Revelation 4 - Chishemanituu Utayimuwin: Kaa Uskaach Testament

Anichii kihchikiishikuhch kaa ihtaatwaau maamihchimeuch Chishemanituuh

¹ Aahchiiuh miin nichii ishi waapahtiikuun. Ishpimihch e iitaapiyaan nichii waapamaau chishtuhkan e aapahiikuchinit anite kihchikiishikuhch. Ekw kaa pechi ayimihiit miin an awen shaash anite e chii pechi ayimihiit. Muyaam puutaachikaniyuu e chishewemakaniyich kaa itihtaakuniyich ekun kaa itihtaakuniyich upehtaakusuwin. Nichii itikw, “Aashtam ute. Che waapahtiitaan taan miin che ati ispayihch.”

² Tiiwehch maak Kaa payehchisiit Ahchaahkw nichii pechi piihchishkaakw ekw kaa waapahtamaan anite kihchikiishikuhch chisheuchimaau tehtapuwin. Chii apuu maak awen anit.

³ An maak awen kaa apit anit chisheuchimaau tehtapuwinihch naashch taapwe chii miywaashiyuu e ishi chiihkaayaashtuwet, muyaam asiniishach kaa mista miyushitwaau jasper ekw maak carnelian kaa ishinihkaasutwaau ekun kaa itaashtuwet an awen. Misiwe waaskaa an chisheuchimaau tehtapuwin chii itaapihchemuu piisimuyaapiih naashch e miywaashtawech muyaam asiniish emerald kaa ishinihkaasut e itaashtuwech.

⁴ Waaskaa maak an chisheuchimaau tehtapuwin ekut kaa ihtakuhkwaauh niistanuu neu chisheuchimaau tehtapuwinh. Niistanuu neu e chisteyihtaakusitwaau chisheinuuch chii apuuch anit. Chii waapaayuuh uchekwaanimuwaauh kaye chii chichishkamuch e ushaaushuuliyaaunaapiskuuniyikwaauh chisheuchimaau astutinh.

⁵ Anite uchisheuchimaau tehtapuwinihch an kaa apit chii uhchi waaswaastepayuu. Chii pehtaakunh pehtaakusuwinh kaye mwehch nimischuuch e pehtaakusitwaau chii itihtaakun anite e apit uhchi. Uhchishkuu maak anit chisheuchimaau tehtapuwinihch chii ihtakun niishwaashch ishkuteu waashtenamaakanh e ishkuteuhkwaauh. Eukunich uchii niishwaashch ahchaahkuch kaa atushkuwaatwaau Chishemanituuh.

⁶ Uhchishkuu an chisheuchimaau tehtapuwin chii ihtakun saakahiikanish mwehch waasenihtaakanaapiskw e ishinaakuhch, e shaapunaakuhch muyaam miskumii e shaapunaakusit. Peshuch maak waaskaa anit chisheuchimaau tehtapuwinihch nichii waapamaauch neu awenichii e pimaatisiitwaau. Misiwe e ispichishtitwaau e ihtakuniyikwaauh uschiishikuwaauh.

⁷ An maak niishtam anichii kaa neutwaau kaa pimaatisiitwaau awenichii muyaam mistatim chii ishinaakusuu. An miin wehchi ihtaat muyaam mistusis chii ishinaakusuu. Miin an nishtu wehchi ihtaat utaashtamuhkw muyaam iinuu mitaastamuhkuyuuh chii ishinaakuniyuu aniyuu utaashtamuhkw. Ekw an neu wehchi ihtaat muyaam mistisuu e pimihiyaat chii ishinaakusuu.

⁸ Misiwe maak e neutwaau kutwaashch tahtiniyuuh utihtahkunawaauh. Misiwe e ispichishtitwaau ihtakuniyuuh uschiishikuwaauh, waawaach shiipaa utihtahkuniwaahch ihtakuniyuuh. Namui maak chipihtuweuch e nikamutwaau e tipiskaayich kaye e chiishikaayich, e itwetwaau, “Payehchisiyuu, payehchisiyuu, payehchisiyuu Utipeyihchikeu Chishemanituu maauch kaa suuhkaatisiit, an muush kaa pechi ihtaat, an anuhchiish kaa ihtaat, kaye an che takushihk.”

⁹ Iskutak maak nekamutwaauh anichii neu kaa pimaatisiitwaau awenichii e chisteyihtaakuhaatwaau, e chishtaachimaatwaau kaye e nanaaskumaatwaau aniyuuh anit chisheuchimaau tehtapuwinihch kaa apiyich, aniyuu kaachiche kaa pimaatisiyich,

¹⁰ anichii niistanuu neu kaa chisteyihtaakusitwaau chisheinuuch chii pahchishimipayihuuch anite ishi e ihtaayich aniyuuh kaa apiyich chisheuchimaau tehtapuwinihch, e nuuchiishtuwaatwaau aniyuu kaachiche kaa pimaatisiyich. Chii manamuch aniyuuh uchisheuchimaau astutinawaauh ekw uhchishkuu anit chisheuchimaau tehtapuwinihch kaa ishuwepinihkwaau, e itwetwaau,

¹¹ “Chiya Nitipeyihchikeminaan kaye Nichishemanituuminaan kaa atushkaataahch chitepicheyihtaakusin chechii chisteyihtaakuhiikuyin kaye chechii chishtaachimikuyin kaye chechii maamihchimikuyin e ishpish suuhkaatisiyin. Wesh chiya misiwe chekwaan chichii ushihtaan. Chiya chichii iteyihten chechii ihtakuhch misiwe chekwaan kaa ihtakuhch ekw maak misiwe kaa ushihtaayin.”