Titus 2 - Chishemanituu Utayimuwin: Kaa Uskaach Testament

Miyu chiskutamaachewin

¹ Chiya maak, e chiskutamuutwaau chipaa wiihtamuwaauch taan che ishi pimaatisiitwaau e wii kuiskutaatisiitwaau.

² Wiihtamuuch anichii kaa chisheinuutwaau chechii nanaakataweyihtahkwaau taan e ihtitwaau, kaye chechii iipwaahkaatwaau, kaye chechii ishi pimaatisiitwaau chechii uhchi chisteyimaakanuutwaau. Chipaawii suuhchikaapuuch taapwehtamuwinihch, kaye saachihiiwewinihch kaye siipiiwesiiwinihch ishi.

³ Kaye maak wiihtamuuch chisheiskweshach upimaatisiiwiniwaahch chipaa nuukuniyuu Chishemanituu e pimaatisiistuwaatwaau. Namui chipaa uhchi papaamaachimeuch aweyuu chechii machaachimaatwaau, namui kaye chipaa uhchi wiihchipeuch, teyakuch

⁴ chipaa chischinuhamuweuch uschiniichiskweu chechii saachihaayich unaapemiyuu kaye utawaashiimiyuu.

⁵ Kaye chipaa chischinuhamuweuch chechii iipwaahkaayich, chechii payehchi pimaatisiyich kaye chechii miywaapatisiyich anite wiichiihch, kaye kuiskw chechii ihtiyich e nanihiihtuwaayich unaapemiyuu. Uyuu maak itaatisiyichen namui aweyuu kata uhchi machaayimuutamiyuu Chishemanituu utayimuwiniyuu.

⁶ Kaye maak siihchimach uschiniichuuch chechii yaakwaamiitwaau misiwe taan e ihtitwaau.

⁷ Chiya maak kaye chipaawii waapahtiyaauch taan che ishi chischinuwaapamiskwaau e miyutuutamin misiwe taan e ihtiyin. E chiskutamaacheyin kaye chipaa nuukuhtaan e iipwaahkaayin kaye kuiskw chipaa ishi chischinuhamaachen.

⁸ Kuiskw ishi ayimh, ekw maak anichii kaa aataweyimiskwaau namui chika uhchi miskamuch taan chechii ishi nitawiin itaachimitahkwaau ekw maak che shaakweyimuhiisutwaau.

⁹ Siihchimach aapachihaakanich chechii nanihiihtuwaatwaau uchimaamuwaauh kaye misiwe chechii ishi nanihiiwehaatwaau kaye ekaa chechii nanaaskushihaatwaau

¹⁰ maak chechii kachemutamuwaatwaau. Chipaa nuukuhtaauch e ishpish miywaapatisitwaau kaye e ishpish kuiskw ihtitwaau ekw maak che chisteyihtaakanuyich aniyuu taan e ishi chiskutamaakaanuyich Chishemanituu chipimaachihiiweminuu e aayimuumaakanuyich.

¹¹ Wesh Chishemanituu chii waapahtiiweu uchishewaatisiiwin chechii uhchi pimaachihut misiwe awen.

¹² Uchishewaatisiiwinihch chuuhchi chiskutamaakunuu chechii nakatamuhkw machaatisiiwin kaye ekaa chechii machimushteneyihtamuhkw chekwaan utah aschiihch. Kaye uchishewaatisiiwinihch chuuhchi chiskutamaakunuu chechii yaakwaamiihkw taan e itaatisiihkw, kaye chechii kuiskutaatisiihkw kaye chechii Chishemanituuwaatisiihkw utah aschiihch e ihtaayihkw,

¹³ Eukuu e ishi pimaatisiihkw e ashuwaapahtamuhkw cheshtinaash che ispayihch an e shaweyihtaakuhch e chiishikaach che takushihk an kaa suuhkaatisiit Chishemanituu kaye chipimaachihiiweminuu Jesus Christ e pechi nuukusit uchisteyihtaakusuwinihch.

¹⁴ Chii pachishteyimitisuu Christ chiyaanuu uhchi, chechii wepeyihtamaakuyihkw misiwe chimachihtwaawinuuh kaye chechii payehchihiitahkw mikw wiya chechii ayaautahkw. Chinituweyimikunuu suuhk chechii iteyihtamihiikuyihkw kuiskw chechii ihtiihkw.

¹⁵ Chiskutamuuch uyuu chekwaayuu kaye aapachihtaa an tipeyihchichewin kaa miikuyin chechii kaachiichimitwaau, kaye chechii wiihtamuutwaau taanit e wanipayitwaau. Ekaawii awen chika uhchi wii aatuweyimukw.