Romans 10 - Chishemanituu Utayimuwin: Kaa Uskaach Testament

¹ Niichishaanitikw, mwaauch e ishi pukuseyimuyaan nitehiich kaye mwaauch e ishi nitutamuuk chekwaayuu Chishemanituu eukw chechii pimaachihutwaau niich Israel iinuuch.

² Wesh taapwe nika chii itaachimaauch taapwe e wii naheyihtamihaatwaau Chishemanituuh mikw maak namui nisituhtamuch taanite chechii uhchi naheyihtamihaatwaau.

³ Ekaa uhchi chischeyihtahkwaau taanite kuiskutaatisiiwinihch wechi ishi kanawaapamikuyich aweyuuh Chishemanituuh ekw wiyawaau tipaan kaa kuchihtaatwaau chechii kuiskunaakuhiisutwaau Chishemanituu ishi e ihtaayich. Ekw maak namui pachishteyimitisuustamuch aniyuu taan kaa itashtaayich Chishemanituuh che ihtiyich aweyuuh ukuiskutaatisiiu chechii ishi kanawaapamaakanuyich.

⁴ Kaa takushihk Christ chii ihtuutam wiishuwewiniyuu ekaa chechii aapateyihtaakuniyich, ekw maak misiwe aniyuuh che taapweyimikuukwe eukunh aniyuuh ukuiskutaatisiiuh che ishi kanawaapamikuyich Chishemanituuh.

Misiwe awen kaa taapwehtahk kata pimaachihuu

⁵ Moses chii aayimuumeu aniyuuh aweyuu e nanihiihtamiyich Chishemanituuh uwiishuwewiniyuu kaa wii uhchi kuiskutaatisiihiisuyich Chishemanituu ishi e ihtaayich. Chii iteu, “An awen che tipituutamukwe taan e itashuwemakaniyich wiishuwewiniyuu eukw aniyuu che ishi pimaatisiit.”

⁶ Mwaau maak e ishi aayimuutech Chishemanituu utayimuwinihch taapwehtamuwinihch e uhchi kuiskutaatisiihaakanuut awen, ekaawii kata uhchi iteyihtam awen kihchikiishikuhch kata ituhteu awen chechii peshuwaat Christ chechii aayimuutamaakuuhkw pimaachihiikusiiwiniyuu.

⁷ Ekaawii kaye kata uhchi iteyihtam awen nitaamihch anite aschiihch taanite e ihtaatwaau kaa nipitwaau kata ituhteu awen anite chechii uhtuhtahaat Christ chechii aayimuutamaakuuhkw pimaachihiikusiiwiniyuu.

⁸ Mwaau e ishi aayimuutech taapwehtamuwinihch e uhchi kuiskutaatisiihaakanuut awen, Chishemanituu upimaachihiiweu miywaachimuwin chipeshuwaapamikunaawaau. Chika chii wiihten e taapwemakahch kaye chika chii utinen chitehiihch. Eukw maak uu e ishi waawiihtamaahch.

⁹ Itweyine Christ eukw Utipeyihchikeu kaye maak chitehiihch taapwehtamane taapwe e chii wanishkaanikut Chishemanituuh nipuwinihch uhchi chika pimaachihun.

¹⁰ Wesh utehiich taapwehtam awen Christ e chii nipiyich kaye e chii wanishkaanikuyich Chishemanituuh nipuwiniihch uhchi. Eukw maak uu awen uyuu ishi taapwehtahke ukuiskutaatisiiu che ishi kanawaapamikut Chishemanituuh. Mushe e wiihtahk awen Christ e utipeyihchikewiyich ekut wehchi pimaachihiikut Chishemanituuh.

¹¹ Itashteu Chishemanituu utayimuwinihch, “An awen che taapweyimaakwe namui nihtaa kata uhchi iteyihtam sehchei aniyuu kaa taapweyimaat.”

¹² Misiwe maak awen aayimuumaakanuu utah wesh peyakunihch ishi kanawaapamaakanuuch Jewa kaa itiskaanesitwaau ekw maak ekaa Jewa kaa itiskaanesitwaau. Peyakuu an Utipeyihchikeu misiwe e ishi tipeyihchiket. Misiwe maak aniyuuh kaa nitutamaakut chechii wiichihaat chika shaweyimeu.

¹³ Wesh itashteu Chishemanituu utayimuwinihch, “Awen che tepwaataakwe Utipeyihchikeuh chechii wiichihiikut kata pimaachihaakanuu.”

¹⁴ Taanite maak chechii uhchi tepwaataatwaau ekaa uhchi taapweyimaatwaau. Taanite chechii uhchi taapweyimaatwaau ekaa uhchi pehtahkwaau chechii aayimuumaakanuyich anite e ihtaatwaau. Taanite chechii uhchi aayimuutamuwaakanuutwaau ekaa itishahamuwaakanuutwaawenich aweyuuh chechii aayimuutamaakutwaau aweyuu uyuu Utipeyihchikeuh.

¹⁵ Taanite chechii uhchi kacheskwetwaau awenichii ekaa chihchitishahwaakanuutwaawenich. Wesh itashteu Chishemanituu utayimuwinihch, Nuwach miyeyihtaakuniyuu tekushihkwaauh uchii miywaachimuwiniyuu kaa petaatwaau.

¹⁶ Aat maak e chii ihtaayich aniyuuh kaa itishahamuwaakanuutwaau chechii waawiihtamaakutwaau miywaachimuwiniyuu anichii Jewa iinuuch namui misiwe uhchi taapwehtamuch. Eukw maak uyuu aniyaanaa uchischiwehiichesuu Isaiah kaa aayimuutahk kaa itwet, Utipeyihchikeu, aatawii aa awen taapwehtam taan e ishi waawiihtamaahch.

¹⁷ E pehtahkwaau awenichii Christ e aayimuumaakanuyich ekut wehchi taapwehtahkwaau. E kacheskwaanuuhch maak ekut e aayimuumaakanuut Christ.

¹⁸ Mikw maak niwii kakwechihchemun, namui aa maak Christ uhchi aayimuutamuwaakanuuch Jewa iinuuch. Ehe, kiipaa kaa aayimuutamuwaakanuutwaau. Wesh itashteu Chishemanituu utayimuwinihch, Misiwe e ispichiskamikaayich aschiihch chii waawiihtamuch aniyuu miywaachimuwiniyuu. Mitun nete e iskwaayaayich uyuu aschiiyuu chii pehtaakuniyuu utayimuwinawaau.

¹⁹ Miin kutach chekwaan niwii kakwechihchemun, namui aa maak uhchi nisituhtamuch Israel iinuuch miywaachimuwiniyuu. Eukw uyuu Moses kaa niikaan aayimuutahk anit kaa itashteyich, Chika ihtuutaatinaawaau chechii uhteyimekuch anichii ekaa kaa utiiniimitutuwaakanuutwaau, kaye chika chishuwaahiitinaawaau e peyakushkaanesitwaau iinuuch ekaa kachehtaaweyihtahkwaau e aapachihiikwaau.

²⁰ Aniyaanaa Isaiah kuiskw chii wiihtam uyuu e chii itweyikupanenh Chishemanituu, Nichii miskaakuch anichii ekaa mechim kaa naanituweyimitwaau. Nichii nuukushiishtawaauch anichii ekaa kaa naanituu chischeyimitwaau.

²¹ Mwaauyuu e ishi aayimuumaat Chishemanituu Israel iinuuh, Iskan chiishikaauh nichii shuwanischeyishtuwaauch anichii ekaa kaa nanihiihtuutwaau kaye kaa aanuwehtahkwaau.