Romans 13 - Chishemanituu Utayimuwin: Kaa Uskaach Testament

Taan chipaa ishi kanawaapahtam awen tipeyihchewiniyuu

¹ Misiwe awen nituweyihtaakusuu chechii nanihiihtahk tipeyihchewiniyuu utah aschiihch. Misiwe tipeyihchewin kaa ihtakuhch Chishemanituu chii pachishtinam. Wiya chii wiishtaau misiwe tipeyihchewiniyuu taan che ishinaakuniyich.

² Eukw wehchi ishinaakuniyich awen e nishkuushtahk tipeyihchewiniyuu nishkuushtam chekwaayuu Chishemanituuh e chii itashuwaatamiyich chechii ihtakuniyich. Nishkuushtahke maak awen tipeyihchewiniyuu chika ihtuutaasuu chechii ishinaakuniyich chechii waweshihaakanuut.

³ Anichii kuiskw kaa ihtitwaau namui ihtakuniyuu chechii kakwaachistacheyimaatwaau aniyuuh wiishuwewinh kaa naanaakachihtaayich. Anichii eukw ekaa maamuyaam kaa ihtitwaau eukunich e ihtakuniyich chechii kakwaachistacheyimaatwaau. Ekaa pisikw waa kakwaachistacheyimaaute an wiishuwewinh kaa naanaakachihtaat kuiskw ihtih. Chika chii ishinaakuniyuu waawaach chechii miyu aayimuumisk.

⁴ Wesh Chishemanituu aniyuuh utaapachihaakanh. Chika miyupayiwaan maak nanihiihtuumatenh. Chiishpin maak ekaa maamuyaam ihtiyine nitawaach chika kakwaachistacheyimaau an wiishuwewinh kaa naanaakachihtaat. Taapwe wesin chii miyaakanuu chechii waweshihaat aweyuuh ekaa maamuyaam kaa ihtiyich. Chishemanituuh aashuu aapachihiikuu chechii waweshihaat aniyuuh ekaa maamuyaam kaa ihtiyich.

⁵ Chinituweyihtaakusin chechii nanihiihtaman tipeyihchichewin. Nanihiihtah namui mikw ekaa chechii waweshihisk Chishemanituu, eukuu ihtih chechii cheshtinaahuyin taapwe kuiskw e ihtiyin.

⁶ Ekun kaye wehchi nituweyihtaakusiyin chechii chiishiihkaasuyin shuuliyaau. Chishemanituuh atushkuweuch anichii tipeyihchewinihch kaa ishi aapatisitwaau eukw maak uyuu e ishi aapatisiihkahtahkwaau.

⁷ Taan mikw e ishi ihtakunikwe shuuliyaayuu e nituweyihtaakusiyin chechii chiishiihkaman chiishiihka. Taan e ishi nituweyihtaakusuune chechii chisteyimatwaau anichii tipeyihchewinihch kaa ishi aapatisitwaau chisteyimach.

Taan chipaa ihtuutaatunaanuu

⁸ Ekaawii chika masinahamuwaau awen chekwaayuu. Mikw taan muush e ishi ihtakuhch chipaa ishi saachihiitunaawaau eukun an chipaa masinahamaatinaawaau. Misiwe tipituutamuweu awen Chishemanituuh uwiishuwewiniyuu wiichishaanh e saachihaat.

⁹ Uyuuh kacheskwewinh, “Ekaawii pisikwaatisiih, ekaawii nipahiiweh, ekaawii kachemuth, ekaawii mushteneyihtamuu kutak awen taan e ishi ayaat.” Kutak maak kacheskwewinh e ihtakunawaakwenh, misiwe maamuu chika chii ishi kanawaapahtaakanuuh anit an peyakw kacheskwewin kaa itashuwemakahch, “Saachihii Chishemanituu mwehch chiya e ishpish saachihiisuyin.”

¹⁰ Awen e saachihaat wiichishaanh namui nihtaa kata uhchi wanituutaweu. E saachihaat awen wiichishaanh misiwe aniyuuh kacheskwewinh nanihiihtam.

¹¹ Ekun uu chipaa ishi pimaatisiinaawaau e chischeyihtamekw taan che ispayihch ekw wiipach. Iteyihtaakun ekw taapwe chechii pekupayekw kaye chechii aasihcheyihtamekw. An e chiishikaach che pimaachihiitahkw Chishemanituu etituu ekw peshunaakun kaa ishpishinaakuhch anit niishtam kaa taapweyimahkw Jesus.

¹² Shaash chekaat miyaaupayuu e tipiskaach. Shaash chika utihchipayuu e chiishikaach. Puuniitaau e ihtuutamuhkw aniyuuh chekwaayuuh taan e ishi ihtuutaakanuuhkwaau wanitipiskuwiiwinihch. Ihtuutahtaau aniyuuh chekwaayuuh che wiichihiikuyihkw chechii nishkuushtuuhkw machimanituu waashtewinihch e ihtaayihkw.

¹³ Kuiskw ishi pimaatisiitaau che nuukuhch maak taapwe waashtewinihch e ishi pimaatisiihkw. Ekaawii chika uhchi wiichihiiwenaanuu e miyuuhkasunaanuuhch e wiinisuu ihtinaanuuhch kaye ekaawii wiichihiiwekw anite e minihkwaanuuhch. Ekaawii nanaahkuu chika uhchi ishi wiinisuu pimaatisiinaanuu. Ekaawii chika uhchi kachiihkaamitunaanuu. Ekaawii kaye chika uhchi wauhteyimitunaanuu.

¹⁴ Nispituwaahkw Utipeyihchikeu Jesus Christ chechii uhchi waapamaatwaau awenichii taan e iteyihtaakusiyich. Ekaawii aapateyihtamukw chiyaasuwaauh chechii ihtuutamekw taan e ishi machi nituweyihtamuumakahkwaauh.