ᐧᕌᒥᓐ 11 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡᒋᔖᒥᓂᑑ ᐋ ᒋᔖᐙᑐᑎᐙᑦ ᐅᑎᔨᔨᒻᐦ ᐃᔅᕋᐃᓚ 1 ᒦᓐ ᑯᑎᒡ ᒑᒀᓐ ᓂᐐ ᑯᒀᒋᐦᒑᔨᒧᓐ᙮ ᒌ ᐙᐱᓈᐤ ᐋ ᒋᔖᒥᓂᑑ ᐅᑎᔨᔨᒻᐦ? ᓂᒧᐃ ᑭᔨᑆ ᐅᐦᒋ ᐙᐱᓈᐤ᙮ ᐃᔅᕋᐄᓪ ᐄᔨᔨᐤ ᑭᔮᐦ ᓃᔨ᙮ ᐊᓂᔮ ᐋᑉᕋᐦᐋᒻ ᐋᐦ ᑖᑦ ᓂᒌ ᐅᐦᒋ ᐋᓂᔅᒑ ᐱᒫᑎᓰᓐ᙮ ᐱᓐᒋᒥᓐ ᑳ ᐃᔑᓂᐦᑳᓱᒡ ᐅᐹᔨᑯᑖᐅᓯᐎᒡ ᐋᑯᑖᐦ ᐙᐦᒋᔮᓐ᙮ 2 ᓂᒧᐃ ᐅᐦᒋ ᐙᐱᓈᐤ ᒋᔖᒥᓂᑑ ᐅᑎᔨᔨᒻᐦ, ᐊᓂᔮᔨᐤ ᔖᔥ ᐊᓂᑖᐦ ᐙᔥᑭᒡ ᑳ ᐅᐙᔮᐱᒫᑦ ᐐᔨ ᒑ ᒌ ᑎᐱᔨᐙᐎᓰᑦ᙮ ᒋᒋᔅᒑᔨᐦᑖᓈᐙᐤ ᑖᓐ ᐋ ᐄᔑ ᐋᔨᒨᒫᑭᓅᑦ ᐄᓛᐃᒑ ᐊᓂᑖᐦ ᒋᐦᒋᒥᓯᓂᐦᐄᑭᓂᐦᒡ᙮ ᒌ ᐋᔨᒨᑎᒧᐙᐤ ᒋᔖᒥᓂᑑ ᑖᓐ ᑳ ᐄᔑ ᐋᑳ ᒫᒨᔮᒻ ᐅᐦᒋ ᐋᐦ ᑎᔨᒡ ᐃᔅᕋᐄᓪ ᐄᔨᔨᐤ, ᒌ ᐃᔨᐤ, 3 “ᑎᐹᔨᐦᒋᒑᔨᓐ, ᒌ ᓂᐱᐦᐋᐅᒡ ᒋᒋᔅᒋᐙᐦᐄᒑᓰᒻ ᐅᒌ ᐄᔨᔨᐅᒡ᙮ ᒌ ᓂᔑᐎᓈᒋᐦᑖᐅᒡ ᒌ ᐱᒋᔅᑎᓂᒑᐤ ᒦᒋᓲᓈᐦᑎᒄ᙮ ᓃᔨ ᒫᐦᒑᔨ ᓂᐹᔨᑯᔑᓐ ᐋ ᓅᔔᔥᑳᑖᓐ᙮ ᓂᐐ ᓂᐱᐦᐄᑯᒡ ᒫᒃ ᑭᔮᐦ ᓃᔨ᙮” 4 ᐋᒄ ᒫᒃ ᑳᐦ ᐄᑎᑯᑦ ᑎᐹᔨᐦᒋᒑᓯᐤ, “ᓃᔣᔥᒡ ᑎᐦᑐ ᒋᔖᒥᑖᐦᑐᒥᑎᓂᐤ ᓂᒌ ᐱᐦᑳᓂᐦᐋᐅᒡ ᐊᓂᒌ ᐄᔨᔨᐅᒡ ᐋᑳ ᓂᐦᑖ ᐙᐦᒋ ᓃᐱᔅᑰᐱᔅᑎᐎᒡ ᐊᓂᔮᔨᐤ ᒥᓂᑑᐦᑳᓐ ᐯᐊᓪ ᑳ ᐃᔑᓂᐦᑳᓱᔨᒡ᙮” 5 ᐋᔪᐎᒄ ᒫᒃ ᒧᔮᒻ ᐋᔅᐱᔨᔨᒡ ᐊᓅᐦᒡ᙮ ᑖᐅᒡ ᐃᔅᕋᐄᓪ ᐄᔨᔨᐅᒡ ᐋᐦᐋᑳ ᒥᐦᒑᑎᒡ ᒋᔖᒥᓂᑑ ᐋ ᒌ ᐅᐙᔮᐱᒥᑯᒡ ᐊᓂᔮᔨᐤ ᐅᐦᒋ ᐋ ᒋᔖᐙᑎᓰᔨᒡ᙮ 6 ᐋ ᒋᔖᐙᑎᓰᑦ ᒋᔖᒥᓂᑑ ᐋᔪᐎᒄ ᐅᔮᔨᐤ ᐙᐦᒋ ᐎᔮᔨᒥᑯᒡ᙮ ᓂᒧᐃ ᐐᔨ ᐊᓂᔮᔨᐤ ᐋ ᒥᔪᐃᐦᑐᑎᐦᒡ᙮ ᐙᔥ ᐎᔮᔨᒫᑦ ᐊᐙᔨᐤᐦ ᐊᓂᔮᔨᐤ ᐅᐦᒋ ᐋ ᒥᔪᑐᑎᒥᔨᒡ, ᓂᒥᔮᔨᐤ ᐊᓂᔮᔨᐤ ᐐᔨ ᒥᒄ ᐅᒋᔖᐙᑎᓰᐎᓐ ᐅᐦᒋ᙮ 7 ᒑᒀᓐ ᒫᒃ ᒑ ᒌ ᐄᓈᓅᒡ ᔖᔥ? ᓂᒧᐃ ᒫᒃ ᐅᐦᒋ ᒥᔅᑭᒧᒡ ᐊᓂᒌ ᐃᔅᕋᐄᓪ ᐄᔨᔨᐅᒡ ᐊᓂᔮᔨᐤ ᓈᔥᒡ ᑳ ᓈᓂᑎᐙᔨᐦᑎᐦᒡ᙮ ᒥᒄ ᐊᓂᒌ ᒋᔖᒥᓂᑑ ᑳ ᐅᐙᔮᐱᒥᑯᒡ ᐋᐅᑯᓂᒡ ᐊᓂᒌ ᑳ ᒥᔅᑭᐦᒡ᙮ ᐋᒄ ᐊᓂᒌ ᑯᑎᑭᒡ ᓈᓈᓂᒌᒻ ᓂᒧᐃ ᐅᐦᒌ ᐹᐦᑎᐙᐅᒡ ᒋᔖᒥᓂᑑ ᑭᔮᐦ ᓂᒧᐃ ᐅᐦᒌ ᓂᔅᑐᐦᑎᒧᒡ᙮ 8 ᐋᐅᒄ ᐙᔥ ᑖᑆᐦ ᑳᐦ ᐄᑎᔥᑖᒡ ᐊᓂᑖᐦ ᒋᐦᒋᒥᓯᓂᐦᐄᑭᓂᐦᒡ, ᒌ ᑐᑖᑰᐎᒡ ᒋᔖᒥᓂᑑ ᒥᑐᓐ ᐋᑳ ᒑᒀᔨᐤ ᒑ ᒌ ᓂᔅᑐᐦᑎᐦᒡ ᐊᐦᒑᐦᑯᐎᓂᐦᒡ ᐄᔑ᙮ ᒌ ᑐᑖᑰᐎᒡ ᐋᑳ ᒑ ᒌ ᐙᐱᐦᑎᒸᒡ ᑖᓐ ᐋ ᐄᔨᐦᑎᔨᒡ ᑭᔮᐦ ᐋᑳ ᒑ ᒌ ᐹᐦᑎᐦᐙᒡ ᑖᓐ ᐋᐦ ᐄᔨᒡ᙮ ᐋᔥᒄ ᐊᓅᐦᒡ ᑳ ᒌᔑᑳᔨᒡ ᐋᔪᐎᒄ ᐋ ᐃᓯᓈᑯᓯᒡ᙮ 9 ᐊᓂᔮ ᒋᐦᒋᐅᒋᒫᐤ ᑌᕕᑦ ᑭᔮᐦ ᐐᔨ ᒌ ᐄᑎᓯᓂᐦᐄᒑᐤ, ᐋᑯᔥ ᐋ ᑎᔓᔨᑯᒡ ᑭᔮᐦ ᒫᒃ ᐋ ᓂᒀᑎᑯᒡ ᒋᑭ ᐃᓯᓈᑯᓂᔨᐤ ᐅᒥᑯᔖᐎᓂᐙᐤ᙮ ᐋᑯᔥ ᒋᑭ ᐱᐦᒋᔑᒥᑰᐎᒡ ᐊᓂᔮᔨᐤ ᐅᒥᑯᔖᐎᓂᐙᐤ᙮ ᐋᑯᔥ ᑭᑎ ᒫᑯᐦᐋᑭᓂᐎᒡ᙮ 10 ᐋᑯᔥ ᒑ ᒌ ᐋᑭᐙᐱᓈᑭᓂᐎᒡ ᒑᐦ ᐋᑳ ᐙᐱᐦᑎᐦᒡ ᑭᔮᐦ ᑳᒋᒡ ᒑ ᒌ ᐙᒋᓯᒡ ᐋ ᐃᔥᐱᔥ ᑯᔑᑯᔥᑳᑯᒡ ᐅᑖᔨᒫᔨᐦᑎᒧᐎᓂᐙᐤ᙮ 11 ᒦᓐ ᑯᑎᒡ ᒑᒀᓐ ᓂᐐ ᑯᒀᒋᐦᒑᒧᓐ᙮ ᐄᔥᐱᐦ ᑳᐦ ᐋᑎᐙᔨᒫᒡ ᒋᔖᒥᓂᑑ ᐊᓂᒌ ᒎᐤ ᑳ ᐄᑎᔅᑳᓈᓯᒡ, ᒌ ᓈᔅᐱᒡ ᐱᐦᒋᔑᓂᒡ ᐋ ᐊᓂᔮᔨᐤ ᑳ ᐱᐦᒋᔑᐦᒡ? ᓂᒧᐃ ᐅᐦᒋ ᓈᔅᐱᒡ ᐱᐦᒋᔑᓂᒡ᙮ ᐊᓂᔮᔨᐤ ᐋᐦ ᐋᑎᐙᔨᒫᒡ ᒋᔖᒥᓂᑑ ᐋᑯᑖᐦ ᑳ ᐅᐦᒋ ᓂᐦᐄᐱᔨᐦᑖᔨᒡ ᒑ ᒌ ᐱᒫᒋᐦᐋᔨᒡ ᐊᓂᔮᔨᐤ ᐋᑳ ᑳ ᒎᐤ ᐄᑎᔅᑳᓈᓰᔨᒡ᙮ ᒌ ᐱᒫᒋᐦᐋᔨᐤ ᒫᒃ ᐊᓂᔮᔨᐤ ᐋᑳ ᑳ ᒎᐤ ᐄᑎᔅᑳᓈᓰᔨᒡ ᒑ ᒌ ᐅᐦᑖᔨᐦᑎᐦᒡ ᐊᓂᒌ ᒎᐤ ᑳ ᐄᑎᔅᑳᓈᓯᒡ᙮ 12 ᐊᓂᑎᐦ ᑳ ᒥᒋᐦᑑᑎᐦᒡ ᐊᓂᒌ ᒎᐤ ᑳ ᐄᑎᔅᑳᓈᓯᒡ ᐋᑯᑖᐦ ᓈᔥᒡ ᑳ ᒋᔖᐙᑐᑎᐙᑦ ᒋᔖᒥᓂᑑ ᒥᓯᐙ ᐊᓂᔮᔨᐤ ᑯᑎᒃ ᐊᐙᔨᐤᐦ ᐃᔨᐦᒡ ᑳᐦ ᐄᑎᔅᑳᓈᓰᔨᒡ᙮ ᑭᔮᐦ ᒫᒃ ᐊᓂᔮᔨᐤ ᐋ ᒌ ᐱᐦᒋᔑᐦᒡ ᐋᑯᑖᐦ ᑭᔮᐦ ᒋᔖᒥᓂᑑ ᑳ ᐅᐦᒋ ᒥᔥᑎᐦ ᒥᔪᑐᑎᐙᑦ ᐊᓂᔮᔨᐤ ᐋᑳ ᑳ ᒎᐤ ᐄᑎᔅᑳᓈᓰᔨᒡ᙮ ᒑᔥᑎᓈᑖᔨᐦᑖᑯᓐ ᒫᒃ ᐊᑎᑎᐤ ᒑ ᒥᔖᔨᒡ ᒋᔖᒥᓂᑑ ᐅᒥᔪᐦᑳᒑᐎᓐ ᑳᐤ ᓂᑎᐙᐱᒥᑯᒑ ᒥᓯᐙ ᒎᐄᔨᔨᐤ᙮ ᒋᔖᒥᓂᑑ ᐋ ᐱᒫᒋᐦᐋᑦ ᐋᑳ ᑳ ᒎᐤ ᐄᑎᔅᑳᓈᓰᔨᒡ ᐊᐙᔨᐤᐦ 13 ᐋᒄ ᒫᒃ ᒌᔨᐙᐤ ᐋᑳ ᑳ ᒎᐤ ᐄᑎᔅᑳᓈᓰᔮᒄ ᒑ ᐊᔨᒥᐦᐄᑎᑯᒡ᙮ ᐋᐅᒄ ᓃᔨ ᒋᑎᐹᔅᑎᓕᒧᐙᐤ᙮ ᒨᔥ ᒫᒃ ᓂᑭ ᒋᔅᑖᔨᐦᑎᒥᐦᐄᑯᓐ ᐆ ᐋᐱᑎᓰᐎᓐ᙮ 14 ᐙᐱᒥᑣᐙ ᓃᒋ ᒎᐤ ᐄᔨᔨᐅᒡ ᐋ ᐙᐐᐦᑎᒫᑎᑯᒡ ᒥᔻᒋᒧᐎᓐ ᒋᑭ ᒌ ᐃᓯᓈᑯᓂᔨᐤ ᒑ ᒌ ᑐᑖᑯᒡ ᐱᔅᒡ ᑳᐤ ᒑ ᒌ ᓂᑎᐙᐱᒫᒡ ᒋᔖᒥᓂᑑ ᐋᒄ ᒫᒃ ᒑ ᐱᒫᒋᐦᐅᒡ᙮ 15 ᒫᒀᒡ ᑳᐦ ᐋᑑᐙᔨᒥᑯᒡ ᒋᔖᒥᓂᑑ ᐊᓂᒌ ᒎᐤ ᑳ ᐄᑎᔅᑳᓈᓯᒡ ᐋᑯᑖᐦ ᑳ ᐅᐦᒋᐱᔨᔨᒡ ᒥᓯᐙ ᐊᓂᒌ ᑯᑎᑭᒡ ᐃᔨᐦᒡ ᑳ ᐄᑎᔅᑳᓈᓯᒡ ᒑ ᒌ ᐅᐐᒑᐙᑭᓂᐦᑭᐙᑭᓂᐎᒡ ᒋᔖᒥᓂᑑ᙮ ᐄᔥᐱᐦ ᒫᒃ ᑳᐤ ᒦᓐ ᒌᐙ ᐅᑎᓂᑯᑣᐙ ᒋᔖᒥᓂᑑ ᐊᓂᒌ ᒎᐤ ᑳ ᐄᑎᔅᑳᓈᓯᒡ ᒧᔮᒻ ᐄᔨᔨᐅᒡ ᐋ ᒌ ᐴᓂᐱᒫᑎᓰᔨᒡ ᒦᓐ ᒫᒃ ᑳᐤ ᐋ ᐱᒫᑎᓰᔨᒡ ᒋᑭ ᐃᓯᓈᑯᓯᐎᒡ᙮ 16 ᐋ ᐱᐦᒀᓈᑦ ᐊᐙᓐ ᐋ ᐅᔅᒋᓰᔨᒡ ᐋᐃᐦᑯᓈᐤ ᐋ ᒥᒋᔥᑎᐦᐋᒫᑦ ᒋᔖᒥᓂᑑ ᐄᔑ ᐋᐦ ᑖᔨᒡ ᒥᓯᐙ ᐋᔅᑎᑎᔨᒡ ᐊᓂᔮᔨᐤ ᐋᐃᐦᑯᓈᐤ ᐐᔨ ᒋᔖᒥᓂᑑ ᐋ ᐃᔮᐙᑦ ᒥᓯᐙ ᐱᔮᐦᒋᓯᔨᐤ ᐃᓯᓈᑯᓂᔨᐤ᙮ ᑭᔮᐦ ᒫᒃ ᐐᔨ ᒋᔖᒥᓂᑑ ᑳ ᐱᒋᔅᑎᓂᒧᐙᑭᓅᒀ ᐊᓂᔮᔨᐤ ᐅᑎᐱᔨᐤ ᑭᔮᐦ ᐊᓂᔮᔨᐤ ᐅᑎᐦᑯᓐ ᐱᔮᐦᑭᓐ ᐃᓯᓈᑯᓐ᙮ 17 ᐊᓂᒌ ᐄᔨᔨᐅᒡ ᒎᐤ ᑳ ᐄᑎᔅᑳᓈᓯᒡ ᐋᐅᑯᓂᒡ ᐅᒌ ᐊᓕᕝ ᒥᔥᑎᒄ ᐊᓂᑖᐦ ᓂᐦᑖᐅᒋᐦᒋᑭᓐ ᐊᔅᒌᐦᒡ ᑳ ᓂᐦᑖᐅᒋᐦᐋᑭᓅᑦ᙮ ᒌ ᑎᑯᓐ ᐅᑎᐦᑯᓐ ᐋ ᒌ ᓈᑣᑭᐦᐄᑭᓂᐎᒡ ᐊᓂᑎᐦ ᐅᐦᒋ ᐊᓕᕝ ᒥᔅᑎᑯᐦᒡ᙮ ᑭᔮᐦ ᒌᐦ ᑖᐅᒡ ᐊᓂᑎᐦ ᐎᔨᐐᑎᒫ ᑯᑎᒃ ᐊᓕᕝ ᒥᔅᑎᑯᒡ ᓂᑎᐐ ᒥᒄ ᐋ ᒌ ᓂᐦᑖᐅᒋᐦᒡ, ᐋᔪᐎᒄ ᒫᒃ ᐅᐎᑎᐦᑯᓐ ᒌ ᒋᑭᒧᐦᑖᑭᓂᐎᔨᐤ ᐄᔑ ᐊᓂᑎᐦ ᐊᓕᕝ ᒥᔥᑎᒄ ᓂᐦᑖᐅᒋᐦᒋᑭᓐ ᐊᔅᒌᐦᒡ ᑳᓂᐦᑖᐅᒋᒡ᙮ ᒌᔨᐙᐤ ᒫᒃ ᐋᑳ ᑳ ᒎᐤ ᐄᑎᔅᑳᓈᓰᔮᒄ ᒋᐐᒋᐦᐄᑯᓈᐙᐤ ᑭᔮᐦ ᒌᔨᐙᐤ ᐅᐦᒋ ᐊᓂᔮᔨᐤ ᑳᐦ ᑐᑎᒧᐙᑦ ᒋᔖᒥᓂᑑ ᒎᐄᔨᔨᐤ᙮ 18 ᐊᑳᐐ ᒫᒃ ᒋᑭ ᐅᐦᒋ ᒫᔮᔨᒫᐙᐅᒡ ᐊᓂᒌ ᒧᔮᒻ ᐙᐦᑎᐦᑯᓐ ᐋ ᒌ ᓈᑣᑭᐦᐄᑭᓂᐎᒡ ᑳ ᐃᓯᓈᑯᓯᒡ᙮ ᒑᒀᓐ ᒑ ᐅᐦᒋ ᐐᐦ ᓂᓈᐹᐅᒧᔮᒄ? ᒧᔮᒻ ᑖᑆᐦ ᐊᓂᑎᐦ ᒥᔅᑎᑯᐦᒡ ᐋ ᐅᐦᒋᔮᒄ ᒋᑎᓯᓈᑯᓯᓈᐙᐤ᙮ ᐋᑯᑖᐦ ᐙᐦᒋ ᒥᔪ ᓂᐦᑖᐅᒋᔮᒄ᙮ ᓂᒥᔮᐤ ᒌᔨᐙᐤ ᓈᐦᑖᐅᒋᐦᐋᒄ ᐆ ᒥᔥᑎᒄ᙮ 19 ᒀᔣᓐ ᐱᔅᒡ ᐊᓂᑎᐦ ᐋ ᑎᔑᔮᒄ ᒋᑭ ᒌ ᐄᓈᐙᐤ, “ᐱᔅᒡ ᐅᑎᐦᑯᓐ ᒌ ᓈᑣᓂᒻ ᒋᔖᒥᓂᑑ ᓃᔨ ᒦᔥᑯᒡ ᒑ ᒌ ᓂᐦᑖᐅᒋᔮᓐ ᑖᓂᑖᐦ ᑳ ᓂᐦᑖᐅᒋᓃᔨᒡ ᐊᓂᔮᔨᐤ ᐅᑎᐦᑯᓐ᙮” 20 ᑖᑆᐦ ᑭᔨᑆ᙮ ᒥᒄ ᒫᒃ, ᒋᔖᒥᓂᑑ ᒌ ᐄᒑᓈᐤ ᐊᓂᔮᔨᐤ ᒎᐄᔨᔨᐤ ᐙᔥ ᐋ ᒌ ᐋᓍᐦᑖᑯᑦ᙮ ᒌᔨ ᒫᒃ ᐐ, ᒌ ᒥᔪᓂᐦᑖᐅᒋᓐ ᐊᓂᑎᐦ ᐊᓐ ᒥᔥᑎᒄ ᐙᔥ ᒋᒌ ᑖᑆᔮᔨᒫᐤ ᒋᔖᒥᓂᑑ᙮ ᐊᑳᐐ ᒋᑭ ᐅᐦᒋ ᓂᓈᐹᐅᒧᓐ᙮ ᑎᑯᓐ ᐊᐅᔅᑖ ᒑ ᒌ ᐄᔑ ᐃᔮᒀᒥᔨᓐ᙮ 21 ᓂᒧᐃ ᐅᐦᒋ ᒥᓈᒋᐦᐋᐤ ᒋᔖᒥᓂᑑ ᐊᓂᔮᔨᐤ ᒎᐤ ᑳᐦ ᐄᑎᔅᑳᓈᓰᔨᒡ, ᐊᓂᔮᔨᐤ ᒋᐦᒋᐙ ᐅᑎᐦᑯᓐ ᐊᓂᑎᐦ ᒥᔅᑎᑯᐦᒡ ᑳ ᐄᔑ ᑭᓂᐙᐱᒫᑭᓂᐎᔨᒡ᙮ ᒋᑎᐄᑖᔨᐦᑖᓐ ᐋ ᒫᒃ ᒑ ᒥᓈᒋᐦᐄᔅᒃ ᒌᔨ? 22 ᒋᐙᐱᐦᑎᒸᓈᓂᐤ ᒫᒃ ᑖᓐ ᐋ ᐃᔥᐱᔥ ᒥᔻᔨᐦᑖᑯᓯᑦ ᒋᔖᒥᓂᑑ ᑭᔮᐦ ᒋᐙᐱᐦᑎᒸᓈᓂᐤ ᑖᓐ ᒑ ᒌ ᐃᔥᐱᔥ ᐋᑳ ᒥᓈᑎᓰᑦ᙮ ᓂᒧᐃ ᒥᓈᒋᐦᐋᐤ ᐊᓂᔮᔨᐤ ᑳ ᐱᐦᒋᔑᓃᔨᒡ ᒥᒄ ᒫᒃ ᒑ ᒥᔪᑐᑎᒫᑯᐙᐤ ᑖᑆᐅᒑᔨᒫᒀ ᒨᔥ ᒑ ᒌ ᒥᔪᑐᑎᒫᑖᒄ᙮ ᐋᑳ ᒫᒃ ᐆ ᑎᔨᓈ ᑭᔮᐦ ᒌᔨ ᒋᑭ ᒥᓂᔔᒄ ᒋᔖᒥᓂᑑ᙮ 23 ᒥᔔ ᒫᒃ ᒥᐦᒋᔨᐙᔮᔨᐦᑎᐦᒀᐙ ᐋ ᒌ ᐋᓍᐦᑎᐦᒡ ᐊᓂᒌ ᒎᐤ ᐄᔨᔨᐅᒡ ᒦᓐ ᑳᐤ ᒋᑭ ᒋᑭᒧᐦᐋᑭᓂᐎᒡ ᑖᓂᑖᐦ ᑳ ᐅᐦᒋ ᓂᐦᑖᐅᒋᒡ᙮ ᐋᔪᐎᒄ ᑖᑆᐦ ᒑ ᒌ ᑐᑖᑯᒡ ᒋᔖᒥᓂᑑ᙮ 24 ᒌᔨᐙᐤ ᐋᑳ ᑳ ᒎᐤ ᐄᑎᔅᑳᓈᓰᔮᒄ ᐋᐅᒄ ᒌᔨᐙᐤ ᐅᐎᑎᐦᑯᓐ ᓂᑎᐐ ᒥᒄ ᑳ ᓂᐦᑖᐅᒋᒡ ᐊᓕᕝ ᒥᔅᑎᑯᒡ ᒋᑎᓯᓈᑯᓯᓈᐙᐤ᙮ ᐆ ᒫᒃ ᐅᑎᐦᑯᓐ, ᓂᐦᑖᐅᒋᐦᒋᑭᓐ ᐊᔅᒌᐦᒡ ᑳ ᓂᐦᑖᐅᒋᑦ ᐊᓕᕝ ᒥᔥᑎᒄ ᐋᑯᑖᐦ ᑳ ᒋᑭᒧᐦᑖᑭᓂᐎᒡ ᐋᐦ ᐋᑦ ᐋᑳ ᐊᓂᑎᐦ ᐅᐦᒋ ᓂᐦᑖᐅᒋᐦᒡ᙮ ᐆ ᒫᒃ ᐊᓕᕝ ᒥᔥᑎᒄ ᑳ ᓂᐦᑖᐅᒋᐦᐋᑭᓅᑦ ᐋᐅᑯᓂᒡ ᐅᒌ ᒎᐤ ᐄᔨᔨᐅᒡ᙮ ᒑᔥᑎᓈᔥ ᒫᒃ ᒋᑭ ᒌᐦ ᑐᑎᐙᐤ ᒋᔖᒥᓂᑑ ᐊᓂᔮᔨᐤ ᒎᐤ ᑳᐦ ᐄᑎᔅᑳᓈᓰᔨᒡ ᑳᐤ ᒑ ᒌ ᒋᐦᒋ ᓂᐦᑖᐅᒋᔨᒡ ᑖᓂᑖᐦ ᔖᔥ ᑳ ᓂᐦᑖᐅᒋᔨᒡ ᐊᓂᑖᐦ ᐹᒋ᙮ ᒥᓯᐙ ᐊᐙᔨᐤᐦ ᐋ ᒋᔖᐙᑐᑎᐙᑦ ᒋᔖᒥᓂᑑ 25 ᓃᒋᔖᓂᑎᒄ, ᒋᓂᑎᐙᔨᒥᑎᓈᐙᐤ ᒑ ᒌ ᓂᔅᑐᐦᑎᒸᒄ ᐅᔮᔨᐤ ᑳ ᐄᔑ ᒋᔅᒑᔨᐦᑖᑯᐦᑖᑦ ᒋᔖᒥᓂᑑ ᐋᒄ ᒫᒃ ᓂᒧᐃ ᒋᑭ ᐅᐦᒋ ᐄᑖᔨᐦᑎᓈᐙᐤ ᓈᔥᒡ ᐋ ᔨᑆᐦᑳᔮᒄ᙮ ᐊᓅᐦᒡ ᒫᒀᒡ ᒥᐦᒑᑐ ᐊᓂᒌ ᒎᐤ ᑳ ᐄᑎᔅᑳᓈᓯᒡ ᐐᐦ ᓰᐱᑎᒧᒡ᙮ ᒥᒄ ᒫᒃ ᒋᑭ ᐅᑎᐦᒋᐱᔨᔨᐤ ᑖᓂᑖᐦ ᒑ ᑖᑆᐦᑎᐦᒡ᙮ ᐋᔥᒄ ᒫᒃ ᐋᒸᔮ ᐅᑎᐦᒋᐱᔨᒡ ᐆ ᒥᓯᐙ ᐊᓂᒌ ᐋᑳ ᑳ ᒎᐤ ᐄᑎᔅᑳᓈᓯᒡ ᑎᐦᑐ ᒥᒄ ᒑ ᐅᐙᔮᐱᒥᑯᐙᒀ ᒋᔖᒥᓂᑑ ᒑ ᒌ ᐱᒫᒋᐦᐅᒡ, ᒋᑭ ᐱᒫᒋᐦᐅᒡ᙮ 26 ᐋᑯᑖᐦ ᒫᒃ ᒥᓯᐙ ᐃᔅᕋᐄᓪ ᐄᔨᔨᐤ ᒑ ᐱᒫᒋᐦᐋᑦ ᒋᔖᒥᓂᑑ᙮ ᒧᔮᒻ ᐋᑎᔥᑖᒡ ᐊᓂᑖᐦ ᒋᐦᒋᒥᓯᓂᐦᐄᑭᓂᐦᒡ, ᐊᓐ ᒑ ᐱᒫᒋᐦᐋᑦ ᐊᐙᔨᐤᐦ, ᓵᐃᔨᓂᐦᒡ ᒋᑭ ᐅᐦᑐᐦᑖᐤ᙮ ᒋᑭᑐᑎᐙᐤ ᐊᓂᔮᔨᐤ ᒉᑭᑉ ᐅᑖᓂᔥᑰᔒᒻ ᒑ ᒌ ᐴᓃᔨᒡ ᐋ ᒥᒋᐦᑑᑎᒥᔨᒡ᙮ 27 ᐋᔪᐎᒄ ᐅᔮᔨᐤ ᒑ ᐄᔑ ᓂᔅᑯᒨᒀᐤ ᒑ ᒌᐦ ᑐᑎᒧᒀ ᐙᐹᔨᐦᑎᒨᒀᐙ ᐅᒥᒋᐦᑣᐎᓂᐙᐤ᙮ 28 ᐊᓂᒌ ᐃᔅᕋᐄᓪ ᐄᔨᔨᐤ ᑳ ᐄᑎᔅᑳᓈᓯᒡ ᒌ ᐋᑎᐙᔨᐦᑎᒧᒡ ᒥᔻᒋᒧᐎᓂᔨᐤ᙮ ᐋᑯᑖᐦ ᐙᐦᒋ ᓅᑯᓃᔨᒡ ᐋ ᐅᐦᑳᑖᔮᔨᒫᒡ ᒋᔖᒥᓂᑑ, ᒑ ᒌ ᐱᒫᒋᐦᐅᔮᒄ ᒫᒃ ᒌᔨᐙᐤ ᐋᑳ ᐃᔅᕋᐄᓪ ᐄᔨᔨᐤ ᐄᑎᔅᑳᓈᓰᔮᒄ ᐋᔪᐎᒄ ᐙᐦᒋ ᐄᔅᐱᔨᔨᒡ ᐆ᙮ ᐊᔮᐱᒡ ᒫᒃ ᒋᔖᒥᓂᑑ ᒌ ᐙᔮᐱᒫᐤ ᐃᔅᕋᐄᓪ ᒑ ᐅᑏᔨᔨᒥᑦ ᐋ ᓵᒋᐦᐋᑦ ᐙᔥ ᒌ ᓵᐦᒋᐦᐋᐤ ᐅᑖᓂᔥᒑ ᐅᐙᐦᑯᒫᑭᓂᔨᐤ᙮ 29 ᑖᐹ ᓂᐦᑖ ᐄᒑᓈᐤ ᒋᔖᒥᓂᑑ ᐊᓂᔮᔨᐤ ᑳ ᐅᐙᔮᐱᒫᑦ᙮ ᑭᔮᐦ ᓂᒧᐃ ᓂᐦᑖ ᒦᓐ ᑳᐤ ᒌᐙ ᐅᑎᓂᒸᐤ ᑖᓂᔮᔨᐤ ᔖᔥ ᑳ ᐄᔑ ᒥᔮᑦ᙮ 30 ᓂᒧᐃ ᑰᐦᒋ ᓂᓂᐦᐄᐦᑎᐙᐙᐤ ᒋᔖᒥᓂᑑ ᐊᓂᑖᐦ ᐅᑖᐦᒡ ᒌᔨᐙᐤ ᐋᑳ ᑳ ᒎᐤ ᐄᑎᔅᑳᓈᓰᔮᒄ᙮ ᐊᓂᔮᔨᐤ ᒫᒃ ᐊᓅᐦᒡ ᐋᐦᐋᑳ ᓂᓂᐦᐄᐦᑐᐙᒡ ᐊᓂᒌ ᒎᐤ ᑳ ᐄᑎᔅᑳᓈᓯᒡ ᐋᔪᐎᒄ ᐙᐦᒋ ᒋᔅᑎᒫᒑᔨᒥᑖᒄ ᒌᔨᐙᐤ ᒋᔖᒥᓂᑑ᙮ 31 ᐋᔪᐎᒄ ᒫᒃ ᒧᔮᒻ ᒑ ᑐᑎᒧᐙᑭᓂᐎᒡ ᐊᓂᒌ ᒎᐤ ᑳ ᐄᑎᔅᑳᓈᓯᒡ ᑖᓐ ᑳᐦ ᑐᑎᒫᑯᐎᔮᒄ᙮ ᐊᓅᐦᒡ ᓂᒧᐃ ᓂᓃᐦᑐᐙᐅᒡ ᒋᔖᒥᓂᑑ᙮ ᒥᒄ ᐋᔥᒄ ᒋᑭ ᐅᑎᐦᒋᐱᔨᐤ ᐋ ᒋᔅᑎᒫᒑᔨᒥᑯᒡ ᒋᔖᒥᓂᑑ ᒧᔮᒻ ᑳ ᐄᔑ ᒋᔅᑎᒫᒑᔨᒥᑖᒄ ᑭᔮᐦ ᒌᔨᐙᐤ᙮ 32 ᐙᔥ ᒋᔖᒥᓂᑑ ᑳ ᐱᒋᔅᑎᓈᑦ ᒥᓯᐙ ᐊᐙᔨᐤᐦ ᒧᔮᒻ ᐋ ᒥᒫᐦᒋᒀᐱᐦᑳᑎᑯᔨᒡ ᐊᓂᔮᔨᐤ ᐋᐦᐋᑳ ᓂᓃᐦᑎᒥᔨᒡ ᐋᑦ ᒑ ᒌ ᐅᐦᒋ ᐙᐱᐦᑏᔮᑦ ᐋ ᒋᔅᑎᒫᒑᔨᒫᑦ ᒥᓯᐙ ᐄᔨᔨᐤ᙮ ᒋᔅᑖᔨᐦᑖᑯᓯᐤ ᒋᔖᒥᓂᑑ 33 ᓈᔥᑖᑆᐦ ᐙᔪᒡ ᐃᔮᐤ ᑭᒑᐦᑎᐙᔨᐦᑎᒧᐎᓂᔨᐤ ᑭᔮᐦ ᒋᔅᒑᔨᐦᑎᒧᐎᓂᔨᐤ ᒋᔖᒥᓂᑑ᙮ ᓂᒧᐃ ᑎᑯᓂᔨᐤ ᒑᒀᔨᐤ ᐋᐦᐋᑳ ᒋᔅᒑᔨᐦᑎᐦᒃ᙮ ᐄᔥᐱᐦ ᐙᔮᔨᐦᑎᐦᒃ ᒑᒀᔨᐤ ᓂᒧᐃ ᐊᐙᔨᐤᐦ ᒌ ᐐᐦᑎᒥᔨᐤ ᒑᒀᔨᐤ ᐊᓂᑖᐦ ᐙᐦᒋ ᐄᔑ ᐎᔮᔨᐦᑎᐦᒃ᙮ ᓂᒧᐃ ᐊᐙᔨᐤᐦ ᒌ ᒥᔪ ᒋᔅᒑᔨᐦᑎᒥᔨᐤ ᑖᓐ ᐋᐦᑎᒃ᙮ 34 ᒧᔮᒻ ᐋᑎᔥᑖᒡ ᐊᓂᑖᐦ ᒋᐦᒋᒥᓯᓂᐦᐄᑭᓂᐦᒡ, ᓂᒧᐃ ᒥᑐᓐ ᐊᐙᓐ ᒋᔅᒑᔨᐦᑎᒻ ᑖᓐ ᐋᔨᑖᔨᐦᑎᒥᔨᒡ ᑎᐹᔨᐦᒋᒑᓯᐤ᙮ ᓂᒧᐃ ᒥᑐᓐ ᐊᐙᓐ ᒋᑭ ᒌ ᐐᐦᑎᒧᐙᐤ ᑖᓐ ᒋᐱᐦ ᑎᔨᐤ᙮ 35 ᑖᐤ ᐋ ᐊᐙᓐ ᐋ ᒌ ᐊᐅᐦᐋᑦ ᒋᔖᒥᓂᑑ ᒑᒀᔨᐤ ᐋᒄ ᒫᒃ ᒑ ᒌ ᐃᓯᓈᑯᓃᔨᒡ ᐋ ᐊᐅᐦᐋᓱᒥᑯᑦ? 36 ᐐᔨ ᒋᔖᒥᓂᑑ ᒥᓯᐙ ᒑᒀᔨᐤ ᒌ ᐅᔑᐦᑖᐤ᙮ ᐐᔨ ᒥᓯᐙ ᒑᒀᔨᐤ ᓈᓈᑭᒋᐦᑖᐤ᙮ ᐐᔨ ᒥᓯᐙ ᒑᒀᔨᐤ ᑎᐱᔨᐙᐅᓯᐤ᙮ ᐐᔨ ᒫᒃ ᑳᒋᒡ ᑭᑎ ᐐᐦ ᒋᔅᑖᔨᒫᑭᓂᐤ᙮ ᐋᒥᓐ᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.