1 Corintios 1 - Sinia' Jlamtis 1994

Pablo itijwile papo Sinia' jilis

^1-2 Asampey, i'lijwas ti as'wet jana Corinto. Ya'am Pablok'i'm jla'yi 'ni sikiecha Sóstenes, sa'am wuj ti atejwila'ase. 'Yina ya'am ti Sinia' ijniejietk'i'm pet ka kia'iyo, ti iyo jikawoyek'i'm, ti awoyi siunie iyo kawoyi, ti siwojwa'n Sijwajieti Jesús jijliujwanikiek'i'm ti atajla'm siunapo ti ijiate ti jikawose. Siupet ti paka Sinia' ti ta'nasepi pet, jla'am ti inlesana' ti jleyejiap ni Sijwajieti Jesús. 'Yina je asamkata, siu'neje napo i'nio' yi' ape'e 'ni ajnat ti kia'iyo jilis ti yite'n pa Saka'niona siu'neje ti jika'nionajas pet.

³ 'Esiji ka Sinia', jla'yi pa Saka'niona Jesús ti Sijwajieti, ka wujwa ka imp'elisinapi, jla'yi ka inoye'ase'm ka akamaja.

Sijwajieti pak Sinia' itiajlate ti wuj ti ip'ilisi'n napo i'nio'

⁴ Je paj ka iliyi ti inikanitieyi awene pi Sinia' astepe'e, siu'neje ni iyo ti wuj ti imp'elisina', ka lajak'i jla'am pi Sijwajieti Jesús.

⁵ Siuti jini'nopijietayiji ni Sijwajieti, 'yina sektaj'le ti Sinia' wuj ti imp'elisina' ti iwi'nase'm ni 'es ti yijits'i niwa askiojwa'l. It'imina ki jiwoyeyi ti 'najanajyi'n, jak je iyoyiji'ni ti jiwoyeyeta asamtikieyi niwa Sinia' jlamtis, 'yina je int'ayeyiji'n.

⁶ 'Yina naka'ne ti 'yakajanit siunie inka'niye ti ijwi'il ni Sijwajieti, ti je k'ajts'e ni yi'i ti yijits'i niwa askiojwa'l.

⁷ Jak je iyoyiji ka poye paka inetiane siuniwa wask'i'nelaja isis ti Sinia' tajle ti yijits'i niwa askiojwa'l, ti asa'am ti jinijijwijienk'iye siojona jloma ti ja'nesi pa Saka'niona.

⁸ Sinia' jan'ye'nase'm 'nakayeyijna'a ti ja ke aleyeyi paj ka awayeyinie'e ni jlaj jane'yi. Ja ke inets'e ka tiwoki astesa' paka k'iejliyeyi ka 'nesta pa Saka'niona Jesús ti Sijwajieti.

⁹ Siupi k'iejliyi ti ijwijla'm napo jilis 'yina je 'yaka'm ape'e, jla'yi ti jla'am ti isi'mase'm ka ni'nopijietayiji ni Jlas Sijwajieti Jesús, ti Saka'niona.

Sinia' jilis ti inik'isa

¹⁰ I'lijwas, etijnape pa Saka'niona Jesús ti Sijwajieti ti wuj ti anip'elisi'niase, ka ijnojlie wita'm siunie jiwoyeyi. Je 'esiji ka ani'wenakitie, 'esiji ka ajwankita siunie jawoyeyi. Siunie asosik kiak jawojliyi janjwanjlik'i, astankiujnieye kia'iyojliyi janjwanjlik'i.

¹¹ Kajeyepa ti ika'niye po' ti siojopo ji'wet jlele jlaja Cloé, japok ijwilk'i ti injwela ti je jininenak'i'ni 'ate.

¹² Jajniejietk'i, po' napo iyo'ate ti asa'am, “Ya'am 'ok'i pet ni Pablo”, po' napo iyo'ate, “Ya'am 'ok'i pet ni Apolos”, ijia napo iyo'ate, “Ya'am 'ok'i pet ni Pedro”, ijia napo iyo'ate, “Ya'am 'ok'i pet pi Sijwajieti.”

¹³ ¿Tepat'e jiniwonayi? ¿'Yinit'iyi ka jijwa'al 'lojwa pa Sijwajieti? ¿Ent'a jijwela' ka yamat'ipi ti Pablok'i'm, ka yama ka sik'iejwata'a japa cruz, ka iniwe'n astepe'e? ¿Mi nak Pablo jle' ti inetijnajiepeje ti inajienajyi'n?

¹⁴ Inikanitieyi poyi pi Sinia' ti je ya'am ka iniejienajyi'n ka ne'yi ti asa'am, napokata jla'am napo Crispo siu'neje ja Gayo, ti inajienajyi'n.

¹⁵ It'imina ti lajk'ipa ka iwo'ate, “Nak setinajapejepi ni Pablo jle', ti siniejienajape.”

¹⁶ Kiajata jla'am ti itiej wujk'i ti ya'am, ti anajienpe ja Estéfanas siu'neje japo ji'wet jlele, 'yina itiej je wujk'i ka poyet'ipi 'neje pa ka iniejie'n.

¹⁷ Sijwajieti je nak ka injlok'i'm ka iniejiejne'n napo i'nio', 'wenajliyi siunie iyo ka iyoyi ti akiji'n naka inka'niye ti 'es ka ijwi'il. Jak je iyoyiji siunie iyo ti amtiyeta ti ts'aja'n i'liji, je ka yama ka intalk'i, 'nakayi napo i'nio' ja 'najane paka inwone ki laja iyo jla'yi ni jijweye ni Sijwajieti ti yi' ape'e jana cruz.

Sijwajieti naka ni injweye siu'neje ni 'najankijnieye ti tajle ni Sinia'

¹⁸ Siunapo i'nio' ijioyi ti janetia'n, napoka napo ijwi'il ka laja lajaye siuniwa Sinia' jlamtis ti ijwi'il ni Sijwajieti jiliaye iyo ti yi' ape'e japa cruz. 'Yina jlampet ti sa'am ti atayeje jana sijwajieti, kasts'ajane ti siuniwa Sinia' jlamtis naka jijweye jla'am.

¹⁹ Iyoyi niwa inamtis t'ipi ti iyo'ate: “Janitiajnat ki iyo napo i'nio' ti 'yijejne'n, siunie iyo napoka jwajla'a je istiejenit ja ke iyo lajaye.”

²⁰ 'Yina, ¿tepi iyo jiat'eje siunie 'yije'en, siu'neje ni inka'neyasajnayewo, siu'neje ni initonit ti ijwi'il ka ijiatayiji ka 'naja'an 'ne ajnat'e? 'Yejne'n, ¡Sinia' initiajnat naka, iyonayiji ni iyone ti je tiwok lajaye ape'e 'ni ajnat!

²¹ Kajeyepa siunie Sinia' ti 'yije'en, iyonayi ni iyone ti ijiate ti je yimink'i napo 'yijejne'n siunie iyo ni 'yijenisi pet, ka siunapo i'nio' yi' ape'e 'ni ajnat ka je 'najanisi, 'wanjliyi kan'wenis. 'Yina napokataja jla'am siunapo je takakiunisi niwa jlamtis ti iyo jlosik ink'ieye, ti je ijiulsijna'm ka 'esieyi niwaka jlamtis, 'nakayi ti janjwajyi'n, 'wanjliyi ka kia'iwo napo i'nio' ka je iwo lajaye naka inamtik.

²² Siunapo Judíojos iyojonk'iye ka ti'wenkinaja puwa ka k'iejliyeyi siuniwa je yits'e japa ka jlomaye ka ti'wena, jlampet siunapo Griégojos itiliajasi pet ka 'najajne'n,

²³ jlampet ti sa'am awoki samtikie' naka ni siunie Injwajieti ti Sinia' jijliujwanik ti tena'a pijia'm japa cruz. Naka'ne ti siunapo Judíojos ti ijwi'il ikajyi'n ni jitienkiujnieye ti 'es, siunapo ijia i'nio' iyoyits'i 'ate, “Ijiat ti jiniliaki naka.”

²⁴ Ti sa'am ti Sinia' isimts'e'm, 'wanjliyi ka Judíojosa' papo, ni'ne ka Griégojosa' papo, 'yina kasts'ajane pa awonaja siunie Sinia' jijliujwanik ti Injwajieti naka ni injweye siu'neje ni 'najankijnieye ti tajle pi Sinia'.

²⁵ Siunie iyo pit ni Sinia', ti po' siunie ti 'yiniye ka laja lajaye, nak jla'm ijiate ti 'yaka'm ape'e ni iyo ni jika 'najankijnieye ni i'nio'. Siu'neje ni iyo ni Sinia', ti 'yiniye ka laja jijweyeja', jlam'ne ni iyo ti 'yaka'm ape'e ni jijweye ni i'nio'.

Sijwajieti jla'am ti kasts'eyasa'n

²⁶ I'lijwas, ataj enayi 'ate siuti Sinia' tana'ase pi. Je 'loj papo ka 'najajne'n ti asa'am, jla'yi ti je 'loj siunapo jwajla'a 'yijeneje'n, jla'yi ti je 'loj siunapo ti jiniewot inkasi.

²⁷ Jlampet ti Sinia' isimits'i siunapo ijiate ti lajk'ipa ka woyi ti je 'yijejne'n, 'yina naka ti iyo ka 'najwejlanitk'i wita'm siunapo 'yijejne'n. Ijiatjliyi isimayits'i siunapo napo i'nio' ijwil laj jijweyeja', 'nakayi ti siunapo i'nio' jijweye po' ja'najwelk'i wita'm.

²⁸ Sinia' isi'mik'i napoka ti tijwela jiniliajayi ti tiwet'ianaja, sekyi'i ti janetiajnat napoka ti tijwela ka ijiatayiji ka laja poye.

²⁹ 'Yina ti kia'iyo kajeyepa ti Sinia' iyo ka lajak'ipa ka ini'najnat ape'e ti jla'am.

³⁰ Ijiate pa Sinia' ti jla'am ti ijnotieyi wita'm pa Sijwajieti Jesús. 'Yina ti jla'am ti saka 'najankijnieye, jla'yi ti jla'am pi Sijwajieti ti it'imina ti Sinia' kasp'elisijne'n. Sekyi'i isiwaliyi'i ki sitis iyoyi, siu'neje ti it'imina ti kasts'isis jitieyi'i ni Sinia'. Jla'yi ti jla'am ti initojmat sitipe'e, it'iminayi ti ajwaye.

³¹ Ijiatjliyi, ka iyokieyi pet sitienkiujnieyeja' niwaka inamtis t'ipi, ti iyo'ate, “Siuti po' ni janjwel ka initonit'ni, 'esiji ka initoniti jla'am pa Saka'niona.”