ᓃᔓ ᑯᕆᓐᕠᔨᓐ 9 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡᐋᐦᑎᑯᐦᒡ ᒋᔖᐙᑐᑖᒑᐎᓐ ᐋ ᒥᔨᐙᓂᐎᒡ 1 ᓂᒧᐃ ᔮᔨᑖ ᓂᑎᐙᔨᐦᑖᑯᓐ ᒑ ᒌ ᐋᔨᒨᑎᒫᑎᑯᒡ ᐋ ᐱᒋᔅᑎᓂᒑᓂᐎᒡ ᐊᓂᑎᐦ ᐋ ᐅᐦᒋ ᐐᒋᐦᐋᑭᓂᐎᒡ ᐊᓂᒌ ᑳ ᑖᑆᔮᔨᐦᑎᐦᒡ ᒎᑏᔮᐦᒡ ᑳᐦ ᑖᒡ᙮ 2 ᒋᒋᔅᒑᔨᒥᑎᓈᐙᐤ ᑭᔨᑆ ᓈᔥᒡ ᐋᐦ ᐋᔑᐦᒑᔨᐦᑎᒫᒄ ᒑ ᒌ ᐄᒋᐦᐋᑯᒡ᙮ ᒋᒌ ᐋᔨᒨᒥᑎᓈᐙᐤ ᒫᒃ ᐊᓂᑖᐦ ᒫᓯᑐᓂᔮᐦᒡ ᑳᐦ ᐄᔨᑎᔨᒡ ᐊᓂᒌ ᐄᔨᔨᐅᒡ, “ᒌᒋᔖᓅᒡ, ᐊᑫᔮ ᑳ ᐃᔑᓂᐦᑳᑖᔨᒡ ᐊᔅᒌᔨᐤ ᑳᐦ ᑖᒡ, ᔖᔥ ᑆᐳᓃᔨᒡ ᒌ ᐃᔮᔅᑭᐎᔪᒡ ᒑ ᒌ ᐱᒋᔅᑎᓂᒑᒡ ᔓᐎᔮᓐ,” ᓂᒌᐦ ᐄᑖᐅᒡ᙮ ᑳ ᐹᐦᑎᐦᒡ ᐅᔮᔨᐤ ᓈᔥᒡ ᒌ ᐄᑖᔨᐦᑎᒧᒡ ᑭᔮᐦ ᐐᔨᐙᐤ ᒑ ᒌ ᐱᒋᔅᑎᓂᒑᒡ᙮ 3 ᑖᐅᒡ ᐅᒌ ᒌᒋᔖᓅᒡ ᐋᐦ ᐄᑎᔑᐦᐋᒫᑎᑯᒡ ᒑ ᒌ ᐐᒌᐦᐄᑖᑯᒡ ᒑ ᒌ ᐋᔮᔅᑯᐎᐦᐄᒫᒄ ᐊᓂᔮᔨᐤ ᔓᐎᔮᓐ ᒑ ᐱᒋᔅᑎᓂᒫᐦᒄ ᐋ ᐐᒋᐦᐄᒫᑭᓂᐎᔨᒡ ᐊᓂᔮᔨᐤ ᑳ ᑖᑆᔮᔨᐦᑎᒥᔨᒡ ᐊᓂᑖᐦ ᒎᑏᔮᐦᒡ ᑳᐦ ᑖᔨᒡ᙮ ᐙᐱᐦᑎᔨᐙᒄ ᑖᑆᐦ ᐋ ᐃᓯᓈᑯᐦᒡ ᑖᓐ ᑳ ᐄᑖᒋᒥᑖᐦᒡ ᓈᔥᒡ ᐋᐦ ᐋᔑᐦᒑᔨᐦᑎᒫᒄ ᒑ ᒌ ᐐᒋᐦᐄᐙᔮᒄ ᑭᔮᐦ ᒌᔨᐙᐤ᙮ 4 ᒀᔂᓐ ᓂᑭ ᐹᒋᐐᒑᐅᑯᒡ ᐱᔅᒡ ᒌᒋᔖᓂᐤ ᒫᓵᑐᓂᔮᐦᒡ ᐋ ᐅᐦᒌᒡ, ᐋᔥᒄ ᒫᒃ ᐋᑳ ᒑ ᐃᔮᔅᑭᐐᐙᒀ ᒑ ᒌ ᐱᒋᔅᑎᓈᐦᒄ ᔓᐎᔮᓐ ᐅᑎᐦᑎᑖᐦᒑ, ᑭᔨᑆ ᓄᐎᒡ ᒑ ᐅᐙᓂᐦᑎᒋᐦᐄᔮᐦᒡ ᑭᔮᐦ ᒌᔨᐙᐤ ᒫᒃ ᓄᐎᒡ ᒋᑭ ᐱᐱᒫᒫᔨᒧᓈᐙᐤ᙮ ᐙᔥ ᓈᔥᑖᑆᐦ ᓂᒌᐦ ᒑᔥᑎᓈᐦᐅᓐ ᒥᒄ ᒑ ᐄᔑ ᐱᒋᔅᑎᓂᒑᔮᒄ᙮ 5 ᐋᐅᒄ ᐆ ᐙᐦᒋ ᓃᑳᓐ ᐄᑎᔑᐦᐋᒫᑎᑯᒡ ᐅᒌ ᓃᒋᔖᓂᒡ, ᒋᑭ ᒌ ᐐᒋᐦᐄᑯᐙᐅᒡ ᒑ ᒌ ᐃᔮᔅᑭᐎᓂᒫᒄ ᐊᓂᔮᔨᐤ ᔓᐎᔮᓐ ᑳᐦ ᐃᔨᐙᒄ ᒑ ᐱᒋᔅᑎᓂᒫᒄ᙮ ᐙᐱᐦᑎᒫᓈ ᒫᒃ ᔖᔥ ᐋ ᒌ ᐃᔮᔅᑭᐎᓂᒫᒄ ᐊᓐ ᒋᐱᒋᔅᑎᓂᒑᐎᓂᐙᐤ ᑎᑯᔑᓂᔮᓈ ᐋᑯᑖᐦ ᒑ ᓂᔅᑑᓈᑯᐦᒡ ᐋᑳ ᐋᔨᐦᑭᒻ ᐅᐦᒋ ᐱᒋᔅᑎᓂᒑᔮᒄ ᑭᔮᐦ ᒫᒃ ᐋ ᒌ ᓯᒋᔮᓯᔮᒄ ᒑ ᒌ ᒥᔨᐙᔮᒄ᙮ 6 ᒫᐤ ᒑ ᐐᐦ ᒋᔥᒋᓯᔮᒄ, ᐊᓐ ᒥᒄ ᐊᐱᔒᔥ ᑳ ᓂᐦᑖᐅᒋᐦᒑᑦ ᒥᒄ ᐊᐱᔒᔥ ᒑᒀᔨᐤ ᒋᑭ ᓂᐦᑖᐅᒋᓂᔨᐤ ᐋᒄ ᐊᓐ ᒥᔥᑏᐦ ᑳ ᓂᐦᑖᐅᒋᐦᒑᑦ ᒥᔥᑏᐦ ᒑᒀᔨᐤ ᑭᑎ ᓂᐦᑖᐅᒋᓂᔨᐤ᙮ 7 ᒥᓯᐙ ᐹᐦᐹᔨᒄ ᐊᐙᓐ ᒥᒄ ᑖᓐ ᑳ ᐄᑖᔨᐦᑎᐦᒃ ᐅᑖᐦᐄᐦᒡ ᒑ ᐃᔥᐱᔥ ᐱᒋᔅᑎᓂᒑᑦ ᐋᔪᐎᒄ ᒋᐱᐦ ᐃᔥᐱᔥ ᐱᒋᔅᑎᓂᒑᐤ᙮ ᓂᒧᐃ ᒋᐱᐦ ᐅᐦᒋ ᒫᐃᓰᐤ ᑭᔮᐦ ᓂᒧᐃ ᔮᐃᓵᒡ ᒋᐱᐦ ᐱᒋᔅᑎᓂᒑᐤ᙮ ᒋᔖᒥᓂᑑ ᓈᔥᒡ ᓵᒋᐦᐋᐤ ᐊᓂᔮᔨᐤᐦ ᐊᐙᔨᐤᐦ ᑳ ᒥᔻᔨᐦᑎᒥᔨᒡ ᐋ ᐱᒋᔅᑎᓂᒑᔨᒡ᙮ 8 ᒋᑭ ᒌᐦ ᑐᑎᒻ ᒋᔖᒥᓂᑑ ᒥᔥᑎᐦ ᒨᔥ ᒑ ᐃᔮᔮᒄ ᑖᓐ ᒥᒄ ᒑ ᐄᔑ ᓂᑎᐙᔨᐦᑎᒧᐙᒀ, ᒑ ᒌ ᐐᒋᐦᐋᑯᒡ ᒫᒃ ᑯᑎᑭᒡ ᐄᔨᔨᐅᒡ᙮ 9 ᐊᒀᒋᔥᑖᒡ ᒋᐦᒋᒥᓯᓂᐦᐄᑭᓂᐦᒡ, ᐊᓐ ᐊᐙᓐ ᑳ ᐙᔪᒡ ᐐᒋᐦᐋᑦ ᐊᓂᔮᔨᐤ ᑳ ᒋᔅᑎᒫᑎᓰᔨᒡ ᑳᒋᒡ ᑭᑎ ᒋᔥᒋᓈᓂᐎᔨᐤ ᐅᒥᔪᑑᑎᒫᒑᐎᓐ᙮ 10 ᒋᔖᒥᓂᑑ ᐋᐅᒄ ᒫᔮᑦ ᓂᐦᑖᐅᒋᐦᒑᓯᐤ ᒑᒀᔨᐤ ᒑ ᓂᐦᑖᐅᒋᐦᑖᔨᒡ᙮ ᐐᔨ ᑭᔮᐦ ᐊᔑᒫᐤ ᒥᓯᐙ ᐊᐙᔨᐤᐦ᙮ ᑭᔮᐦ ᒌᔨᐙᐤ ᒫᒃ ᒋᑭ ᐙᔪᒡ ᒥᔨᑯᐙᐤ, ᒥᐦᒑᑐ ᒫᒃ ᐄᔨᔨᐅᒡ ᒑ ᒌ ᐄᒋᐦᐋᑯᒡ᙮ ᐋᒄ ᒫᒃ ᐆ ᐋ ᐄᔑ ᒥᔪᑐᑎᒫᒑᔮᒄ ᒥᐦᒑᑐ ᐄᔨᔨᐅᒡ ᒥᔥᑏᐦ ᒋᑭ ᒥᔪᑐᑎᒫᑯᒡ ᒋᔖᒥᓂᑑ᙮ 11 ᑭᔮᐦ ᒌᔨᐙᐤ ᒫᒃ ᓈᔥᑖᑆᐦ ᓂᓈᐦᑭᐤ ᒋᑭ ᐄᔑ ᐙᔪᒡ ᒥᔨᑯᐙᐤ ᒋᔖᒥᓂᑑ, ᐋᒄ ᒫᒃ ᓂᓈᐦᑭᐤ ᒑ ᒌ ᐄᔑ ᒥᔮᑯᒡ ᑯᑎᑭᒡ ᐄᔨᔨᐅᒡ᙮ ᐋᒄ ᒫᒃ ᒑ ᒥᐦᒑᑎᒡ ᐊᓂᒌ ᒑ ᓂᓈᔅᑯᒫᒡ ᒋᔖᒥᓂᑑ ᐄᔥᐱᐦ ᑳᒋᔅᑎᓂᐦᒀᐙ ᐊᓂᔮᔨᐤ ᒋᐱᒋᔅᑎᓂᒑᐎᓂᐙᔨᐤ᙮ 12 ᐅᔮᔨᐤ ᒫᒃ ᐋ ᐄᔑ ᒥᔪᑐᑎᒧᐙᑯᒡ ᑳ ᑖᑆᔮᔨᐦᑎᐦᒡ ᐋ ᒥᔮᑯᒡ ᑖᓐ ᐋ ᐄᔑ ᓅᐦᑖᐱᔨᔨᒡ ᐋᑯᑖᐦ ᐙᐦᒋᐱᔨᔨᒡ ᒥᔥᑏᐦ ᒑ ᒌ ᓂᓈᔅᑯᒫᒡ ᒋᔖᒥᓂᑑ᙮ 13 ᐋᔨᐤᐦ ᒫᒃ ᑭᑎ ᒋᔅᑖᒋᒫᐅᒡ ᒋᔖᒥᓂᑑ ᐙᐱᐦᑎᐦᒀᐙ ᐋ ᓅᑯᓃᔨᒡ ᑖᑆᐦ ᐋ ᑖᑆᐦᑎᒸᒄ ᑭᔮᐦ ᐋ ᓂᓂᐦᐄᐦᑎᒸᒄ ᙭ ᐅᒥᔻᒋᒧᐎᓐ᙮ ᑭᔮᐦ ᒫᒃ ᑭᑎ ᒋᔅᑖᒋᒫᐅᒡ ᒋᔖᒥᓂᑑ ᐊᓂᔮᔨᐤ ᑖᓐ ᑳ ᐃᔥᐱᔥ ᐄᒋᐦᐋᑯᒡ ᑭᔮᐦ ᑖᓐ ᑳ ᐃᔥᐱᔥ ᐐᒋᐦᐄᒫᒄ ᑯᑎᒃ ᐊᐙᔨᐤᐦ᙮ 14 ᑳ ᐃᔥᐱᔥ ᐙᔪᒡ ᒥᔪᑐᑖᑖᒄ ᒋᔖᒥᓂᑑ ᒋᑭ ᓵᒋᐦᐄᑯᐙᐅᒡ ᑭᔮᐦ ᒫᒃ ᒋᑭ ᐊᔨᒥᐦᐋᔥᑎᒫᑯᐙᐅᒡ᙮ 15 ᓂᓈᔅᑯᒫᑖᐤ ᒋᔖᒥᓂᑑ ᐊᓂᔮᔨᐤ ᐅᒥᐙᐎᓐ ᐅᐦᒋ᙮ ᓂᒧᐃ ᓂᐦᐋᐤ ᒌ ᐐᐦᑖᑭᓂᐎᔨᐤ ᐋ ᐃᔥᐱᔥ ᒥᔻᔨᐦᑖᑯᓃᔨᒡ᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.