Romans 6 - Chishemanituu Utayimuwin: Kaa Uskaach Testament

Chechii nipiimakahch taan e ishpish tipeyimikuyihkw machihtwaawin ekw maak Christ chechii pimaatisiistuuhkw

¹ Itwet aahch awen ekush yaapach machituutahtaau etituu chechii nuukuhtwaatahkw e ishpish muush weyuuch shaweyimaat Chishemanituu aweyuuh. Mwaau nipaa ishi nishkweushihaau an awen uyuu itwet.

² Namui chika chii ishinaakun uu. Namui mechim chipaa uhchi ishi maamituneyihtam awen. Chipaa ishi kanawaapamisunaanuu mwehch e chii nipistamuhkw taan kaa ishi tipeyimikuyihkw machihtwaawin. Namui ekw machihtwaawinihch chipaa uhchi ishi pimaatisiinaanuu.

³ Namui aa chichischeyihtenaawaau iskutak kaa siikahaahtaakuyihkw chechii wiichewekw Christ Jesus, ekut kaa nuukuhtaayihkw e chii asich nipiimakahch weskach chititaatisiwinuu Christ kaa nipahaakanuut.

⁴ Ekun maak wehch ishinaakuhch kaa siikahaahtaakuyihkw mwehch kaye chiyaanuu e chii nahiihkaakuyihkw kaa nahiihkuwaakanuut kaye kaa nipahaakanuut chiyaanuu kaye chichii nipahiikunaanuu. Uu maak wehchii ishinaakuhch eukw mitun chechii uscheyihtaakuhch taan e ishi pimaatisiihkw mwehch kaa ishpish tekash uscheyihtaakuniyich Christ upimaatisiiwin kaa wanishkaanikut Uhtaawimaau uchisteyihtaakusuu suuhkaatisiiwiniihch uhchi.

⁵ Ekw maak e wiicheuhkw Jesus unipuwinihch chitishinaakusinaanuu. Ekut wehchi cheshtinaateyihtaakuhch che wanishkaanikuyihk mwehch wiya e chii wanishkaanaakanuut.

⁶ Wesh chichischeyihtenaanuu an weskach chititaatisiwinuu e chii chiistaaskuhtaakanuuhch Jesus kaa chiistaaskuhwaakanuut ashiteyaahtikuhch. Aniyuu kaa chiistaaskuhwaakanuut ekut kaa nishuunaatisiimakahch taan kaa ishi tipeyimikuyihkw weskach chititaatisiiwinuuh ekw maak namui mitun chika chii tipeyimikunaanuu ekw machaatisiiwin.

⁷ Awen e chii nipit namui chika chii tipeyimikuu machaatisiiwiniyuu.

⁸ An maak e chii nipahtaakanuuhch weskach chititaatisiiwinuu Christ kaa nipahaakanuut, chitaapwehtenaanuu cheshtinaash wiya Christ ekw che pimaatisiistuuhkw.

⁹ Chichischeyihtenaanuu Christ e chii wanishkaanaakanuut nipuwinihch uhchi. Namui maak miin chika chii nipuu. Namui wiiskaat miin chika chii tipeyimikuu nipuwiniyuu.

¹⁰ Wesh aniyuu kaa nipit eukw aniyuu mikw peyakwaau kaa nipistamuwaat aniyuuh aweyuuh kaa tipeyimikuyich machihtwaawiniyuu. Ekw maak aniyuu anuhchiish kaau e pimaatisiit, pimaatisiiu chechii chisteyihtaakuhaat Chishemanituu.

¹¹ Mwehch awenichii e nipitwaau ekaa tipeyimikutwaau machaatisiiwiniyuu ekun chipaa ishi kanawaapamisunaawaau. Chipimaatisiinaawaau ekw chechii naheyihtamihekw Chishemanituu e wiicheumekw Jesus Christ.

¹² Ekaawii maak uhchi pachishtinamukw machihtwaawin chechii tipeyimikuyekw chipimaatisiiwiniwaahch.

¹³ Ekaawii kaye mitun pachishtinamukw chiiyuuwaauh machihtwaawinihch chechii ishi aapatahkwaau. Chishemanituu teyakuch pachishteyimitisuustawaahkw. Ekw maak che ishinaakusiyekw mwehch awenichii e chii nipitwaau kaau maak e pimaatisiitwaau. Tekash pachishtinaahkw Chishemanituu chechii tipeyihtahk chipimaatisiiwinawaauh. Ekw maak chechii aapachihiitaakw chechii miyutuutamuwekw.

¹⁴ Ekaawii ekw chika uhchi tipeyimikunaawaau machaatisiiwin wesh taapaa ekw mikw wiishuwewin e nanihiihtamekw chika uhchi naniheyihtamihaawaau Chishemanituu. Wesh Chishemanituu uweyuch shaweyihchichewinihch ekut wehchi pimaachihiitaakw.

Kuiskutaatisiiwin ekw chitipeyimikuunaanuu

¹⁵ Taan maak chechii ihtiihkw. Yaapach aa chika machituutenaanuu wii machituutamuhkwe e chischeyihtamuhkw ekaa wiishuwewin tipeyimikuyihkw, teyakuch Chishemanituu ushaweyihchichewinihch e ishi kanuweyihtaakusiihkw. Namui kiipaa ishinaakun uu chechii ihtiihkw.

¹⁶ Chinituweyimitinaawaau uu chechii chischisiyekw. Pachishteyimitisuustawekwe awen chechii uhchi tekash nanihiihtuwekw mwehch aapachihaakan e ishinaakusit e nanihiihtuwaat uchimaamh, kiipaa che utaapachihaakanitutaataakw an awen kaa wiyeyihtamekw chechii nanihiihtawekw. Mwehch maak e ishinaakusit aapachihaakan mwehch e maahchikwaapihkaasut chechii nanihiihtuwaat uchimaam ekun mwehch e ishinaakusiyekw kaye chiyawaau. Maak kaa pachishteyimitisuustamuwekwe an taan e ishi ihtakuhch e wii machituutamekw maak Chishemanituu kaa pachishteyimitisuustawekwe. Chiishpin maak kaa pachishteyimitisuustamuwekwe an taan e ishi ihtakuhch e wii machituutamekw kiipaa ekut che uhchipayihch kaachiche che nipiyekw. Chiishpin maak wiya Chishemanituu kaa pachishteyimitisuustawekwe ekut che uhchipayihch chechii kuiskutaatisiyekw.

¹⁷ Ninanaaskumaau Chishemanituu chiyawaau peyakwaau kaa ishinaakusiyekw e utaapachihaakanitutaakuyekw machihtwaawin, e chii utihchipayihch taanit tekash kaa iteyihtamihiikuyekw chechii nanihiihtamekw miyu chiskutamaachewin iskutak e ati waawiihtamaakuyekw.

¹⁸ Chichii wiihkuchihiikunaawaau machihtwaawinihch uhchi ekw maak kuiskutaatisiiwin kaa ati tipeyimikuyekw.

¹⁹ Eukuu e ishi ayimihiitakuch wesh ekut mikw chechii uhchi nisituhtamekw. Peyakwaau chichii ishinaakusinaawaau mitun e chii pachishtinisuyekw wiinishuwaatisiiwin chechii tipeyimikuyekw kaye maak chichii pachishtinisunaawaau wetaach chechii ati machaatisiyekw. Anuhchiish maak tekash pachishtinisukw kuiskutaatisiiwinihch chechii ishi pimuhteyekw chechii uhchi payehtisiyekw Chishemanituu ishi e ihtaat.

²⁰ Mekwaach tekash kaa tipeyimikuyekw machihtwaawin namui mitun chuuhchi piskaatenaawaau kuiskutaatisiiwin.

²¹ Taan maak kaa ishi wiichihiikuyin aniyuu chekwaayuuh kaa chii ihtuutaman, aniyuuh chekwaayuuh siyaakweyimuhiikuyin anuhchiish. Nipuwinihch ituhtahiiwemakanh aniyuuh chekwaayuuh kaa chii ihtuutaman.

²² Anuhchiish maak wii, chichii wiihkuchihiikuun machihtwaawinihch uhchi Chishemanituu ekw chechii utaapachihaakanitutaask. Ekw maak tekash Chishemanituu e ihtaat ekw e ishi pahkaanishtech chipimaatisiiwin, chika ati utihten maak kaachiche pimaatisiiwin.

²³ Wesh nipuwinihch ituhtahiikuu awen machihtwaawiniyuu. Ekw an awen kaa wiichewaat Jesus Christ Chitipeyihchikeminuuh Chishemanituuh sehchei miikuu kaachiche pimaatisiiwiniyuu.