Romans 2 - Chishemanituu Utayimuwin: Kaa Uskaach Testament

Chishemanituu mikw chika chii wiyaaskuneu aweyuuh

¹ Eukw maak uu wehchi ekaa mitun ishinaakuhch chechii wiyaaskunit awen. Wesh chiishpin e wiyaskunitwaau awenichii, chiya maak e ihtuutamuwane aniyuu kaa ishi wiyaskunitwaau, chiya tipiiwe chinishuuwanaachimisun.

² Wesh misiwe chicheshtinaahunaanuu taapwe kuiskw e ihtit Chishemanituu weyaaskunaach aniyuuh aweyuuh kaa ihtuutamiyich uyuuh chekwaayuuh.

³ Chiya maak wii, niwiichewaakan, chitihtuuten uyuuh chekwaayuuh taan aniyuuh e ishi wiyaaskunitwaau kutakach e ihtuutahkwaau. Chititeyihten aa che miyaaskamut Chishemanituu uwiyaaskunichewin uu e ihtiyin.

⁴ Naashch taapwe chishewaatisiyuu Chishemanituu. Nakaawiyuu chechii wiyaaskunisk kaye naashch taapwe chisiipiiwesiistaakw. Chekwaayuu wehchi maayeyimat, aniyuu maak e ishpish miyeyihtaakusit. Namui aa chichischeyihten chekwaayuu wehchi chishewaatutaask. Chinituweyimukw chechii mihchiiweyihtamut taan e ishi machaatisiyuut ekw maak chechii kweskaatisiyuut.

⁵ An maak e ishpish suuhcheyimuwiin mikw chitihtuuten etituu aahkwaach chechii ishi wiyaaskunisk Chishemanituu aniyuu e chiishikaayich taanit cheshtinaash kuiskw che ishi wiyaaskunaat aniyuuh kaa machituutamiyich.

⁶ Wesh misiwe aweyuu aniyuu taan kaa aihtiyich kata ihtakuniyuu taan che ishi wiyaaskunaat.

⁷ Aniyuuh aweyuuh muush kaa miyutuutamiyich e pukuseyimuyich chechii miyu kanawaapamikuyich Chishemanituu kaye chechii miywaachimikuyich kaye chechii miikuyich kaachiche chechii pimaatisiyich, kata miyeu kaachiche chechii pimaatisiyich.

⁸ Ekw aniyuu kutak aweyuuh mikw wiyawaau kaa maamituneyimisuyich ekaa mitun kaa aapateyihtamiyich aniyuu taan e ishi kuiskunaakuniyich chechii ihtuutamiyich, pisikw kaa machituutamiyich, eukun uyuuh maauch aahkwaayaach che ishi wiyaaskunaat Chishemanituu.

⁹ Misiwe anichii kaa machaatisiitwaau mistahii chika utihtahukuuch nanehkaateyimuwiniyuu kaye kata maahtakushkaakuuch aayimeyihtamuwiniyuu. Anichii Jewa kaa itiskaanesitwaau niishtam kata wiyaaskunaakanuuch ekw miin anichii ekaa Jewa kaa itiskaanesitwaau.

¹⁰ Aniyuuh maak muush kaa miyutuutamiyich eukun aniyuuh che miyu kanawaapamaat Chishemanituu. Chika chishtaachimeu kaye chika miyeu chiyaameyihtamuwiniyuu. Aniyuuh niishtam Jewa kaa itiskaanesiyich chika ihtuutuweu uyuu ekw miin aniyuuh ekaa Jewa kaa itiskaanesiyich.

¹¹ Wesh misiwe e itiskaanesiyich aweyuu peyakunihch ishi kanawaapameu Chishemanituu.

¹² Anichii ekaa Jewa kaa itiskaanesitwaau namui chischeyihtamuch aniyuu wiishuwewiniyuu Chishemanituuh kaa miyaayich aniyuuh Jewa kaa itiskaanesiyich. Kata wanishinuuch maak aniyuu e machituutahkwaau mikw maak namui aniyuu wiishuwewiniyuu kata uhchi aapataniyuu wiyaaskunaakanuutwaawenich. Anichii maak wii Jewa kaa itiskaanesitwaau chischeyihtamuch uyuu wiishuwewiniyuu. Machituutamuch maak kaye wiyawaau. Eukw maak uyeyuu wiishuwewiniyuu che aapataniyich wiyaaskunikutwaawenich Chishemanituuh.

¹³ Wesh taapaa anit e pehtahk awen Moses uwiishuwewiniyuu kata uhchi kuiskunaakusuu Chishemanituu ishi e ihtaayich. Ihtuutahke taan e itashteyich anit ekut che uhchi kuiskunaakusit Chishemanituu ishi e ihtaayich.

¹⁴ Anichii maak wii ekaa Jewa kaa itiskaanesitwaau namui ayaauch uyuu wiishuwewiniyuu. Mikw maak tipiiwe anit e ihtaatwaau e uhchipayiyich chechii ihtuutahkwaau taan e itashumuweyich aniyuu wiishuwewiniyuu ekut wehchi nuukuniyich e chischeyihtahkwaau taan chipaa ihtuuch kaye taan aniyuuh ekaa chipaa uhchi ihtuuch aat ekaa ayaatwaau Moses uwiishuwewiniyuu.

¹⁵ Ekut maak wehchi nuukuniyich e ihtakuniyich wiishuwewiniyuu utehiiwaahch aniyuu e wiishumikutwaau taan chipaa ishi pimaatisiyuuch kaye maak ihtakuniyuu anit wehchi chischeyihtahkwaau taan chipaa ishi pimaatisiyuuch. Chischeyihtamuch meyuutuutamuwaakwenich maak mechituutamuwaakwenich.

¹⁶ Ekw maak iskutak Chishemanituu wiyaaskunaate misiwe aweyuuh, Jesus Christ uhchi, taan kaa ishi chiimuut machituutamiyich ekut che nuukuniyich an awen taapwe kaa ihtuutamukwe taan e itashumuweyich wiishuwewiniyuu. Ekun e ishi wiihtamaachemakahch uu miywaachimuwin Jesus Christ kaa miit chechii waawiihtamuch.

Jewa iinuuch ekw maak aniyuu uwiishuwewinawaauh

¹⁷ Chiya maak wii Jewa kaa itiskaanesiyin maaskuuch chititeyihten e miyu kanawaapamisk Chishemanituu mikw aniyuu e chischeyihtamut Moses uwiishuwewin. Kaye chimaamihchimun Chishemanituu e utiiniimitutaask.

¹⁸ Chichischeyimaau taan e ishi nituweyimisk chechii ishi pimaatisiyuut Chishemanituu. Uwiishuwewinihch ekut kaa uhchi chischeyihtaman taan chipaa ishi pimaatisiin kaye taan ekaa chipaa uhchi ishi pimaatisiin.

¹⁹ Chicheshtinaahun kaye chechii miyu chischinuhtahiitwaau anichii ekaa kaa wapahtahkwaau. Chicheshtinaahun kaye waashtewin chechii ishinaakusiistuutwaau anichii wanitipiskusiiwinihch kaa ihtaatwaau.

²⁰ Chicheshtinaahun chipaa kuiskunaauch anichii naashch ekaa kaa iteyihtahkwaau, kaye chicheshtinaahun awaashach chipaa chischinuhamuwaauch. E ayaayin uu wiishuwewin chititeyihten misiwe chekwaan e chischeyihtaman kaye maak e chischeyihtaman taapwewin.

²¹ Chichiskutamuwaauch awenichii. Namui aa chiya kaye chichiskutamaasun. Chikacheschimuwen ekaa chechii kachemutit awen. Chiya maak wii cheshtinaash aa namui chikachemutin.

²² Chititwen kaye ekaa chechii pisikwaatisiit awen. Chiya maak wii cheshtinaash aa namui chipisikwaatisiin. Chuuhkaataauch manituuhkaanich. Mikw maak namui aa chikachemutin anit ayimiheukamikuhch taanit newachiishtuwaakanuutwaau manituuhkaanich.

²³ Miin kutach chekwaan. Naashch chinanaapeumun e ayaawat Chishemanituu uwiishuwewin. Mikw maak nuwach chimaayeyimaau Chishemanituu ekaa nanihiihtamut uwiishuwewin.

²⁴ Chishemanituu utayimuwinihch itashteu, Chiyawaau Jewa kaa itiskaanesiyekw, chiyawaau chitihtuutuwaawaauch anichii ekaa Jewa kaa itiskaanesitwaau chechii machaayimuumaatwaau Chishemanituuh.

²⁵ Jewa e itiskaanesiyin chichii chischinuwaachishukuun chechii chischeyimikuyin Chishemanituu e utiiniimitutaask. Nanihiihtamute Chishemanituu uwiishuwewin chika wiichihiikun taapwe chischinuwaachishuwewin. Ekaa maak nanihiihtamute uwiishuwewin namui aapatan e chii chischinuwaachishukuyin.

²⁶ An awen ekaa Jewa kaa itiskaanesit kaye ekaa uhchi chischinuwaachishwaakanuut nanihiihtahke wiishuwewiniyuu chika miyu kanawaapamikuu Chishemanituu, mwehch taapwe e chii chischinuwaachishwaakanuut ekun che ishi kanawaapamikut.

²⁷ Ekw maak chiyawaau Jewa kaa itiskaanesiyekw che nishuuwanaachimitaakuch uchii ekaa Jewa kaa itiskaanesitwaau wesh taapaa chinanihiihtamuwaanaawaau chiyawaau Chishemanituu uwiishuwewin aat chiyawaau e ayaawekw e chii masinahiikanuyich kaye maak aat e chii chischinuwaachishukuyekw. Wiyawaau maak uchii ekaa Jewa kaa itiskaanesitwaau nanihiihtamuch wiishuwewiniyuu aat ekaa uhchi chischinuwaachishwaakanuutwaau wiyawaau.

²⁸ Namayeyuu mikw Jewa e itiskaanesit awen kaye e chii chischinuwaachishwaakanuut wiiyuuhch wehchi utiiniimitutaakut Chishemanituuh.

²⁹ An awen chihchiwe Jewa kaa ihtaat nuukuniyuu anite piihch upimaatisiiwinihch taapwe Jewa e ihtaat. Wesh Kaa payehchisiit Ahchaahkw eukuu e chischinuwaachishukuyihkw chitehiinaahch, eukw maak uu chihchiwe chischinuwaachishuwewin, namayeu wii wiishuwewin e nanihiihtamuhkw chika chii chischinuwaachishukunaanuu chitehiinaahch. Eukw maak uu awen chihchiwe Jewa kaa ihtaat Chishemanituuh eukw che nituweyimaat chechii mamiywaachimikut namui wii naapeuh.