ᓃᔓ ᑯᕆᓐᕠᔨᓐ 8 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡᐋᐦ ᐋᔨᐦᑭᒫᑭᓅᑦ ᐊᐙᓐ ᒑ ᒌ ᐙᔪᒡ ᒥᔨᐙᑦ 1 ᓂᐐᒑᐙᑭᓂᑐᒃ, ᒋᓂᑎᐙᔨᒥᑎᓈᓐ ᒑ ᒌ ᒋᔅᒑᔨᒫᑯᒡ ᑖᓐ ᑳ ᐄᔑ ᒥᔪᑐᑎᒫᑯᒡ ᒋᔖᒥᓂᑑ ᐊᓂᒌ ᐅᒫᒨᐊᔨᒥᐦᐋᐅᒡ ᐊᓂᑖᐦ ᒫᓯᑐᓂᔮ ᑳ ᐃᔑᓂᐦᑳᑖᔨᒡ ᐊᔅᒌᔨᐤ ᑳᐦ ᑖᒡ᙮ 2 ᓈᔥᑖᑆᐦ ᒌ ᐹᒋ ᐋᔨᒥᐦᐅᒡ᙮ ᐋᑦ ᐊᓂᔮᔨᐤ ᐋ ᐃᔥᐱᔥ ᓈᔥᒡ ᒋᔅᑎᒫᑎᓰᔨᒡ ᐊᔮᐱᒡ ᓈᔥᑖᑆᐦ ᒥᔥᑏᐦ ᒌ ᐱᒋᔅᑎᓂᒑᐅᒡ᙮ ᑭᔮᐦ ᒫᒃ ᓈᔥᑖᑆᐦ ᒌ ᒥᔻᔨᐦᑎᒧᒡ ᐋ ᐱᒋᔅᑎᓂᒑᒡ᙮ 3 ᒌ ᐱᒋᔅᑎᓂᒧᒡ ᑖᓐ ᑳ ᐄᔑ ᓂᐦᐄᐱᔨᒡ ᒑ ᒌ ᐃᔥᐱᔥ ᐱᒋᔅᑎᓂᐦᒡ, ᓂᒌᐙᐱᒫᐅᒡ ᐙᔥ, ᐃᔨᐙᒡ ᒫᒃ ᐊᔮᐱᒡ ᒌ ᐃᔥᐱᔥ ᐱᒋᔅᑎᓂᒑᐅᒡ, ᐐᔨᐙᐤ ᒥᑐᓐ ᐋ ᒌ ᐄᑖᔨᐦᑎᒥᐦᐄᑯᒡ ᒑ ᒌ ᐃᔥᐱᔥ ᐱᒋᔅᑎᓂᒑᒡ᙮ 4 ᓈᔥᒡ ᓂᒌᐦ ᐋᔨᐦᑭᒥᑰᓈᓂᒡ ᒑ ᐅᑎᓂᒧᒋᐦᒡ ᒑ ᒌ ᐱᒋᔅᑎᓂᒑᒡ ᑭᔮᐦ ᐐᔨᐙᐤ, ᒑ ᒌ ᐐᒋᐦᐄᒫᑭᓂᐎᔨᒡ ᐊᓂᔮᔨᐤ ᑳ ᒋᔅᑎᒫᑎᓰᔨᒡ ᑳ ᑖᑆᔮᔨᐦᑎᒥᔨᒡ ᐊᓂᑖᐦ ᒎᑏᔮᐦᒡ ᐊᔅᒌᐦᒡ ᑳᐦ ᑖᔨᒡ᙮ 5 ᐹᔥᒡ ᒫᒃ ᒌᐦ ᑐᑎᒧᒡ ᑖᓐ ᑳ ᐄᑖᔨᒥᒋᐦᒡ ᒑ ᑎᒡ᙮ ᓃᔥᑎᒻ ᑎᐹᔨᐦᒋᒑᓯᐤ ᒌ ᐱᒋᔥᑖᔨᒧᓯᔅᑎᐙᐅᒡ ᐋᒄ ᓃᔮᓐ ᑳ ᐱᒋᔥᑖᔨᒧᓯᔅᑎᐎᔨᒥᐦᒡ ᒧᔮᒻ ᑖᓐ ᑳ ᐄᔑ ᓂᑎᐙᔨᒥᑯᒡ ᒋᔖᒥᓂᑑ ᒑ ᒌᐦ ᑎᒡ᙮ 6 ᐋᔪᐎᒄ ᐙᐦᒋ ᒌ ᐄᑎᒋᐦᒡ ᑖᐃᑎᔅ ᓲᐦᒃ ᒑ ᑯᒋᐦᑖᑦ ᒑ ᒌ ᒌᓯᐦᑖᐙᒄ ᐊᓂᔮᔨᐤ ᑳ ᐄᔑ ᒋᐦᒌᑖᐙᒄ, ᐋ ᒋᔅᑎᒫᒑᔨᐦᒋᒑᔮᒄ, ᐙᔥ ᐐᔨ ᓃᔥᑎᒻ ᒋᒌ ᐋᔨᒨᑎᒫᑯᐙᐤ ᐋ ᐱᒋᔅᑎᓂᒑᓂᐎᔨᒡ᙮ 7 ᒥᓯᐙ ᒑᒀᓐ ᓈᔥᑖᑆᐦ ᒋᑭᔅᒋᐦᐅᓈᐙᐤ᙮ ᓲᐦᒑᔨᐦᑖᑯᓐ ᒌ ᑖᑆᐦᑎᒧᐎᓂᐙᐤ᙮ ᒋᑭᔅᒋᐦᐅᓈᐙᐤ ᐋᐦ ᐋᔨᒨᑎᒫᒄ᙮ ᒥᔥᑏᐦ ᒋᒋᔅᒑᔨᐦᑎᒸᓈᐙᐤ᙮ ᓈᔥᑖᑆᐦ ᓲᐦᒃ ᒋᑎᐄᑖᔨᐦᑎᓈᐙᐤ ᒑ ᒌ ᐄᒋᐦᐋᑯᒡ ᑯᑎᑭᒡ ᐄᔨᔨᐅᒡ ᑭᔮᐦ ᒫᒃ ᓈᔥᑖᑆᐦ ᒌ ᓵᒋᐦᐄᓈᓐ᙮ ᒋᐱᐦ ᐐᐦ ᒥᔪ ᒥᔨᐙᓈᐙᐤ ᒫᒃ᙮ 8 ᓂᒧᐃ ᒋᐐᐦ ᐎᔨᔓᒥᑎᓈᐙᐤ ᐆ ᑳ ᐃᔮᓐ᙮ ᒋᓂᑐᐙᔨᒥᑎᓈᐙᐤ ᒑ ᒌ ᒋᔅᒑᔨᐦᑎᒫᒄ ᑯᑎᑭᒡ ᐄᔨᔨᐅᒡ ᓈᔥᒡ ᐋ ᒋᓯᐙᔨᐦᑖᐦᒡ ᒑ ᒌ ᐱᒋᔅᑎᓂᒑᒡ, ᑎᔮᒀ ᒫᒃ ᐊᓂᔮᔨᐤ ᐋᐦ ᑎᒡ ᒑ ᒌ ᒋᔅᒑᔨᒥᑎᑯᒡ ᑭᔮᐦ ᑖᑆᐦ ᐋ ᐃᔮᔮᒄ ᓵᒋᐦᐄᐙᐎᓐ᙮ 9 ᒋᒋᔅᒑᔨᒫᐙᐤ ᑖᓐ ᑳ ᐄᔑ ᒥᔪᑐᑎᒫᒑᑦ ᒋᑎᐹᔨᐦᒋᒑᓰᒥᓂᐤ ᒌᓴᔅ ᙭᙮ ᐋᐦᐋᑦ ᒫᒃ ᒌ ᐙᔪᑎᓰᑦ ᐊᔮᐱᒡ ᒫᒃ ᒌ ᑐᑖᔓ ᒑ ᒌ ᒋᔅᑎᒫᑎᓯᑦ ᒌᔮᓂᐤ ᐅᐦᒋ, ᒑ ᒌ ᐙᔪᒡ ᐃᔮᔨᐦᒄ ᒫᒃ ᒌᔮᓂᐤ᙮ ᒌ ᓂᑭᑎᒻ ᐐᔨ ᒥᓯᐙ ᐅᐙᔫᑎᓰᐎᓐ᙮ 10 ᐋᐅᒄ ᒫᒃ ᐋᑖᔨᒥᑎᑯᒡ ᒑ ᒌ ᑎᐙᑯᐱᓈ᙮ ᐅᑖᐦᒡ ᐹᐳᐦᒡ ᒌᔨᐙᐤ ᓃᔥᑎᒻ ᓈᔥᒡ ᒋᒌ ᐄᑖᔨᐦᑖᓈᐙᐤ ᒑ ᒌ ᐱᒋᔅᑎᓂᒑᔮᒄ, ᒋᒌ ᒋᐦᒋᐱᔨᐦᑖᓈᐙᐤ ᒫᒃ ᐋ ᐱᒋᔅᑎᓂᒑᔮᒄ᙮ 11 ᐋᒄ ᒫᒃ, ᒌᔑᐦᑖᒄ ᑖᓐ ᑳ ᐄᔑ ᒋᐦᒋᐱᔨᐦᑖᔮᒄ᙮ ᑖᓐ ᑳ ᐃᔥᐱᔥ ᓲᐦᒃ ᒌ ᐋᓯᒑᔨᐦᑎᒫᒄ ᐅᔅᑭᒡ ᑳ ᐐᐦ ᒋᐦᒋᐱᔨᐦᑖᔮᒄ ᒑ ᒌ ᐱᒋᔅᑎᓂᒑᔮᒄ ᐹᔨᑯᓂᒡ ᐊᔮᐱᒡ ᒋᐱᐦ ᐄᔑ ᐋᓯᒑᔨᐦᑖᓈᐙᐤ ᐊᓅᐦᒡ ᐋ ᐱᒋᔅᑎᓂᒑᔮᒄ᙮ 12 ᓅᑯᐦᒑ ᓈᔥᒡ ᐋᐦ ᐋᓯᐦᒑᔨᐦᑎᒫᒄ ᒑ ᒌ ᐱᒋᔅᑎᓂᒑᔮᒄ ᐋᔪᐎᒄ ᐅᔮᔨᐤ ᒑ ᓂᐦᐋᔨᐦᑎᒥᐦᐄᑯᑦ ᒋᔖᒥᓂᑑ᙮ ᑖᐹ ᓂᒥᔮᔨᐤ ᐊᓂᔮᔨᐤ ᐋᔥ ᐋᑳ ᐃᔮᐙᒄ ᒑ ᑭᓂᐙᐱᐦᑎᐦᒃ᙮ ᐊᓂᔮᔨᐤ ᑖᓐ ᐋ ᐄᔑ ᐃᔮᐙᒄ ᐋᔪᐎᒄ ᐊᓂᔮᔨᐤ ᒑ ᑭᓂᐙᐱᐦᑎᐦᒃ᙮ 13 ᓂᒧᐃ ᒋᑎᐄᑎᔓᒥᑎᓈᐙᐤ ᒑ ᒌ ᐃᔮᔨᒥᐦᐄᓱᔮᒄ ᐊᓂᑎᐦ ᒑ ᒌ ᐅᐦᒋ ᐙᐦᒋᐱᐦᐄᑯᒡ ᑯᑎᑭᒡ ᐄᔨᔨᐅᒡ ᒑᒀᔨᐤ, ᒥᒄ ᒫᒃ ᐊᓂᑎᐦ ᒑ ᒌ ᐅᐦᒋ ᐃᔮᑦ ᒥᓯᐙ ᐊᐙᓐ ᒥᒄ ᐊᓂᔮᔨᐤ ᒑᒀᔨᐤ ᓈᑎᐙᔨᐦᑎᐦᒃ᙮ 14 ᐊᓅᐦᒡ ᒫᒃ, ᐙᔪᒡ ᒋᒋᔮᓈᐙᐤ ᒑᒀᓐ ᒑ ᒌ ᐐᒋᐦᐋᑯᒡ ᐊᓂᒌ ᐄᔨᔨᐅᒡ ᑳ ᓅᐦᑖᐱᔨᔨᒡ᙮ ᐋᒄ ᒫᒃ ᒑᒃ ᐃᓯᓈᑯᐦᒑ ᒌᔨᐙᐤ ᐋ ᓅᐦᑖᐱᔮᒄ ᑯᑎᑭᒡ ᒫᒃ ᐋ ᐙᔪᒡ ᐃᔮᒡ ᐋᒄ ᒫᒃ ᐐᔨᐙᐤ ᒀᔅᒌᐱᓐ ᒑ ᒌ ᐐᒋᐦᐄᑖᑯᒡ᙮ ᐋᒄ ᒫᒃ ᒑ ᑖᐱᔅᑯᒋᐱᔨᒡ ᒥᓯᐙ ᐊᐙᓐ ᑖᓐ ᐋ ᐄᔑ ᐃᔮᑦ᙮ 15 ᒧᔮᒻ ᐋᑎᔥᑖᒡ ᒋᐦᒋᒥᓯᓂᐦᐄᑭᓂᐦᒡ, ᐊᓐ ᐊᐙᓐ ᒥᔥᑏᐦ ᑳ ᒫᐅᒋᐦᑖᑦ ᓂᒧᐃ ᓈᔥᒡ ᐹᔥᒡ ᒥᔥᑏᐦ ᐅᐦᒋ ᐃᔮᐤ, ᐋᒄ ᐊᓐ ᒥᒄ ᐊᐱᔒᔥ ᑳ ᒫᐅᒋᐦᑖᑦ ᓂᒧᐃ ᐅᐦᒋ ᓅᐦᑖᐱᔨᐤ᙮ ᑖᐃᑎᔅ ᑯᕆᓐᑏᐦᒡ ᑳᐦ ᐄᑎᔑᐦᐙᑭᓄᑦ 16 ᓂᓂᓈᔅᑯᒫᐤ ᒋᔖᒥᓂᑑ ᐋ ᒌ ᒥᔮᑦ ᑖᐃᑎᔅ ᒧᔮᒻ ᓃᔨ ᐋ ᐄᔑ ᓵᒋᐦᐄᑎᑯᒡ ᒑ ᒌ ᐄᔑ ᓵᒋᐦᐄᑖᒄ᙮ 17 ᓂᒧᐃ ᒥᒄ ᐊᓂᔮᔨᐤ ᐋ ᒌ ᐐᐦ ᐄᑎᔑᐦᐅᒋᐦᑦ ᐊᓂᑖᐦ ᐋᐦᑖᐙᒄ ᐙᐦᒋ ᐄᑐᐦᑖᑦ, ᓈᔥᒡ ᐙᔥ ᒋᒌ ᐐᐦ ᓂᑎᐙᐱᒥᑯᐙᐤ᙮ 18 ᑖᐤ ᐅᑎᐦ ᑯᑎᒃ ᒌᒋᔖᓂᐤ ᓈᔥᒡ ᐋ ᒥᔪ ᒋᔅᒑᔨᒥᑯᑦ ᒥᓯᐙ ᑖᓂᑖᐦ ᐋᐦ ᐋᑎ ᐃᔨᐦᑖᔨᒡ ᐅᒫᒨᐊᔨᒥᐦᐋᐤ ᑖᓐ ᐋ ᐄᔑ ᒥᔻᐱᑎᓯᑦ ᐋ ᐙᐐᐦᑎᐦᒃ ᒥᔻᒋᒧᐎᓂᔨᐤ᙮ ᐋᐅᒄ ᐆ ᑳᐦ ᐄᑎᔑᐦᐅᒋᐦᒡ ᒑ ᒌ ᐐᒑᐙᑦ ᑖᐃᑎᔅ᙮ 19 ᐋᔨᐤᐦ ᒫᒃ ᐅᒫᒨᐊᔨᒥᐦᐋᐤ ᒌ ᐎᔮᔨᒥᑰ ᒑ ᒌ ᐐᒑᐅᔨᒥᐦᑦ ᐋᐦ ᐄᑐᐦᑐᐎᒋᐦᒡ ᐊᓂᒌ ᑳ ᒋᔅᑎᒫᑎᓰᔨᒡ ᑳ ᑖᑆᔮᔨᐦᑎᐦᒡ ᐊᓂᔮᔨᐤ ᒌ ᐱᒋᔅᑎᓂᒑᐎᓂᐙᔨᐤ᙮ ᑎᐹᔨᐦᒋᒑᓯᐤ ᒫᒃ ᓂᐐᐦ ᒋᔅᑖᔨᐦᑖᑯᐦᐋᓈᓐ ᐆ ᑳᐦ ᑐᑎᒫᐦᒡ᙮ ᐋᑯᑖᐦ ᒑ ᓅᑯᐦᒡ ᐋ ᐐᐦ ᐐᒋᐦᐄᐙᔮᐦᒡ᙮ 20 ᓂᒧᐃ ᑭᔮᐦ ᓂᓂᑎᐙᔨᐦᑖᓈᓐ ᓂᑎᐐ ᒥᒄ ᒑ ᒌ ᐄᔑ ᐊᑖᒫᔨᒥᑯᔮᐦᒡ ᐋ ᐱᒥᐱᔨᐦᑖᔮᐦᒡ ᐆ ᐙᔪᒡ ᐱᒋᔅᑎᓂᒑᐎᓐ᙮ 21 ᓂᐐᐦᑐᑖᓈᓐ ᐊᓂᔮᔨᐤ ᒑ ᓂᐦᐋᔨᑎᒥᐦᐄᑯᑦ ᑎᐹᔨᐦᒋᒑᓯᐤ, ᑭᔮᐦ ᒫᒃ ᓂᐐᐦᑐᑖᓈᓐ ᐊᓂᔮᔨᐤ ᑯᐃᔅᒄ ᐋ ᐄᔑ ᑭᓂᐙᐱᐦᑎᐦᒃ ᓈᐹᐤ᙮ 22 ᐋᔪᐎᒄ ᒫᒃ ᑭᔮᐦ ᐙᐦᒋ ᐄᑎᔑᐦᐅᒋᐦᑦ ᐆ ᒌᒋᔖᓂᐤ ᒑ ᒌ ᐐᒑᐙᑦ ᐊᓂᔮᔨᐤ ᑖᐃᑎᔅ᙮ ᒥᐦᒑᑣᐤ ᓂᒌᐙᐱᐦᑎᔨᑯᓈᓐ ᑖᑆᐦ ᑭᔮᐦ ᐐᔨ ᐋ ᐐᐦ ᐐᒋᐦᐄᐙᑦ᙮ ᐊᓂᔮᔨᐤ ᒫᒃ ᑖᓐ ᐋ ᐄᔑ ᑖᑆᐅᒑᔨᒥᑖᒄ ᐋᒄ ᐊᑎᑎᐤ ᐙᐦ ᐐᒋᐦᐄᑖᒄ᙮ 23 ᐆ ᒫᒃ ᑖᐃᑎᔅ ᐋᐅᒄ ᐆ ᐙᒋᐋᐱᑎᓰᒥᑦ ᐋ ᐐᒋᐦᐄᑎᑯᒡ᙮ ᐋᒄ ᐊᓂᒌ ᑯᑎᑭᒡ ᒌᒋᔖᓅᒡ ᐅᒫᒨᐊᔨᒥᐦᐋᐤ ᒌ ᐄᑎᔓᐦᐅᑯᒡ᙮ ᒋᔅᑖᔨᐦᑖᑯᐦᐋᐅᒡ ᒫᒃ ᙭ ᒑᒀᔨᐤ ᐋᐦ ᑐᑎᐦᒡ᙮ 24 ᓲᐦᒃ ᒫᒃ ᐙᐱᐦᑎᔮᐦᑯᒡ ᐅᒌ ᓈᐹᐅᒡ ᐋ ᓵᒋᐦᐋᑯᒡ ᒑ ᒌ ᐙᐱᐦᑎᐦᒡ ᐅᒫᒨᐊᔨᒥᐦᐋᐅᒡ ᒌ ᓵᒋᐦᐄᐙᐎᓂᐙᔨᐤ ᑭᔮᐦ ᒑ ᒌ ᒋᔅᒑᔨᐦᑎᐦᒡ ᒑᒀᓐ ᐙᐦᒋ ᓈᔥᒡ ᒫᒥᐦᒋᐦᐄᔮᐦᒡ᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.