Romans 8 - Chishemanituu Utayimuwin: Kaa Uskaach Testament

Aniyuu pimaatisiiwiniyuu Kaa payehchisiit Ahchaahkw maayaat aweyuuh

¹ Namui ekw nishuuwanaachimikuuch Chishemanituu anichii awenichii Jesus Christ kaa wiichewaatwaau.

² Wesh Chishemanituu Utahchaahkwa chitihtuutaakunuu chechii pimaatisiyuuhkw Christ Jesus uhchi. Eukuu kaa aapihkunit taan kaa ishi tipeyimikuch machaatisiiwiniyuu kaye nipuwiniyuu.

³ Misiwe awen namui uhchii ihtuu tekash chechii nanihiihtamuwaat Chishemanituuh uwiishuwewiniyuu chechii uhchi pimaachihut. Ekw maak Chishemanituu kaa pechi itishahwaat Ukusisa muyaam chiyaanuu e ishinaakusuuhkw chechii ishinaakusiyich. Chii pechi itishahweu chechii nipistamaakuuhkw. Ekut uu kaa uhchi nishuuwanaachihtaat taan kaa ishi tipeyimikuuhkw machaatisiiwiniyuu.

⁴ Chii ihtuutam uyuu chechii uhchi tekash tipituutamahkw taan e ishi kuiskw iteyihtaakuniyich e itashuwemakaniyich uwiishuwewin. Kaa payehchisiit Ahchaahkw e tipeyimitahkw ekw yaakw chechii ihtuutamuhkw uu namui wii chimachaatisiiwinuuh e tipeyimikuyihkw.

⁵ Anichii mikw e ishi wehpemipayiyich chechii machaatisiitwaau kaa ishi pimaatisiitwaau, mikw wiyawaau nitamukw chechii ishi naniheyihtamihiisuutwaau ishi maamituneyihtamuch. Ekw anichii Kaa payehchisiyich Ahchaahkw kaa pachishtinaatwaau chechii tipeyimikutwaau taan che ishi pimaatisiitwaau, pishikw chechii naniheyihtamihaatwaau Kaa payehchisiyich Ahchaahkw ishi maamituneyihtamuch.

⁶ Mikw nitamukw wiishi naniheyihtamihiisute awen, kata nipahiikuu uyuu e ihtit. Pisikw Kaa payehchisiyich Ahchaahkwa chechii naniheyihtamihaat e ishi maamituneyihtahk awen pimaatisiiwiniyuu kaye chiyaameyihtamuwiniyuu ayaau.

⁷ Wesh anichii nitamukw chechii ishi naniheyihtamihiisutwaau kaa ishi maamituneyihtahkwaau nishkuushtaweuch Chishemanituuh. Namui ihtuutamuweuch taan e itashuweyich. Namui mechim chii ihtuutamuweuch.

⁸ Anichii nitamukw kaa ishi pimaatisiitwaau namui chika chii naheyihtamaheuch Chishemanituu.

⁹ Chiyawaau maak wii, namui chitipeyimikunaawaau nitamukw e wii ishi naheyihtamahiisuyekw. Kaa payehchisiit Ahchaahkw eukw tepeyimitaakw chiishpin taapwe paahchishkaataakwe. Awen maak ekaa paahchishkaakuukwe Kaa payehchisiyich Ahchaahkwa namui tipiiweusiitutaakuu Jesus.

¹⁰ Christ maak e piihchishkaataakw ekut wehchi ispayihch taapwe chechii pimaatisiitwaau Chitahchaahkuwaauch wesh e kuiskutaatisiiwekw chit ishi kanawaapamikuwaau Chishemanituu, aat anuhchiish e ati nipiimakahkwaau chiiyuuwaauh an uhchi e machaatisiyekw.

¹¹ Chiishpin paahchishkaataakwenh uu payehchisiyuu Ahchaahkwa an kaa wanishkaanaat Jesus nipuwinihch uhchi cheshtinaash chika wanishkaanikuwaau kaye chiyawaau nipuwinihch uhchi aniyuuh uu payehchisiyuu Ahchaahkwa uhchi. Ekut maak chechii uhchi pimaachihtaakanuuhkwaau aniyuuh chiiyuuwaauh kaa ishinaakuhkwaauh che nipiimakahkwaau.

¹² Niichishaanitikw, chinituweyihtaakusinaanuu ekaa wiyaasuwinihch chechii ishi pimaatisiihkw, namui chipaa uhchi ishi pimaatisiinaanuu taan e ishi nituweyihtamuumakahkwaau chiyaasinuuh.

¹³ Wesh an ishi pimaatisiine taan e ishi nituweyihtamuumakahch chiyaas chika nipin. Pachishtinate maak Kaa payehchisiit Ahchaahkw chechii wiichihiisk chechii puunihtaawat taan waa ishi wehchipayihch chechii machituutam ekw kiipaa taapwe che pimaatisiyin.

¹⁴ Misiwe anichii Kaa payehchisiyich Ahchaahkwa kaa chischinuhtahiikutwaau Chishemanituuh utawaashiimitutaakuuch.

¹⁵ Wesh taapaa chitihtuutaakuwaau an Ahchaahkw Chishemanituu kaa miitaakw kaau chechii tipeyimikuwekw sechisuwiniyuu. Uu Ahchaahkw uhchi ekut wehchi ishihiitahkw Chishemanituu chechii utawaashiimitutaatahkw kaye maak chechii itahkw “Paapaa, Nuuhtaawii.”

¹⁶ Kaa payehchisiit Ahchaahkw chichischeyihtamihiikunuu chitehiinaahch taapwe Chishemanituu e utawaashiimitutaatahkw.

¹⁷ Ekw maak e utawaashiimitutaatahkw Chishemanituu cheshtinaash chika miikunuu aniyuuh kaa ishi miywaashiyikwaauh shaweyihchichewinh kaa ayeskuushtamuwaat utawaashiimh. Kaye maak taapishkun Jesus ekw maak chiyaanuu chika ayaanaanuu taan kaa ishi ayeskuushtamuwaakanuut Jesus. Wesh chiishpin wiich nanehkaateyimuumahkwe Jesus aniyuu e taapweyimahkw kaye chiyaanuu chika chisteyihtaakuhiikunaanuu chisteyihtaakuhaakanuute.

Eshkw chika chisteyihtaakuhiikunaanuu

¹⁸ Niya e iteyihtamaan taan e ishi nanehkaateyimuyihkw anuhchiish namui mitun chekwaan chika uhchi iteyihtaakun che iteyihtaakuhch iskutak utihchipayihche anit che chisteyihtaakuhiitahkw Chishemanituu.

¹⁹ Misiwe chekwaayuu taan kaa ishi ushihtaat Chishemanituu naashch pukweyihtamuumakaniyuu e ashuwaapahtamumakaniyich che ishpish mushe nuukuhaat utawaashiim.

²⁰ Wesh misiwe chekwaayuu kaa ishi ushihtaat Chishemanituu chii ishihtaau chek chechii ati wanaataniyich. Namayeu maak uu kaa ishi nituweyihtamuumakahch misiwe an kaa ishi ushihtaakanuuhch chechii ishinaakuhch. Wiya Chishemanituu kaa iteyihtahk uyuu chechii ishinaakuniyich.

²¹ Yaapach maak chii iteyihtam eshkw peyakwaau e chiishikaayich kaau che ishihtaat misiwe taan kaa ishi ushihtaat ekaa nihtaa chechii wanaatiniyich kaye ekaa ekw wanaatisiiwinihch chechii ishi tipeyihtaakuniyich. Chii iteyihtam chechii asich chisteyihtaakuhtaakanuyikwaauh uyuuh chisteyihtaakuhaakanuwiichenh utawaashiimh.

²² Chichischeyihtenaanuu anit misiwe taan kaa ishi ushihtaat Chishemanituu e ihtakuniyich taan e ishi nanehkaateyimuumakaniyich, mwehch e ishinaakusit iskweu iskutak e ati chihchipayiyich che waapamaausut.

²³ Namui maak mikw uyuuh chekwaayuuh nanehkaateyimuumakanh. Chiyaanuu kaye Chishemanituu kaa utawaashiimitutaatahkw chinanehkaateumunaanuu chitehiinaahch mekwaach e ashuwaapatamahkw Chishemanituu utawaashiimh chechii ishi nuukuhiikuyihkw kaye chechii ishihiikuyihkw ekaa nihtaa miin chechii nanehkaateyimuwiihkw, kaachiche chechii pimaatisiihkw. Shaash maak chichii miikunuu Chishemanituu Utahchaahkwa chechii uhchi chischeyihtamuhkw misiwe taapwe che ispayiyich uyuu.

²⁴ Ekw maak e ishinaakusiihkw kaa ishpish pimaachihiitahkw Chishemanituu e aspeyimuyihkw che utihchipayihch uu. Iskutak maak chii utihchipayihche kiipaa namui ekw chika uhchi ashuwaapahtenaanuu. Wesh taapaa ashuwaapahtam awen chekwaayuu chechii ispayiyich shaash e chii ispayiyich.

²⁵ Chitasuwaapahtenaanuu maak chekwaan ekaa nihtaa uhchi waapahtamukw. Chisiipiiwesiinaanuu maak e ashuwaapahtamuhkw.

²⁶ Ihtakun taan e ishpish ekaa saapeyihtamuhkw mikw maak ihtaau Kaa payehchisiit Ahchaahkw chechii wiichihiitahkw. Muyaam e ishinaakusiihkw niyaanikutehch ekaa chischeyihtamuhkw taan nihaau chipaa ishi ayimihaanaanuu. Ekut maak netutamaastamaatahkw Kaa payehchisiit Ahchaahkw uhchishkuu Chishemanituuh e ihtaayich e maamaatuweumuyihkw ekaa chii wiihtamuhkw taan nihaau e itamahchihuyihkw.

²⁷ Chishemanituu maak kaa chischeyihtahk misiwe chitehiinuuh chischeyihtam taan nihaau e ishi nitutamaastamaacheyich Ahchaahkw wesh nitutamaastamuweyuuh aniyuuh kaa taapwehtamiitwaauh chechii ihtuutaakanuyich Chishemanituu utiteyihtamuwin.

²⁸ Chichischeyihtenaanuu maak misiwe chekwaayuu e ispayiyich upimaatisiiwiniihch aniyuuh kaa saachihiikut Chishemanituu ihtuutamuweu misiwe chechii miyutuutaakuyich. Ekun e ihtuutamuwaat aniyuuh wiya kaa iteyihtahk chechii wiyaapamaat chechii utiiniimit.

²⁹ Wesh niyaakan chii chischeyimeu Chishemanituu aweyuu che utiiniimit, eukun maak uyuuh kaa wiyaapamaat che nispitawaayich Ukusisa. Eukw uyuu kaa ihtit Chishemanituu niishtamuushaan chechii ihtaayich Ukusisa anit mekwesiinuu e mihchetiyich wiichishaanimaauh.

³⁰ Aniyuuh maak niyaakan kaa wiyeyimaat aweyuu chii tepwaateu. Uyuuh maak kaa tepwaataat chii kuiskunaakuheu wiya ishi e ihtaat. Uyuu maa kaa kuiskunaakuhaat chii chisteyihtaakuheu.

E ishpish saachihiitahkw Chishemanituu

³¹ Misiwe maak uu e chischeyihtamahkw maau chechii itweyihkw, taapwe Chishemanituu waachihiikuwaauhkwe namui awen chika chii shaakuuchihiikunuu.

³² Namui waawaach Ukusisa chuuhchi manaatinamaakunuu. Chii pachishtineu chechii nipistamaakuuhkw. Aniyuu maak waawaach tipiiwe Ukusisa e chii pachishtinaat chechii nipahaakanuyich chiyaanuu uhchi ekut che uhchi cheshtinaahuyihkw mikw che ishi miikuyihkw kutak chekwaayuuh.

³³ Awen chechii mamishimaat Chishemanituuh uwiyaapimaakaniyuuh. Wiya Chishemanituu ukuiskutaatisiiuch ishi kanawaapameu aniyuu kaa wiyaapamaat.

³⁴ Namui maak awen chika chii nishuuwanaachimeu Chishemanituuh uwiyaapimaakaniyuuh chechii itwet e iteyihtaakuniyich chechii waweshihaakanuyich umachihtwaawiniyuu uhchi. Wesh namui mikw kuuhchi nipistamaakunuu Christ eyuu chii wanishkaanaakanuu nipuwinihch uhchi. Mekwaach maak Chishemanituuh unihiiwiniihch apuu e ayimiheshtamaatahkw.

³⁵ Awen maak chechii iichenitahkw Christ usaachihiiwewiniihch uhchi. Aat naashch nanehkaateyimuwiihkwe maak naashch aayimuhuyihkwe, kaye aat wawiisacheyihtamihiikuwiihkwe, aat ishinaakuhche chechii kauhkateyihkw, kaye aat naashch chistimaatisiihkwe, aat naashch kushtaatikuhche taanit e ihtaayihkw kaye maak aat nipahiikuyihkwe namui yaapach chika chii iichehtahiikunaanuu Jesus usaachihiiwewinihch uhchi.

³⁶ Itashteu Chishemanituu utayimuwinihch, Eshikum chiishikaauh kushpaneyihtaakun chechii nipahiikuyaahch e nuushuushkaataahch. Mwehch maanishchaanishach kaa peshuwaakanuutwaau chechii nipahaakanuutwaau ekun e ishinaakusiyaahch.

³⁷ Aat maak misiwe uu e ishi nanaahkuu ispayihch anit e ihtaayihkw chitayaanaanuu pischiyaachewin Christ uhchi, an kaa saachihiitahkw wesh wiya chiwiichihiikunuu.

³⁸ Nicheshtinaahun ekaa chekwaan ihtakuhch chechii iichehtahiikuyihkw Christ usaachihiiwewinihch uhchi. Puunipimaatisiyuuhkw maak pimaatisiyuuhkw yaapach chipaa saachihiikunuu. Namui waawaach enchilich maak machi ahchaahkuhch chika chii iichehtahiikunuuch Christ usaachihiiwewiniihch uhchi. Namui chekwaan chika chii ispayuu anuhchiish maak anite niishtamihch chechii iichehtahiikuyihkw usaachihiiwewinihch uhchi.

³⁹ Namui ihtakunh suuhcheyihtaakusuwinh anite ishpimihch maak ute niihtaahch chechii iichehtahiikuyihkw usaachihiiwewinihch. Kaye namui ihtakuniyuu chekwaayuu e chii ushihtaat Chishemanituu chechii iichehtahiikuyihkw Christ uu saachihiiwewinihch uhchi. Aniyuu taan kaa ishi ihtuutamaatahkw Jesus Christ Chitipeyihchikeminuuh ekut kaa waapahtiitahkw taan e ishpish saachihiitahkw Chishemanituu.