ᐄᕕᓰᔨᓐ 6 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡᐊᐙᔑᔑᒡ ᑭᔮᐦ ᒫᒃ ᐅᓃᒋᐦᐄᑯᒫᐅᒡ 1 ᒌᔨᐙᐤ ᐊᐙᔑᑐᒃ ᐋ ᑖᑆᔮᔨᒫᒄ ᑎᐹᔨᐦᒋᒑᓯᐤ ᒋᐱᐦ ᓈᓂᐦᐄᐦᑐᐙᐙᐅᒡ ᒋᓃᒋᐦᐄᑯᐙᐅᒡ ᐙᔥ ᑯᐃᔅᒄ ᐃᓯᓈᑯᓐ ᐆ ᒑ ᒌ ᑎᔮᒄ᙮ 2 ᒋᔅᑖᔨᒻ ᑰᐦᑖᐐ ᑭᔮᐦ ᒋᑳᐐ᙮ ᐋᔪᐎᒄ ᐅᔮᔨᐤ ᐄᑎᔓᐙᐎᓂᔨᐤ ᓃᔥᑎᒻ ᒫᐅᒡ ᑳ ᓂᔅᑯᒧᑦ ᒋᔖᒥᓂᑑ ᓂᓈᑭᑎᐙᔨᐦᑎᒥᔨᒑ ᐊᐙᔨᐤᐦ ᒑᔥᑎᓈᔥ ᒑ ᒥᔪᑐᑎᒧᐙᑦ, 3 ᒋᑭ ᒥᔪᐱᔨᓈᐙᐤ ᑭᔮᐦ ᓈᐅᔥ ᒋᑭ ᐱᒫᑎᓰᓈᐙᐤ ᐅᑎᐦ ᐊᔅᒌᐦᒡ᙮ 4 ᒌᔨᐙᐤ ᐅᐦᑖᐐᒫᑐᒄ, ᐊᑳᐐ ᓈᓂᑐ ᒋᔑᐙᐦᐋᐦᑯᒡ ᒋᑎᐙᔑᔒᒧᐙᐅᒡ, ᑎᔨᑯᒡ ᑯᐃᔅᒄ ᐄᔑ ᐅᐦᐱᓂᐦᑖᐅᒋᓈᐦᑯᒡ ᒑ ᒌ ᒋᔅᒑᔨᐦᑎᒥᐦᐋᑯᒡ ᑖᓐ ᑳ ᐄᔑ ᒋᔅᑯᑎᒫᒑᔨᒡ ᑎᐹᔨᐦᒋᒑᓯᐤ ᒑ ᒌ ᓈᓂᐦᐄᐦᑐᐙᒡ ᑭᔮᐦ ᐋᔪᐎᒄ ᒋᐱᐦ ᐄᔑ ᐱᒫᑎᓰᐎᒡ᙮ ᑖᓐ ᒋᐱᐦ ᑑᐎᒡ ᐋᐱᒋᐦᐋᑭᓂᒡ ᑭᔮᐦ ᒫᒃ ᐅᒋᒫᒧᐙᐤ 5 ᒌᔨᐙᐤ ᑳ ᑖᐱ ᑎᐹᔨᐦᑖᑯᓰᔮᒄ ᐋᐦ ᐋᐱᑎᔒᔥᑑᐙᒄ ᐊᐙᓐ ᒋᐱᐦ ᓂᓂᐦᐄᐦᑎᐙᐙᐅᒡ ᐊᓂᒌ ᑰᒋᒫᒨᐙᐅᒡ ᐅᑎᐦ ᐊᔅᒌᐦᒡ᙮ ᔮᒀᐦ ᐄᑖᔨᒫᐦᑯᒡ ᑭᔮᐦ ᔮᒀᒦᔥᑐᐙᐦᑯᒡ ᑭᔮᐦ ᑯᐃᔅᒄ ᐄᔑ ᐋᐱᑎᔒᔥᑑᐙᐦᑯᒡ ᒧᔮᒻ ᒑ ᐄᔑ ᐋᐱᑎᔒᔥᑑᐙᐙᑯᐱᓈ ᙭᙮ 6 ᐊᑳᐐ ᒥᒄ ᐋ ᑭᓂᐙᐱᒥᔅᒃ ᑰᒋᒫᒻ ᓲᐦᒃ ᐋᐱᑎᓰᐦ, ᒥᒄ ᐊᓂᔮᔨᐤ ᒑ ᒌ ᓂᐦᐋᔨᑎᒥᐦᐄᑦ᙮ ᐙᔥ ᙭ ᐅᑖᐱᒋᐦᐋᑭᓐᐦ ᒋᐱᐦ ᐄᔑᑭᓂᐙᐱᒦᓲᓐ ᑭᔮᐦ ᓂᑎᐙᔨᐦᑖᑯᓯᔨᐤ ᒥᑐᓐ ᐅᑖᐦᐄᔨᔨᒡ ᒑ ᒌ ᐅᐦᒋ ᑐᑎᒥᔨᒡ ᒋᔖᒥᓂᑑ ᐅᑎᑖᔨᐦᑎᒧᐎᓂᔨᐤ᙮ 7 ᐙᔥ ᒋᐱᐦ ᐐᐦ ᑐᑖᓐ ᒋᑖᐱᑎᓰᐎᓐ ᐋᑳ ᐊᔅᑎᓂᒥᓐ ᐎᔮᔅᑖᔨᐦᑎᒧᐎᓐ᙮ ᑖᐹ ᒥᒄ ᑰᒋᒫᒻ ᒋᑖᐱᑎᓯᔅᑎᐙᐤ, ᑎᐹᔨᐦᒋᒑᓯᐤ ᐋᐅᒄ ᐙᒋᐦᒡ ᐃᔮᐱᑎᔑᔥᑑᑦ᙮ 8 ᐐᐦ ᒋᔅᒑᔨᐦᑎᒧᒄ ᑖᐹ ᐃᔨᐦᒡ ᑭᑎ ᐅᐦᒋ ᐄᔑ ᑎᐱᐦᐊᒧᐙᐤ ᑎᐹᔨᐦᒋᒑᓯᐤ ᐊᐙᔨᐤᐦ ᐋᑎ ᐊᓂᔮᔨᐤ ᑳ ᐅᒋᒫᐎᔨᒡ ᑭᔮᐦ ᒫᒃ ᐊᓂᔮᔨᐤ ᑳᐦ ᐋᐱᒋᐦᐋᑭᓂᐎᔨᒡ᙮ ᒥᒄ ᑖᓐ ᐋ ᐄᔑ ᓅᑯᐦᑖᔨᒡ ᐋ ᒌ ᐄᔑ ᒥᔻᐱᑎᓰᔨᒡ ᐊᐙᔨᐤᐦ, ᐋᔪᐎᒄ ᒑ ᐄᔑ ᑎᐱᐦᐊᒧᐙᑦ᙮ 9 ᒌᔨᐙᐤ ᑭᔮᐦ ᑳ ᐅᒋᒫᐎᔮᒄ, ᒥᔪᑐᑖᐦᑯᒡ ᒋᑖᐱᒋᐦᐋᑭᓂᐙᐅᒡ᙮ ᐊᑳᐐ ᓵᒑᔨᐦᑎᒥᐦᐋᐦᑯᒡ᙮ ᐙᔥ ᒋᒋᔅᒑᔨᐦᑖᓈᐙᐤ ᐋ ᐹᔨᑯᑦ ᑯᒋᒫᒧᐙᐤ᙮ ᐋᐅᒄ ᐆ ᑎᐹᔨᐦᒋᒑᓯᐤ ᒋᐦᒋᒌᔑᑯᐦᒡ ᑳᐦ ᑖᑦ᙮ ᒥᓯᐙ ᒫᒃ ᐊᐙᔨᐤᐦ ᑖᐱᔥᑯᓐ ᐄᑖᔨᒫᐤ, ᓂᒧᐃ ᐊᐅᔅᑖ ᒥᔪᑐᑎᐙᐤ ᐊᐙᔨᐤᐦ ᑳ ᐅᒋᒫᐎᔨᒡ᙮ ᒑ ᐄᔑ ᐃᔮᔅᑭᐐᑦ ᐊᐙᓐ ᑳ ᐱᔮᐦᒋᓯᑦ ᐊᐦᒑᐦᑯᐎᓂᐦᒡ ᒑ ᒌ ᐄᔑ ᒫᓯᐦᒑᑦ 10 ᐋᐅᒄ ᒫᐦᒑᔨ ᒑ ᐄᑎᑯᒡ ᒑᒀᓐ, ᓃᒋᔖᓂᑎᒄ᙮ ᐊᓂᑖᐦ ᑎᐹᔨᐦᒋᒑᓯᐤ ᐅᓲᐦᑳᑎᓰᐎᓂᐦᒡ ᑭᔮᐦ ᐅᒥᔅᑰᓰᐎᓂᐦᒡ ᐋᑯᑖᐦ ᐐᐦ ᐄᔑ ᐋᔨᒋᑳᐳᒄ᙮ 11 ᐳᔅᑎᔅᑭᒥᐦᒄ ᒫᒃ ᒥᓯᐙ ᒋᓂᑑᐱᔫᐋᐱᒋᐦᑖᐎᓂᐙᐤ ᑖᓐ ᑳ ᐄᔑ ᒥᔨᑖᐦᒄ ᒋᔖᒥᓂᑑ ᒑ ᒌ ᐄᔑ ᒫᓯᐦᒑᐙᒑᐙᐦᒄ ᐋᒄ ᒫᒃ ᒑ ᒌ ᓲᐦᒋᑳᐳᔅᑐᐙᒄ ᑭᔮᐦ ᒑ ᒌ ᓈᓂᑳᐦᐊᒫᓱᐙᒄ ᑖᓐ ᐋ ᐄᔑ ᐎᓂᒨᔨᑖᒄ ᒥᒋᒥᓂᑑ᙮ 12 ᐙᔥ ᓂᒧᐃ ᓈᐦᐄᔨᐤ ᐄᔨᔨᐅᒡ ᒌ ᒫᓯᐦᐋᓅᒡ᙮ ᒥᒋᐊᐦᒑᐦᑯᒡ ᑳ ᑎᐹᔨᐦᒋᒑᒡ ᒫᒃ ᒌ ᒫᓯᐦᐋᓅᒡ ᑭᔮᐦ ᐊᓂᒌ ᓈᔥᒡ ᑳ ᓲᐦᒑᔨᐦᑖᑯᓯᒡ ᑭᔮᐦ ᐊᓂᒌ ᑳ ᓃᑳᓂᔥᑭᐦᒡ ᐊᐅᑳᔅᑖᐎᓂᔨᐤ ᐅᑎᐦ ᐊᔅᒌᐦᒡ ᑳᐦ ᑎᑯᓃᔨᒡ᙮ ᒌ ᒫᓯᐦᐋᓅᒡ ᑭᔮᐦ ᐊᓂᒌ ᒥᐦᒑᑐ ᒥᒋᐊᐦᒑᐦᑯᒡ ᐊᓂᑖᐦ ᐃᔥᐱᒥᐦᒡ ᑳᐦ ᑖᒡ᙮ 13 ᐋᐅᒄ ᒫᒃ ᒑ ᐅᐦᒋ ᐳᔅᑎᔅᑭᒫᒄ ᐊᓐ ᒥᓯᐙ ᒋᓂᑑᐱᔫᐋᐱᒋᐦᑖᐎᓂᐙᐤ ᑖᓐ ᑳ ᐄᔑ ᒥᔨᑖᐦᒄ ᒋᔖᒥᓂᑑ ᒑ ᒌ ᒫᓯᐦᒑᐙᒑᐙᐦᒄ, ᐋᒄ ᒫᒃ ᓂᒧᐃ ᒋᑭ ᐅᐦᒋ ᔑᐦᑯᒋᐦᐄᑯᓈᐙᐤ ᑭᔮᐦ ᐊᔮᐱᒡ ᐋᔥᒄ ᒑ ᒌ ᐋᔨᒋᑳᐳᔮᒄ ᐄᔥᐱᐦ ᓲᐦᒃ ᑯᒀᒋᐦᐄᑖᒀ ᒥᒋᒥᓂᑑ᙮ 14 ᐋᔨᒋᑳᐳᒄ ᒫᒃ, ᐋ ᐱᐦᑯᐦᑖᐦᐅᓂᔅᑭᒫᒄ ᑖᑆᐎᓐ ᑭᔮᐦ ᑯᐃᔅᑯᑖᑎᓰᐎᓐ ᒧᔮᒻ ᒥᔅᑳᔅᒋᑭᓈᐱᔅᒄ ᐋ ᒋᒋᔥᑭᒫᐦᒄ ᒑ ᒌ ᐃᓯᓈᑯᓱᔮᒄ᙮ 15 ᑭᔮᐦ ᐐᐦ ᐃᔮᔅᑭᐐᒄ ᒑ ᒌ ᐐᐦᑎᒫᒑᔮᒄ ᐊᓐ ᒥᔻᒋᒧᐎᓐ ᒋᔖᒥᓂᑑ ᑳ ᒥᔨᐙᑦ ᒋᔮᒫᔨᐦᑎᒨᐎᓂᔨᐤ, ᒧᔮᒻ ᔖᔥ ᐋ ᐳᔅᑭᒫᒄ ᒋᒥᔅᒋᓂᐙᐤ ᐋ ᐐᐦ ᒫᒋᔮᒄ ᒑ ᒌ ᐃᓯᓈᑯᓱᔮᒄ᙮ 16 ᑭᔮᐦ ᒫᒃ ᒨᔥ ᒋᐱᐦ ᑭᓂᐙᔨᐦᑖᓈᓂᐤ ᑖᑆᔮᔨᐦᑎᒧᐎᓐ ᓂᑳᐦᐊᒫᓱᐎᓐ ᒑ ᒌ ᐄᔑ ᐋᐱᒋᐦᑖᔨᐦᒄ ᐙᔥ ᐋᑯᑖᐦ ᒑ ᐅᐦᒋ ᐋᔥᑐᐙᐦᐅᒥᐦᒄ ᐊᓂᔮᔨᐤ ᑳ ᐃᔥᑯᑖᐎᔨᒡ ᐊᑯᔅᒄ ᒥᒋᒥᓂᑑ ᑳ ᐲᐦᐳᒧᑖᒄ᙮ 17 ᐅᑖᓂᒧᒄ ᒌ ᓂᑑᐱᔫᐊᔥᑐᑎᓂᐙᐤ ᐋᐅᒄ ᐱᒫᒋᐦᐄᐙᐎᓐ, ᐅᑎᓂᒧᒄ ᑭᔮᐦ ᐊᓂᔮᔨᐤ ᓂᑐᐱᔫᐦᑯᒫᓂᔨᐤ ᑳ ᐱᔮᐦᒋᓰᑦ ᐊᐦᒑᐦᒄ ᑳ ᒥᔨᑖᒄ ᐋᔪᐎᒄ ᐅᔮᔨᐤ ᐋᑎᔅᑖᔨᒡ ᒋᔖᒥᓂᑑ ᐅᑎᔨᒧᐎᓐᐦ᙮ 18 ᐊᐦᒑᐦᑯᐎᓂᐦᒡ ᒨᔥ ᐄᔑ ᐊᔨᒥᐦᐋᒄ ᓂᓈᐦᑭᐤ ᐋ ᐄᔑ ᐊᔨᒥᐦᐋᔮᒄ ᑭᔮᐦ ᓂᓈᐦᑭᐤ ᐋ ᐄᔑ ᓂᑐᑎᒫᔮᒄ᙮ ᐆ ᒫᒃ ᐋ ᐄᔑ ᒋᔅᒋᓰᔮᒄ ᐃᔮᔅᑭᐐᒄ ᑭᔮᐦ ᐊᑳᐐ ᐴᓃᒄ ᐋ ᐊᔨᒥᐦᐋᔥᑎᒧᐙᐦᑯᒡ ᐊᓂᒌ ᑳ ᑖᑆᔮᔨᐦᑎᐦᒡ᙮ 19 ᐹᒋ ᐊᔨᒥᐦᐋᔥᑎᒨᒄ ᑭᔮᐦ ᓃᔨ ᒑ ᒌ ᐹᒋ ᒥᔨᑦ ᒋᔖᒥᓂᑑ ᑖᓐ ᒑ ᐃᔨᐅᒡ ᐋ ᐙᐐᐦᑎᒧᒡ ᒥᔻᒋᒧᐎᓂᔨᐤ ᐊᓂᔮᔨᐤ ᑖᓐ ᐋ ᐄᔑ ᐋᑳ ᐅᐦᒋ ᒋᔅᒑᔨᐦᑖᑯᓃᔨᒡ ᐊᓂᑖᐦ ᐅᑖᐦᒡ ᑭᔮᐦ ᒫᒃ ᐊᔨᒥᐦᐋᔥᑎᒨᒄ ᐋᑳ ᒑ ᒌ ᑯᔥᑖᒋᔮᓐ᙮ 20 ᒋᔖᒥᓂᑑ ᓂᒌ ᐹᒋ ᐄᑎᔑᐦᐅᒄ ᒑ ᒌ ᐙᐐᐦᑎᒧᒡ ᐅᒥᔻᒋᒧᐎᓐ ᐋᐦ ᐋᑎ ᐊᐆᓃᔨᒡ ᐊᓂᔮᔨᐤ ᐙᒋ ᑖᐅᒡ ᐅᑎᐦ ᒋᐱᐦᐅᑑᑭᒥᑯᐦᒡ᙮ ᐹᒋ ᐊᔨᒥᐦᐋᔥᑎᒨᒄ ᒫᒃ ᒑ ᒌ ᓲᐦᒋᑖᐦᐋᔮᓐ ᑭᔮᐦ ᒑ ᒌ ᐃᔮᓐ ᑖᓐ ᐋ ᐄᔑ ᓂᑎᐙᔨᒥᑦ ᒋᔖᒥᓂᑑ ᒑ ᒌ ᐃᔨᐅᒡ᙮ ᑖᓐ ᒫᐦᒑᔨ ᑳ ᐄᑎᓯᓂᐦᐋᒧᐙᑦ ᑆᓪ ᐊᓂᔮᔨᐤ ᐄᔨᔨᐤᐦ ᐊᓂᑖᐦ ᐁᕕᓱᓯᐦᒡ ᑳᐦ ᑖᔨᒡ 21 ᑖᐃᑭᑭᔅ ᒋᑭ ᑎᑯᔑᓐ ᓈᑖᐦ ᐋᐦᑖᐙᒄ ᒑ ᒌ ᐐᐦᑎᒫᑖᒄ ᑖᓐ ᐋᔨᐦᑑᒡ ᑭᔮᐦ ᑖᓐ ᐋᔨᔅᐱᔫᒡ᙮ ᐋᐅᒄ ᐆ ᑳ ᓵᒋᐦᐄᒃ ᒌᒋᔖᓂᐤ ᑭᔮᐦ ᑯᐃᔅᒄ ᑳ ᐄᔑ ᐋᐱᑖᑎᓯᑦ ᑎᐹᔨᐦᒋᒑᓯᐤ ᐋᐦ ᐋᐱᑎᔒᔥᑎᐙᑦ᙮ 22 ᐋᐅᒄ ᐆ ᐙᐦᒋ ᐄᑎᔑᐦᐅᒃ ᓈᑖᐦ ᐋᐦᑖᐙᒄ ᒑ ᒌ ᒋᔅᒑᔨᐦᑎᒫᒄ ᑖᓐ ᐋᔨᔅᐱᔮᐦᒡ ᐋᒄ ᒫᒃ ᒑ ᒌ ᐅᐦᐱᓂᑯᔮᒄ ᒌ ᐱᒫᑎᓰᐎᓂᐙᐦᒡ᙮ 23 ᓂᒋᔖᓂᑐᒃ ᓂᑎᔨᒥᐦᐋᓐ ᒋᔖᒥᓂᑑ ᑰᐦᑖᐐᓂᐤ ᑭᔮᐦ ᑎᐹᔨᐦᒋᒑᓯᐤ ᒌᓴᔅ ᙭ ᒑ ᒌ ᒥᔨᑖᑯᒡ ᒋᔮᒫᔨᐦᑎᒧᐎᓂᔨᐤ ᑭᔮᐦ ᓵᒋᐦᐄᐙᐎᓂᔨᐤ ᒑ ᒌ ᓅᑯᐦᒡ ᒋᑖᑆᔮᔨᐦᑎᒧᐎᓂᐙᐤ᙮ 24 ᓂᑐᑎᒧᐙᐤ ᒋᔖᒥᓂᑑ ᒑ ᒋᔖᐙᑐᑖᑖᒄ ᒥᓯᐙ ᒌᔨᐙᐤ ᑳ ᓵᒋᐦᐋᒄ ᒋᑎᐹᔨᐦᒋᒑᓰᒥᓂᐤ ᒌᓴᔅ ᙭ ᒨᔥ ᑳᒋᒡ᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.