1 Corintios 12 - Sinia' Jlamtis 1994

Ijwienjli je k'iejliyik'i siuniwa jikijmaye iyo jana Sinia' jikimet ti ijwienkitamk'i'ni napo ti iyo ji'wajieta'

¹ I'lijwas, awotajank'iye pet ka 'najanayi paka awonayiji siuniwa Sinia' jikimet ti 'es iyo ji'wajieta', napo ijniejiet'e.

² Je ajwel ka je 'najanayi naka, ti ijiate ti wuj ti ink'emijietayi niwaka siuniwa diosis ti i'nio' jikio' jilisanik, ti jitienkiuniejliyi'iji pi Saka'niona.

³ Nak it'imina 'nakayi ti awotaja ka 'najanayi, ti po' siunie ti japaka Sinia' jikimet ti 'es ti yamtijie'n kajeyepa ti yiji, ajwel'ni je 'yu'we ka wo'ate, ka injwe'el pa Jesús, “Je 'es pa Jesús”, jlam'ne je 'wena paka intajle. Kia'iyojliyi siunie ti iyo'ate, “Saka'niona Jesús”, jlam'ne siojopa Sinia' jikimet ti 'es jijweye yiji.

⁴ 'Yina ijwienjli je k'iejliyi siuniwa jikijmaye iyo jana Sinia' jikimet, jlam'ne ijwienjliyeta jla'am siojona tajle ti iwints'e'm.

⁵ Je ijwienjli paka sikijmayeja' ti Saka'niona ijniejietts'e'm, 'yina ijwienjli siunie Saka anechiyas.

⁶ Jla'yi ti je pini' siuniwa iyone pa Sinia', ka 'yakajlaja pet ka k'iejliyeyi puwa ka ilisanaja, 'yina ijwienjli siunie tajle, ti it'imina'aja ti 'yakajli ti ilisane pi k'iejliyi.

⁷ Je wikie'eyi ka neyi naka, ijwienjli'iji pa iyo ka wo ji'wajieta' janak Sinia' jikimet pa k'iejliyi jla'am pi iyo kawone, ti ijia 'esi pet.

⁸ Sinia' jikimet janaka ti iwijna'm ni i'nio' ka 'naja'n ji'liji; jla'yi ti janaka 'neje ti tajle siunie ti po' ni itiant'ieje siunie yiyi pi jikiecha.

⁹ Janaka 'neje ti Sinia' jikimet ti tajle siunie ti it'imina ti ijiate ti jitienkiujnieye po' ni i'nio'; siu'neje ti iyo jijweyeja' ni i'nio' ka injwajiete'n napo je isis.

¹⁰ Janaka 'neje ti tajle ti po' siunie ti 'yijene pi iyone ti ilisane siupa ti je kia'iyo ka ti'wena'ni; siu'neje na ti iyoyi jika'niyejayi napo i'nio', siunie tiwenaja'm; siu'neje ti po' siunie ti itiant'ieje siunie ti ijiate ti Sinia' jikimet, siu'neje niwa imose'l jikijmatis pet. Siu'neje ti po' ni 'yijene siuniwa inamtis ti 'wenayi; siu'neje na ti ipi'ya siuniwa inamtis je ti'niejenaja, sekyi'i ijwilik'iji'n.

¹¹ 'Yina wikie'eyi niwaka, ti je ijwienjli paka k'iejliyeyi paka jikijmaye kanwone, jlam'ne ijwienjli jla'am siojona Sinia' jikimet ti tajle, ti iwijna'm pi iyo ka iwejna'm.

Ijwienjli siunie atajlaja ti awoki ts'ajwesie'

¹² Siuti sa'am ti i'niolts'e'm, ijwienjli ni ts'ajwes, ijiate ti poyeta siuniwa sijwa'al 'neje, 'yina 'wena je taj'le. 'Yina Sijwajieti kia'iyo 'neje pet, siunapo jika kia'lis.

¹³ Wikie'eyi, 'wanjliyi ka napokaye Judíojos, siu'neje napo je Judíojos, siunapo inkipijnas, siu'neje napo ti je inkipijnas, ti kasnajienaja'n ti kaswomk'i wita'm pa Saka'niona, ti iyo ka kasjwanjlik'i, jla'yi ti ijwienjli siojopa Sinia' jikimet ti kasts'esi ti kassetijnape. Jla'yi ti kaswikie'eyi ti kas'yayinaja siunie ti jla'am janak Sinia' jikimet.

¹⁴ Ijiate ti 'loj siuniwa sijwa'al ti i'niolts'e'm, 'yina ijwienjli siunie t'ajwes.

¹⁵ Siunie sisiet ti jawo'ate, “Siuti je ya'am ka inkioyek'i'm, ijiate ti je wajk'i'm siunie ni i'nio'”, 'yina je naka ka int'emina ka je iwiaja ni i'nio'. ¡Jeyi!

¹⁶ Ni'ne ka janakaye jana ink'iote ka wo'ate, “Siuti je intatek'i'm, it'imina ti je wajk'i'm ni i'nio'”, 'yina je naka ka int'emina ka je iwiaja ni i'nio'. ¡Jeyi!

¹⁷ 'Yina, ¿tepa ka wot'itieje ka pajlata ka intateyets'e'm ti sa'am ti i'niolts'e'm? Ajwel'ni je apechiyeta'ni ka kia'iwo. ¿Tepa ka wot'itieje ka pajlata ka ink'iotiye ni t'ajwes? Ajwel'ni je 'estaja ka ijwila ka ijni'wina paka k'iejliyeyi, siuti ja laja ijnietawoja'.

¹⁸ Siunie ti jikimet jla'am pa Sinia' 'ni ts'ajwes, it'imina ti siupa iyo jla'am ka ine'ne ki iyo niwa sijwa'al, ka iyot'e 'ate niwa sisietis, sikioye, wikie'eyi.

¹⁹ ¡Siut'itie ka kia'iwo ka ijwanjleje'n ka ne'yi pa siu'niwa, sikioye, sisietis, ajwel'ni je ijyiwittajk'i paka i'nioye iyo 'ni ts'ajwes!

²⁰ Jak je iyoyiji, ijiatataja ti 'loj siu'niwa sijwa'al, 'yina je 'loj papo ka intajle. Ijwienjli jla'am siunie ts'ajwes.

²¹ 'Yina nak kia'iyo jana sitiete, ti je 'yakajli ka kiak iwone ni sikio', ka wone'ate, “Je asetia'n”, ni'ne ka janakaye setik ka wone'ate niwa sisietis, “Je asetiana”.

²² Jlampet siuniwa sijwa'al ti ajwela je 'esijiyi, niwakap'an siuniwa ti ijiate ti kasts'esi ti iniuyets'e'm,

²³ jlampet siuniwa sijwa'al ti je awok lajaye, niwak ijiate ti a'yenaja. Siuniwa ti kasts'ajwejle, niwaka ap'ona ape'e,

²⁴ ijiate ti siuniwa sijwa'al ti awok lajaye lajk'i jlampa ka insetiane. Lapakawo ti Sinia' ilisanat'ets'epe, 'yina wuj ti i'yena siuniwa ti sa'am je wuj ka i'yenaja'm, jlam'ne ki iyo ti laja po'.

²⁵ Kajeyepa siuniwa sijwa'al Sinia' je iyo ka inikawo'on, 'wenajlitieje ka injwanjlik'i siunie jawoyi ka inip'elisijne'n.

²⁶ Siuti po' pa yi'i pa a'tieje, ijiate kia'iyoye'ijyi pet niwa jijwa'al iliatayi'iji pet. Jlampet ti yi'i pa ti inkaj'ni, 'yina kia'iyoye'ijyi pet siuniwa ijia ti ikatayi'iji pet ni iyo ti inkaj'ni.

²⁷ 'Yina kiak jiwoyeyi pet ti asa'am, ti Sijwajieti t'ajwets'iase'm. Jak je iyoyiji siunapo ijia, pa yi'i pa, je 'wena paka intajle, Sijwajieti t'ajwes jijwa'lase'm pet.

²⁸ Ti Sinia' iyo ka ine'nik'i siuniwa ji'wetis napo jilis ti yikiajle ni jikijmaye, sekyi'i ti iniajnata napo ti iyojwa'n injlojwajnasa'; tomik'i ti napokaye pet napo injwejlanawos, siunapo ti ijwile pet pijia'm siunie iyo jana Sinia' jikimet, ti ijwijla'm napo i'nio'. Sekyi'i ti tomayik'i pet siunapo inka'neyasajnawos; siunapo ti i'winki'n siuniwa ti je yits'e japa ka jlomaye ka kia'iwo ka ti'wena'ni. Ijia napo 'yijene pi iyone ti ijwiejiete'n napo je isis; ijia napo ip'ilisi'n napo i'nio' Sinia' jilis, sekyi'i iniuyeje; ijia napo iniajnenk'iye napo ijia Sinia' jilis, ti iyoyi pi jikijmaye; ijia napo ti iyoyi siupuwa inamtis ti je tipe'yak.

²⁹ 'Yina a'wena ti je wikie'eyi ka jikijmaye kia'iwo ka injlojwajnasa', jla'yi ti je wikie'eyi ka injwejlanawosa', jla'yi ti je wikie'eyi ka inka'neyasajnawosa', jla'yi ti je wikie'eyi ka jikijmaye injwanjlik'i, ka wo'ate siunapo ti 'yijene pi iyone ti i'winki'n siunie ti je yits'e ka ti'wena.

³⁰ Je wikie'eyi ka jijweye poyeyis ka injwajiete'n napo je isis, ni'ne ka wikie'eyeyi ka 'najane siuniwa inamtis je tipe'yak, ni'ne ka wikie'eyeyi ka injwelik'iji'n ni siunie iyo naka, ti 'yijene ni ye'li ti je tipe'yak.

³¹ Kima'yi ilia'm niwaka ti je niliaja, niwak ja 'nesieyi pet. Ja'winki'nasem'ne siunie ti as'nayija' ti wuj ti 'es.