1 Corintios 10 - Sinia' Jlamtis 1994

“Je 'es ka ataj womayi siuniwa tiwonaja diosisa'”

¹ Je 'es ka inkiwaliyeyi'i siupapo sitiselt'ipi ti wikie'eyi ti t'iskiunisi'n kiajwe siojopa poli t'ipi, siu'neje ti yikiwajasia'm siupa i'niat jlajlik'i ti jle' iyo'ate Isiati.

² 'Yina siuti kia'iyo yiyis kiajwe japak poli, siu'neje pa i'niat jlajlik'i ti yikiwajasia'm, 'yiniye ka tiniejienaja'n siupi iyoyi ti jla'yijis pa Moisés.

^3-4 'Yina ijniul wita'm siupa jlak iyot'iyipi papo i'nio', jlak siupa tajle pi Sinia'. Kajeyepa ti Sinia' iwijna'm siupa i'niat ti tajla'm japa sisaj, 'yina ti Sinia' yamk'iji'ni papo i'nio' t'ipi ti yiji pi ji'niayi. Paka Sijwajieti ti ti'yenajap japak sisaj ti i'niat tajlam'ni.

⁵ Kiak iyoyet'itieje ala, 'yina ti je 'loj siupapo its'iuye pa Sinia', siupapo ijia ijiate ti 'lojwe ti je its'iuye pa Sinia'. Pak it'imina ti Sinia' jwesieja'm papo i'nio'. It'imina ti t'o'l sekyi'i ape'e pa ajnat laj i'nioye'e.

⁶ Kiakjini iyopi pakayi lapakawo ti 'esiji ti po' sik'ioye kiaka, ja'nakayeyijna'a ti ja ke ijyiwitak'i siunie iniwont'iyisijipi ti itiliajasi siunie je 'es, siupi iniwont'iyisijipi ti iyoyi ni je 'es.

⁷ It'imina ti kiak awo'nase, ti awo'ate, ataj ká awomayi siuniwa tiwoki diosisa'. Akosjlete'l ká ateyeyijin kiajwe, iniwont'iyisijipi papoka. Iyoye'ate siuniwa Sinia' jlamtis ti iyo'ate, “Yiyek'iji'n papo i'nio' ti ti'yekiujni'n jla'yi ti i'yayis, sekyi'i ti tiliakinie papo i'nio'.”

⁸ Siu'neje ti ja ke iyoki siunie ti iyot'iyisipi'iji papoka ti 'yuyisi'ni papo ijiajwa'yis. Japak siojopa jloma ti veintitrés mil (23.000) papo no'we ti 'yajle'n ti jloma ijwienjli.

⁹ Jla'yi ti je 'es ka sakajejlasaye iyina'a pa Sijwajieti, iyot'iyipi papok i'nio' t'ipi, pakayi ti injlajas itij'we ti yokieje'n.

¹⁰ Ke injwesiejayi ni Sinia', iyot'iyipi papo i'nio' ti jwesiejesi pi Sinia', 'yina siupa injlojwanik poli jlele kalankijieta Sinia' ijliuyi ka intej'we ka inlajne'n.

¹¹ Kiak iyo siukia jiwet'ia iyot'iyipi papoka sitiselt'ipi lapakawo ti sa'am ti kastajieta, ti yi'i niwa Sinia' jlamtis, ka kiak je iniwonaja pet, sa'am ti atomajak'i pijia'm, 'nakayi ti ja ke kasjwekk'i sekjane'yi ja kasts'esi.

¹² Jak je iyoyiji siunie ijwil ka t'onieyi, 'esiji ka wujwa ka intoskiye pet, 'lojwinie'e ka inekk'i isia'm pet.

¹³ Siunie inkajejlasaye yi'ase, lajk'ipa ka ne'yi paka i'nioye ka je ineyiji. 'Yina 'esiji ka ataj awomayi pa Sinia' ti ja ke inenayi 'ate niwaka inkajejlasayejes, ti wuj ti a'tisk'iji'n, ti je tiuma'yi ilia'm. Siu'neje ti, yiyeta'ase nak inkajejlasaye, Sinia' jan'wenki'na'ase'm siunie janiwonayi ka toma'yi ilia'm.

¹⁴ Nak it'imina ti kiak awo'nase, i'lijwas ti yimijna'yase'm, 'yiltana'ni k'iye naka ti ijnonitieye tena'a niwa ti tiwoki diosisa'.

¹⁵ Kiak awo'nase, kajeyepa ti asa'am ti jwajla'aja'ni jiwek pi jiwoyeyi ti 'najanajyi'n. 'Yina 'esiji ka 'yena siunie ti ajwe'lase'm.

¹⁶ Siuti poyeta jana Saka'niona Jlak ti 'Es, sinikanitieyi awenajayi ni Sinia' ti akimajataja janaka inat jiwe, 'yina siuti a'yakietaja sekyi'i pi Sijwajieti kasjwanjliyik'i, iyo pit pi ji'woyis. Siu'neje ti atowajata jana woye ni siunie ak'isaki'n, nak kasjwanjliyik'i pet ki iyo ni t'isie'n.

¹⁷ 'Yina 'wanjliyi kas'lojwata, lapakawo ti ijwienjli siunie t'isie'n, kajeyepa ti anikijwana ti atowajata ni woye ijwienjli.

¹⁸ 'Yejne'n siupapo Judíojos ti itiuwis siupuwa insejna' ti titiejietajape pet pa Sinia' ti tonitiejata, nak kia'iyo ti iniwo'om papo i'nio' kajeyepa ti inijwankitisk'iyi siuti ti'yekiujni'n, kia'iyo inikijwa'n.

¹⁹ Je nak ka 'yejnap siunie iyo napo 'wenayi pet, ti kia'iyo ijiunitis niwaka ti iyoyisi jika diosisa'. ¿Ten siunie ajwel'ni? ¿Mi awo'ate niwak jla'm ijiate ti laja po', siuniwa ti tiwoki diosisa'? ¡Jeyi! ¿Ent'a siuniwa tilianajan'ni wakiajas 'yaka'm ape'e siuniwa ijia ti kia'iyo ti tilianajan'ni? ¿Je niwaka ka ijwil'ni?

²⁰ Siunie ajwel'ni, siunapo i'nio' ti po' siuniwa iyo jika diosisa' ti jitiej iyoma, ti kiak iyoyetaja ti iliajne'n niwa wakiajas, je naka Sinia' ka ilesane k'iye, 'wenajliyi niwa imose'l ti ilisanisi k'iye, kajeyepa ti niwaka ti ijiunitis pet. Wuj ti je emink'i ka kiak aniwonayiji, ka ni'nopijietayiji niwak imose'l.

²¹ 'Yejne'n, je 'es ka kiak aniwonayi, ti ji'yayejyi janaka Saka'niona jlat jiwe, 'yina jatemayi ka ajlasayeyi janak jlat jiwe pet niwa imose'l. Siu'neje ti jataye'yi ape'e janaka Saka'niona jlak tenaja'ni ape'e, sekjane'yi ka ajlasayeyi jana imose'l jlak tenaja'ni ape'e pet.

²² ¿Awokt'ijyinme k'iye ka iliakik pi Saka'niona, ja'nakayeyi ti ja jiwak inents'e'm? ¿Sijweyet'imi 'yaka'm ape'e pi Sinia'?

Wunitieyi pi Saka'niona wikie'eyi siuniwa jiwoyeyi

²³ Siuti asa'am jiwoye'ate, “Lajk'ipa ka intomi'ni ijyik'i siu'nie awoyi, ya'am isimet”, ka jla'm awoyeyi wat. 'Yina siuti po' siunie awoyi ti je 'es, 'yina nak je iniuyijk'i'm pet. Ijiatataja wek ti isimet siu'nie awoyi, 'yina po' siuniwa sit'iunitt'i'ni, ti ajwel ka iyikk'i pi Saka'niona siunie iyo.

²⁴ Ká awojyi'n siunie ti a'm ti ja 'nesi, 'yina wojyi'n siunie ti ja 'esieyi napo a'lejwas.

²⁵ Siuti jik'iajwa, jloyi napo wakia t'isie'n jiwos, 'esiji ka je k'iejliyeyi paka astankiujnieye awonayi, ni'ne ka 'yasanayi ka intajle siuniwa ti tiwoki diosisa'. Ekial, jlam woni'ni 'ate ka lesane paka tojw.

²⁶ Siuniwa Sinia' jlamtis ijwil ti iyo'ate, “Wikie'eyi 'ni ajnat, siu'neje niwa wask'i'nelaja yi' ape'e, jikimet ni Saka'niona.”

²⁷ Ti po' ni je iyoyi kiwa Saka'niona jlamtis ti ijliu'wase'm ka joyeyi, kajeyepa ti iyo ka akijwanayi ti jan'yekiujni'n, siuti jawo ka akk'i, 'esiji ka ataj je enayi'ni 'ate naka. Ká akawonayi siupa ijwi'lase'm, kima'yi ilia'm, towa. 'Yina ká a'yasajyi'n ka k'iejliyeyi paka woyeyi ka 'najanayi.

²⁸ Jlampet ti po' ni iyo 'ate, “Siu'nie wakia t'isie'n pajk'i ti timaja ti tiwunitieje puwa diosis”, 'yina jla'm ijiate wek jla'am naka, ká atowa, 'lojwinie'e ka woye jijliak'aliye pak i'nio', jla'yi ti jakajyina' pi jitienkiujnieye iyo.

²⁹ Siuti ayiji naka, je asa'am ka ijwila siunie astankiujnieye iyo. Ajwel siunie jitienkiujnieye iyo napo 'wenayi. 'Yina je iyojliyi ti po' ni iyo'ate, “¿Yot'iyi'ni ka ikajyijne'n ni jitienkiujnieye napo i'nio' siunie iyo ni awoyi?

³⁰ Jlam'ne inikanitieyi ekiajlapi pi Sinia' siu'nie atojw.”

³¹ It'imina ti kiak awo'nase ti awo'ate, “Ja k'iejliyeyi siupa jawoyeyi, ni'ne ka 'yekiunie, ja k'iejliyeyi pi ja'yayejyi, wikie'eyi niwaka wunitieyi pi Sinia'.”

³² Ka a'wenkinayi napo Judíojos, 'lojwinie'e ka akajyina' ni jlosik iyo, siu'neje napo ti je Judíojos, napoka 'neje siunapo ti iyoyi ki inamtik ti Sinia' jilis.

³³ Jlampet siunie awoyi, ti awotajank'iye ka k'iejliyeyi paka iyoyi, ja ke its'ijlianiti k'iye ka 'winkina, kajeyepa ti je awoyi ka yama ka ininajnat ka iyojyi'n paka ts'esi. 'Wenajliyi ti awojyi'n paka insesi napo i'nio', 'nakayi ti janjwa'.