Titus 3 - Chishemanituu Utayimuwin: Kaa Uskaach Testament

Taan chipaa ishi pimaatisiyuuch anichii kaa taapweyimaatwaau Chishemanituuh

¹ Chischisuumach chitiiniimach chechii nituhtawaatwaau aniyuu kaa uchimaamitwaau kaye chechii nanihiihtawaatwaau aniyuu kaa chisheuchimaau aapatisiyich kaye muush chechii ayeskuwiitwaau chechii aapatisiihkahtahkwaau kuiskw e ishinaakuniyich atushchewiniyuu.

² Wiihtamuch ekaa chechii machaayimuumaatwaau aweyuu, chechii chiyaameyihtaakusitwaau kaye chechii miyeyihtaakusitwaau. Muush chipaa yuuspaatisiistuweuch misiwe aweyuuh.

³ Wesh kaye chiyaanuu peyakwaau chichii chiishkwepimaatisiinaanuu, namui chuuhchi nanihiihtuwaanuu Chishemanituu, chichii wiyeshihiikunaanuu kaye chichii shaakuuchihiikunaanuu nanaahkuu machi nituweyihtamuwinh kaye machi miyeyihtamuwinh. Pisikw chichii machaatisiinaanuu kaye chichii uhteyimaanuuch awenichii. Chichii uhkaataanuuch awenich kaye wiyawaau maak chichii uhkaateyimikunuuch.

⁴ Mikw maak iskutak kaa waapahtiitahkw Chishemanituu chipimaachihiiweminuu e ishpish chishewaatutaatahkw kaye e ishpish saachihiitahkw

⁵ chichii pimaachihiikunuu. Namui wii taan kaa ishi chimiyuutuutamuhkw chuuhchi pimaachihiikunuu mikw aniyuu Chishemanituu e chii chistimaacheyimitahkw ekut kaa uhchi pimaachihiitahkw. Kaa payehchisiit Ahchaahkw chichii payehchihiikunuu kaye miin chichii uschihiikunuu.

⁶ Chishemanituu chii weyuuchipayiniyuu e siikanimaataakw Kaa payehchisiyich Ahchaahkwa anit e ihtaayihkw aniyuu uhchi taan kaa ishi ihtuutamaatahkw chipimaachihiiweminuu Jesus Christ.

⁷ Ekw maak aniyuu e chii chishewaatutaatahkw Chishemanituu chichii ihtuutaakunuu chechii kuiskunaakusiihkw ekw maak chiyeshtinaateyihtamuhkw che ayaayihk kaachiche pimaatisiiwin.

⁸ Taapwemakan uu kaa itweyaan. Chinituweyimitin chechii siihchimatwaau anichii kaa taapweyimaatwaau Chishemanituu che wii miyutuutamuwaatwaau kutak aweyuu. Wesh miywaayuu kaye chika miyu wiichihiikuuch uyuu ihtuutahkwaawenich.

⁹ Ihtaauch awenichii e machipayitwaau e aayimuutahkwaau Jewa iinuu wiishuwewinh taan aniyuuh chipaa kanuweyihtaakanuuyuuh kaye e aayimuutahkwaau taan e itiskaatuyich utaanische waahkumaakanawaauh. Ekaawii aapateyihtamukw chechii aayimuutamekw uyuuh chekwaayuuh wesh taapaa wiyesh itaapatan kaye namui mitun wiichihiikuuch awenichii.

¹⁰ Ihtaate awen muush e ihtuutawaat chechii machipayiyich umaamuuayimihaau kaye chechii ihtuutawaat chechii pahkaanipayihuyich wiihtamuu peyakwaau maak niishwaau chechii puuniit aniyuu e ihtit. Ekaa maak nituhtaaske ekush ekaa piskaas.

¹¹ Chichischeyimaau e machituutahk awen uyuu e ihtit. E machituutahk maak ekut e nuukuniyich e wanipayit.

Maahchishtai kaa itashumaat Paul aniyuu Titus

¹² Nititeyihten chechii itishahuuk Artemas kaye maak Tychicus anite e ihtaayin. Iskutak maak takushinitwaawenich uchii naapeuch anite e ihtaayin che kuchihtaayin tiiwehch chechii pechi nachishkuyin anite Nicopolis kaa ishinihkaatech ihtaawin wesh ekut kaa wii ihtaayaan iskan pipun.

¹³ Kata chistuhteuch an wiyaaskunichesuu Zenas ekw maak Apollos. Suuhk che kuchihtaayin chechii wiichihiitwaau e ayeskuwiitwaau, che nituu chischeyimatwaau misiwe chekwaayuu chechii ayaatwaau taan che ishi nituweyihtahkwaau.

¹⁴ Anichii maak chiyaanuu chitiiniiminuuch chipaawii chischeyihtamuch taan chipaa chii ishi miyu atushcheuch, e wiichihaatwaau aweyuuh naashch e nituweyihtamiyich chechii wiichihaakanuyich. Namui chipaa uhchi ishinaakusuuch ekaa wiyesh itaapatisitwaau.

¹⁵ Misiwe maak awenichii utah kaa ihtaatwaau e ihtaayaan chiwaachiyemikuch. Waachiyemach chiwiichewaakanuuch anichii kaa taapwehtahkwaau. Chitayimiheshtamaatinaan Chishemanituu chechii chishewaatutaataakw misiwe e tashiyekw.