'es ka anitonitieyi, siunie ti po' ni askiecha ti jikinieyi siupi iyoyi, jlam'ne wikie'eyi ti askimet niwaka wask'i'nelaja.

²² 'Wanjliyi ka nakaye Pablo, ka nakaye Apolos, ka nakaye Pedro, ka nakaye ajnat, ka nakaye poli, ka janakaye in'wasankiye, siunie jlaj yi'i ni i'nio', ka nakaye siu'nie jloma, siu'neje niwa jlomas atayeje, 'yina wikie'eyi niwak wask'i'nelaja askijmatis.

²³ Jlampet ti asa'am nak Sijwajieti ti jikimet'ase'm, jlampet ni Sijwajieti Sinia' jikimet pet.