Romans 7 - Chishemanituu Utayimuwin: Kaa Uskaach Testament

Wiichihtuuwin ekw maak wiishuwewin

¹ Chiyawaau niichishaanitikw, nicheshtinaahun che nisituhtamekw taan che ishi waawiihtamaatakuch wesh chichischeyihtenaawaau wiishuwewinh. Chichischeyihtenaawaache mikw che ishpish pimaatisiikwe awen utah aschiihch wiishuwewinh kata tipeyimikuu.

² Muyaam iskweu taan e ishinaakusit, itashteyuu wiishuwewinihch ekaa chechii nakataat unaapem eshkw e pimaatisiyich. Chiishpin maak puunipimaatisiichenh aniyuu unaapemh ekw kiipaa namui ekw chika maamaahchikwaapihkaatikuu aniyuu wiishuwewiniyuu.

³ Uu maak taan e itwemakahch uu wiishuwewin upisikwaatisiiskweu chika ishinihkaataakanuu iskweu kutak naapeuh wiichimaate eshkw e pimaatisiyich unaapemh. Nipiichen maak unaapem iskweu namui ekw kata uhchi aapataniyuu aniyuu niipuu wiishuwewiniyuu kaye maak namui kata uhchi pisikwaatisiyuu aat kutak naapeuh wiichimaate.

⁴ Ekun maak mwehch e ishinaakuhch taan kaa ihtuutamaakuyihkw, niichishaanitikw. Wesh mwehch e chii asich chiistaaskuhiikuyihkw Jesus kaa nipahaakanuut eukw e ishinaakuhch. Ekut maak wehchi ishinaakuhch kutak awen ekw e tipeyimitahkw, eukuu Jesus. Wesh chii ihtuutaakuu Chishemanituu kaau chechii pimaatisiit aat e chii nipit chechii uhchi miywaapachihiitahkw Chishemanituu.

⁵ Wesh eshkw weskach chititaatisiiwinuuh e chii tipeyimikuyihkw, an maak e ihtakuhch wiishuwewin kaye maak e chii chischeyihtamuhkw an wiishuwewin, ekut kaa uhchipayihch aahch e muushchipayihch chechii machituutamuhkw. Uu maak e chii ishi pimaatisiihkw mwehch e nipiihkw chichii ishinaakusinaanuu.

⁶ Anuhchiish maak shaash chichii wiihkuchihiikunaanuu taan kaa ishi maahchikwaapihkaatikuyihkw wiishuwewin, wesh chihchiwe chichii nakatenaanuu an itaatisiiwin naashch kaa chii tipeyimikuyihkw. Namui ekw an weskach wiishuwewin chinanihiihtenaanuu. Chishemanituu eukw nenahiihtuuhkw ekw, Kaa payehchisiit Ahchaahkw e wiichihiitahkw.

Wiishuwewin ekw maak machihtwaawin

⁷ Itwet aahch awen, maayaatanuuche an wiishuwewin wesh ekut kaa uhchipayihch aahch chechii machituutamaan. Mwaau nipaa ishi nishkweushihaau uu awen, taapaa namayeu an wiishuwewin kaa ihtuutaakuyaan chechii machituutamaan. Mikw maak ekut kaa uhchi chischeyihtamaan taapwe e machituutamaan anite uhchi taan e itashuwemakahch an wiishuwewin. Mwehch anit an kaa itashtech, “Ekaawii machi mushteneyihche,” ekut kaa uhchi chischeyihtamaan e machituutamaan e machi mushteneyihcheyaan.

⁸ Anit maak an kaa itashtech wiishuwewinihch ekaa chechii machi mushteneyihchet awen ekut kaa uhchipayihch aahch nanaahkuu chechii ishi machi mushteneyihcheyaan. Namui chipaa uhchi chischeyihtam awen e machituutahk ekaa uhchi ihtakuniyiwaakupanenh wiishuwewinh.

⁹ Utaahch nichii ishi pimaatisiin ekaa chischeyihtamaan taan e itashuwemakahch wiishuwewin. Iskutak maak kaa chischeyihtamaan itashuwewin taan itwemakahch, ekut kaa uhchi chischeyihtamaan e machaatisiyaan kaye muyaam e nipiyaan e ishinaakusiyaan.

¹⁰ Ekw an wiishuwewin kaa miiwaanuuhch ati chechii uhchi pimaatisiistuuk Chishemanituu, ekut kaa uhchi chischeyihtamaan e nipiyaan.

¹¹ Chishemanituu ukacheskwewinihch chii uhchi nihiipayihiisuumakan machihtwaawin chechii wiyeshimikuyaan. Eukw maak uu machihtwaawin kaa nipahiikuyaan.

¹² Ekut maak wehchi waapahtamaan e payehkahch wiishuwewin. Kaye maak misiwe taan itashuwemakahkwaau aniyuuh kascheskwewinh anit wiishuwewinihch payehchisiimakanh, taapwemakanh, kaye maak miyawaauh.

¹³ Euhaa maak e ishinaakuhch an kaa miywaashich nipuwinihch chechii ituhtahiikuyaan. Namui kiipaa. Machihtwaawin eukw nipuwinihch kaa ituhtahiikuyaan. An chekwaan e miywaashich ekut kaa uhtaapachihuumakahch machihtwaawin nipuwinihch chechii ituhtahiikuyaan. Ekut maak kaa uhchi nuukuhtaakanuuhch taan nihaau e iteyihtaakuhch machihtwaawin. Wiishuwewinihch ekut kaa uhchi nuukuhtaakanuuhch taan e ishpish etituu maayaatahch machihtwaawin.

Taan e ishi maasihchepayiyich awen e ihtaat

¹⁴ Chichischeyihtenaanuu Chishemanituu utahchaahkwa e ihtaayich e chii uhchipayihch uu wiishuwewin. Niya wii, niwiyaasuu pimaatisiin niya. Mwehch awen kaa utaapachihaakanitutawaakanuut ekun e ihtuutaakuyaan machihtwaawin.

¹⁵ Namui ninisituhten chekwaan wehchi ihtuutamaan chekwaan e ihtuutamaan. Shaash namui nitihtuuten an kaa wii ihtuutamaan, teyakuch an ekaa kaa miyeyihtamaan ekun an e ihtuutamaan.

¹⁶ Chiishpin e ihtuutamuwaane an ekaa waa ihtuutamaan ekut wehchi nuukuhch e taapwehtamaan e miywaashich wiishuwewin.

¹⁷ Namayeu maak taapwe niya kaa ihtuutamaan an ekaa kaa miyeyihtamaan e ihtuutamaan. Eukw an machihtwaawin utah e ihtaayaan kaa ihtakuhch kaa ihtuutaakuyaan.

¹⁸ Nichischeyihten ekaa mitun chii miyutuutamaan niya tipiiwe e wii miyutuutamaan, utah kiipaa muhch nipimaatisiiwinihch. Aat e ihtakuhch e wii miyutuutamaan namui yaapach nichii miyutuuten.

¹⁹ Wesh taapaa nitihtuuten an waa ishi miyutuutamaan. An kaa maayaahtahch ekaa kaa wii ihtuutamaan eukun e ati ihtuutamaan.

²⁰ Chiishpin maak e ihtuutamaan an ekaa kaa wii ihtuutamaan, namayeu niya kaa ihtuutamaan an. An machihtwaawin utah e ihtaayaan kaa ihtakuhch eukun an kaa ihtuutaakuyaan uu chechii ihtiyaan.

²¹ Maau maak e ishi waapahtamaan muush e ispayaan. Aat waah miyutuutamaanh yaaitei muush asichipayuu e wii machituutamaan.

²² Utah piihch e ihtaayaan naashch nimiyeyihtamihiikuwaan Chishemanituu uwiishuwewin.

²³ Ekw mikw maau e ishi waapahtamaan muush e wii ispayaan. Ihtakun e ishi maasihchepayihch utah e ihtaayaan, an e wii miyutuutamaan ekw maak an e wii machituutamaan maasihchepayuu. An maak muush e ihtakuhch e wii machituutamaan eukw tepeyimikuyaan.

²⁴ Taapwe kiipaa nuushtaapayin. Awen maak che pechi wiihkuchihiit utah uyuu miiyuuyuu che nipiimakaniyich.

²⁵ Nanaaskumaataau Chishemanituu an waachihiitahk Jesus Christ uhchi. Maau e ispayaan. Niya utah tipiiwe e ihtaayaan nimiyeyihtamihiikuwaan Chishemanituu uwiishuwewin kaye niwii nanihiihtamuwaan. Mikw maak anit taan e ishi pimaatisiyaan ihtakun e ishi utaapachihaakanitutaakuyaan machihtwaawin.