Romans 4 - Chishemanituu Utayimuwin: Kaa Uskaach Testament

Taapwehtamuwiniyuu kaa kuiskunaakuhiikut Abraham

¹ Ekw maak chipaa aayimuumaanuu aniyaanaa aanische chimushuuminuu Abraham taanite kaa uhchi kuiskunaakuhaakanuut.

² Wesh chiishpin kaa kuiskunaakuhaakanuukwe Chishemanituu ishi e ihtaayich e miyutuutahk, chipaa ihtakuniyuu taan chipaa chiishi maamihchimuu. Mikw maak namui ihtakuniyuu chekwaayuu ati chechii uhchi maamihchimut Chishemanituu ishi e ihtaayich.

³ Taan e itashtech maak Chishemanituu utayimuwinihch. Itashteu, Abraham chii taapweyimeu Chishemanituu eukw uyuu wehchi ukuiskutaatisiiu chii ishi kanawaapamikut.

⁴ Kanawaapahtamukw taan e ishinaakuhch awen e aapatisit. Aniyuu e aapatisit ekw maak e chiishiihkawaakanuut namui sehchei miyaakanuu aniyuu utipahamaakusiiwin. Shaakuuch aniyuu e chii aapatisit wehchi miyaakanuut.

⁵ Maamituneyimaataau maa awen kaa machaatisiit. Aniyuu e miyutuutahk ekut aa wehchi kuiskutaatisiit. Namui, e taapweyimaat Chishemanituu ekut mikw chechii uhchi kuiskunaakusit Chishemanituu ishi e ihtaayich.

⁶ Eukw uyeyuu kaa aayimuutahk aniyaa chisheuchimaau David. Chii aayimuumeu e ishpish shaweyihtaakusiyich aniyuu aweyuu ukuiskutaatisiiu kaa ishi kanawaapamikuyich Chishemanituu. Namui wii aniyuu taan e ishi miyu atushchetwaau wehchi ukuiskutaatisiiuch ishi kanawaapamikutwaau Chishemanituu.

⁷ Chii iteu uu chisheuchimaau, Taapwe shaweyihtaakusuuch anichii awenich kaa wepeyihtamaakutwaau Chishemanituu uwaniihtuwinawaauh, anichii kaa iichenamuwaakanuutwaau umachihtwaawinawaauh.

⁸ Taapwe shaweyihtaakusuu an awen kaa wepeyihtamuwaakanuut umachihtwaawinh.

⁹ Mikw aa maak anichii kaa chischinuwaachishwaakanuutwaau chika shaweyimaakanuuch. Namui kiipaa. Kaye anichii ekaa kaa chischinuwaachishwaakanuutwaau chika shaweyimaakanuuch. Wesh itashteu Chishemanituu utayimuwinihch, Abraham e chii taapweyimaat Chishemanituuh eukw maak uyuu e kuiskutaatisiit wehchi ishi kanawaapamikut Chishemanituu.

¹⁰ Taaishpish maak kaa itaachimaakanuut uyeyuu Abraham, eshkw aa ekaa uhchi chischinuwaachishwaakanuut maak shaash e chii chischinuwaachishwaakanuut. Eshkw ekaa uhchi chischinuwaachishwaakanuut ekut kaa itaachimaakanuut uyeyuu, namui wii paatish kaa chischinuwaachishwaakanuut.

¹¹ Paatimaa chii chischinuwaachishwaakanuu. Aniyuu maak e chii chischinuwaachishwaakanuut ekut kaa uhchi chischeyihtaakuhtaakanuyich e taapweyimaat Chishemanituu, shaash kuiskutaatisiiwinihch e chii ishi kanawaapamikuukupane Chishemanituu. Shaash kuiskutaatisiiwinihch chii ishi kanawaapamikuukupane eshkw ekaa mechim uhchi chischinuwaachishwaakanuut. Ekw maak e ati ishinaakusit e uhtaawiimaaututawaat misiwe aniyuuh kaa taapweyimaayich Chishemanituu, aniyuuh kuiskutaatisiiwinihch kaa ishi kanawaapamikuyich Chishemanituu, aat ekaa uhchi chischinuwaachishwaakanuyich.

¹² Kaye maak aniyuuh kaa chischinuwaachishwaakanuyich uhtaawiimaaututaweu, mikw namui uhtaawiimaaututaweu mikw aniyuu e chii chischinuwaachishwaakanuyich. Aniyuu taapwehtamuwinihch e ishi pimaatisiyich mwehch wiya kaa ihtit aniyaanaa kuuhtaawiinuu Abraham eshkw ekaa uhchi chischinuwaachishwaakanuut eukw uyuu wehchi uhtaawiimaaututawaat.

Namui chika chii kuiskutaatisiihaakanuu awen mikw aniyuu e nanihiihtahk wiishuwewiniyuu

¹³ Chishemanituu chii iteu Abraham ekw maak aniyuu anit e ihtaat che uhchi aanische pimaatisiyich cheshtinaash taapwe che miyaat misiwe uyuu aschiiyuu. Uyuu maak kaa itweyich Chishemanituu cheshtinaash che ihtuutamaakut Abraham namui wii aniyuu e nanihiihtahk wiishuwewiniyuu wehchii itikut uyuu che ihtuutamaakut. E chii taapweyimaat Chishemanituu kaye maak ukuiskutaatisiiu e chii ishi kanawaapamikut eukw uyuu wehchii ihtuutamaakut uyuu.

¹⁴ Wesh e ishinaakunikwe mikw anichii kaa nanihiihtahkwaau wiishuwewiniyuu che pimaachihiikuwaakwenich Chishemanituu ekw kiipaa chechii itweyihkw, namui wiyesh ishinaakun taapwehtamuwin, e chii itwet maak Chishemanituu cheshtinaash che pimaachihaat aniyuu aweyuu che taapweyimikut.

¹⁵ Wesh ekaa nanihiihtaakanuuhch wiishuwewin ekut wehchipayiyich Chishemanituu chechii aahkuyuwesit. Ekw maak taanite ekaa e ihtakuhkwaauh wiishuwewinh namui kiipaa ihtakun taanite ekaa nenihiihtaakanuuhkwaau wiishuwewinh.

¹⁶ Ekun maak wehchi ishinaakuhch taapwehtamuwinihch mikw chechii uhchi ayaakanuyich aniyuu Chishemanituu kaa itwet cheshtinaash che ihtuutamaachet. Ekw maak Chishemanituu ushaweyihchichewinihch ekut wehchi cheshtinaateyihtaakuniyich misiwe anichii kaa ishi aanische taapweyimaatwaau Chishemanituu mwehch kaa ishi taapweyimaayich Abraham kaye wiyawaau chechii ayaatwaau aniyuuh taan kaa itweyich Chishemanituuh cheshtinaash che ihtuutamaacheyich. Namui maak mikw anichii kaa miyaakanuutwaau Moses uwiishuwewiniyuu chika chii ayaauch uyuu. Anichii kaa taapweyimaatwaau Chishemanituuh mwehch Abraham kaa ishi taapweyimaayich eukunich kaye wiyawaau che ayaatwaau uyuu. Wesh misiwe e tashiihkw Abraham kuuhtaawiitutuwaanuu.

¹⁷ Mwehch e itashtech Chishemanituu utayimuwinihch Abraham e chii itikuukupane Chishemanituuh, Chichii ishihiitin chechii uhtaawimaaututuutwaau mihchetu e itiskaanesitwaau awenichii. Abraham maak e chii taapweyimaat Chishemanituu eukw uyuu e uhtaawiimaaututauhkw wehchii ishi kanawaapamikut. Eukunh maak uyuuh Abraham kaa taapweyimaat, aniyuuh kaa ihtuutawaayich aniyuuh ekaa kaa pimaatisiyich kaau chechii pimaatisiyich kaye maak mikw e itweyich chechii ihtakuniyich chekwaayuu ekaa wiiskaat uhchi ihtakuniyich tiiwehch ihtakuniyuu.

¹⁸ Aat ekaa mechim uhchi ihtakuniyich taanite che ishi aspeyimukupane Abraham taapwe chechii utawaashiimitwaau wiichiskweu, yaapach chii taapweyimeu Chishemanituuh wesh ekun kaa itikut che ihtuutamaakut. Ekut kaa uhchi ishinaakuniyich mihchetu e itiskaanesiyich aweyuuh chechii uhtaawiimaaututawaat. Wesh kiipaa ekun e itashteyich Chishemanituu utayimuwinihch, Chika mihchetuuch awenichii anite e ihtaayin che uhchi aanische pimaatisiitwaau.

¹⁹ Shaash maak chekaat chii mitaahtumitanuupunesuu Abraham uyuu kaa itaakanuut che ihtuutamuwaakanuut. Yaapach maak peyakun chii ishpish taapweyimeu Chishemanituuh. Kaa ishpish chii suuhchipayiyich e taapweyimaat namui mitun uhchi aanuwehtam che utawaashiimitwaau aat e chii chischeyimisut ekaa shaash chechii uhtaawimaaut kaye aniyuuh wiich chisheishkwesha e chii chischeyimaat cheshtinaash shaash ekaa chechii utawaashiimiyich.

²⁰ Yaapach chii taapwehtam Abraham che ihtuutamaakut Chishemanituu taan aniyuuh kaa itikut cheshtinaash che ihtuutamaakut. Etituu chii ati suuhcheyihtaakuniyuu utaapwehtamuwin. Shaash chii chishtaachimeu Chishemanituuh aat eshkw ekaa mechim uhchi ispayiyich uyuu.

²¹ Mitun chii cheshtinaateyimeu Chishemanituuh cheshtinaash che ihtuutamiyich taan aniyuuh kaa itweyich che ihtuutamaakut.

²² Ekun maak wehchii ishinaakuniyich Abraham aniyuu e taapweyimaat Chishemanituu ukuiskutaatisiiu chechii ishi kanawaapamikut.

²³ An kaa itashtech Chishemanituu utayimuwinihch, Kuiskutaatisiiwinihch chiishi kanawaapamikuu Chishemanituuh, namui mikw Abraham uhchi aayimuumaakanuu utah.

²⁴ Chitasitahukunaanuu kaye chiyaanuu uu kaa itashtech, chiyaanuu kaa taapweyimuhkw Chishemanituu an kaa wanishkaanaat Jesus Chitipeyihchikeminuu nipuwinihch uhchi. Kaye chiyaanuu kuiskutaatisiwinihch chika ishi kanawaapamikunuu Chishemanituu.

²⁵ Jesus chii pachishtinaakanuu chechii nipistamaatahkw chechii wepeyihtamaakuyihkw chimachihtwaawinuuh, ekw maak aniyuu kaa wanishkaanaakanuut nipuwinihch uhchi ekut kaa uhchi ishinaakuhch kuiskutaatisiiwinihch chechii ishi kanawaapamitahk Chishemanituu.