Romans 16 - Chishemanituu Utayimuwin: Kaa Uskaach Testament

Paul kaa waachiyemaat nanaahkuu aweyuuh

¹ Chiwii miyu aayimuutamaatinaawaau chiichishaaniskweminuu Phoebe. Naashch taapwe miyu wiichiheu aniyuuh umaamuuayimihaauh Cenchreae kaa ishinihkaateyich ihtaawiniyuu kaa ihtaayich.

² Mikw che ishi piihtakahekw nituwaapamitaakwe kaye che wii miyu kanuweyimekw mwehch chipaa ishi miyutuutawaawaau awen e taapwehtahk. Che wiichihekw taan che ishi nituweyihtamukwe chechii ishi wiichihekw. Wesh mihchet aweyuuh chii miyu wiichiheu wiya. Kaye maak niya nichii miyu wiichihiikw.

³ Niwaachiyemaauch Priscilla ekw maak Aquila. Niwiichaapatisiimaauch uchii e atushkuwaatwaau Jesus Christ.

⁴ Mekwaach anit naashch e chii kushtaatikuniyich kaa ihtaauch namui mitun uhchi manaateyihtamuch tipiiwe upimaatisiiwinawaauh kaa ishpish chii wii wiichihiitwaau. Naashch taapwe ninanaaskumaauch. Namui mikw niya, misiwe kaye aniyuuh ekaa Jewa kaa itiskaanesiyich umaamuuayimihaauh nanaaskumikuuch.

⁵ Niwaachiyemaayuuh kaye aniyuu umaamuuayimihaauh uwiichiwaawaahch maan kaa chii maamuyich chechii ayimihaayich. Epaenetus kaye niwaachiyemaau eukuu niwiichewaakan kaa saachihak. Wiya maauch niishtam chii taapweyimeu Jesus anite Asia kaa ishinihkaateyich aschiiyuu.

⁶ Mary an naashch kaa mistaapatisit e wiichihiitaakw niwaachiyemaau kaye wiya.

⁷ Kaye anichii niwaahkumaakanich Andronicus ekw maak Junias niwaachiyemaauch. Ekute kaye wiyawaau kaa ihtaatwaau mekwaach chipahutuukamikuhch kaa ihtaauch. Naashch miyu chisteyimikuuch kutak apastalh. Wiyawaau niishtam chii taapweyimeuch Jesus eshkw ekaa uhchi taapweyimach niya.

⁸ Niwaachiyemaau kaye Ampliatus, niwiichewaakan kaa saachihiik kaa taapweyimaat Utipeyihchikeuh.

⁹ Urbanus eukw miin waachiyemak. Nichii wiichaapatisiimaanaan e atushkaamachiht Jesus Christ. Niwiichewaakan Stachys naashch kaa saachihiik kaye niwaachiyemaau.

¹⁰ Niwaachiyemaau Apelles. Taapwe nuukuniyuu e taapweyimaat Jesus aniyuu taan e ishi pimaatisit. Niwaachiyemaauch anichii Aristobulus wiichiihch kaa ihtaatwaau.

¹¹ Niwaahkumaakan Herodion, eukw miin waachiyemak, ekw maak anichii Narcissus wiichiihch kaa ihtaatwaau anichii kaa taapweyimaatwaau Utipeyihchikeuh.

¹² Anichii iskweuch Tryphaena ekw maak Tryphosa Utipeyihchikeu kaa atuskwaatwaau, niwaachiyemaauch kaye. Niwiichewaakan Persis, eukw miin waachiyemak, naashch taapwe nisaachihaau. Nasch taapwe chii mista aapatisuu uu iskweu Utipeyihchikeu e atushkuwaat.

¹³ Niwaachiyemaau Rufus, naashch taapwe chishtaachimaakanuu taan e ishi miyu atushkuwaat Utipeyihchikeu. Ukaawii kaye niwaachiyemaayuu. Mwehch tipiiwe nikaawii nititeyimaayuu.

¹⁴ Asyncritus, Phlegon, Hermes, Patrobas, Hermas ekw maak misiwe aniyuuh kutak wiichishaanimaauh kaa wiicheukutwaau niwaachiyemaauch.

¹⁵ Ekw maak Philologus, Julia, Nereus, kaye Nereus umisa, Olympas ekw maak misiwe aniyuu kaa taapwehtamiitwaauh kaa wiichewaakanitwaau niwaachiyemaauch.

¹⁶ Chiyawaau kaa wiichishaanihtuyekw uchemitukw e waachiyemituyekw. Misiwe umaamuuayimihaauch Christ kaa chisteyimaatwaau chiwaachiyemikuwaauch.

Maahchishtai e itashuwet Paul

¹⁷ Niichishaanitikw, chiwii yaakwaamitinaawaau. Yaakwaamiistuwaahkuch anichii kaa ihtuutawaatwaau aweyuuh chechii papahkaanipayiyich kaye aahchiiuh chechii iteyimituyich kaye kaa wanaachihtaawaatwaau taan e ishi taapwehtamiyich. Aahchiiuh ishi chiskutamaacheuch taan shaash kaa ishi chiskutamaakuwekw. Ekaawii piskaataahkuch uchii.

¹⁸ Namui Chitipeyihchikeminuuh Christ atushkuweuch uchii uyuu e ihtitwaau, mikw taan aniyuuh chekwaayuuh chechii miichitwaau maak taan aniyuuh ekaa chechii miichitwaau eukunh mekushkaateyihtamihiikutwaau. Naashch taapwe miyuuhtaakuhiisuuch taan e ishi ayimitwaau kaye nitamukw ihtuuch aniyuu e miywaachimaatwaau aweyuu. Ekut maak wehchi wiyeshimaatwaau aniyuuh naashch kaa wehchipayihch chechii wiyeshimaakanuyich.

¹⁹ Chiyawaau maak wii misiwe awen chii pehtam taan e ishi nanihiihtuwekw Utipeyihchikeu. Ekut maak wehchi naashch miyeyihtamaan e chischeyimitakuch uu e ihtiyekw. Chinituweyimitinaawaau chechii miyu chischeyihtamekw taan an meywaashich kaye ekaa mitun chechii ihtuutamekw an taan e ishi maayaatahch.

²⁰ Ekw maak Chishemanituu an kaa miitahkw chiyaameyihtamuwiniyuu shaash wiipach tekash chika tepaheu machimanituuh kaye chika ihtuutaakuwaau chechii ashpashihiimekw. Nitutamaan Chitipeyihchikeminuu Jesus Christ muush chechii miyutuutamaataakw.

²¹ Timothy an kaa wiich aapatisiimak chiwaachiyemikuwaau. Kaye anichii nuwaahkumaakanich Lucius, Jason, ekw maak Sosipater chiwaachiyemikuwaauch.

²² Niya Tertius, kaa masinahamaan taan e itwet Paul uyuu kaa masinahiichet chiwaachiyemitinaawaau. Nitaapweyimaau kaye niya Utipeyihchikeu.

²³ Gaius wiichihch nitihtaawaan anite miyaauchihiitutwaau maan umaamuuayimihaauch. Kaye wiya Gaius chiwaachiyemukuwaau. Erastus, an kaa naanaakachihtaat shuuliyaayuu utah uyuu ihtaawiniyuu ekw maak chiichishaanuu Quartus chiwaachiyemikuwaauch kaye wiyawaau.

²⁴ Ninitutamaan Chitipeyihchikeminuu Jesus Christ misiwe chechii chishewaatutaataakw. Amen.

Paul e ishi maamihchimaat Chishemanituuh

²⁵ Maamihchimaataau Chishemanituu. Wes wiya eukw keschihut chechii yaaichikaapuuhiitaakw chipimaatisiiwiniwaahch anit uhchi taan kaa ishi waawiihtamaatakuch miywaachimuwin. Ekut e aayimuumaakanuut uu Jesus Christ kaa tipaachimak. Eukw maak uyuu miywaachimuwiniyuu namui uhchi pachishtinam Chishemanituu chechii chischeyihtaakanuyich anite pechi weskach.

²⁶ Anuhchiish maak shaash chichischeyihtenaanuu uu miywaachimuwin. Chishemanituu kaachiche kaa ihtaat chii itashumeu aniyehkaanaanh uchischiwehiichesiimh chechii aayimuutamiyich uyuu miywaachimuwiniyuu anite utayimuwiniihch ati misiwe e itiskaanesitwaau awenichii utah aschiihch chechii chischeyihtamihaakanuutwaau aniyuu miywaachimuwiniyuu kaye chechii taapweyimaatwaau kaye chechii nanihiihtuwaatwaau Chishemanituu.

²⁷ Chishemanituu mikw wiya kaa Chishemanituut kaye tekash kaa kachehtaaweyihtahk, kata maamihchimaakanuu aniyuu uhchi taan e ishi ihtuutamiyich Jesus Christ. Amen.