Romans 1 - Chishemanituu Utayimuwin: Kaa Uskaach Testament

¹ Niya Paul, Jesus Christ utaapachihaakan. Chishemanituu nichii wiyaapamukw apastal chechii ihtaauch kaye maak wiya nichii tepwaatikw chechii waawiihtamuch umiywaachimuwin.

² Shaash weskach anite chii pechi wiihtam Chishemanituu cheshtinaash eshkw che ihtakuniyich uyuu miywaachimuwiniyuu. Aniyehkaanaanh uchischiwehiichesuuh chii aapachiheu chechii wiihtamiyich uyuu. Kaye chii aayimuuteu uu miywaachimuwin anite Chishemanituu upayehchi ayimuwinihch.

³ Ukusisa, Chitipeyihchikeminuuh Jesus Christ, eukunh aniyuuh e aayimuumaakanuyich utah miywaachimuwinihch. Kaa pimaatisiit chitipeyihchikeminuu Jesus Christ, aniyaanaa Chisheuchimaau David kaa ishinihkaasuyich e ihtaayich ekute kaa uhchi aanische pimaatisiit.

⁴ Eyuu maak Chishemanituu chii ukusiitutaakuu. Chishemanituuh maak e chii wanishkaanikut chitipeyihchikeminuu Jesus Christ nipuwinihch uhchi ekut kaa uhchi waapahtiiwet Kaa payehchisiit Ahchaahkw taapwe Chishemanituu Ukusisa e aawiyich Jesus aniyuu uhchi e chii suuhcheyihtaakusiyich.

⁵ Christ uhchi Chishemanituu nichii wiyaapamukw e miyeyihtaakuniyich chechii ishi atushkuuk, eukw uyuu apastal chechii itaapatisuuch, chechii wiichihiimach misiwe nanaahkuu e itiskaanesiitwaauh aweyuuh chechii ati taapweyimikut kaye chechii ati nanihiihtaakut.

⁶ Kaye maak chiyawaau Rome kaa ihtaayekw chitasitahukunaawaau uu e ishi waawiihtamaan, chiyawaau Chishemanituu kaa wiyaapamitaakw Jesus Christ chechii tipiiweusiitutaataakw.

⁷ Ekun maak wehchi masinahamaatakuch misiwe chiyawaau Rome kaa ihtaayekw, chiyawaau Chishemanituu kaa saachihiitaakw kaye kaa wiyaapamitaakw chechii tipiiweusiitutaataakw. Chishemanituu Kuuhtaawiinuu ekw maak chitipeyihchikeminuu Jesus Christ chika shaweyimikuwaauch kaye chika miikuwaauch chiyaameyihtamuwiniyuu.

Paul kaa wii nituwaapamaat aniyuuh kaa taapwehtamiyich Rome kaa ihtaayich

⁸ Niishtam chekwaan waa itweyaan. Nanaaskumaau Nichishemanituum Jesus Christ uhchi iskutak cheschisiitutaatakuch misiwe e tashiyekw wesh misiwe utah aschiihch aayimuutaakanuu chitaapwehtamuwinawaau.

⁹ Chishemanituu an kwaast kaa atushkuuk e waawiihtamuch aniyuu miywaachimuwiniyuu Ukusisa anit e aayimuumikuyich nichischeyimikw e taapweuch. Nichischeyimikw muush e chischisiitutaatakuch tahtwaau e ayimihiik.

¹⁰ Nitutamuwaau taapwe chechii nihiipayihtaat chechii waapamitakuch, wiya kiipaa e iteyihtamukwe chechii waapamitakuch.

¹¹ Naashch taapwe chiwii waapamitinaawaau chechii ayaayekw kaye chiyawaau aniyuu ahchaahkuu miyawewinh Chishemanituu kaa pechi miit chechii yaaichikaapuuyekw taapwehtamuwinihch.

¹² Nititwen taapishkun chechii wiichihiituyihkw, chechii wiichihiikuyekw niya nitaapwehtamuwin kaye maak chiyawaau chitaapwehtamuwinawaau chechii wiichihiikuyaan.

¹³ Che wii chischisiyekw uu niichishaanitikw. Shaash mihchetwaau nichii wiyeyihten chechii nituwaapamitakuch mikw maak muush chii ihtakun chekwaan e nakaahukuyaan. Wesh nipukuseyihten kaye chiyawaau chechii wiichihiitakuch chechii taapwehtamekw miywaachimuwin mwehch kaa ishi wiichihakwaau kutakach ekaa Jewa kaa itiskaanesitwaau chechii taapwehtahkwaau.

¹⁴ Eukw uu e ishi nituweyihtaakusiyaan chechii ihtiyaan. Ninituweyihtaakusin misiwe awenichii chechii waawiihtamuukwaau uyuu miywaachimuwiniyuu, anichii anite Achaia kaa ihtaatwaau kaye maak anichii aahchiiuh aschiihch kaa ihtaatwaau, anichii e chii chischinuhamuwaakanuutwaau kaye anichii ekaa uhchi chischinuhamuwaakanuutwaau.

¹⁵ Ekun maak wehchi naakaasiyaan chechii waawiihtamaatakuch kaye chiyawaau Rome kaa ihtaayekw uu miywaachimuwin.

¹⁶ Wesh taapaa nipimaamisiituten miywaachimuwin. Eukw uyuu miywaachimuwiniyuu suuhk yaapachihtaat Chishemanituu chechii ayaayich pimaachihiikusiiwiniyuu misiwe aweyuuh kaa taapwehtamiyich. Niishtam aniyuuh Jewa kaa itiskaanesiyich chii waawiihtamuwaakanuyuu chek aniyuu ekaa Jewa kaa itiskaanesiyich kaa waawiihtamuwaakanuyich.

¹⁷ Ekut kaye miywaachimuwinihch wehchi chischeyihtamihiikuyihkw taanite wehchi kuiskunaakuhaat Chishemanituu aweyuuh wiya ishi e ihtaat. E taapweyimaat awen Jesus ekut mikw wehchi kuiskunaakuhaakanuut Chishemanituuh ishi e ihtaayich. Taapwehtamuwiniyuu pimaachihiikuu awen, kaye eukw uyuu che chiiwehtahiikut. Mwehch e itashtech masinahiikanihch, An kaa kuiskunaakusit taapwehtamuwinihch uhchi eukuu che pimaatisiit.

Misiwe awen machaatisiyuu

¹⁸ Wesh ekw e nuukuhtaat Chishemanituu kihchikiishikuhch uhchi taan e ishpish mista chishuwaahiikut misiwe aweyuuh aniyuu uhchi e machaatisiyich kaye aniyuu ekaa mitun aapateyimikut. Wesh aniyuu e machaatisiitwaau awenichii nakaahamuch etituu chechii chischeyihtaakunuyich taapwewiniyuu.

¹⁹ Waweshiheu Chishemanituu uyuuh aweyuuh wesh shaash tekash chii chischeyihtamiheu aweyuuh taan nihaau e iteyihtaakusit. Wiya Chishemanituu chii piyekasch waapahtiyeu uyuu.

²⁰ Aat ekaa muhch chii waapamaakanuut Chishemanituu, misiwe taan kaa ishihtaat uyuu aschiiyuu ekut chechii uhchi piyekasch nisituunamuwaatwaau awenichii ukaachiche suuhkaatisiiwiniyuu kaye ekut chechii uhchi chischeyimaatwaau taapwe e Chishemanituwiyich. Namui maak katachii iteu awen ekaa chischeyihtahk e ihtaayich Chishemanituu.

²¹ Wesh maau kaa ishinaakuhch. Chii chischeyihtamuch taapwe e ihtaayich Chishemanituu, mikw namui uhchi wii chisteyimeuch taan chipaa ishi chisteyimeuch kaye namui uhchi wii nanaaskumeuch. Uyuu e ihtitwaau namui papaaspine uhchi iteyihtaakuniyuu taan kaa iteyihtahkwaau e iteyihtaakusiyich Chishemanituuh ekw maak namui mitun kuiskw uhchi ishi kanawaapahtamuch chekwaayuu.

²² Muyaam naashch e kachehtaaweyihtahkwaau chii iteyihtaakuhiisuuch mikw maak tekash chiishkwehkaanihch iteyihtaakusuuch.

²³ Ishpish wii chechii nuuchiishtuwaatwaau kaa chisteyihtaakusiyich Chishemanituu aniyuu kaachiche che ihtaayich, teyakuch aniyuuh manituuhkaanh che nishuunaatisiyich nuuchiishtuweuch, aniyuuh wiyawaau tipiiwe e chii ushihaatwaau mistikuhch ekw maak asiniihch uhchi. Aniyuuh maak manituuhkaanh kaa ushihaatwaau muyaam naapeu maak piyeshiisha maak awesiisa maak nanaahkuu e ishinaakusiyich manichuusha ekun kaa ishinaakuhaatwaau.

²⁴ Namui uhchi piskaateuch Chishemanituuh. Eukw wehchi tekash chii pachishteyimikutwaau wiinisuwinihch ishi, chechii ati ihtuutahkwaau taan e ishi machi nituweyihtamuumakaniyikwaauh utehiiwaauh. Wiinihiituuch maak aniyuu naashch nitawiin e ihtuutaatutwaau wiinisuwinihch ishi.

²⁵ Kweschinamuweuch aniyuu taapwewiniyuu Chishemanituuh kaa pachishtinamiyich chechii chischeyihtaakunuyich. Miiskuch maak nanatayuwiniyuu chii taapwehtamuch. Ishpish wii aniyuuh aweyuuh misiwe chekwaayuu kaa ushihtaayich chechii nuuchiishtuwaatwaau, aniyuuh chekwaayuuh kaa ushihtaayich eukunh aniyuuh newachiishtahkwaau. Chishemanituu maak eukw taapwe tiyepicheyihtaakusit kaachiche chechii maamihchimaakanuut. Amen.

²⁶ Uyuu maak e ihtitwaau awenichii, ekaa wii chisteyimaatwaau kaye ekaa wii nanaaskumaatwaau Chishemanituu ekw anite kaa ishi pachishteyimikutwaau uwiinishuu machi nituweyihtamuwiniwaahch ishi. Waawaach iskweuch chii kweschipayihtaaweuch taan aniyuuh Chishemanituuh kaa itashtaayich e miyunaakuniyich che ishi chischeyimituyich naapeuh kaye iskweuh anite wiichihtuwinihch.

²⁷ Ekun kaa ihtitwaau kaye naapeuch. Chii nakatamuch taan aniyuuh Chishemanituu kaa ishi miikutwaau chechii ishi chischeyimaatwaau iskweuh. Ekw maak naashch e suuhchipayiniyich wiyawaau e machi nituweyimitutwaau. Aniyuu maak e ihtuutaatutwaau naapeuch ekaa mitun pimaamishiitwaau waweshihaakanuuch taan aniyuuh muyaam e ishinaakuniyich chechii ishi waweshihaakanuutwaau.

²⁸ Ekaa aapateyihtahkwaau awenichii taan aniyuuh kuiskw chipaa ishi chischeyimeuch Chishemanituuh kaye ekaa wii piskaataatwaau upimaatisiiwiniwaahch ekw kaa ihtuutaakutwaau naashch ekaa chechii kuiskunaakuniyich taan e iteyihtahkwaau chechii ihtitwaau. Ekw maak e ihtuutahkwaau aniyuuh chekwaayuu ekaa chipaa uhchi ihtuutamuch.

²⁹ Piihchishkaakuuch nanaahkuu machaatisiiwiniyuu kaye maayaatisiiwiniyuu, kaye piihchishkaakuuch mushtenamaachewiniyuu kaye uhkaateyimuwiniyuu. Tekash piihchishkaakuuch uhteyimuwiniyuu, kaye muush wii nipahiiweuch, kaye muush mamachipayihkahtuweuch aweyuuh, pishikw kaye wawiyesimuweuch, kaye tekash piihchishkaakuuch uhkaasuwewiniyuu. Pukunuumuweuch kaye,

³⁰ kaye maak mamushe machi aayimuumeuch aweyuuh, uhkaateuch kaye Chishemanituuh, naashch taapwe suuhchimaayeyihcheuch, naashch taapwe chihchiwe iteyimisuuch kaye maak naashch kaa wii nanaapeumutwaau ekun e iteyihtaakusitwaau. Muush mamiskamuch taan etituu chechii ishi maayaach pimaatisiitwaau. Nishkuushtuweuch uniichihiikuwaauh kaye namui mitun aapatihtaweuch.

³¹ Namui mitun nisitushkaakuuch machaatisiiwiniyuu utehiiwaahch kaye umituneyihchikaniwaahch. Namui mitun nanaakatuweyihtamuch aniyuuh chekwaayuuh kaa niskumutwaau che nanaakatuweyihtahkwaau. Namui mitun nuukuniyuu saachihiiwewiniyuu chechii ayaatwaau kaye maak namui mitun chistimaacheyimeuch aweyuu.

³² Aat e chischeyihtahkwaau Chishemanituuh e chii wiyeyihtamiyich taapwe e iteyihtaakuniyich chechii nipiyich aniyuuh aweyuuh uyuu kaa ishi machi pimaatisiyich yaapach etituu ihtuuch wiyawaau taan waa ihtitwaau. Namui maak mikw uyuu ihtuuch, naniheyihtamihiikuuch eyuu aniyuuh aweyuuh uyuu e ishi machi pimaatisiyich.