ᓃᔓ ᑯᕆᓐᕠᔨᓐ 2 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡ1 ᔖᔥ ᓂᒌᐦ ᐄᑖᔨᐦᑖᓐ ᐋᑳ ᒑ ᐅᐦᒋ ᐐᐦ ᒥᓯᒫᔨᐦᑎᒥᐦᐄᑎᑯᒡ ᒦᓐ ᓂᑎᐙᐱᒥᑎᑯᒑ, 2 ᐙᔥ ᒋᒥᔻᔨᐦᑎᒥᐦᐄᓈᐙᐤ᙮ ᒥᓯᒫᔨᐦᑎᒥᐦᐄᑎᑯᒑ ᒫᒃ, ᐊᐙᓐ ᒦᓐ ᐋᐦ ᑖᑦ ᒑ ᒥᔻᔨᐦᑎᒥᐦᐄᑦ? 3 ᐋᐅᒄ ᐙᐦᒋ ᒥᓯᓂᐦᐋᒫᑎᑯᒡ ᐊᓐ ᑳ ᒥᓯᓂᐦᐋᒫᑎᑯᒡ, ᐋᐦᐋᑳ ᐱᑦ ᐅᐦᒋ ᐐᐦ ᓂᑎᐙᐱᒥᑖᑯᒡ᙮ ᓂᒧᐃ ᓅᐦᒋ ᓂᑎᐙᔨᐦᑖᓐ ᒑ ᒌ ᒥᓯᒫᔨᐦᑎᒥᐦᐄᔮᒄ ᓂᑎᐙᐱᒥᑎᑯᒑ, ᐙᔥ ᒌᔨᐙᐤ ᒋᐱᐦ ᒥᔻᔨᐦᑎᒥᐦᐄᓈᐙᐤ᙮ ᓂᒑᔅᑏᓈᐦᐅᓐ ᒥᔻᔨᐦᑎᒫᓈ ᑭᔮᐦ ᒌᔨᐙᐤ ᒑ ᒥᔻᔨᐦᑎᒫᒄ᙮ 4 ᐅᑎᐦ ᑳ ᒥᓯᓂᐦᐋᒫᑎᑯᒡ ᒫᒀᒡ ᓈᔥᑖᑆᐦ ᓂᒌ ᒥᑯᔥᑳᑖᔨᐦᑖᓐ᙮ ᓂᒌ ᐲᑯᑖᐦᐋᓐ᙮ ᒥᔥᑏᐦ ᑭᔮᐦ ᓂᒌ ᐅᐦᒋᑯᐙᐱᓐ᙮ ᑖᐹ ᑰᐦᒋ ᐐᐦ ᒥᓯᒫᔨᐦᑎᒥᐦᐄᑎᓈᐙᐤ ᐊᓐ ᑳ ᒥᓯᓂᐦᐋᒫᑎᑯᒡ ᒥᒄ ᒋᒌ ᐐᐦ ᒋᔅᒑᔨᐦᑎᒥᐦᐄᑎᓈᐙᐤ ᑖᓐ ᐋ ᐃᔥᐱᔥ ᒥᔥᑎᐦ ᓵᒋᐦᐄᑎᑯᒡ᙮ ᒑ ᒌ ᐙᐹᔨᐦᑎᒧᐙᑭᓅᑦ ᐊᐙᓐ ᑳ ᐎᓂᑐᑎᐦᒃ 5 ᐋᐦ ᑖᒀ ᐊᐙᓐ ᐋ ᒌ ᒥᓯᒫᔨᐦᑎᒥᐦᐋᑦ ᐊᐙᔨᐤᐦ, ᓂᒧᐃ ᒥᒄ ᓃᔨ ᓅᐦᒋ ᒥᓯᒫᔨᐦᑎᒥᐦᐄᒄ᙮ ᒌᔨᐙᐤ ᒫᒃ ᒑᑳᑦ ᒥᓯᐙ ᐋ ᑎᔑᔮᒄ ᒌᐦ ᑎᑯᓂᔨᐤ ᑖᓐ ᑳ ᐄᔑ ᒥᓯᒫᔨᐦᑎᒥᐦᐄᑖᒄ᙮ ᓂᒧᐃ ᐊᑎᑎᐤ ᒥᔥᑏᐦ ᐹᔅᒡ ᓂᐐ ᐋᔨᒨᑖᓐ ᐆ᙮ 6 ᔖᔥ ᒫᒃ ᐄᔅᐱᔨᔨᐤ ᐊᓂᔮᔨᐤ ᑖᓐ ᑳ ᐄᔑ ᒥᒫᑯᐦᐄᑯᑦ ᒑᑳᑦ ᒥᓯᐙ ᐊᓂᔮᔨᐤ ᐄᔨᔨᐤᐦ, ᐊᑯᓐ ᒫᒃ ᐋᒄ ᐃᔥᐱᔥ᙮ 7 ᐅᑎᐦᒋᐱᔨᐤ ᒫᒃ ᔖᔥ ᒑ ᒌ ᐙᐹᔨᐦᑎᒧᐙᒄ᙮ ᑭᔮᐦ ᒋᐱᐦ ᒥᔻᔨᒧᐦᐋᐙᐤ ᒑᐦ ᐋᑳ ᐄᑖᔨᐦᑎᐦᒃ ᒑᐦ ᐋᑳ ᒌᐦ ᑎᐦᒃ ᐊᓂᔮᔨᐤ ᐅᐦᒋ ᐅᓵᒻ ᓈᔥᒡ ᐋ ᒥᒑᔨᐦᑎᐦᒃ᙮ 8 ᐋᐅᒄ ᐙᐦᒋ ᐋᔨᐦᑭᒥᑎᑯᒡ ᒑ ᒌ ᒋᔅᒑᔨᐦᑎᒥᐦᐋᒄ ᑖᑆᐦ ᐋᔥᒄ ᐋ ᓵᒋᐦᐋᒄ᙮ 9 ᒋᒌ ᒥᓯᓂᐦᐋᒫᑎᓈᐙᐤ ᐋ ᐐᐦ ᓂᑑᒋᔅᒑᔨᒥᑎᑯᒡ ᐊᓐ ᑳ ᐄᔑ ᑰᒀᒋᐦᐄᑎᑯᒡ, ᒑ ᓂᓂᐦᐄᐦᑎᒧᐙᒀ ᒥᓯᐙ ᑳᐦ ᐄᑎᔓᒥᑎᑯᒡ᙮ 10 ᐙᔥ ᒥᒄ ᑎᐦᑐ ᐎᔮᐹᔨᐦᑎᒧᐙᒄ ᐊᐙᓐ ᑖᓐ ᒥᒄ ᑳᐦ ᑎᒀ ᑭᔮᐦ ᓃᔨ ᓂᐙᐹᔨᐦᑎᒧᐙᐤ᙮ ᓈᑎᐙᔨᐦᑖᑯᓂᒀ ᒑ ᒌ ᐙᐹᔨᐦᑎᒨᒃ ᐊᐙᓐ ᓂᐙᐹᔨᐦᑎᒧᐙᐤ ᒌᔨᐙᐤ ᒑ ᒌ ᐐᒋᐦᐄᑯᔮᒄ ᐋ ᒋᔅᒑᔨᐦᑎᒫᓐ ᙭ ᐋ ᐙᐱᒥᑦ᙮ 11 ᐆ ᒫᒃ ᒋᑎᑎᓈᓂᐤ ᐋᑳ ᒑ ᒌ ᓵᑯᐦᐄᑖᒄ ᒥᒋᒥᓂᑑ᙮ ᐙᔥ ᒌ ᒋᔅᒑᔨᒫᓂᐤ ᑖᓐ ᐙᐦ ᑎᒃ᙮ ᑦᕎᐋᓯᐦᒡ ᑭᔮᐦ ᒫᒃ ᒫᓯᑐᓂᔮᐦᒡ ᑳ ᐄᑐᐦᑖᑦ ᑆᓪ 12 ᑦᕎᐋᔅ ᑳ ᐃᔑᓂᐦᑳᑖᒡ ᐃᐦᑖᐎᓐ ᐋᑯᑖᐦ ᑳ ᓂᑑᑭᒑᔅᒀᔮᓐ ᙭ ᐅᒥᔻᒋᒧᐎᓐ᙮ ᑳ ᐹᐲᔮᓐ ᒫᒃ ᐊᓂᑖᐦ ᒥᑐᓐ ᒌ ᓂᔅᑑᓈᑯᓐ ᑎᐹᔨᐦᒋᒑᓯᐤ ᔖᔥ ᐋ ᒌ ᐃᔮᔅᑰᔥᑖᑯᐱᓈ ᐊᓂᑎᐦ ᒑ ᒌ ᑭᒑᔅᒀᐅᒡ᙮ 13 ᒥᒄ ᒫᒃ ᐊᔮᐱᒡ ᒌ ᑎᑯᓐ ᑖᓐ ᑳ ᐄᔑ ᒥᑯᔥᑳᑖᔨᐦᑎᒫᓐ ᐙᔥ ᑖᐹ ᓅᐦᒋ ᐙᐱᒫᐤ ᓃᒋᔖᓐ ᑖᐃᑎᔅ ᐊᓂᑖᐦ ᒑ ᒌ ᑖᑦ᙮ ᐋᒄ ᒫᒃ ᑳ ᓂᑭᑎᒀᐤ ᐊᓂᒌ ᐄᔨᔨᐅᒡ ᐊᓂᑎᐦ ᑳᐦ ᑖᒡ᙮ ᒫᓯᑐᓂᔮ ᑳ ᐃᔑᓂᐦᑳᑖᒡ ᐊᔅᒌ ᐋᑯᑖᐦ ᒦᓐ ᑳ ᐄᑐᐦᑖᔮᓐ᙮ ᙭ ᒌ ᒥᔨᑯᓂᐤ ᒑ ᒌ ᑭᔥᒋᐦᐅᒄ 14 ᒥᒄ ᒫᒃ ᑖᑆᐦ ᓂᓂᓈᔅᑯᒫᐤ ᒋᔖᒥᓂᑑ, ᐐᔨ ᒨᔥ ᐋ ᒋᔅᒋᓄᑎᐦᐄᑎᐦᒄ ᐊᓂᑎᐦ ᒑ ᒌ ᑎᑯᓯᓃᔨᐦᒡ ᐄᔨᔨᐤ ᒑ ᒌ ᒋᔅᑖᔨᒫᔨᒡ ᙭ ᑭᔮᐦ ᐆ ᑖᐱ ᑭᔅᒋᐦᐆᐎᓂᔨᐤ᙮ ᐆ ᒫᒃ ᙭ ᒋᔅᒑᔨᐦᑎᒨᐎᓐ ᐋᐦ ᐋᑎ ᒥᓯᐦᑖᐲᐦᑖᔮᐦᒡ ᒥᒄ ᑖᓂᑖᐦ ᐋᑎ ᐄᑑᐦᑖᔮᐦᒡ ᒨᔮᒻ ᑳ ᒥᔪᒫᑯᓯᒡ ᒑᒀᓐ ᐋ ᒥᔮᐦᑭᑖᒡ ᐄᑖᔨᐦᑖᑯᓐ᙮ 15 ᓃᔮᓐ ᒫᒃ ᐋ ᑭᒑᔅᒀᔮᐦᒡ ᙭ ᒑ ᒌ ᒋᔅᒑᔨᒫᑭᓅᑦ ᒧᔮᒻ ᑳ ᒥᔪᒫᑯᓰᔨᒡ ᐋ ᒥᔮᑭᐦᑎᒡ ᐋ ᓂᐦᐋᔨᐦᑎᒥᐦᐄᑯᑦ ᒋᔖᒥᓂᑑ ᐄᑖᔨᐦᑖᑯᓐ᙮ ᐊᓐ ᒫᒃ ᐋ ᐐᐦᒋᒫᔥᑖᒡ ᑭᑎ ᒥᔮᐦᑎᒧᒡ ᐊᓂᒌ ᒑ ᐱᒫᒋᐦᐅᒡ ᐄᔨᔨᐅᒡ ᑭᔮᐦ ᐊᓂᒌ ᐄᔨᔨᐅᒡ ᒑ ᐎᓂᔑᐦᒡ᙮ 16 ᐊᓐ ᒫᒃ ᑳ ᒥᔪᒫᑯᓯᒡ, ᐊᓂᒌ ᒫᒃ ᒑ ᐎᓂᔑᐦᒡ ᓂᐱᐎᓂᔨᐤ ᐋᐅᒄ ᒫᔮᐦᑎᐦᒡ, ᐋᒄ ᐊᓂᒌ ᒑ ᐱᒫᒋᐦᐅᒡ ᐱᒫᒋᐦᐄᐙᐎᓂᔨᐤ ᐋᔪᐎᒄ ᒫᔮᐦᑎᐦᒡ᙮ ᐆ ᒫᒃ ᐋᐱᑎᓰᐎᓐ ᐋᑐᑎᒫᐦᒡ ᓈᔅᑖ ᒋᔥᑎᒫᐎᓐ, ᐊᐙᓐ ᒫᒃ ᒑ ᑭᔅᒋᐆᐦᑦ ᐅᔮᔨᐤ ᒑ ᒌᐦ ᑐᑎᐦᒃ᙮ 17 ᐱᔅᒡ ᐄᔨᔨᐅᒡ ᑳ ᐱᐹᑭᒑᔅᒀᒡ ᒧᔮᒻ ᐋ ᐱᐹᐊᑖᐙᒑᐙᒡ ᒋᔖᒥᓂᑑ ᐅᑎᔨᒧᐎᓂᔨᐤᐦ, ᐋᔪᐎᒄ ᐋ ᐃᓯᓈᑯᓯᒡ ᐋ ᐐᐦ ᐅᐦᑎᓰᔨᒡ ᔓᐎᔮᓐ᙮ ᓂᒧᐃ ᐐ ᓃᔮᓐ ᐆ ᓂᑎᐦᑐᑖᓈᓐ᙮ ᒥᒄ ᒫᒃ ᓂᑎᐋᔨᒨᑖᓈᓐ ᐊᓐ ᒥᔻᒋᒧᐎᓐ ᐊᓐ ᐅᐦᒋ ᐆ ᓲᐦᑳᑎᓰᐎᓐ ᙭, ᐋᐦ ᐋᐱᑎᔒᔥᑑᒋᐦᑦ ᒋᔖᒥᓂᑑ ᐋ ᑖᐱ ᒋᔅᑖᔨᒥᒋᐦᑦ, ᐙᔥ ᐐᔨ ᐋ ᒌ ᐹᒋ ᐄᑎᔓᐦᐆᔨᒥᐦᑦ᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.