Revelation 6 - Chishemanituu Utayimuwin: Kaa Uskaach Testament

Maanishchaanish kaa manahk aniyuuh chiishaawaach pasakuhiikanh

¹ Ekw kaa waapamak an Maanishchaanish e aapahahk peyakw aniyuuh niishwaashch kaa itahtaniyikwaauh chiishaawaach pasakuhiikanh. Nichii pehtwaau maak peyakw anichii kaa pimaatisiitwaau awenich e itwet, “Aashtam.” Mwehch nimischuuch e itihtaakusitwaau e chistutwaau ekun kaa ishpish chishewet aniyuu e itwet.

² Ekw kaa iitaapiyaan, kaa waapamak e waapisit kaapalakaskweu. An maak kaa tehtapit aniyuuh kaapalakaskweuh chii tahkuneu ahchaapiih. Chii miyaakanuu chisheuchimaau astutiniyuu ekw kaa chistuhtet kihchikiishikuhch uhchi anite aschiihch e ituhtet. Chii tepihekupane maanh aweyuuh chechii ati uchimaahkatuwaat. Miin maak chii chistuhteu chechii tepihaat kaye chechii ati uchimaahkatuwaat kutak aweyuuh.

³ Iskutak maak miin kutachiyuu aniyuuh niishwaashch kaa itahtaniyikwaauh chiishaawaach pasakuhiikanh kaa aapahahk an Maanishchaanish ekw kaa pehtuuk miin an wehchi ihtaat anichii neu kaa pimaatisiitwaau awenich e itwet, “Aashtam.”

⁴ Ekw miin kutak kaapalakaskweu kaa uhchi wiiwiit. Chii mihkusuu an kaapalakaskweu. An maak kaa tehtapit aniyuuh kaapalakaskweuh chii miyaakanuu chechii ihtuutahk chechii nitupayinaanuyich kaye chechii nipahiituyich aweyuuh aniyuu e nitupayiyich. Chii miyaakanuu e mihchaapiskaayich nitupayuuhkumaaniyuu.

⁵ Miin chekwaan kaa ispayihch, miin kutachiyuu aniyuuh chiishaawaach pasakuhiikanh kaa aapahahk an Maanishchaanish. Ekw nishtu kaa aapahahk. Ekw an nishtu e ihtaat anichii neu kaa pimaatisiitwaau awenich kaa itwet, “Aashtam.” Iskutak maak e iitaapiyaan nichii waapamaau e wiipisit kaapalakaskweu. An maak kaa tehtapit aniyuuh kaapalakaskweu chii tahkunam tipaapeskuchikaniyuu.

⁶ Ekw kaa pehtamaan pehtaakusuwin mwehch awen e ayimit e itihtaakuhch mekwesiinuu anichii neu kaa pimaatisiitwaau awenich e ihtaatwaau e uhtihtaakuhch. An awen kaa ayamit chii iteu, “Peyakw chiishikaauh e ishpish aapatisit awen mikw niishu tipaapekahiikan pahkweshikanh chika saakutahweu maak kutwaashch tipaapekahiikan ayuuminh. Mikw maak ekaawii wii wanaachihtaa an pimiih ekw maak an shuuminaapuuh.”

⁷ Ekw an Maanishchaanish miin kutachiyuu aniyuuh chiishaawaach pasakuhiikaniyuu kaa aapahahk. Eukw ekw neu kaa aapahahk. Ekw kaa pehtuuk an neu e ihtaat anichii neu kaa pimaatisiitwaau awenich e itwet, “Aashtam.”

⁸ Miin kaa waapamak kaapalakaskweu e uhchi wiiwiit. Chii waapiteusiyuu an kaapalakaskweu. An maak kaa tehtapit aniyuuh kaapalakaskweuh nipuwin chii ishinihkaasuu. Utaahchiis maak anit e ihtaat ekut kaa ihtakuniyich Hades kaa ishinihkaateyich chiipaischiyuu. Chii miyaakanuuch maak uchii tipeyihchichewiniyuu peyakw eshikum neu e tashiyich aweyuuh utah aschiihch chechii nipahaatwaau nituupayuwiniyuu uhchi, kaye kauhkatewiniyuu uhchi, kaye nanaahkuu aahkusiiwinh uhchi. Chii miyaakanuuch kaye tipeyihchichewiniyuu chechii ihtuutawaatwaau kaa kushtaatikusiyich awesiisa anite aschiihch kaa ihtaayich chechii nanipahaayich aweyuuh.

⁹ Ekw an Maanishchaanish kaa apahahk miin kutachiyuu chiishaawaach pasakuhiikaniyuu. Eukw ekw niyaayin kaa aapahahk. Iskutak maak kaa aapahahk aniyuu chiishaawaach pasakuhiikaniyuu ekw kaa waapamach utahchaahkuwaauh anichii kaa nipahaakanuutwaau Chishemanituuh utayimuwiniyuu e chii taapwehtamuwaatwaau kaye e chii waawiihtahkwaau taan e ishi taapwehtahkwaau. Anite pachishtinicheu miichisuunaahtikuhch taanit kaa chii maamihchimaakanuyich Chishemanituuh, anit maak niihtaahch ekut kaa waapamach utahchaahkuwaauh uchii.

¹⁰ Chii chisheweuch maak e tepwetwaau, “Nitipeyihchikeminaan kaa suuhkaatisiyin, kaa payehchisiyin, kaa tepicheyihtaakusiyin chechii taapweucheyimikuyin. Taaishpish che wiyaaskunitwaau anichii anite aschiihch kaa ihtaatwaau kaa nipahiyiamihtwaau. Taaishpish che taapishtuutwaau anichii kaa nipahiyiamihtwaau.”

¹¹ Ekw paahpeyakw kaa miyaakanuutwaau e waapayikwaauh akuhpa. Chii itaakanuuch maak miin weipishchiish chechii ayiwepitwaau paatish tip chii ishpish nipahaakanuyichen wiich aapachihaakanuwaauh ekw maak wiichishaanawaauh taan aniyuuh chipaa nipahaakanuyuuh muyaam wiyawaau e chii nipahaakanuutwaau.

¹² Ekw kaa waapamak an Maanishchaanish miin kutachiyuu chiishaawaach pasakuhiikaniyuu e aapahahk. Eukw ekw kutwaashch kaa aapahahk. Iskutak maak kaa aapahahk ekw kaa mista kuihkuhch. Piisim chii tipischipayuu muyaam machunish kaa suuhchekahch e wiipekahch ekun kaa ishinaakusit. Ekw tipischipiisim kaa mihkusit, muyaam e suukusit ekun kaa ishinaakusit.

¹³ Achahkushach chii paahpahchishinuuch chiishikuhch uhchi anite ishi aschiihch muyaam e ishi pahchishinitwaauh waapaminich ekaa atisutwaau iskutak e suuhchiiweyich.

¹⁴ Chiishikw maak chii paasikunaakun muyaam masinahiikan e ati tihtipinikanuuhch ekun kaa ispayihch. Misiwe wachuuh ekw maak ministikw chii aahchipayuuh taanit kaa ihtakuhkwaauh uhchi.

¹⁵ Misiwe maak awenichii anit aschiihch kaa ihtaatwaau chii nituu kaasuuch anite e waatakwaapiskahiikanuyich wachiihch maak shiipaa asiniih e mihchaapischisiyich. Ekw anichii chisheuchimaauch, kaye anichii kaa chisteyihtaakusitwaau chisheuchimaasishach, nitupayuu uchimaauch, anichii kaa miisitisiitwaau, anichii kaa chisteyihtaakusitwaau awenichii, kaa utaapachihaakanitutawaakanuutwaau kaye ekaa kaa utaapachihaakanitutawaakanuutwaau kaye misiwe kutak awen chii nituu kaasuu anite e waatakwaapiskaayich wachiihch maak shiipaa asiniih e mihchaapischisiyich.

¹⁶ Ekw kaa tepwetwaau anite ishi wachiihch ekw maak anite e ihtaayich kaa maamihchaapischisiyiich asinii, e itwetwaau, “Pechi pachishtahunaan maa. Pechi kaainaan ekaa chechii waapamiyimiht an chisheuchimaau tehtapuwinihch kaa apit kaye ekaa chechii wiyaaskunikuuyaahch an Maanishchaanish.

¹⁷ Wesh ekw wetihchipayiyich taanit misiwe aweyuuh che aahkwaach waweshihaatwaau. Namui maak awen chika chii ishikaapuushtam uyuu che ishi waweshihaakanuyich aweyuuh.”