Titus 1 - Chishemanituu Utayimuwin: Kaa Uskaach Testament

¹ Niya, Paul, kaa masinahamaataan. Niya Chishemanituu utaapachihaakan kaye Jesus Christ utapastalimh. Nichii itishahukuun chechii wiichihiimach aniyuuh iinuuh Chishemanituu kaa wiyaapamaat chechii taapweyimaayich Jesus. Nichii itishahukuun kaye chechii chiskutamuukwaau chechii chischeyihtahkwaau taapwewiniyuu ekw maak chechii itaatisiitwaau taan e ishi nituweyimikutwaau Chishemanituu chechii itaatisiitwaau.

² Aniyuu maak taan e ishi chiskutamuukwaau ekut che uhchi cheshtinaateyihtahkwaau che ayaatwaau kaachiche pimaatisiiwiniyuu, aniyuu kaa itweyich Chishemanituu anite pechi weskach cheshtinaash che ayaawaakupanenich. Namui maak nihtaa nanatayuu Chishemanituu.

³ Ekw maak wetihchipayiyich anit wiya Chishemanituu kaa iteyihtamihiikut chechii chischeyihtaakunuyich miywaachimuwiniyuu. Ekw maak misiwe awen wiyaawiihtamuuhk uyuu miywaachimuwiniyuu. Niya nichii miikw Chishemanituu chipimaachihiiweminuu chechii aapatisiihkahtamaan uu.

⁴ Chiya Titus chimasinahamaatin. Mwehch tipiyeu nikus ekun e iteyimitaan wesh peyakunihch chit ishi taapwehtenaanuu. Nitayimihaan Chishemanituu Uhtaawiimaau kaye Jesus Christ chipimaachihiiweminuu chechii chishewaatutaaskwaau kaye chechii miiskwaau chiyaameyihtamuwiniyuu.

Taan chipaa itaapatisuu Titus anite Crete kaa ishinihkaateyich

⁵ Chichii nakatitin anit an ministikw Crete kaa ishinihkaatech chechii wiichihiitwaau anichii umaamuuayimihaauch taanit weushtaapayitwaau utaapwehtamuwiniwaahch. Chichii ititin misiwe e tahtihkwaau ihtaawin chechii wiyaapamitwaau anit awenich che niikaanishkuwaatwaau aniyuu umaamuuayimihaauh. Chischisih taan kaa ititaan chipaa iteyihtaakusuu awen e niikaanishkuwaat umaamuuayimihaauh.

⁶ Chipaa miyu aayimuumaakanuu, chipaa peyakuheu wiichiskweu, kaye utawaashiim chipaa taapweyimeyuu Jesus. Namui chipaa uhchi aahkwaateyihtaakusiyuu, chipaa miyu pishichistamiyuu.

⁷ An awen kaa niikaanishkuwaat umaamuuayimihaauh, namui chipaa uhchi machituutam anit chechii uhchi ataameyimaakanuut chekwaayuu, wesh Chishemanituuh atushkuweu. Namui chihchiwe chipaa uhchi iteyimisuu, kaye namui tiiwehch chipaa uhchi chishuwaasuu, kaye namui chipaa uhchi wiihchipeu, kaye namui chipaa uhchi aahkuyuwesuu, kaye namui chipaa uhchi saachihtaau shuuliyaayuu.

⁸ Teyakuch chipaa chishewaatutaweu maaniteuh, kaye chipaa saachihtaau aniyuu taan e ishi kuiskunaakuniyich e ihtinaanuyich. Chipaa kachehtaaweyihtam kaye chipaa kuiskutaatisiyuu, chipaa payehchi pimaatisiyuu, kaye chipaa nanaakataweyihtam taan e ihtit.

⁹ Muush yaakwaau chipaa ishi naanaakachihtaau taan kaa ishi chiskutamuwaakanuut Chishemanituu kaa taapwemakaniyich utayimuwinihch uhchi. Ekw maak kuiskw chechii ishi chiskutamuwaat kutak aweyuu kaye kuiskw chechii ishi nishkuushtuwaat aniyuu aweyuu kaa wii aanuwehtamiyich.

¹⁰ Wesh mihchetuuch awenichii ekaa wii nanihiihtamuwaatwaau Chishemanituu utayimuwiniyuu kaye wiyeshimeuch kutak aweyuu nitamukw e ishi ayimitwaau. Etituu maak iteyihtaakusuuch anichii kaa itwetwaau misiwe awen kaa taapwehtahk chipaa nanihiihtam wiishuwewiniyuu.

¹¹ Iteyihtaakuniyuu maak chechii chipihchihaakanuutwaau uyuu e ishi wiihtamaachetwaau wesh machipayiheuch aweyuu e chiskutamuwaatwaau aniyuu chekwaayuu ekaa chipaa uhchi chiskutamuweuch mikw aniyuu e wii ushuuliyaamihkaasutwaau uhchi.

¹² Waawaach kaye peyakw anit e ihtaatwaau e uhchiyich kaa chischiwehiicheyich chii itweyichen tipiiwe utiiniim e aayimuumaat, “Chiyawaau Crete kaa uhchiyekw muush chinanatayinaawaau, kaye mwehch machi awesiisach e iteyihtaakusiyekw, naashch e chihtimiyekw kaye naashch e ukaasichimiyekw.”

¹³ Taapwe maak ekun e iteyihtaakusiyich aniyuu kaa itwet. Eukw maak uyuu che uhchi suuhk nishkuushtuwekuch anichii umaamuuayimihaauch kaa nituhtawaatwaau aniyuuh kaa wiyeshihiiweyitwaau chechii uhchi suuhchikaapuutwaau kuiskw e ishi taapwehtahkwaau.

¹⁴ Ekaa chihchiwe chechii iteyihtamihiikutwaau aniyuu Jewa iinuu tipaachimuwinh kaye ekaa chechii nituhtuwaatwaau aniyuu aweyuuh kaa aanuwehtamiyich taapwewiniyuu.

¹⁵ An awen kaa payehchi pimaatisiit misiwe chekwaayuu payehchinaakuniyuu, ekw an awen kaa machaatisiit kaye ekaa kaa taapwehtahk namui chekwaayuu payehchinaakuniyuu wesh naashch taapwe wiinaayuu umituneyihchikan kaye utehii.

¹⁶ Itweuch e chischeyimaatwaau Chishemanituuh mikw maak aniyuu e itaatisiitwaau nuukuniyuu ekaa taapwe chischeyimaatwaau Chishemanituu wesh naashch machaatisiyuuch. Namui mitun nanihiihtuweuch Chishemanituu kaye namui mitun iteyihtaakusuuch chechii miyutuutahkwaau.