Romans 11 - Chishemanituu Utayimuwin: Kaa Uskaach Testament

Chishemanituu e chishewaatutawaat utiiniimh Israel

¹ Miin kutach chekwaan niwii kakwechihcheyimun. Chii wepineu aa Chishemanituu utiiniim. Namui kiipaa uhchi wepineu. Israel iinuu kaye niya. Abraham e ihtaat nichii uhchi aanische pimaatisiin. Benjamin kaa ishinihkaasutwaau upeyakuteusiyuuch ekut wehchiyaan.

² Namui uhchi wepineu Chishemanituu utiiniimh, aniyuuh shaash anite weskach kaa wiyaapamaat wiya chechii tipiyeusiit. Chichischeyihtenaawaau taan e ishi aayimuumaakanuut Elijah anite Chishemanituu utayimuwinihch. Chii aayimuutamuweu Chishemanituuh taan kaa ishi ekaa maamuyaam uhchi ihtiyich Israel iinuuh, chii itweu,

³ Utipeyihchikeu, chii nipaheuch chichischiwehiichesiimh uchii iinuuch. Chii wanaachihtaauch chipachishtinichenaapiskwa. Niya maahchishtai nipeyakushin e nuushuushkaataan. Niwii nipahiikuch maak kaye niya.

⁴ Ekw maak kaa itikut Utipeyihchikeuh, Niishwaashwaa chishe mitaahtumitanuu nichii pahkaanihaauch anichii awenichii ekaa wiiskaat uhchi niipiskuupistawaatwaau aniyuuh manituuhkaan Baal kaa ishinihkaasuyich.

⁵ Ekun maak mwehch e ispayihch anuhchiish. Ihtaauch Israel iinuuch ekaa mihchetitwaau Chishemanituuh e chii wiyaapamikutwaau aniyuu uhchi e chishewaatisiit.

⁶ E chishewaatisiit Chishemanituu eukw uyuu wehchii wiyeyimikutwaau. Namui wii aniyeyuu e miyutuutahkwaau. Wesh wiyeyimaat aweyuu aniyuu uhchi e miyutuutamiyich, namui chihchiwe chipaa uhchi ishinaakuniyuu aniyuu uchishewaatisiiwin.

⁷ Namui maak uhchi miskamuch anichii Israel iinuuch aniyuu naashch kaa naanituweyihtahkwaau. Mikw anichii Chishemanituuh kaa wiyaapamikutwaau eukunich anichii kaa miskahkwaau. Ekw anichii kutakach wetaach namui uhchii pehtaweuch Chishemanituuh kaye namui uhchii nisituhtamuch.

⁸ Eukw wesh taapwe kaa itashtech anite Chishemanituu utayimuwinihch, Chii ihtuutaakuuch Chishemanituuh mitun ekaa chekwaayuu chechii nisituhtahkwaau ahchaahkuwinihch ishi. Chii ihtuutaakuuch ekaa chechii waapahtamuwaatwaau taan e ihtiyich kaye ekaa chechii pehtahwaatwaau taan e itweyich. Eshkw anuhchiish kaa chiishikaayich ekun e ishinaakusitwaau.

⁹ Aniyaa chisheuchimaau David kaye wiya chii itasinahiicheu, Ekush e tasuwiikutwaau maak e nakwaatikutwaau chika ishinaakuniyuuh umakushewinawaauh. Ekush chika pahchishimikuuch aniyuuh umakushewinawaauh. Ekush kata waweshihaakanuuch.

¹⁰ Nitutamaan chechii aakuuchaapinaakanuutwaau chechii ekaa waapahtahkwaau. Nitutamaan kaachiche chechii waachisitwaau e ishpish kushikushkaakutwaau utaayimeyihtamuwinawaauh.

¹¹ Miin kutach chekwaan niwii kakwechihchemun. Iskutak kaa aataweyimaatwaau Chishemanituuh anichii Jewa kaa itiskaanesitwaau, chii naaspich pahchishinuuch aa aniyuu kaa pahchishihkwaau. Namui uhchi naaspich pahchishinuuch. Aniyuu e aataweyimaatwaau Chishemanituuh ekut kaa uhchi nihiipayihtaayich chechii pimaachihaayich aniyuuh ekaa Jewa kaa itiskaanesiyich. Chii pimaachiheyuuh maak aniyuu ekaa Jewa kaa itiskaanesiyich chechii uhteyihtahkwaau anichii Jewa kaa itiskaanesitwaau.

¹² Anit kaa machituutahkwaau anichii Jewa kaa itiskaanesitwaau ekut naashch kaa shaweyimaat Chishemanituu misiwe aniyuu kutak aweyuuh aahchiiuh kaa itiskaanesiyich. Kaye maak aniyuu e chii pahchishinitwaau ekut kaye Chishemanituu kaa uhchi mista shaweyimaat aniyuuh ekaa Jewa kaa itiskaanesitwaau. Cheshtinaateyihtaakun maak etituu che mishaayich Chishemanituuh ushaweyihchichewin kaau nituwaapamikute misiwe Jewa iinuuh.

Chishemanituu e pimaachihaat ekaa Jewa kaa itiskaanesiyich aweyuuh

¹³ Ekw maak chiyawaau ekaa Jewa kaa itiskaanesiyekw che ayimihiitakuch. Eukw niya chitapastalimuwaau. Muush maak chihchiwe nika iteyihtamihiikuun uu aapatisuwin.

¹⁴ Wapamitwaawenich niich Jewa iinuuch e waawiihtamaatakuch miywaachimuwin chika chii ishinaakuniyuu chechii ihtuutaakutwaau pasch kaau chechii nituwaapamaatwaau Chishemanituuh ekw maak che pimaachihutwaau.

¹⁵ Mekwaach ekaa kaa piskaatikutwaau Chishemanituuh anichii Jewa kaa itiskaanesitwaau ekut kaa uhchipayiyich misiwe anichii kutakach aahchiiuh kaa itiskaanesitwaau chechii wiichewaakanistamuwaakanuutwaau Chishemanituuh. Iskutak maak kaau utinikutwaawenich Chishemanituuh anichii Jewa kaa itiskaanesitwaau mwehch awenichii e chii nipitwaau kaau maak e pimaatisiitwaau chika ishinaakusuuch.

¹⁶ E pahkwenaat awen uschaaihkunaauh e machishtawehamaat Chishemanituu ishi e ihtaayich misiwe e ispichishtiyich aniyuuh aaihkunaau wiya Chishemanituu e ayaawaat ishinaakuniyuu. Kaye maak wiya Chishemanituu kaa pachishtinamuwaakanuukwe aniyuu utapiyuu kaye aniyuuh watihkunh payehkanh ishinaakun.

¹⁷ Anichii iinuuch Jewa kaa itiskaanesitwaau eukw uchii olive mistikw anite nihtaauchihchikan aschiihch kaa nihtaauchihaakanuut. Chii ihtakunh watihkunh e chii naatwaakahiikanuuhkwaau anit uhchi mistikuhch. Peyakw maak uwatihkun nitamukw e nihtaauchit olive mistikw chii chikamuhtaakanuuyuu anit. Chiyawaau maak ekaa Jewa kaa itiskaanesiyekw eukun an olive mistikw anite nitawiin kaa nihtaauchit. Anuhchiish maak chimiyu nihtaauchinaawaau ahchaahkuwinihch kaye chiyawaau, muyaam taan e ishi miyu nihtaauchitwaau ahchaahkuwinihch anichii Jewa iinuuch.

¹⁸ Ekaawii maak chika uhchi maayeyimaawaauch anichii mwehch wahtihkunh e chii naatwaakahiikanuuhkwaau kaa ishinaakusitwaau. Chekwaan che uhchi wii nanaapeumuyekw. Mwehch taapwe anit mistikuhch e uhchiyekw chitishinaakusinaawaau. Ekute wehchi miyu nihtaauchiyekw. Namayeu chiyawaau nehtaauchihekw uu mistikw.

¹⁹ Maaskuuch pasch anit e tashiyekw chika chii itwenaawaau, “Pasch watihkunh chii naatwaanam Chishemanituu niya miiskuch chechii nihtaauchiyaan taanit kaa nihtaauchihkwaau aniyuuh watihkunh.”

²⁰ Taapwe kiipaa. Mikw maak, Chishemanituu chii iicheneu aniyuuh Jewa iinuuh wesa e chii aanuwehtaakut. Chiya maak wii, chimiyunihtaauchin anit an mistikw wesh chichii taapweyimaau Chishemanituu. Ekaawii chika uhchi nanaapeumun. Ihtakun teyakuch chechii yaakwaamiyin.

²¹ Namui uhchi manaachiheu Chishemanituu aniyuuh Jewa kaa itiskaanesiyich, aniyuuh chihchiwe watihkunh anit mistikuhch kaa ishi kanawaapamaakanuyich. Chititeyihten aa maak che manaachihiisk chiya.

²² Chiwaapahtamuwaanaanuu maak taan e ishpish miyeyihtaakusit Chishemanituu kaye chiwaapahtamuwaanaanuu taan chechii ishpish ekaa manaatisiit. Namui manaachiheu aniyuuh kaa pahchishiniyich mikw maak miyutuutamuweu aniyuu muush kaa wii miyutuutamiyich wiya ishi e ihtaat. Ekaa maak uu ihtiyine kaye chiya chika manishuukw Chishemanituu.

²³ Chiishpin maak mihchiiweyihtahkwaawenich e chii aanuwehtahkwaau anichii Jewa iinuuch miin kaau chika chikamuhaakanuuch taanit kaa uhchi nihtaauchitwaau. Ekun taapwe chechii ihtuutaakutwaau Chishemanituuh.

²⁴ Chiyawaau ekaa Jewa kaa itiskaanesiyekw eukw chiyawaau uwatihkun nitamukw kaa nihtaauchit olive mistikw chitishinaakusinaawaau. Uu maak watihkun, nihtaauchihchikan aschiihch kaa nihtaauchit olive mistikw ekute kaa chikamuhtaakanuuhch aat ekaa anit uhchi nihtaauchihch. Uu maak olive mistikw kaa nihtaauchihaakanuut eukw uchii Jewa iinuuch. Cheshtinaash maak chika chii ihtuutaweu Chishemanituu aniyuuh Jewa kaa itiskaanesiyich kaau chechii chihchi nihtaauchiyich taanit shaash kaa nihtaauchiyich anite pechi.

Misiwe aweyuuh e chishewaatutawaat Chishemanituu

²⁵ Niichishaanitikw, chinituweyimitinaawaau chechii nisituhtamuwekw uyuu kaa ishi chischeyihtaakuhtaat Chishemanituu ekw maak namui chika uhchi iteyihtenaawaau naashch e iipwaahkaayekw. Anuhchiish mekwaach mihchetu anichii Jewa kaa itiskaanesitwaau wii suuhchitamuch. Namui wii taapweucheyimeuch Chishemanituuh. Mikw maak chika utihchipayuu taanit che taapwehtahkwaau. Eshkw maak ekaa utihchipayihch uu misiwe anichii ekaa Jewa kaa itiskaanesitwaau tahtu mikw che wiyaapamikuwaakwenich Chishemanituuh chechii pimaachihutwaau, chika pimaachihuuch.

²⁶ Ekw maak misiwe Israel iinuuh che pimaachihaat Chishemanituu. Mwehch e itashtech anite Chishemanituu utayimuwinihch, An che pimaachihaat aweyuu, Zionihch chika uhtuhteu. Chika ihtuutaweu aniyuuh Jacob utawaashiimiyuu chechii puuniyich e machituutamiyich.

²⁷ Eukw uyuu che ishi niskumuuch chechii ihtuutamuukwaau wepeyihtamuukwaawenich umachihtwaawinawaauh.

²⁸ Anichii Jewa kaa itiskaanesitwaau chii aataweyihtamuch miywaachimuwiniyuu. Ekut wehchi nuukuniyich e uhkaateyimaatwaau Chishemanituuh. Chechii pimaachihuyekw maak chiyawaau ekaa Jewa kaa itiskaanesiyekw ekun wehchii ispayihch uu. Yaapach maak saachiheu Chishemanituu aniyuuh Jewa kaa itiskaanesiyich. Wesh utaanische waahkumaakaniyuuh anite ishi utaahch chii wiyaapameu chechii utiiniimit. Ekw maak anuhchiish tepiyeusiit aniyuuh Jewa kaa itiskaanesiyich.

²⁹ Taapaa wiiskaat iicheneu Chishemanituu aniyuuh kaa wiyaapamaat. Kaye namui nihtaa kaau utinam aniyuu taan shaash kaa ishi miyaat.

³⁰ Namui kuuhchi nanihiihtuwaawaau Chishemanituu anite utaahch chiyawaau ekaa Jewa kaa itiskaanesiyekw. Aniyuu maak anuhchiish ekaa nanihiihtuwaatwaau anichii Jewa kaa itiskaanesitwaau ekun wehchi chistimaacheyimitaakw Chishemanituu.

³¹ Ekun maak mwehch che ihtuutamuwaakanuutwaau anichii Jewa kaa itiskaanesitwaau taan kaa ihtuutamaakuyekw. Anuhchiish namui nanihiihtuweuch Chishemanituuh. Mikw eshkw chika utihchipayuu e chistimaacheyimikutwaau Chishemanituuh mwehch kaa ishi chistimaacheyimitaakw kaye chiyawaau.

³² Misiwe aweyuuh namui nanihiihtaakuu Chishemanituu. Ekw maak kaa ihtuutawaat misiwe aweyuuh chechii maahchikwaapihkaatikuyich aniyuu ekaa nanihiihtaakut ati chechii uhchi nihiipayihtaat misiwe aweyuuh chechii chistimaacheyimaat.

Chisteyihtaakusuu Chishemanituu

³³ Naashch taapwe miyeyihtaakusuu Chishemanituu. Taapwe kachehtaaweyihtam kaye misiwe chekwaayuu chischeyihtam. Iskutak weyeyihtahk chekwaayuu namui mitun aweyuuh chii wiihtamiyuuh chekwaayuu anite wehchi ishi wiyeyihtahk aniyuu chekwaayuu. Namui aweyuuh chii miyu chischeyihtamiyuuh taan e ihtit.

³⁴ Mwehch e itashtech anite Chishemanituu utayimuwinihch, Namui mitun awen chischeyihtam taan e iteyihtamiyich Utipeyihchikeuh. Namui mitun awen chika chii wiihtamuweu taan chipaa ihtiyuuh.

³⁵ Ihtaau aa awen e chii uhaat Chishemanituu chekwaayuu ekw maak chechii ishinaakuniyich e masinahamaakut.

³⁶ Wiya Chishemanituu misiwe chekwaayuu chii ushihtaau. Wiya misiwe chekwaayuu naanaakachihtaau. Wiya misiwe chekwaayuu tipiyeusiiu. Wiya maak kaachiche kata wii chisteyimaakanuu. Amen.