Romans 9 - Chishemanituu Utayimuwin: Kaa Uskaach Testament

Chishemanituu ekw maak Jewa iinuuch

¹ Nitaapwen uu che itweyaan. Namui ninanatayin wesh Christ nitipiyeusiitutaakw. Nicheshtinaateyihten e taapweyaan kaye maak Kaa payehchisiit Ahchaahkw nichischeyihtamihiikw e taapweuch.

² Naashch taapwe nikusukumahchihun kaye muush pimipayuu naashch e maakushkaakuyaan e maamituneyimakwaau niich Israel iinuuch.

³ Chiishpin chii nihiipayikupane chechii ihtuutaakanuuhch nipaa pachishteyimisun niya eukw chechii waaweshihiit Chishemanituu kaye maak niya eukw chechii iichehtahiikuyaan Christ uhchi e ihtaat.

⁴ Wesh eukw anichii Israel iinuuch Chishemanituuh kaa wiyaapamikutwaau chechii utawaashiimituutaakutwaau kaye chechii chisteyihtaakuhiikutwaau. Chii ushihtamaakuch niskumuwiniyuu. Chii miikuuch wiishuwewiniyuu. Chii chischeyihtamihiikuuch taan che ishi nuuchiishtuwaatwaau. Nanaahkuu chekwaayuuh chii itikuuch cheshtinaash che ihtuutamaakutwaau.

⁵ Aniyehkaanaanich aanische chiwaahkumaakanuuh Abrahamh, Isaac ekw maak Jacob e ihtaayihch chii uhchi aanische pimaatisiyuuch. Ekute kaye wiya Jesus Christ kaa uhchi aanische pimaatisiit iskutak naapeu kaa ishihaakanuut. Chishemanituu an misiwe chekwaayuu kaa pimipayihtaat, kaachiche katawii maamihchimaakanuu. Amen.

⁶ Namui kiipaa kata chii iinaanuu ekaa uhchi ihtuutahk Chishemanituu taan aniyuuh kaa itwet cheshtinaash che ihtuutahk wesh taapaa misiwe anichii Jacob e ihtaayich kaa uhchi aanische pimaatisiitwaau, Israel iinuuch kaa ishinihkaatisutwaau utiiniimitutaakuuch Chishemanituuh.

⁷ Kaye maak mikw pasch anichii Abraham e ihtaayich kaa uhchi aanische pimaatisiitwaau utiiniimitutaakuuch Chishemanituu. Weskach anite, Chishemanituu chii iteu Abrahamh, “Isaac e ihtaat chika uhchi aanische pimaatisiyuuch anichii awenichii kaa ititaan cheshtinaash che miitaan.”

⁸ Ekw maak namui misiwe awen Abrahamh e ihtaayich kaa uhchi aanische pimaatisiit utawaashiimitutaakuu Chishemanituu. Anichii eukw che taapwehtamuwaakwenich aniyuu taan kaa itweyich Chishemanituuh cheshtinaash che ihtuutamuwaayich Abrahamh eukunich anichii Chishemanituuh che utawaashiimitutaakutwaau.

⁹ Wesh chii iteu Chishemanituu Abrahamh uyuu cheshtinaash che ihtuutamuwaat, “Peyakw pipun ishpish ekw miin che pechi nituwaapamitaan. Shaash kata ayaaweu Sarah ukusisa miin pechi nituwaapamitaane.”

¹⁰ Kaye wiya maak Rebecca niyaakan chii wiihtamaakuu Chishemanituuh taan che ispayiyich. Aniyuuh ukusisa kaa niishiyich taapishkun anite aniyaanaa chitaanische waahkumaakanuuh Isaac e ihtaayich chii uhchiyuuch.

¹¹ Eshkw maak ekaa uhchi pimaatisiyich uyuuh ukusisa Rebecca, “Eshkw ekaa mechim uhchi machituutamiyich kaye aat eshkw ekaa uhchi miyutuutamiyich,” chii itikuu Chishemanituuh,

¹² An Niishtamuusaan chika niikaanishkaakuu aniyuuh usiimh. Chishemanituu uyeyuu chii iteu chechii waapahtiiwet wiya e wiyaapamaat taan aniyuuh waah wiyaapamaat aweyuu che utiiniimit, namui wii aniyuu taan e ihtiyich maak ekaa e ihtiyich aweyuuh wehchi wiyaapamaat.

¹³ Mwehch e itashtech anite Chishemanituu utayimuwinihch, “Nichii saachihaau Jacob ekw Esau kaa uhkaatak.”

¹⁴ Taan maak che itweyihkw, chika chii itwenaanuu aa ekaa maamuyaam ihtit Chishemanituu. Namui kiipaa.

¹⁵ Wesh weskach anite Chishemanituu chii iteu aniyuu Moses, “Nika chishewaatutawaau an awen waa chishewaatutuuk kaye maak nika chistimaacheyimaau an awen waa chistimaacheyimak.”

¹⁶ Chishemanituu chistimaacheyimeu taan aniyuuh aweyuuh waa chistimaacheyimaat. Namayeyuu wii aniyuu taan e ishi nituweyihtamiyich uyuuh maak e ishi miyutuutamiyich wehchi chistimaacheyimaat.

¹⁷ Wesh anite Chishemanituu utayimuwinihch wiihtaakun Pharaoh e chii itaakanuut, “Chichii wiikaapuuhiitin chechii chisheuchimaawiyin chechii nuukuhtaukwaau misiwe awenichii nisuuhkaatisiiwiniyuu kaye maak misiwe awen utah aschiihch chechii chischeyimit.”

¹⁸ Ekw maak Chishemanituu chestimaacheyimaat aniyuuh aweyuuh waa chistimaacheyimaat, kaye maak taan aniyuuh waa ihtuutawaat chechii miskauteheyich eukunh aniyuuh meskautehaat.

Chishemanituu utaahkuyuwesuwin ekw maak uchishewaatisiiwin

¹⁹ Maaskuuch peyakw awen anit e tashiyekw nipaa chii itikw, “Taapwe uu e ishinaakunikwe taanite yaapach wehchi ataameyimaat Chishemanituu aweyuuh chekwaayuu. Ihtaau aa awen chechii niskaustamuwaat utiteyihtamuwiniyuu.”

²⁰ Awen maak e iteyimisuyin chiya uyeyuu kaa ishi nishkweushihiit Chishemanituu. Chika chii aa itwemakan an saschuu puutai kaa wiischuuchinikanuuhch, “Chekwaan uu wehchi ishihiyin.”

²¹ An kaa wiischuutinichet namui aa mikw chekwaayuu waa ushitaat chika chii ushihtaau. Namui aa chika chii ushihtaau niishu wiyaakanh anit uhchi aniyuu peyakwaau e piskushteyich sischiyuu. Peyakw wiyaakaniyuu naashch e miywaashiyich chechii ishinaakuhtaat mikw aaskuu chechii aapataniyich ekw kutachiyuu muush chechii aapataniyich chechii ishinaakuhtaat.

²² Ekun maak mwehch e ihtit Chishemanituu. Chii wiyeyihtam chechii waapahtiiwet utaahkuyuwesuwin kaye maak chii wii chischeyihtaakuhtaau usuuhcheyihtaakusuwin. Ute utaahch muush chii pechi siipiiwesiistuweu aniyuuh kaa chishuwaahiikut ute utaahch, aniyuuh kaa iteyihtaakuniyich chechii nisuunaatisiyich.

²³ Eukw uyeyuu kaa ishi wiyeyihtahk e chii wii waapahtiiwet e ishpish weyuutaniyich uchisteyihtaakusuwin taan aniyuuh maayaat aniyuuh kaa wiyeyimaat chechii chishewaatutawaat, eukw chiyaanuu. Niyaakan chichii wiyeyimikunuu chechii chischeyihtamukw uchisteyihtaakusuwin.

²⁴ Chiyaanuu chichii tepwaatikunuu Chishemanituu chechii utiiniimitutaatahkw. Namui maak mikw niyaan Jewa kaa itiskaanesiyaahch nuuhchi tepwaatikunuu kaye chiyawaau ekaa Jewa kaa itiskaanesiyekw chichii tepwaatikuwaau.

²⁵ Eukw uyuu aayimuutahk Chishemanituu anite aniyuuh Hosea kaa ishinihkaasuyich utayimuwiniihch. Itashteyuu anit, Anichii ekaa kaa utiiniimitutaukwaau, nitiiniimach nikaa ishinihkaataauch. Ekw anichii ekaa kaa saachihaakanuutwaau naashch nika saachihaauch.

²⁶ Anit aniyuu mekwaach kaa ihtaatwaau kaa itikutwaau Chishemanituu, namayeu chiyawaau nitiiniimach ekut anit niyaanitam che ishinihkaataakanuutwaau Chishemanituu kaa pimaatisiit ukusisah.

²⁷ Ekw aniyaanaa uchischiwehiichesuu Isaiah chii ihtakuniyuu taan kaa ishi aayimuumaat Israel iinuuh. Chii itwekupane, Aat e ishpish weyuutisiitwaau Israel iinuuch mwehch e ishpish weyuuch minikaach yekaau yaayeu chihchikamiihch yaapach namui mihchetu kata uhchi pimaachihuuch.

²⁸ Wesh chika chiistapayuu Utipeyihchikeu wiyaaskunaate misiwe aweyuuh utah aschiihch kaa ihtaayich kaye cheshtinaash ekun che ishinaakuniyich aniyuu taan kaa itwet che ishi wiyaaskunichet.

²⁹ Chii niikaan wiihtam kaye aniyaanaa uchischiwehiichesuu Isaiah kaa itwet, Chiishpin Utipeyihchikeu tekash kaa suuhkaatisiit ekaa uhchi wiyeyihtamikupane pasch aniyeyuu aanische chitawaashiiminuuh chechii pimaachihaat misiwe chipaa nishuunaatisiinaanuu mwehch kaa ishi wanaachihaakanuutwaau aniyehkaanaanich iinuuch Sodom ekw maak Gomorrah kaa ihtaatwaau.

Israel utaanuwehtamuwinawaau

³⁰ Mwaau e ishi wiihtamaachemakahch misiwe uu kaa ishi aayimuutech, anichii ekaa Jewa kaa itiskaanesitwaau namui mechim uhchi kuchihtaauch chechii kuiskunaakuhiisutwaau Chishemanituu ishi e ihtaayich. Eukunh maak uyuu Chishemanituu kaa kuiskunaakuhaat iskutak kaa taapwehtamiyich.

³¹ Ekw anichii Jewa iinuuch Chishemanituuh kaa utiiniimitutaakutwaau, e nanihiihtahkwaau wiishuwewinh chii wii uhchi wii kuiskunaakuhiisuuch Chishemanituu ishi e ihtaayich. Namui maak ukuiskutaatisiiuch uhchi ishi kanawaapamikuuch Chishemanituuh uyuu e chii ihtitwaau.

³² Chekwaayuu maak wehchi ekaa ukuiskutaatisiiuch uhchiish kanawaapamukutwaau Chishemanituuh. Namui uhchi taapweyimeuch Chishemanituuh chechii kuiskunaakuhiikutwaau. Eukw maak uyuu wehchi ekaa ukuiskutaatisiiuch uhchi ishi kanawaapamikutwaau Chishemanituuh. Chii iteyihtamuch e miyutuutamaahch chika uhchipayuu ukuiskutaatisiiuch chechii ishi kanawaapamiyimiht Chishemanituu. Ekw maak kaa pisuskuwaatwaau aniyuuh asiniih kaa pachishtinaakanuyich che pisusamuweyich.

³³ Eukuu e aayimuutech Chishemanituu umasinihiikanihch anit kaa itashtech, Iitaapikw maa, nipachishtinaau Zionihch asinii che pisusamuwet. Mihchaapischisuu uu asinii, kata pahchishiniyuuh maak aniyuuh aweyuu che pisuskaakut. An maak awen che taapweyimaakwe namui nihtaa kata uhchi iteyihtam sehchei e taapweyimaat.