Romans 15 - Chishemanituu Utayimuwin: Kaa Uskaach Testament

Kutakach awenichii wii naniheyihtamihiich

¹ Chiyaanuu kaa suuhchikaapuuyihkw chipaa wiichihaanuuch anichii ekaa kaa suuhchikaapuutwaau. Namui chiyaanuu chipaa uhchi wii naheyihtamihiisunaanuu.

² Misiwe e tashiihkw chipaa nanaakatuweyimaanuu chiichishaanuu chechii miyutuutuuhkw. Suuhk chipaa wii wiichihaanuu chechii nihtaauchit taapwehtamuwinihch ishi.

³ Waawaach Christ namui uhchi ishi pimaatisiyuu mikw wiya chechii naheyihtamihiisut. Teyakuch aniyuu taan e itashteyich Chishemanituu utayimuwinihch ekun kaa ispayit, “Niya nichii maayeyimikuch anichii kaa maayeyimiskwaau.”

⁴ Misiwe taan kaa pechi itasinahiikanuuhch Chishemanituu utayimuwinihch chichii wii chiskutamaakunaanuu anit uhchi. Ekut wehchi siihchimikuyihkw kaye ekut wehchi ayaayihkw siipiiwesiiwin ekw maak chechii ayaayihkw aspeyimuwin.

⁵ Chishemanituu an kaa miiwet siipiiwesiiwiniyuu kaye kaa siihchimuwet eukw netutamuuk chechii ihtuutaataakw chechii miyu wiicheutuwekw e chischinuwaapamekw Christ taan kaa aihtit wiya.

⁶ Ekw maak misiwe maamuu e tashiyekw peyakunihch che ishi maamihchimekw Chishemanituu, Chitipeyihchikeminuu Jesus Christ Uhtaawii.

Anichii ekaa Jewa kaa itiskaanesitwaau che ituhtatuwaakanuutwaau miywaachimuwiniyuu

⁷ Namui kuuhchi aatuweyimikuwaau Christ, ekaawii maak kaye chiyawaau aatuweyimitukw wes ekut chechii uhchi maamihchimaakanuut Chishemanituu.

⁸ Chiwiihtamaatinaawaau, Christ chii takushinuu chechii atushkuwaat Jewa iinuuh, chii wii waapahtiiweu taapwe che ihtuutamiyich Chishemanituuh aniyuu taan kaa itaayich chitaanische waahkumaakanuuh cheshtinaash che ihtuutamuwaayich.

⁹ Kaye maak chii takushinuu kaye aniyuuh ekaa Jewa kaa itiskaanesiyich chechii chisteyihtaakuhaayich Chishemanituu aniyuu taan kaa ishi chistimaacheyimikutwaau kaye wiyawaau. Itashteu Chishemanituu utayimuwinihch, Chika maamihchimitin mekwesiinuu ekaa Jewa kaa itiskaanesitwaau e ihtaatwaau kaye chika nikamuushtaatin.

¹⁰ Kaye maak itashteu, Chiyawaau ekaa Jewa kaa itiskaanesiyekw wiich miywaatamuumaahkw Chishemanituu utiiniim.

¹¹ Maau miin e itashtech, Maamihchimaahkw Utipeyihchikeu misiwe chiyawaau ekaa Jewa kaa itiskaanesiyekw. Misiwe awen e ishinaakusit, maamihchimaahkw Utipeyihchikeu.

¹² Kaye wiya Isaiah chii ihtakuniyuu uyuu e chii itashtaakupane, Chika ihtaau awen Jesse e ihtaayich e uhchi aanische nihtaauchit che niikaanishkuwaat aniyuu ekaa Jewa kaa itiskaanesiitwaauh. Eukw maak uyuuh che aspeyimutaakut.

¹³ Chishemanituu, an kaa ihtuutaatahkw chechii ayaayihkw aspeyimuwin eukun an netutamuuk tekash chechii miyeyihtamihiitaakw kaye chechii chiyaameyihtamuwekw e taapweyimekw. Ekw maak Kaa payehchisit Ahchaahkw usuuhcheyihtaakusuwin chechii ihtuutaakuyekw etituu chechii aspeyimitutawekw Chishemanituu.

Paul aayimuutam taan e ishi atushkuwaat Christ

¹⁴ Niichishaanitikw, nicheshtinaahun taapwe e Saakaschineshkaakuyekw e wii miyutuutamekw, misiwe e chischeyihtamuwekw taan e ishi nituweyimitaakw Chishemanituu chechii chischeyihtamuwekw kaye maak e kaschihuyekw chechii chiskutamaatuyekw.

¹⁵ Uu maak mesinahamaatakuch ihtakunh chekwaayuuh ekaa mitun uhchi nakaawiyaan chechii chischisuumitakuch. Chishemanituu nichii miikw uchishewaatisiiwin uu chechii ihtiyaan.

¹⁶ Niya nichii wiyaapamukw Chishemanituu Jesus Christ chechii atushkaamach, anite chiyawaau ekaa Jewa kaa itiskaanesiyekw e ihtaayekw chechii ishi ayimiheu aapatisiyaan, miywaachimuwiniyuu e waawiihtamaatakuch. Eukw uyuu waa itaapachihiit Chishemanituu chechii uhchi naheyihtamihaatwaau Chishemanituuh anichii ekaa Jewa kaa itiskaanesitwaau e pachishteyimitisuutwaau wiya e ihtaayich. Kaa payehchisiit Ahchaahkw maak chitihtuutaakuwaau Chishemanituu chechii utiiniimitutaataakw.

¹⁷ Jesus Christ e wiichewak ekun wehchi chihchiwe iteyihtamihiikuyaan taan e ishi atushkuuk Chishemanituu.

¹⁸ Namui kutach chekwaan nika uhchi aayimuuten, mikw taan kaa ishi aapachihiit Jesus chechii wiichihiimach aniyuuh ekaa Jewa kaa itiskaanesiyich chechii nanihiihtuwaayich Chishemanituu, ekun mikw che aayimuutamaan. Taan kaa ishi waawiihtamuukwaau kaye taan kaa ihtuuch,

¹⁹ taan kaa ishi waapahtiyaakanuutwaau waapahtiiwewinh kaye e miskaateyihtaakuniyikwaauh chekwaayuuh e suuhcheyihtaakuniyikwaauh, kaye maak aniyuu taan kaa ishi miit suuhkaatisiiwiniyuu Kaa payehchisiit Ahchaahkw ekut kaa uhchi wiihkuchihaakanuutwaau. Misiwe taanite kaa ituhteyaan Jerusalemihch anite maak ishi Illyricum aschiihch nichii waawiihtamuwaan Jesus Christ umiywaachimuwin.

²⁰ Muush nichii iteyihten taanite eshkw ekaa uhchi aayimuutamuwaakanuutwaau awenichii Jesus Christ ekute mikw anite che waawiihtamaan miywaachimuwin. Namui nuhchi wii ituhten taanite kutak awen shaash e chii chihchipayihtaat e waawiihtahk miywaachimuwiniyuu.

²¹ Wesh itashteu Chishemanituu utayimuwinihch Christ e aayimuumaakanuut, Anichii eshkw ekaa uhchi aayimuutamuwaakanuutwaau kata waapahtamuch, ekw anichii eshkw ekaa uhchi pehtahkwaau kata nisituhtamuch.

Paul kaa wiyeyihtahk Rome chechii ituhtet

²² Uchii maak e chii nituu waawiihtamuukwaau miywaachimuwiniyuu eukw uu mihchetwaau kaa ihtuutaakuyaan wehchi ekaa uhchi nihiipayaan chechii nituwaapamitakuch.

²³ Namui maak ekw ihtakun nitaapatisuwin ute kaye maak shaash mihchetu pipunh kaa wii chiiutamitakuch.

²⁴ Nipukuseyimun maak chechii naskwe waapamitakuch Spain ituhteyaane. Chipukuseyimitinaawaau kaye chechii wiichihiyekw anite Spain e wii ituhteyaan. Pitamaa kiipaa chipaa chiiutamitinaawaau. Naashch nika miyeyihten nihiipayihche chechii chiiutamitakuch.

²⁵ Anuhchiish wii Jerusalemihch nitituhten. Ihtakuniyuu shuuliyaayuu che ituhtatuukwaau anichii kaa chistimaatisiitwaau kaa taapwehtahkwaau.

²⁶ Anichii kaa taapwehtahkwaau Macedoniahch ekw maak Achaiahch kaa ishinihkaateyikwaauh aschiih kaa ihtaatwaau chii iteyihtamuch chechii maamuunihkwaau shuuliyaayuu e wii wiichihaatwaau kaa taapwehtamiitwaauh anite Jerusalemihch kaa ihtaayich kaa chistimaatisiyich.

²⁷ Wiyawaau chii iteyihtamuch chechii wiichihaatwaau uyuuh. Taapwe maak ishinaakuniyuu chechii wiichihaawaakupanenich. Wesh anichii ekaa Jewa kaa itiskaanesitwaau kaa taapwehtahkwaau taapwe chii wiichihiikuuch aniyuuh Jewa kaa itiskaanesiyich kaa taapwehtamiyich chechii ayaawaatwaau kaye wiyawaau Chishemanituuh ushaweyihchichewiniyuu e chii waawiihtamaakutwaau miywaachimuwiniyuu. Ihtakuniyuu maak taapwe anichii ekaa Jewa kaa itiskaanesitwaau kaa taapwehtahkwaau muhch e iteyihtaakuniyich chekwaayuu chechii ishi wiichihaatwaau aniyuuh kaa taapwehtamiyich kaa chistimaatisiyich Jerusalemihch kaa ihtaayich shuuliyaayuu e miyaatwaau.

²⁸ Chii ihtuutamaane maak uu kaa itashumikuyaan chechii ihtuutamaan iskutak chii miikwaawenich aniyuu shuuliyaayuu kaa maamuunikanuyich ekw Spainihch che ituhteyaan. Ekw maak che wii ati waapamitakuch anite ituhteyaane.

²⁹ Nicheshtinaahun maak takushiniyaane anite e ihtaayekw che ihtuutaatakuch tekash chechii shaweyimitaakw Christ.

³⁰ Niichishaanitikw, chitaapweyimaanuu Utipeyihchikeu Jesus Christ kaye maak Kaa payehchisiit Ahchaahkw chiwiichihiikunuu chechii saachihiituyihkw, ekun wehchi pukuseyimitakuch chechii wiichihiyekw taan e itaapatisiyaan suuhk e ayimiheshtamuyekw.

³¹ Nitutamaakw chechii kanuweyimikuyaan taan che wii ishi wiyesh ihtuutuutwaau anichii ekaa kaa taapwehtahkwaau Judea kaa ishinihkaateyich aschiiyuu kaa ihtaatwaau. Nitutamaakw kaye anichii kaa taapwehtahkwaau Jerusalemihch kaa ihtaatwaau chechii naheyihtamihiikutwaau aniyuu taan che ihtuutamuukwaau.

³² Chishemanituu maak naheyihtahke chechii nituwaapamitakuch kiipaa naashch che miyeyihtamaan nituwaapamitakuche ekw maak che miyu ayiwepiyaan anite e ihtaayekw ihtaayaane.

³³ Chishemanituu an kaa miitahkw chiyaameyihtamuwiniyuu misiwe chika wiicheukuwaau. Amen.