ᓃᔥᑎᒻ ᑯᕆᓐᕠᔨᓐ 13 - ᒋᐦᒋᒥᓯᓂᐦᐄᑭᓐ ᑳ ᐅᔅᑳᒡ ᑎᔅᑎᒥᓐᑦ : ᐋᑎᒫᐲᓯᒽ ᐋᔨᒳᐃᓐ ᐋ ᐃᔑ ᐄᐧᑖᔅᑎᒫᑖᑭᓄᐧᐃᒡᓵᒋᐦᐄᐙᐎᓐ ᐋᐅᒄ ᒫᐅᒡ ᒑᔅᑖᔨᐦᑖᑯᐦᒡ 1 ᐋᑦ ᒥᔨᑭᐎᔮᓐ ᒑ ᒌ ᐄᔑ ᐊᔨᒥᔮᓐ ᐋ ᐄᔑ ᐊᔨᒥᒡ ᓂᓈᐦᑭᐤ ᐄᔨᔨᐅᒡ ᑭᔮᐦ ᐋ ᐄᔑ ᐊᔨᒥᒡ ᐋᓐᒋᓂᒡ, ᐋᑳ ᒫᒃ ᐃᔮᔮᓐ ᓵᒋᐦᐄᐙᐎᓐ ᓂᒧᐃ ᐎᔮᔥ ᒋᐱᐦ ᐅᐦᒋ ᐄᑖᐱᑎᓐ ᐊᓐ ᑳ ᐄᔑ ᒥᔨᑭᐎᔮᓐ ᒑ ᒌ ᐄᔑ ᐊᔨᒥᔮᓐ ᐙᔥ ᒧᔮᒻ ᒥᒄ ᐋ ᒥᒥᑣᔮᐱᔅᑭᐦᐄᑭᓂᐎᒡ ᐱᔻᐱᔅᒄ ᓂᐱᐦ ᐄᑎᐦᑖᑯᓯᓐ᙮ 2 ᑭᔮᐦ ᒫᒃ ᐋᑦ ᒥᔨᑭᐎᔮᓐ ᒑ ᒌ ᑭᔅᒋᐦᐅᔮᓐ ᐋ ᒋᔅᒋᐙᐦᐄᒑᔮᓐ ᐋ ᐊᔨᒥᔅᑖᒨᒄ ᒋᔖᒥᓂᑑ, ᑭᔮᐦ ᒫᒃ ᐋᑦ ᒥᓯᐙ ᓂᔅᑐᐦᑎᒫᓐ ᓃᔨ ᑖᓐ ᐋ ᐄᔑ ᐋᑳ ᓂᔅᑐᐦᑎᐦᒡ ᑯᑎᑭᒡ ᐄᔨᔨᐅᒡ, ᑭᔮᐦ ᐋᑦ ᒥᔨᑭᐎᔮᓐ ᒥᓯᐙ ᒑ ᒌ ᒋᔅᒑᔨᐦᑎᒫᓐ ᒑᒀᓐ ᐋᐦᐋᑳ ᐅᐦᒋ ᒋᔅᒑᔨᐦᑎᒥᐦᐄᐙᓂᐎᒡ ᐊᓂᑖᐦ ᐅᑖᐦᒡ ᑭᔮᐦ ᒫᒃ ᐋᑦ ᐃᔮᔮᓐ ᑖᑆᔮᔨᐦᑎᒧᐎᓐ ᒑ ᒌ ᐋᐦᑎᓂᒫᓐ ᐙᒋᔮ ᐋᑳ ᒫᒃ ᐃᔮᔮᓐ ᓵᒋᐦᐄᐙᐎᓐ ᐊᔮᐱᒡ ᓂᒧᐃ ᒥᑐᓐ ᒑᒀᓐ ᓂᐱᐦ ᐅᐦᒋ ᐄᑖᔨᐦᑖᑯᓯᓐ᙮ 3 ᑭᔮᐦ ᐋᑦ ᒥᓯᐙ ᒑᒀᓐ ᐱᒋᔅᑎᓂᒫᓐ ᑖᓐ ᐋ ᐄᔑ ᑎᐱᔨᐙᐅᓯᔮᓐ ᒑ ᒌ ᐐᒋᐦᐋᑭᓂᐎᒡ ᑳ ᒋᔅᑎᒫᑎᓰᔨᒡ, ᐋᑦ ᒫᒃ ᑭᔮᐦ ᐱᒋᔅᑎᓂᒫᓐ ᒑ ᒌ ᐃᔥᒀᓯᑭᓂᐎᒡ ᓂᔨᐤ, ᐋᑳ ᒫᒃ ᐃᔮᔮᓐ ᓵᒋᐦᐄᐙᐎᓐ ᐊᔮᐱᒡ ᓂᒧᐃ ᐎᔮᔥ ᐄᑖᐱᑎᓐ ᐊᓐ ᑖᓐ ᑳ ᐊᔨᐦᑎᔮᓐ᙮ 4 ᐋ ᓵᒋᐦᐋᑦ ᐊᐙᓐ ᐊᐙᔨᐤᐦ ᓈᔥᒡ ᒥᔪᑐᑎᐙᐤ ᑭᔮᐦ ᓰᐱᔨᐙᓰᔅᑎᐙᐤ, ᓂᒧᐃ ᑭᔮᐦ ᐙᐅᐦᑖᔨᐦᑎᒻ ᑭᔮᐦ ᓂᒧᐃ ᒫᒥᐦᒋᒨ, ᑭᔮᐦ ᓂᒧᐃ ᒋᔅᑖᔨᒥᓲ, 5 ᑭᔮᐦ ᓂᒧᐃ ᒫᔮᔨᐦᒑᐤ᙮ ᓂᒧᐃ ᒥᒄ ᐐᔨ ᐙᐦ ᑎᒃ ᐄᐦᑐ᙮ ᓂᒧᐃ ᐙᐦᑎᓂᔨᐤ ᒑ ᒌ ᒋᔑᐙᐦᐄᑯᑦ ᐊᐙᔨᐤᐦ ᑭᔮᐦ ᓂᒧᐃ ᑭᓂᐙᔨᐦᑎᒻ ᐊᓂᔮᔨᐤ ᑖᓐ ᑳ ᐄᔑ ᐎᓂᑐᑖᑯᑦ ᐊᐙᔨᐤᐦ᙮ 6 ᐋ ᓵᒋᐦᐋᑦ ᐊᐙᓐ ᐊᐙᔨᐤᐦ, ᓂᒧᐃ ᒥᔻᔨᐦᑎᒻ ᐋ ᐎᓂᑐᑎᑭᓂᐎᒡ᙮ ᒥᒄ ᒫᒃ ᓄᐎᒡ ᒥᔻᔨᐦᑎᒻ ᑖᑆᐎᓂᔨᐤ᙮ 7 ᐋ ᓵᒋᐦᐋᑦ ᐊᐙᓐ ᐊᐙᔨᐤᐦ ᒨᔥ ᑭᓄᐙᔨᒫᐤ ᒥᒄ ᑖᓐ ᐋ ᑎᔨᒀᓂᐦᐄ᙮ ᑭᔮᐦ ᒨᔥ ᑖᑆᐅᒑᔨᒫᐤ ᐊᓂᔮᔨᐤᐦ ᐊᐙᔨᐤᐦ ᑭᔮᐦ ᒨᔥ ᑎᑯᓂᔨᐤ ᐋ ᐄᔑ ᐱᑯᓵᔨᒧᑦ ᒑ ᒌ ᒥᔪᐱᔨᔨᒡ᙮ ᓂᒧᐃ ᐴᓈᔮᔨᒨᐤ ᑭᔮᐦ ᒨᔥ ᓰᑑᔅᑯᐙᐤ ᐊᓂᔮᔨᐤᐦ ᐊᐙᔨᐤᐦ᙮ 8 ᓂᒧᐃ ᓂᐦᑖ ᒋᑭ ᐅᐦᒋ ᐃᔅᒀᐱᔨᐤ ᓵᒋᐦᐄᐙᐎᓐ᙮ ᐋᒄ ᒫᒃ ᐊᓂᐦᐄ ᑯᑎᒃ ᒥᔨᐙᐎᓐᐦ ᑳ ᐹᔮᐦᒋᓰᑦ ᐊᐦᒑᐦᒄ ᐙᐦᒋᐱᔨᐦᒡ, ᐊᓂᐦᐄ ᐋ ᒋᔅᒋᐙᐦᐄᒑᐤ ᐊᔨᒦᔥᑎᒧᐙᑭᓂᐙᑦ ᒋᔖᒥᓂᑑ ᑭᑎ ᐃᔅᒀᐱᔨᐤ ᑭᔮᐦ ᐋ ᒀᔅᒡ ᐊᔨᒥᓈᓂᐎᒡ ᑭᑎ ᐴᓂᐱᔨᐤ ᑭᔮᐦ ᒫᒃ ᒋᔅᒑᔨᐦᑎᒧᐎᓐ ᑭᑎ ᐄᔥᒀᔮᐤ᙮ 9 ᐙᔥ ᓂᒧᐃ ᒥᓯᐙ ᒑᒀᓐ ᒋᒋᔅᒑᔨᐦᑖᓈᓂᐤ, ᑭᔮᐦ ᒫᒃ ᒥᒄ ᐊᐱᔑᔥ ᒋᒌ ᒋᔅᒋᐙᐦᐄᒑᓈᓂᐤ ᐋᐦ ᐋᔨᒦᔥᑎᒨᐦᒄ ᒋᔖᒥᓂᑑ᙮ 10 ᐋᔥᒄ ᐹᔨᒀᐤ ᒋᑭ ᐅᑎᐦᒋᐱᔨᐤ ᒑ ᒌ ᒋᔅᒑᔨᒫᒄ ᑖᓐ ᓂᐦᐋᐤ ᐋ ᐄᑖᔨᐦᑖᑯᓯᑦ ᒋᔖᒥᓂᑑ᙮ ᐊᓂᐦᐄ ᒫᒃ ᑳ ᑎᐦᒀᒡ ᒋᑭᔅᒋᐦᐆᐐᓂᐤ ᑳ ᐹᔮᒋᓰᑦ ᐊᐦᒑᐦᒄ ᑳ ᒥᔨᑎᐦᒄ, ᓂᒧᐃ ᒋᑭ ᐃᔮᐱᑖᔨᐦᑖᑭᓂᐤ᙮ 11 ᑳ ᐊᐙᔑᔒᐎᔮᓐ, ᒧᔮᒻ ᐊᐙᔑᔥ ᐋ ᐄᔑ ᐊᔨᒥᑦ ᓂᒌᐦ ᐄᔑ ᐋᔨᒥᓐ, ᑭᔮᐦ ᒧᔮᒻ ᐊᐙᔑᔥ ᐋ ᐄᔑ ᒫᒥᑐᓈᔨᐦᑎᐦᒃ ᓂᒌᐦ ᐄᔑ ᒫᒥᑐᓈᔨᐦᑖᓐ, ᑭᔮᐦ ᒫᒃ ᒧᔮᒻ ᐊᐙᔑᔑᒡ ᓂᒌᐦ ᐄᑖᔨᐦᑖᑯᓯᓐ᙮ ᒥᒄ ᒫᒃ ᐊᓅᐦᒡ ᐋᒄ ᓂᔮᐹᐅᔮᓐ, ᒑ ᐴᓂᔮᓐ ᐋ ᐊᐙᔑᔒᐙᔨᐦᑖᑯᓰᔮᓐ᙮ 12 ᒧᔮᒻ ᑭᔮᐦ ᐋ ᑭᓄᐙᐱᒥᐦᒄ ᐊᐙᓐ ᐊᓂᑖᐦ ᐙᐱᒥᓱᓂᐦᒡ, ᓂᒧᐃ ᒋᑎ ᐃᔥᐱᔥ ᐱᔮᑭᔅᒋᓄᐙᓂᐤ ᐋ ᐃᔥᐱᔥ ᐱᔮᑭᔅᒋᓅᐦᒄ ᑎᐱᔨᐙ ᒋᔅᒌᓯᑯᓈᐦᒡ ᐋ ᑭᓄᐙᐱᒥᐦᒄ᙮ ᐋᐅᒄ ᒫᒃ ᒧᔮᒻ ᐋ ᐄᔑ ᒋᔅᒑᔨᒫᒄ ᒋᔖᒥᓂᑑ ᐊᓅᐦᒡ᙮ ᓂᒧᐃ ᒥᑐᓐ ᒋᒋᔅᒑᔨᒫᓂᐤ᙮ ᒥᒄ ᒫᒃ ᐄᔥᐱᐦ ᐅᐦᑎᔅᑰ ᐙᐱᒫᐦᒀ ᐋᒄ ᒥᑐᓐ ᒑ ᒋᔅᒑᔨᒫᒄ, ᒧᔮᒻ ᒌᔮᓂᐤ ᐋ ᐃᔥᐱᔥ ᒥᑐᓐ ᒋᔅᒑᔨᒥᑎᐦᒄ᙮ 13 ᓂᔥᑐ ᒑᒀᓂᐦᐄ ᓂᒧᐃ ᓂᐦᑖ ᒋᑭ ᐅᐦᒋ ᐃᔅᒀᐱᔨᐤ, ᐋᔪᐎᑯᓐᐦ ᐅᐦᐄ᙮ ᑖᑆᔮᔨᐦᑎᒧᐎᓐ, ᐊᔅᐹᔨᒧᐎᓐ ᐋᒄ ᒫᒃ ᓵᒋᐦᐄᐙᐎᓐ᙮ ᐊᓐ ᒫᒃ ᒫᐅᒡ ᒑᔅᑖᔨᐦᑖᑯᐦᒡ ᐋᐅᒄ ᓵᒋᐦᐄᐙᐎᓐ᙮ |
© 2016, Wycliffe Bible Translators, Inc. All rights reserved.
Wycliffe Bible Translators, Inc.