ᓃᔥᑎᒻ ᑯᕆᓐᕠᔨᓐ 8 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡᒦᒋᒥᔨᐤ ᐋ ᒌ ᒥᒋᔥᑖᐦᐋᒧᐙᑭᓂᐎᒡ ᒥᓂᑑᐦᑳᓂᒡ 1 ᐋᒄ ᒫᒃ ᒑ ᐋᔨᒨᑎᒫᑎᑯᒡ ᑖᓐ ᒋᐱᐦ ᐄᔑ ᑭᓂᐙᐱᐦᑖᑭᓂᐤ ᒦᒋᒻ ᒥᓂᑑᐦᑳᓂᒡ ᐋ ᒌ ᐱᒋᔅᑎᓂᒧᐙᑭᓂᐎᒡ᙮ ᐄᓈᓂᐤ ᒥᓯᐙ ᐊᐙᓐ ᐋ ᐃᔮᑦ ᒋᔅᒑᔨᐦᑎᒧᐎᓂᔨᐤ᙮ ᓈᔅᑖ ᐙᐦᑎᓂᔪ ᐊᐙᓐ ᒑ ᒌ ᑐᑖᑯᑦ ᒋᔅᒑᔨᐦᑎᒧᐎᓂᔨᐤ ᓈᔥᒡ ᒑ ᒌ ᐄᑖᔨᒦᓱᑦ᙮ ᒥᒄ ᒫᒃ ᐊᐙᓐ ᑳ ᐃᔮᑦ ᓵᒋᐦᐄᐙᐎᓂᔨᐤ ᑐᑎᐙᐤ ᑯᑎᒃ ᐊᐙᔨᐤᐦ ᒑ ᒌ ᒥᔥᑭᐎᑳᐳᐎᒡ᙮ 2 ᐋᒄ ᒫᒃ ᐋᑖᔨᐦᑎᒧᒀ ᐊᐙᓐ ᓈᔥᒡ ᒥᔥᑏᐦ ᐋ ᒋᔅᒑᔨᐦᑎᐦᒃ ᒑᒀᔨᐤ, ᓅᑯᐦᑖᐤ ᐋᔥᒄ ᐋᐦᐋᑳ ᒋᔅᒑᔨᐦᑎᐦᒃ ᑖᓐ ᒑ ᐄᔑ ᒋᔅᒑᔨᐦᑎᒧᑯᐱᓈ ᔖᔥ᙮ 3 ᒥᒄ ᒫᒃ ᐊᓐ ᐊᐙᓐ ᑳ ᓵᒋᐦᐋᑦ ᒋᔖᒥᓂᑑ ᐋᐅᒄ ᐆ ᒑᔅᒑᔨᒥᑯᑦ ᒋᔖᒥᓂᑑ᙮ 4 ᐋᒄ ᒫᒃ ᐙᐦ ᐋᔨᒨᑎᒫᓐ ᐋ ᒦᒋᓈᓂᐎᒡ ᒦᒋᒻ ᒥᓂᑑᐦᑳᓂᒡ ᐋ ᒌ ᐱᒋᔅᑎᓂᒧᐙᑭᓂᐎᒡ᙮ ᒋᒋᔅᒑᔨᐦᑖᓈᓂᐤ ᐋᐦᐋᑳ ᒥᑐᓐ ᒑᒀᓐ ᐄᑖᔨᐦᑖᑯᓯᒡ ᑭᔮᐦ ᐋᐦᐋᑳ ᑖᑦ ᑯᑎᒃ ᐊᐙᓐ ᐋ ᒋᔖᒥᓂᑑᐎᑦ, ᒥᒄ ᐹᔨᑰ ᒋᔖᒥᓂᑑ᙮ 5 ᐋᑦ ᐋ ᐄᑖᔨᐦᑎᐦᒡ ᐄᔨᔨᐅᒡ ᐋ ᒥᐦᒑᑎᔨᒡ ᒥᓂᑑᐦ ᐅᑎᐦ ᐊᔅᒌᐦᒡ ᑭᔮᐦ ᒋᐦᒋᒌᔑᑯᐦᒡ ᑭᔮᐦ ᒥᐦᒑᑐ ᐊᓂᒌ ᐋ ᐃᔑᓂᐦᑳᑖᑭᓂᐎᒡ ᒥᓂᑑ ᑭᔮᐦ ᒫᒃ ᑎᐹᔨᐦᒋᒑᓯᐤ, 6 ᒋᑖᑆᐦᑖᓈᓂᐤ ᒌᔮᓂᐤ ᒥᒄ ᐋ ᐹᔨᑯᔑᑦ ᒋᔖᒥᓂᑑ ᐊᓐ ᐙᐆᐦᑖᐐᒫᐅᑦ, ᐊᓐ ᒥᓯᐙ ᒑᒀᔨᐤ ᑳ ᐅᔑᐦᑖᑦ, ᑭᔮᐦ ᒫᒃ ᐐᔨ ᐋᐅᒄ ᐹᒫᑎᓰᔅᑑᐦᒄ᙮ ᑭᔮᐦ ᒥᒄ ᐹᔨᑯᓯᐤ ᑎᐹᔨᐦᒋᒑᓯᐤ, ᐋᐅᒄ ᒌᓴᔅ ᙭᙮ ᐐᔨ ᐅᐦᒋ ᐙᐦᒋ ᑎᑯᐦᒡ ᒥᓯᐙ ᒑᒀᓐ ᑳ ᐅᔑᐦᑖᑭᓂᐎᒡ, ᑭᔮᐦ ᒫᒃ ᐐᔨ ᐅᐦᒋ ᐙᐦᒋ ᐃᔮᔨᐦᒄ ᐱᒫᑎᓰᐎᓐ᙮ 7 ᒥᒄ ᒫᒃ ᓂᒧᐃ ᒥᓯᐙ ᐊᐙᓐ ᒋᔅᒑᔨᐦᑎᒻ ᐋ ᑖᑆᒥᑭᓃᔨᒡ ᐅᔮᔨᐤ᙮ ᐱᔅᒡ ᐄᔨᔨᐅᒡ ᐋᔥᒄ ᓈᔥᒡ ᐄᑖᔨᒫᐅᒡ ᒥᓂᑑᐦᑳᓐ, ᐄᑖᔨᐦᑎᒧᒡ ᒧᔮᒻ ᒥᓂᑑᐦᑳᓐ ᐋ ᐊᔨᒥᐦᐋᔅᑎᐙᒡ ᐋ ᐃᓯᓈᑯᓯᒡ ᐋ ᒦᒋᒡ ᒧᒋᔥᑖᐦᐋᒫᐎᓂᔨᐤ ᒥᓂᑑᐦᑳᓐ ᐋ ᒌ ᐱᒋᔅᑎᓂᒫᒫᑭᓂᐎᔨᒡ᙮ ᐙᐦᒋᐱᔨᐤ ᒑ ᒌ ᐄᑖᔨᐦᑎᐦᒡ ᐋ ᒥᒌᐦᑐᑖᐦᒡ ᐅᔮᔨᐤ, ᐙᔥ ᓂᒧᐃ ᐋᔨᒋᑳᐳᐎᒡ ᐆ ᑖᑆᔮᔨᐦᑎᒧᐎᓂᐙᒡ᙮ 8 ᓂᒧᐃ ᐊᓐ ᒦᒋᒻ ᒫᒌᔨᐦᒄ ᒋᑭ ᑐᑖᑯᓈᓂᐤ ᐊᐅᔅᑖ ᒑ ᒌ ᐄᑖᔨᐦᑖᑯᓰᔨᐦᒄ ᒋᔖᒥᓂᑑ ᐄᔑ ᐋᐦ ᑖᑦ᙮ ᓂᒧᐃ ᐊᐅᔅᑖ ᒋᑭ ᐅᐦᒋ ᐄᑖᔨᐦᑖᑯᓯᓈᓂᐤ ᐋᑦ ᒦᒋᔨᐦᒀ ᑭᔮᐦ ᓂᒧᐃ ᓃᐦᑖᒡ ᒋᑭ ᐅᐦᒋ ᐄᑖᔨᐦᑖᑯᓯᓈᓂᐤ ᐋᑦ ᐋᑳ ᒦᒋᔨᐦᒀ᙮ 9 ᔮᒀᒦᐦ ᒫᒃ᙮ ᐊᓐ ᐋ ᐃᓯᓈᑯᐦᒡ ᒑ ᒌ ᐎᔮᔨᐦᑎᒫᓱᔨᓐ ᒌᔨ ᑖᓐ ᒑ ᑎᔨᓐ, ᐊᑳᐐ ᒋᑭ ᐅᐦᒋ ᑐᑖᑰ ᑯᑎᒃ ᐊᐙᓐ ᐋᔥᒄ ᐋᑳ ᑳ ᐋᔨᒋᑳᐳᑦ ᑖᑆᔮᔨᐦᑎᒧᐎᓂᐦᒡ ᒑ ᒌ ᒥᒋᐦᑐᑎᐦᒄ ᐅᐦᒋ ᐊᓂᑎᐦ᙮ 10 ᐊᑖᑳ ᐄᑖᔨᐦᑎᒥᓈ ᒌᔨ ᐋᐦᐋᑳ ᒫᔮᑎᐦᒡ ᐋ ᒦᒋᓱᔨᓐ ᐊᓂᑖᐦ ᒥᓂᑑᐦᑳᓐ ᐋᔮᒥᐦᐋᐅᑭᒥᑯᐦᒡ, ᐙᐱᒥᔅᑳ ᒫᒃ ᐊᐙᓐ ᐊᒦᒋᓲᑦ ᐊᓂᑎᐦ ᐋ ᐄᑖᔨᐦᑎᐦᒃ ᒫᒃ ᐋ ᒥᒌᐦᑐᑖᑭᓄᐐᒡ ᐋ ᒦᒋᓈᓂᐎᒡ ᐊᓂᔮᔨᐤ ᒦᒋᒥᔨᐤ ᒥᓂᑑᐦᑳᓐ ᑳ ᐱᒋᔅᑎᓂᒫᒫᑭᓂᐎᔨᒡ᙮ ᒀᔂᓐ ᐊᔮᐱᒡ ᒋᑭ ᒦᒋᓲ ᑭᔮᐦ ᐋᐦᐋᑦ ᐄᑖᔨᐦᑎᐦᒃ ᐋ ᒥᒌᐦᑐᑖᑭᓂᐎᒡ᙮ 11 ᒫᒥᑐᓈᔨᒥᑖ ᐊᓐ ᒌᒋᔖᓐ ᐋᑳ ᑳ ᐋᔨᒋᑳᐳᑦ, ᒋᑭ ᒌ ᐃᓯᓈᑯᓐ ᒋᒋᔅᒑᔨᐦᑎᒧᐎᓂᒡ ᒑ ᒌ ᓂᔑᐎᓈᒋᐦᑖᐙᑦ ᐅᑖᑆᔮᔨᐦᑎᒧᐎᓐ᙮ ᒋᔥᒋᓯᐦ ᒫᐦ ᑭᔮᐦ ᐐᔨ ᐋ ᒌ ᓂᐳᔅᑎᒫᑯᑦ ᙭᙮ 12 ᐎᓂᑐᑐᑖ ᒫᒃ ᒌᒋᔖᓐ ᐊᓐ ᐋᐦᐋᑳ ᔮᐃᒋᑳᐴᑦ ᐅᑖᑆᔮᔨᐦᑎᒧᐎᓂᒡ ᑭᔮᐦ ᐊᑰᐦᐄᑖ ᐋᑐᑖᐅᑦ ᒑ ᒌ ᑐᑎᐦᒄ ᒑᒀᔨᐤ ᐋ ᒥᒋᐦᑐᑎᐦᒃ, ᙭ ᒌ ᐎᓂᑐᑎᐙᐤ᙮ 13 ᐋᒄ ᒫᒃ, ᒦᒋᔮᓈ ᒦᒋᒻ, ᑐᑖᑯᒑ ᒫᒃ ᓃᒋᔖᓐ ᒑ ᒌ ᐎᓂᑐᑎᐦᒄ ᐊᓂᔮᔨᐤ ᐋᐦᑑᒡ, ᓂᒧᐃ ᒦᓐ ᓂᐦᑖ ᓂᑭ ᐅᐦᒋ ᒦᒋᓐ ᐊᓐ ᒦᒋᒻ ᒑ ᑐᑖᑰᒀ ᓃᒋᔖᓐ ᒑ ᒌ ᐱᐦᒋᔑᐦᒃ᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.