Romans 5 - Chishemanituu Utayimuwin: Kaa Uskaach Testament

E kuiskutaatisiit awen Chishemanituuh ishi e ihtaayich

¹ Ekw maak kuiskutaatisiiwinihch ekw e ishi kanawaapamitahkw Chishemanituu aniyuu e taapweyimahkw. Ekw kaye meyuu wiicheuhkw Chishemanituu aniyuu uhchi taan kaa ihtuutamaatahkw Chitipeyihchikeminuu Jesus Christ.

² Christ chichii ihtuutamaakunaanuu muush ekw chechii chischeyihtamukw Chishemanituuh ushaweyihchichewin chipimaatisiiwinaahch. Ekw maak meyeyihtamuhkw e cheshtinaateyihtamuhkw eshkw tekash che chischeyihtamihiitahkw Chishemanituu uchisteyihtaakusuwin.

³ Ekun maak wehchi ishinaakusiihkw yaapach e muuchicheyihtamukw aat anit mekwaach e aayimihuyihkw, wesh chichischeyihtenaanuu anit an e aayimihuyihkw ekut wehchi etituu siipiiwesiihkw.

⁴ Ekw maak an wetaach e siipiiwesiikw chipimaatisiiwinaahch Chishemanituu naheyihtamihiikuu. Uyuu maak e ishi naheyihtamihiihkw ekut wehchi cheshtinaateyihtamuhkw eshkw tekash che chischeyihtamihiitahkw uchisteyihtaakusuwin.

⁵ E chischeyihtamukw maak eshkw tekash che chischeyihtamihiitahkw Chishemanituu uchisteyihtaakusuwin, chika chii cheshtinaateyihtenaanuu taapwe eshkw che ispayihch, wesh Chishemanituu taapwe chichii chischeyihtamihiikunuu chitehiinaahch Upayehchii Ahchaahkw uhchi, taan e ishpish saachihiitahkw. Wiya maak Chishemanituu chichii miikunuu Upayehchi Ahchaahkwa.

⁶ Wesh anit mekwaach kaa ishinaakusiihkw ekaa mitun chechii pimaachihiisuyihkw, Christ chii nipistamuweu umachihtwaau. Anit maak Chishemanituuh kaa wiyeyihtamiyich uyuu chechii ihtuutamaatahkw ekut kaa nipuushtamaatahkw.

⁷ Namui awen chipaa uhchi wii nipistamuweu aweyuu e kuiskutaatisiyich mikw maak maaskuuch chipaa chii ishinaakuniyuu chechii ihtaat awen e kakweteyihtahk chechii nipistamuwaat aweyuu e miyu iiniiwiyich.

⁸ Chishemanituu maak wii mitun chichii waapahtiikunuu taan e ishpish saachihiitahkw, chii pachishtineu Christ chechii nipistamaakuuhkw eshkw mekwaach machihtwaawinihch e chii ihtaauhkw.

⁹ Ekun maak e kuiskutaatisiihkw wehchi ishi kanawaapamitahkw Chishemanituu aniyuu Christ e chii nipistamaatahk asiteyaahtikuhch. Chicheshtinaateyihtenaanuu Christ taapwe che wiihkuchihiitahkw Chishemanituu utaahkuyuwesuu wiyaaskunichewiniihch uhchi maahchishtai chiishikaayiche.

¹⁰ Eshkw maak mekwaach ekaa mitun uhchi aapateyimahkw Chishemanituu yaapach chii uhtinam taanite chechii uhchi ishinaakuniyich chechii ati miyu wiicheuhkw. Kaa nipistamaakuuhkw Christ ekut kaa uhchi nihiipayihtaat uyuu chechii ishinaakuniyich. Ekw maak anuhchiish e miyuwicheuhkw Chishemanituu cheshtinaateyihtaakun che pimaachihiitahkw Jesus upimaatisiiwiniihch uhchi.

¹¹ Eyuu maak naashch chimiyeyihtenaanuu Chishemanituu shaash e chii nihiipayihtaat chechii miyu wiicheuhkw Chitipeyihchikeminuu Jesus Christ uhchi.

Adam ekw maak Christ

¹² Eukw maak uu kaa ispayihch, peyakw naapeu e ihtaat ekut kaa uhchi ihtakuhch machihtwaawin kaye ekut kaa uhchi ihtakuhch nipuwin aniyuu e chii machituutahk. Kaye maak ekut wehchi ishinaakuhch misiwe awen e utihtahukut nipuwiniyuu, wesh misiwe awen machituutam.

¹³ Aat e chii machituutahkwaau awenichii utah aschiihch kaa ihtaatwaau eshkw ekaa uhchi ihtakuniyich wiishuwewiniyuu, namui uhchi achihtamiyuu Chishemanituu umachituutamuwinawaauh.

¹⁴ Adam e ihtaat uhchi anichii maak anite kaa aanische pimaatisiitwaau Moses ishi e ihtaayich misiwe chii tipeyimikuuch nipuwiniyuu aat anichii ekaa nihaau Adam kaa ishi machituutamiyich kaa ishi machituutahkwaau. Uu maak Adam yaapach chii ihtakuniyuu taan kaa ishi nispituwaat aniyuu eshkw che takushiniyich, eukunh Jesus.

¹⁵ Mikw maak aniyuu miiwewiniyuu sehchei kaa miitahkw Chishemanituu naashch taapwe aahchiiuh iteyihtaakuniyuu taan kaa iteyihtaakuniyich Adam umachihtuutamuwin. Mihchetu awen chii nipuu aniyuu uhchi peyakw naapeu, eukuu Adam, e chii machituutahk. Mikw maak etituu mihchetiyuu aweyuuh Chishemanituu e chii shaweyimaat. Etituu iteyihtaakuniyuu aniyuu miiwewiniyuu sehchei kaa miitahkw Christ ushaweyihchichewiniihch uhchi mihchetu awen chechii pimaachihut.

¹⁶ Aahchiiuh taapwe iteyihtaakuniyuu Chishemanituu umiiwewin taan kaa iteyihtaakuniyich peyakw naapeu umachihtuutamuwin. Wesh aniyuu taan kaa ishi machituutahk Adam ekut kaa uhchipayiyich misiwe awen taapwe chechii ataameyihtaakusit machihtwaawiniyuu Chishemanituu ishi e ihtaayich. Chishemanituu maak kaa pachishtinaat Jesus chechii nipahaakanuyich ekut wehchipayihch mihchetu awenichii chechii wepeyihtamuwaakanuutwaau umachituutamuwinawaauh ekw maak e kuiskutaatisiitwaau che ishi kanawaapamikutwaau Chishemanituuh.

¹⁷ Wesh chichischeyihtenaanuu aniyuu umachihtwaawin an peyakw naapeu ekut kaa uhchi ishinaakuhch misiwe awen chechii tipeyimikut nipuwiniyuu. Taan maak uste e ishpish miyeyihtaakuniyich taan kaa ishi ihtuutamaatahkw an kutak naapeu, eukuu Jesus Christ. Misiwe maak anichii kaa weyuuch chischeyihtamihaakanuutwaau Chishemanituu ushaweyihchichewiniyuu ukuiskutaatisiiuch e ishi kanawaapamukutwaau Chishemanituu muush kata taauch taanite e ihtaayich Jesus kaye kata wiichihiikuuch chechii suuhchikaapuutwaau upimaatisiiwiniwaahch.

¹⁸ Ekun maak wehchi ishinaakuhch mwehch peyakw awen umachihtwaawinh uhchi misiwe awen e ishi ataameyihtaakusit machihtwaawiniyuu Chishemanituu ishi e ihtaayich. Jesus maak ukuiskutaatisiiwinihch ekut wehchipayiyich Chishemanituu misiwe ukuiskutaatisiiuch chechii ishi kanawaapamikutwaau kaye chechii miyaat kaachiche pimaatisiiwiniyuu.

¹⁹ Peyakw awen, eukuu Adam, aniyuu ekaa uhchi nanihiihtuwaat Chishemanituu eukuu wehchi misiwe awen ataameyihtaakusit e machaatisiit. An maak kutak, eukuu Jesus, tekash e chii nanihiihtuwaat Chishemanituuh ekut wehchipayiyich mihchet awen e kuiskutaatisiit chechii ishi kanawaapamikut Chishemanituu.

²⁰ Iskutak kaa pachishtinahk Chishemanituu uwiishuwewin ekut kaa uhchi chischeyihtahkwaau awenichii e ishpish weyuuch machituutahkwaau. Mikw maak taanit kaa weyuuch machituutaakanuuhch Chishemanituu ushaweyihchichewin etituu chii aapatisiimakaniyuu.

²¹ Taapwe kiipaa suuhchipayuu machihtwaawin. Wesh mitun tipeyimikuuch awenichii eukw maak wehchii iteyihtaakuniyich chechii nipitwaau. Etituu maak Chishemanituu uchishewaatisiiwin suuhcheyihtaakuniyuu. Ukuiskutaatisiiuch chit ishi kanawaapamikunuu aniyuu uhchi taan kaa ishi ihtuutamaakuuhk Jesus Chitipeyihchikeminuuh. Ekut maak chechii uhchi ayaauhkw kaachiche pimaatisiiwiniyuu.