ᓃᔓ ᕞᓵᐧᓛᓃᔨᓐ 1 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡ1 ᓃᔮᓐ ᑆᓪ, ᓵᐃᓚᔅ, ᑭᔮᐦ ᑎᒧᕢ, ᒋᒥᓯᓂᐦᐋᒫᑎᓈᓐ ᒌᔨᐙᐤ ᐅᒫᒨᐊᔨᒥᐦᐋᐅᒡ ᐊᓂᑖᐦ ᕞᓵᓨᓈᐃᑳᐦᒡ ᐃᐦᑖᐎᓐ ᑳᐦ ᑖᔮᒄ, ᒋᔖᒥᓂᑑ ᐅᐦᑖᐐᒫᐤ ᑭᔮᐦ ᑎᐹᔨᐦᒋᒑᓯᐤ ᒌᓴᔅ ᙭ ᑳ ᑎᐹᔨᒥᑖᑯᒡ᙮ 2 ᓂᑐᑎᒧᐙᓈᓂᒡ ᒋᔖᒥᓂᑑ ᐅᐦᑖᐐᒫᐤ ᑭᔮᐦ ᑎᐹᔨᐦᒋᒑᓯᐤ ᒌᓴᔅ ᙭ ᒋᑭ ᒥᔪᑐᑖᑯᐙᐅᒡ ᑭᔮᐦ ᒋᑭ ᒥᔨᑯᐙᐅᒡ ᒋᔮᒫᔨᐦᑎᒧᐎᓂᔨᐤ᙮ ᑆᓪ ᑳ ᐄᔑ ᓂᓈᔅᑯᒧᑦ ᑭᔮᐦ ᑳ ᐄᔑ ᔒᐦᒋᒧᐙᑦ 3 ᓃᒋᔖᓈᓂᒡ, ᐄᑖᔨᐦᑖᑯᓐ ᒨᔥ ᒑ ᒌ ᓂᓈᔅᑯᒥᒋᐦᑦ ᒋᔖᒥᓂᑑ ᒌᔨᐙᐤ ᐅᐦᒋ, ᐙᔥ ᐊᑎᑎᐤ ᒋᑎ ᐋᑎ ᑖᑆᐅᒑᔨᒫᐙᐤ ᙭ ᑭᔮᐦ ᒫᒃ ᐋᔮᔅᒃ ᐊᑎᑎᐤ ᒋᓵᒋᐦᐄᑐᓈᐙᐤ᙮ 4 ᐋᐅᒄ ᒫᒃ ᐆ ᐙᐦᒋ ᒫᒥᐦᒋᐦᐄᔮᐦᒡ ᐋᒄ ᒫᒃ ᐃᔮᔨᒨᒥᑖᐦᒡ ᐊᓂᑖᐦ ᑯᑎᑭᒡ ᐅᒫᒨᐊᔨᒥᐦᐋᐅᒡ ᐋᐦ ᑖᒡ᙮ ᓂᒥᒥᑖᑯᓰᓈᓐ ᐋᐦ ᐋᔨᒨᑎᒫᐦᒡ ᐋᐦᐋᑳ ᐴᓂᔮᒄ ᑭᔮᐦ ᐋᔥᒄ ᐊᔮᐱᒡ ᐋ ᑖᑆᐅᒑᔨᒫᒄ ᙭ ᐋᑦ ᐊᓐ ᐋ ᐃᔥᐱᔥ ᓂᓈᐦᑳᑖᔨᒧᐦᐄᑯᐎᔮᒄ ᑭᔮᐦ ᐋ ᐃᔥᐱᔥ ᐋᔨᒧᐦᐅᔮᒄ᙮ ᑎᐹᔅᑯᓂᒑᐎᓐ ᙭ ᑎᑯᔑᐦᑳ 5 ᐋᑯᑖᐦ ᒫᒃ ᐅᑎᐦ ᒑ ᐅᐦᒋ ᒋᔅᒑᔨᐦᑎᒫᒄ ᑖᓐ ᐋ ᐃᔥᐱᔥ ᑯᐃᔅᒄ ᑎᒃ ᒋᔖᒥᓂᑑ ᐋ ᑎᐹᔅᑯᓂᒑᑦ᙮ ᐊᓐ ᒫᒃ ᑖᓐ ᐙᔥ ᐐᓯᒑᔨᐦᑎᒥᒄ ᒋᑭ ᑎᐱᒑᔨᐦᑖᑯᓯᓈᐙᐤ ᒑ ᒌ ᐐᒋᐦᐄᐙᔮᒄ ᐊᓂᑖᐦ ᒋᔖᒥᓂᑑ ᐅᒋᐦᒋᐅᒋᒫᐎᓂᐦᒡ᙮ 6 ᒋᔖᒥᓂᑑ ᑯᐃᔅᒄ ᐄᐦᑐ᙮ ᒋᑭ ᑐᑎᐙᐤ ᒑ ᒌ ᓂᓈᐦᑳᑖᔨᒧᔨᒡ ᐊᓂᔮᔨᐤᐦ ᐊᐙᔨᐤᐦ ᑳ ᓂᓈᐦᑳᑖᔨᒧᐦᐄᑎᔨᑖᐦᒄ᙮ 7 ᐋᒄ ᒌᔨᐙᐤ ᑳ ᓂᓈᐦᑳᑖᔨᒧᔮᒄ ᒋᑭ ᑐᑖᑯᐙᐤ ᒋᔖᒥᓂᑑ ᒑ ᒌ ᐴᓐ ᓂᓈᐦᑳᑖᔨᒧᐙᒄ ᑭᔮᐦ ᒫᒃ ᓃᔮᓐ ᐋᔪᐎᒄ ᒑ ᐄᔑ ᐐᒋᐦᐄᔨᒥᐦᑦ᙮ ᐄᔥᐱᐦ ᐹᒋ ᓅᑯᓯᒑ ᑎᐹᔨᐦᒋᒑᓯᐤ ᒌᓴᔅ ᐊᓂᑖᐦ ᒋᐦᒋᒌᔑᑯᐦᒡ ᐅᐦᒋ ᐋ ᐹᒋ ᐐᒑᐙᑦ ᐅᑖᓐᒋᓂᒻᐦ ᑳ ᓲᐦᑳᑎᓰᔨᒡ ᐋᑯᑖᐦ ᒑ ᑐᑎᐦᒃ ᐅᔮᔨᐤ᙮ 8 ᐃᔥᑯᑖᔨᐤ ᐋ ᒀᑯᑎᐙᐱᔨᒡ ᒋᑭ ᐋᐱᒋᐦᑖᐤ ᒥᒫᑯᐦᐋᒑ ᐊᓂᔮᔨᐤ ᐋᑳ ᑳ ᒋᔅᒑᔨᒫᔨᒡ ᒋᔖᒥᓂᑑ ᑭᔮᐦ ᐊᓂᔮᔨᐤ ᐋᑳ ᑳ ᓂᓂᐦᐄᐦᑎᒥᔨᒡ ᒥᔻᒋᒧᐎᓂᔨᐤ ᐊᓂᑎᐦ ᐃᔮᔨᒧᒫᑭᓂᐎᔨᒡ ᑎᐹᔨᐦᒋᒑᓯᐤᐦ ᒌᓴᔅᐦ᙮ 9 ᒋᑭ ᐎᓯᒑᔨᑎᒥᐦᐋᑭᓂᐎᒡ ᑳᒋᒡ ᒑ ᒌ ᓂᔑᐎᓈᑎᓰᔨᒡ᙮ ᑭᑎ ᐄᒑᓈᑭᓂᐎᒡ ᑎᐹᔨᐦᒋᒑᓯᐤ ᐋᐦ ᑖᔨᒡ ᐅᐦᒋ ᑭᔮᐦ ᐊᓂᑎᐦ ᐋ ᒋᔅᑖᔨᐦᑖᑯᓃᔨᒡ ᐆ ᓲᐦᑳᑎᓰᐎᓂᔨᐤ, 10 ᐊᓂᔮᔨᐤ ᐋ ᒌᔑᑳᔨᒡ ᑎᑯᔑᐦᑳ ᒑ ᒌ ᒫᒥᐦᒋᒫᑭᓅᑦ ᑭᔮᐦ ᒑ ᒌ ᒋᔅᑖᔨᒥᑯᑦ ᒥᓯᐙ ᐐᔨ ᑎᐲᐙ ᐅᑎᔨᔨᒻᐦ ᑳ ᑖᑆᔮᔨᒥᑯᑦ᙮ ᐋᑯᑖᐦ ᒫᒃ ᒑ ᐐᒋᐦᐄᐙᔮᒄ ᑭᔮᐦ ᒌᔨᐙᐤ ᐙᔥ ᒋᑖᑆᐦᑖᓈᐙᐤ ᐊᓐ ᒥᔻᒋᒧᐎᓐ ᑳ ᐐᐦᑎᒫᑖᐦᒡ᙮ 11 ᐋᐅᒄ ᒫᒃ ᐆ ᐙᐦᒋ ᒨᔥ ᐊᔨᒥᐦᐋᔥᑎᒫᑖᐦᒡ᙮ ᓂᓂᑐᑎᒧᐙᓈᓐ ᒋᔖᒥᓂᑑ ᒑ ᒌ ᑖᐱᒑᔨᐦᑖᑯᐦᐄᑯᔮᒄ ᒑ ᒌ ᐄᔑ ᐱᒫᑎᓰᔮᒄ ᐊᓂᔮᔨᐤ ᑳ ᐄᔑ ᓂᑎᐙᔨᒥᑖᒄ ᒑ ᒌ ᐄᔑ ᐱᒫᑎᓰᐙᒄ᙮ ᓂᓂᑐᑎᒧᐙᓈᓐ ᒑ ᒥᔨᑖᒄ ᓲᐦᑳᑎᓰᐎᓂᔨᐤ ᒑ ᒌᐦ ᑐᑎᒫᒄ ᒥᓯᐙ ᐊᓐ ᐋ ᒥᔻᓰᔨᒡ ᐙᐦᑐᑎᒫᒄ᙮ ᑭᔮᐦ ᒑ ᒌ ᐐᒋᐦᐄᑖᒄ ᒑ ᒌ ᒌᔑᑖᐙᒄ ᐊᓂᔮᔨᐤ ᒑᒀᔨᐤ ᐙᐦ ᑐᑎᒸᐦᒄ ᐋ ᑖᑆᔮᔨᐦᑎᒫᒄ᙮ 12 ᐋᑯᑖᐦ ᒑ ᐅᐦᒋ ᒋᔅᑖᔨᐦᑖᑯᐦᑖᐙᒄ ᒋᑎᐹᔨᐦᒋᒑᓰᒥᓂᐤ ᒌᓴᔅ ᐅᑎᔑᓂᐦᑳᓱᐎᓐ ᑭᔮᐦ ᒌᔨᐙᐤ ᒫᒃ ᒋᑭ ᒋᔅᑖᔨᐦᑖᑯᐦᐄᑯᐙᐤ᙮ ᐋᐅᒄ ᒑ ᑐᑖᑯᐎᔮᒄ ᐋ ᐃᔥᐱᔥ ᒋᔖᐙᑐᑖᒑᒡ ᒋᒋᔖᒥᓂᑑᒥᓂᐤ ᑭᔮᐦ ᒫᒃ ᑎᐹᔨᐦᒋᒑᓯᐤ ᒌᓴᔅ ᙭᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.