ᐦᐄᑉᕉ 5 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡ1 ᒥᓯᐙ ᒫᐅᒡ ᑳ ᓃᑳᓈᔮᔨᐦᑖᑯᔑᑦ ᒋᔖᐊᔨᒥᐦᐋᐅᒋᒫᐤ ᑖᐙᔨᔥ ᐅᑎᔨᔨᒻᐦ ᐋᐦ ᑖᔨᒡ ᒌ ᐅᐦᒋ ᐅᐙᔮᐱᒫᑭᓂᐤ ᒑ ᒌ ᐋᐱᑎᔒᔥᑎᐙᑦ ᒋᔖᒥᓂᑑ ᐐᔨᐙᐤ ᐅᐦᒋ᙮ ᒌ ᐱᒋᔅᑎᓂᒑᔅᑎᒧᐙᐤ ᐊᓂᔮᔨᐤ ᐄᔨᔨᐤᐦ ᑭᔮᐦ ᒌ ᒥᒋᔥᑖᐦᐊᒫᐤ ᒑ ᒌ ᐙᐹᔨᐦᑎᒧᐙᑭᓂᐎᔨᒡ ᐊᓂᔮᔨᐤ ᐄᔨᔨᐤᐦ ᐅᒥᒋᐦᑣᐎᓂᔨᐤ᙮ 2 ᐙᔥ ᒋᔅᒑᔨᐦᑎᒻ ᐃᔮᒀ ᒑ ᒌᐦ ᑐᑎᐙᑦ ᐊᓂᔮᔨᐤ ᐅᑎᔨᔨᒻᐦ ᐋᐦᐋᑳ ᐄᑆᐦᑳᔨᒡ ᑭᔮᐦ ᐋᐦᐋᑳ ᑯᐃᔅᒄ ᑎᔨᒡ, ᐙᔥ ᑭᔮᐦ ᐐᔨ ᐊᔮᐱᒡ ᐋᔨᒥᓯᐤ ᑭᔮᐦ ᐎᓂᐱᔨᐤ ᒫᓐ᙮ 3 ᐋᔪᐎᒄ ᒫᒃ ᑭᔮᐦ ᐐᔨ ᐙᐦᒋ ᒥᒋᔥᑎᐦᐋᒫᑦ ᒑ ᒌ ᐙᐹᔨᐦᑎᒧᐙᑭᓅᑦ ᐅᒥᒋᐦᑣᐎᓐᐦ ᑭᔮᐦ ᒫᒃ ᐊᓂᔮᔨᐤ ᐄᔨᔨᐤᐦ ᒑ ᒌ ᐙᐹᔨᐦᑎᒧᐙᑭᓂᐎᔨᒡ ᐅᒥᒋᐦᑣᐎᓂᔨᐤᐦ᙮ 4 ᓂᒧᐃ ᐊᐙᓐ ᒋᑭ ᒌ ᐎᔮᔨᐦᑎᒻ ᒑ ᒌ ᒋᔅᑖᔨᐦᑖᑯᐦᐄᓱᑦ ᐋ ᓃᑳᓈᔨᐦᑖᑯᔑᑦ ᐋ ᒋᔖᐊᔨᒥᐦᐋᐅᒋᒫᐅᑦ᙮ ᒋᔖᒥᓂᑑ ᐋᐅᒄ ᐙᐙᔮᐱᒫᑦ ᐊᐙᔨᐤᐦ ᒑ ᒋᔖᐊᔨᒥᐦᐋᐅᒋᒫᐎᔨᒡ, ᒧᔮᒻ ᑳ ᐄᔑ ᐅᐙᔮᐱᒫᑦ ᐁᕋᓐ ᑳ ᐃᔑᓂᐦᑳᓱᔨᒡ ᒑ ᒌ ᒋᔖᐊᔨᒥᐦᐋᐅᒋᒫᐎᔨᒡ᙮ 5 ᐋᔪᐎᒄ ᒫᒃ ᒧᔮᒻ ᑭᔮᐦ ᐐᔨ ᙭ ᑳᐦ ᑎᒃ᙮ ᓂᒧᐃ ᐐᔨ ᐅᐦᒋ ᐎᔮᔨᐦᑎᒻ ᒑ ᒌ ᒋᔅᑖᔨᐦᑖᑯᐦᐄᓱᑦ ᐋ ᒋᔖᐊᔨᒥᐦᐋᐅᒋᒫᐅᑦ᙮ ᒥᒄ ᒫᒃ ᒋᔖᒥᓂᑑ ᒌ ᐄᑎᑰ, ᒌᔨ ᓂᑯᔅ, ᓃᔨ ᑰᐦᑖᐎᑐᑎᐎᓐ ᐊᓅᐦᒡ ᐆ ᑳᔑᑳᒡ᙮ 6 ᒦᓐ ᑎᑯᓂᔨᐤ ᒋᐦᒋ ᒫᓯᓂᐦᐄᑭᓂᒡ ᒋᔖᒥᓂᑑ ᐋ ᒌ ᐃᔨᑦ, ᑳᒋᒡ ᐋ ᐊᔨᒥᐦᐋᐅᒋᒫᐅᔨᓐ, ᒧᔮᒻ ᒣᓪᑭᓯᑌᒃ ᑳ ᐃᔑᓂᐦᑳᓱᑦ ᑳ ᐄᔑ ᐊᔨᒥᐦᐋᐅᒋᒫᐆᑦ᙮ 7 ᒫᒀᒡ ᐅᑎᐦ ᐊᔅᒌᐦᒡ ᑳᐦ ᑖᑦ ᒌᓴᔅ ᒥᐦᒑᑣᐤ ᒌ ᐃᓯᓈᑯᓯᐤ ᓲᐦᒃ ᐋ ᒋᔣᐙᑦ ᓂᑐᑎᒧᐙᑦ ᑭᔮᐦ ᐋ ᒫᑑᑦ ᐊᓂᔮᔨᐤ ᑳ ᒋᔅᒑᔨᒫᑦ ᒑ ᒌ ᐱᒫᒋᐦᐄᑯᑦ ᓂᐱᐎᓂᐦᒡ ᐅᐦᒋ᙮ ᒌ ᐹᐦᑖᑰ ᒫᒃ ᐙᔥ ᒌ ᑎᐱᐦᑖᔨᒨᔅᑎᐙᐤ ᑭᔮᐦ ᒌ ᓈᓃᐦᑎᐙᐤ᙮ 8 ᐋᑦ ᐋ ᒌ ᐅᑯᓰᑐᑖᑯᑦ ᒋᔖᒥᓂᑑᐦ ᒌᓴᔅ, ᐊᔮᐱᒡ ᐋᑯᑎᐦ ᑳ ᒋᔅᒑᔨᐦᑎᐦᒃ ᒥᑐᓐ ᒑ ᒌ ᓂᓂᐦᐄᐦᑎᐙᑦ ᐊᓂᔮᔨᐤ ᑳ ᐄᔑ ᓂᓈᐦᑳᒋᐦᐋᑭᓅᑦ᙮ 9 ᐊᓂᔮᔨᐤ ᒫᒃ ᓈᔥᒡ ᑖᐱ ᑯᐃᔅᒄ ᐋ ᒌ ᓂᓃᐦᑎᐦᒃ ᒌᓴᔅ ᒑ ᒌ ᓂᓈᐦᑳᒋᐦᐋᑭᓅᑦ ᐋᑯᑖᐦ ᑳ ᐅᐦᒋ ᒥᔮᑭᓅᑦ ᑳᒋᒡ ᒑ ᒌ ᐱᒫᒋᐦᐋᑦ ᒥᓯᐙ ᐊᓂᔮᔨᐤ ᑳ ᓂᓃᐦᑖᑯᑦ, 10 ᑭᔮᐦ ᒋᔖᒥᓂᑑ ᑳ ᐅᐙᔮᐱᒥᑯᑦ ᒑ ᒌ ᒋᔖᐊᔨᒥᐦᐋᐅᒋᒫᐅᑦ ᒧᔮᒻ ᒣᓪᑭᓯᑌᒃ ᐋ ᐄᔑ ᒋᔖᐊᔨᒥᐦᐋᐅᒋᒫᐎᔨᒡ᙮ ᓲᐦᒃ ᐐᐦ ᑐᑎᐦᑖᐤ ᒑ ᒌ ᐄᔑ ᓂᐦᑖᐅᒋᔨᐦᒄ ᑎᐹᔨᐦᒋᒑᓯᐤ ᐋᐦ ᑖᑦ 11 ᐋᔥᒄ ᒥᔥᑏᐦ ᑎᑯᓐ ᑖᓐ ᒑ ᒌ ᐄᔑ ᐐᐦᑎᒫᑖᐦᒡ ᒥᒄ ᒫᒃ ᓈᔥᒡ ᓂᑎᔨᒥᐦᐄᑯᓈᓐ, ᐙᔥ ᒋᐱᓰᓈᐙᐤ ᒑ ᒌ ᓂᔅᑐᐦᑎᒫᒄ᙮ 12 ᔖᔥ ᐙᔥ ᒋᐱᐦ ᒋᔅᑯᑎᒧᐙᐙᐅᒡ ᐄᔨᔨᐅᒡ ᑖᓐ ᐋ ᐄᔑ ᑖᑆᒥᑭᓃᔨᒡ ᒋᔖᒥᓂᑑ ᐅᑎᔨᒧᐎᓐᐦ ᔖᔥ ᐙᔥᑭᒡ ᑳ ᑖᑆᐦᑎᒫᒄ ᒌᔨᐙᐤ ᒥᔻᒋᒧᐎᓐ᙮ ᒥᒄ ᒫᒃ ᓂᑎᐙᔨᐦᑖᑯᓐ ᒦᓐ ᐊᑎᑎᐤ ᒑ ᒌ ᒋᔅᑯᑎᒫᑯᐎᔮᒄ ᑖᓐ ᑳ ᐄᔑ ᒋᔅᑯᑎᒫᑯᐎᔮᒄ ᐅᔅᑭᒡ ᑳ ᒋᐦᒋ ᑖᑆᐦᑎᒫᒄ᙮ ᒧᔮᒻ ᐊᐱᔥᑖᐙᔑᔑᒡ ᒥᒄ ᑑᑑᓯᓈᐳᔨᐦ ᑳ ᒥᓂᐦᐋᑭᓂᐎᒡ ᒋᑎᐄᑖᔨᐦᑖᑯᓯᓈᐙᐤ᙮ ᐙᔥ ᓂᒧᐃ ᒌ ᒦᒋᐎᒡ ᐎᔮᓯᔨᐤ ᐊᐱᔥᑖᐙᔑᔑᒡ᙮ 13 ᐊᓂᒌ ᐋᐙᓂᒌ ᒧᔮᒻ ᐊᐱᔅᑖᐙᔑᔒᒡ, ᓈᔥᑎᔨᔥ ᓂᒫᐦ ᒋᔅᒑᔨᐦᑎᒨᒡ ᒋᔅᑰᑎᒫᒑᐎᓂᔨᐤ ᑯᐃᔅᒄ ᐋ ᐄᔑ ᐱᒫᑎᓰᓈᓂᐐᒡ᙮ 14 ᐙᔥ ᐊᓂᔮᔨᐤ ᐎᔮᓯᔨᐤ ᐋᔪᐎᒄ ᒫᐦᒋᒡ ᐊᓂᒌ ᑳ ᒋᔖᐄᔨᔨᐙᔨᐦᑎᐦᒡ᙮ ᐊᓐ ᒫᒃ ᐊᐙᓐ ᒨᔥ ᒦᔮᒥᑐᓈᔨᐦᑎᒸᑦ ᒋᔖᒥᓂᑑ ᐅᑎᔨᒧᐎᓂᔨᐤᐦ, ᐋᑯᑎᐦ ᐙᐦᒋ ᒋᔅᑯᑎᒨᐙᑭᓅᑦ ᒑ ᒌ ᓂᓯᑐᓂᐦᒃ ᑖᓂᑎ ᐊᔨᐦᒡ ᐋᓰᓈᑰᓃᔨᒡ ᐋᒦᔻᔒᒡ ᑭᔮᐦ ᐊᓂᔮᔨᐤ ᒦᔮᔮᑎᓃᔨᒡ᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.