1 Corintios 11 - Sinia' Jlamtis 1994

¹ Niwonayi 'ate siunie aniwone, iyo'ate awoyi ti awoyi siunie Sijwajieti iniwone.

Siunie 'es jota iniwone napo asejnia ti ijiunit pa Sinia'

² Wuj ti ts'ajka'ase'm siunie jiwoyeyi, ti je paj ka inkiwaliyeyi'i siunie awoyipi ti a'yasap, siu'neje ti je liyik'i siunie iyo ti 'eyasanajyi'n.

³ 'Yina siunie ti awotajank'iye pet ka 'najanayi ti siunie Sijwajieti naka ni jletik ni i'nio', na ayinie jlam ti jik'iemjla jletik, 'yina jlampet siunie Sinia' naka pet ni Sijwajieti jletik.

⁴ Jak je iyoyiji ti po' ni i'nio' ti iyo t'ajlayeja', ni'ne ti ijwile pijia'm siupa iyo japa Sinia' jikimet ti 'es, ti its'i'n ape'e pi lotakinie japa jletik, 'yina 'yajwejlanit'ni pet siunie ti jletik.

⁵ Jlampet siojona ti lajk'ipa ka ink'i'n ape'e japa jletik ti iyo t'ajlayeja', siu'neje ti ijwile pijia'm siupi iyo japa Sinia' jikimet, kia'iyojliyi wuj ti 'yajwejlanit'ni pa ayinie ti japak jletik. Janak 'yiniye siojona asejnia ti yisit'e jana jletik ti je itioyit'i.

⁶ Siuti kiak jawo jana asejnia ti je ip'io'n ape'e jana jletik, 'esiji ka nesit'e jana jletik. Jlampet ti ja 'najwejle ti yisit kiajwe niwa ji'wole, ni'ne ka je intoyit'i jana jletik, 'esiji kawo jletik p'ota'.

⁷ Jlampet siunie ayinie, je 'esiji pet ka ink'i'n ape'e pa k'iejliyeyi japa jletik, kajeyepa ti jla'am ti Sinia' jipe'el jayonaja, jla'yi ti jijweye yiji.

⁸ Kajeyepa siunie i'nio' je janak asejnia ka intajla'm ti 'nelanjie'e Sinia' ilisanat'iyijpe, 'yina siojona asejnia nak titiajlaja'm ni ayinie.

⁹ Jla'yi ti je janak asejnia ka Sinia' int'emina ka impojonit'i ape'e 'ni ajnat, 'yina jla'm ijiatayi wek jla'am ni ayinie ti Sinia' ipiujunit jana asejnia.

¹⁰ 'Yina pakat'iyik'ipe jla'am siojopa asejnia ti kiak tiwonaja ti po' siunie its'i'n ape'e jana jletik, 'yina nak 'yakajanit ti Sinia' iyo ji'niayija', ka 'esieyiji ka iwo t'ajlayeja', jla'yi ka injwele pijia'm siupa iyo japa Sinia' jikimet, jitieyi'i napo injlojwajnas poli jlele.

¹¹ 'Yejne'n, ataj enayijna'a 'ate siu'nie, ti siuti ka lajak'i japa siojona asejnia, 'yina siunie ayinie kia'iyotaja lajtak'ipa. Lapakawo ti Sinia' pajk'i ta'a ti wakal siunie iyo, ti je 'esiji ka injwanjli ni ayinie, siu'neje jana asejnia.

¹² Jlam je iyo siunie, ti Sinia' k'iejli ilisanayi jana asejnia, je 'wena paka intajle, tajlaja'm ni ayinie ti jiwa pi ilisane. 'Yina siunie ayinie kia'iyo pit, je 'wena japa ka intajla'm, tal jits'ija'm siuti yiyetaja'n. 'Yina wikie'eyi niwak wask'i'nelaja tajla jla'am pa Sinia'.

¹³ Ja'yena'yasa'm, 'yina, ¿ma 'est'iyiji jana asejnia ti iyoyeta t'ajlayeja', ti t'ajle pi Sinia', ti je its'ine ape'e paka k'iejliyeyi japa jletik?

¹⁴ Jejlikiame kiu' ka ataj enayi'ni 'ate, siunie Sinia' iyone ni jikijmaye ti ilisane niwa wask'i'nelaja yi' ape'e 'ni ajnat, ¿ma 'yu'we ni ayinie ti ji'wole itiojyits'i? ¡Ajwelta ka jeye!

¹⁵ Jlampet siojona asejnia ti yi'nate niwa ji'wole ti itioyit'i, nak wuj ti 'yu'we, kajeyepa ti nak Sinia' yikiajle pit ti 'yiniye ka jijweyeja', ti niwak Sinia' iyoyi jip'ota' jana jletik.

¹⁶ Siuti japoye siunie janwet'iank'i siukia awoyi, 'esiji ka 'najane paka iwone: tiwet'ianaja ka sama, ka napokaye 'neje wek Sinia' jilis, ka 'najane paka wone ka poye siupa jikeye napo i'nio' paka tiniwonaja.

Saka'niona Jlak ti 'Es ti je tilisanajaje

^17-18 Po'neje siunie awo ka ijwi'lase'm. Ti siuti jinitotieyetak'i wita'm asa'am ti Sinia' jilists'ase'm, wuj ti je 'es siupa jiwoyeyi, 'yina ti inkajyina jlam'ne ka inoye'ase'm. Siunie inia'an ti ajieyi, naka ti je ijnojlie wita'm siupa k'iejliyi ti jiwoyeyi, ajwel'ni ijiate kiaka.

¹⁹ ¡'Wanjliyi je akakiuni, kajeyepa ti ja'nakayeyi ti ja 'nakaj siunapo ti je takalakijiejne'n ti yame siunie iyo pi Sijwajieti!

²⁰ Siunie tajle ki iyo ti jinik'isaja ti kia'iyo ti jinitotieyetajak'i wita'm, siunie Saka'niona Jlak ti 'Es ti jitiuwa. 'Yina je pi iyoye'ate ti pajk'i, ti ijiate siunie jiwonayiji, jlam'ne 'nakayi je ijiatk'i siunie jiwoyeyi.

²¹ Siunie ajieyi ti po' siunapo ti neyate'e kan'yekiujni'n, ajwel ni Saka'niona Jlak ti 'Es. 'Yina je its'iujwap papo ijia, jlam'ne po' siupapo ijia ti ijiate ti lajk'iyipa ka in'wenis pet ti inil'liajne'n, jak je iyoyiji ka je ijnomeje'n ta'a siunapo ijia.

²² 'Yejne'n, jlam'ne po' ni jwajla'a yi' as'wete, ka'yekiuniejyi'n ta'a siu'neje ni ji'yayejyi. ¿Yot'iyi'ni ti kiak jiwonayi napoka Sinia' jilis ti je woye lajaye? ¿Yot'iyi'ni ti jit'iajwejlanatak'i wita'm napoka i'nio' ti p'ijliusis? ¿Tepa jayone pi i'lij ti jawi'nase'm? ¿Jot'i ka ijiunitieyi siunie jiwoyeyi? ¡Jeyi! ¡Wuj ti je 'es siunie jiniwonayi!

Saka'niona Jlak ti 'Es

²³ 'Yina jla'am ti tajle siu'nie t'eyasajnaye pi Saka'niona, siukia 'eyasanajyipe, siunie iyo'ate: Saka'niona Jesús, siupa ajnaj ti tiwenaja t'ipi, isimat'iyipi japa woye ti yijni kiojyi,

²⁴ sekyi'i ti jinikanitieyi yikiajlayi pi Jinia'. Itime ti its'isajaja'n, 'yina iyo'ne 'ate, “'Nak 'isie'n ti tiwena astepe'e ka insisieyi ti janetia'n. Kiak janiwonayipi, tankiunieyepe ijyik'i.”

²⁵ Kiak iyonjliyiji, ti itimat'iyisijpe ti ti'yekiujni'n, isimat'iyi'ijyi siojopa inat jiwe. Sekyi'i ti jinikanitieyi yikiajlayi'iji pi Sinia', ti iyo'ate, “Siu'nie at'es 'nak 'yakajanit siunie Sinia' ijwi'il ti ink'ie' siunie janwo, ti ijiatk'i siu'nie i'yoyis ti tisa'ni astepe'e ka insisieyi. Siuti ji'yayeyetaja sekjane'yi ka tankiunieyepe ijyik'i.”

²⁶ 'Yina sek ijio'we kiaka, siuti jitiuwayeta janak woye siu'neje ti ji'yayetaja siunie at'es ts'ejniet'io t'e', 'yina jlekiajla'ni pijia'm ni iyo pi Saka'niona ti 'ya'al paj ka awayeyinie'e siojona jloma ti jla'am janapimet.

Siunie 'es ka tiwoki ti titiuwajata ni Saka'niona Jlak ti 'Es

²⁷ Jak je iyoyiji ti po' siunie itiujw janak woye siu'neje ni at'es ti ji'yaja ti je lisaniji, wuj ni jitis iyo, kajeyepa ti teje'yi ilia'm ni Saka'niona t'isie'n siu'neje ni ji'woyis.

²⁸ Jak je iyoyiji ti kiak awo'nase ti awo'ate, siuti je kimajliyi'iji siojona woye siu'neje ni at'es, najnat ka 'esieyiji ka wujwa ka 'yena siunie astankiujnieye.

²⁹ Kajeyepa ti siunie ti je itiant'ieje ki iyo naka Saka'niona t'isie'n, 'yiniye ka wo'ate ti i'yaje siunie ti jitis jla'am ni i'nio', ti Sinia' jane'ne.

³⁰ Tempi it'imina ti po' ti asa'am ti je insisie, jla'yi ti laj ast'oniye; po' napo 'yajle'n, 'yina ti naka ti tajleje.

³¹ Jlampet ti kiak janiwonaja ti janilesanaja, kiak jawo'ojyi pet Saka'niona ja ke iwo sitisa'.

³² 'Wanjlit'itieje wek ka insats'e'm pa Saka'niona, 'yina ti ja lajak'ipa kawo ti ja kasts'eyasajne'n, jla'yi ti ja ke tijwanajats'e'm siunapo ti jitis po', ti ja tisiejek'i'yi.

³³ Jak je iyoyiji i'lijwas, siuti kia'iyo jiniojwayetak'i wita'm ti jatowa ni Saka'niona Jlak ti 'Es, 'esiji ka anijnojlieta wita'm siuti ji'yekiunieyeta.

³⁴ Siuti inel'lia'n, 'yekiunta'a a'wete, ja'nakayeyi ti Saka'niona ja ke intajlat'ase'm siuti jawoyeyi siunie jiwonayiji'ni ti wuj ti je 'es, ti jinitotieyetak'i wita'm. Siuniwa ijia 'neje niwak jatiejieta pet ts'iji ka nak ijiotaja.