Revelation 3 - Chishemanituu Utayimuwin: Kaa Uskaach Testament

Taan kaa itasinahamuwaakanuutwaau Sardis kaa ishinihkaateyich ihtaawiniyuu kaa ihtaatwaau

¹ Ekw miin kaa itikuyaan, eukw uyuu itisinahamuu an enchil kaa naanaakachihaat umaamuuayimihaauh anite Sardis kaa ihtaayich. “Eukw uyuu e itwet an kaa tipeyimaat aniyuuh niishwaashch ahchaahkwa kaa atushkuwaayich Chishemanituu, an kaa tahkunaat niishwaashch achahkusha. Chichischeyimitinaawaau misiwe taan e ihtiyekw, iteu. Chichischeyimitinaawaau e iteyimikuyekw taapwe ahchaahkuwinihch e ishi pimaatisiyekw, mikw maak chinipinaawaau.

² Wanishkaakw. Yaaichihtaakw aniyuuh chekwaayuuh kaa iskupayihkwaauh, shaash chekaat kaa nipiimakahkwaau, wesh nichischeyihten ekaa eshkw tekash ihtuutamekw taan kaa itashumitaakw Chishemanituu.

³ Chischisikw maa taan kaa ishi pehtamekw anite pechi kaye taan kaa ishi chiskutamaakuyekw. Nanihiihtamukw kaye ihtuutamukw an kaa ishi chiskutamaakuyekw. Kaye maak kweskaatisiikw, nakatamukw chimachituutamuwinawaauh. Wesh ekaa che uhchi wanishkaawekwe, nika takushin che pechi nituu wiyaaskunitikuch. Namui maak chika uhchi chischeyiminaawaau taaishpish nihaau che takushiniyaan muyaam chimutisk e ishpish ekaa chischeyimaakanuut taaishpish che takushinit.

⁴ Ihtaauch kiipaa pasch awenichii anite Sardis e chii kanuweyimisutwaau ekaa uhchi wiinaakutaatwaau uchekwaanimuwaauh. Eukunich maak uchii che papaawiicheutwaau e waapaaspisutwaau wesh tepicheyihtaakusuuch.

⁵ Chika waapaaspisuuch anichii che shaakuuchihtaawaakwenich taan che ishi kakwechihiikutwaau machi chekwaayuu. Namui nika uhchi kaasiisinahamuwaan utishinihkaasuwinawaauh anite masinahiikanihch taanit mesinaasuyich aweyuuh che ayaayich kaachiche pimaatisiiwiniyuu. Nika wiihtamuwaan anite Nuuhtaawii kaye enchil e ihtaayich niya e ihtaauch e ishi tipeyihtaakusitwaau.”

⁶ “Misiwe chiyawaau kaa nituhtamekw suuhk wii nisituhtamekw taan e itaat Kaa payehchisiit Ahchaahkw umaamuuayimihaauh.”

Taan kaa itasinahamuwaakanuutwaau Philadelphia kaa ishinihkaateyich ihtaawiniyuu kaa ihtaatwaau

⁷ Miin nichii itikuun, eukw uyuu itasinahamuu an enchil kaa naanaakachihaat umaamuuayimihaauh Philadelphiahch kaa ihtaayich. “Eukw uyuu e itwet an kaa payehchisiit, an muush kuiskw kaa ihtit e atushkuwaat Chishemanituuh. Tahkunamuweu David utaapahiikaniyuu. Aapuhwaate chishtuhkan namui aweyuuh chika chii chipahweyuuh. Chipahwaate chishtuhkan namui aweyuuh chika chii aapuhweyuuh.

⁸ Chichischeyimitinaawaau taan e ihtiyekw. Chichischeyimitinaawaau ekaa naashch chischeyimakuyekw. Yaapach maak chichii nanihiihtuunaawaau taan kaa itashumitakuch kaye namui chuuhchi puuniinaawaau e taapweyimiyekw. Chichii aapahamaatinaawaau maak ishkwaahtem ekaa awen chechii chipahwaat.

⁹ Nika ihtuutawaauch chechii uchihchiihkunapayihutwaau e chisteyimitaakuch anichii machimanituuh e ihtaayich kaa ishi wiichihiiwetwaau, anichii kaa nanataitwaau e itwetwaau, Jewa iinuuch niyaan, Chishemanituu utiiniim. Chika chischeyihtamuch maak e saachihiitakuch.

¹⁰ An e chii siipiiwesiyekw taan e ishi nachishkamekw muyaam kaa itashumitakuch chechii ihtiyekw, chika kanuweyimitinaawaau anit mekwaach pimipayihche e aayimuhutwaau awenichii, anit mekwaach che nituu chischeyimaakanuutwaau misiwe awenichii utah aschiihch kaa ihtaatwaau.

¹¹ Shaash wiipach nika takushin. Suuhk yaapach taapweyimikw ekaa awen chechii miskamitaakw taan kaa ishi kaaniyuuyekw chisheuchimaau astutin.

¹² Anichii awenichii che shaakuuchihtaawaakwenich taan che ishi kakwechihiikutwaau machi chekwaayuu nika ishihaauch muyaam siituuwaaskuhiikan chihchiwe e aapatahch anite uchisheayimiheukamikuhch an Chishemanituu kaa atushkuuk chechii ishinaakusitwaau. Namui maak miin wiiskaat chika uhchi nakatamuch. Nika masinahamuwaan Chishemanituuh utishinihkaasuwiniyuu anit e ihtaatwaau. Nika masinahamuwaan taan e ishinihkaateyich Chishemanituuh utihtaawiniyuu anit e ihtaatwaau eukw uu kaa uskaach Jerusalem. Chishemanituu chika pechi itishaham uyuu kihchikiishikuhch uhchi. Kaye nika masinahamuwaan kaa uskaayich nitishinihkaasuwiniyuu anit e ihtaatwaau.”

¹³ “Misiwe chiyawaau kaa nituhtamekw suuhk wii nisituhtamekw taan e itaat Kaa payehchisiit Ahchaahkw umaamuuayimihaauh.”

Taan kaa itasinahamuwaakanuutwaau Laodicea kaa ishinihkaateyich ihtaawiniyuu kaa ihtaatwaau

¹⁴ Miin maak nichii itikuun. Eukw uyuu itasinahamuu an enchil kaa naanaakachihaat umaamuuayimihaauh Laodiceahch kaa ihtaayich. “Eukw uyuu e itwet an anit wehchi cheshtinaateyihtaakuniyich misiwe taan e itwet Chishemanituu che ihtuutamaachet kaye che ihtit, an kuiskw kaa ihtit e wiihtahk taan nihaau e iteyihtaakusiyich Chishemanituuh, aniyuuh kaa aapachihaat Chishemanituu misiwe chekwaayuu kaa ushihtaat.

¹⁵ Nichischeyihten taan e ishinaakuhkwaauh chitatushchewinawaau. Namui chitahchisinaawaau kaye namui chichisunaawaau. Kamaa tahchisiyekw maak chisuyekw.

¹⁶ An maak ekaa tahchisiyekw kaye ekaa chisuyekw mikw e chiisuukamisiyekw e ishinaakusiyekw chika aapahkaatemitinaawaau.

¹⁷ Chititwenaawaau niweyuuchisiinaan, naashch taapwe nimiyupayinaan kaye shaash misiwe chekwaan nitayaanaan taan e ishi nituweyihtamaahch. Namui aa chichischeyihtenaawaau taan e ishi ekaa chihkaawaateyimuyekw ekaa miyeyimuyekw kaye taan e ishpish pimaameyihtaakusiyekw. Namui chichischeyihtenaawaau taan e ishpish chistimaatisiyekw, e musheshkateyekw, kaye ekaa waapahtemekw.

¹⁸ Eukw uu che uhchi wiihtamaatakuch taan che ihtiyekw. E ihtaayaan utinaahkw ushaaushuuliyaanaapiskw. Uu ushaaushuuliyaanaapiskw ishkutehch chii tataakanuu chechii payehchihtaakanuuhch. Ayaawekwe maak ekw che weyuuchisiyekw Chishemanituu ishi e ihtaat. Utinamukw kaye e waapaasikwaauh machunisha chechii chichishkamekw ekaa chechii shaakweyimuyekw wesh namui ekw chika uhchi musheshkatenaawaau. Kaye utinamukw nituhkuiin che ashtaayekw chischiisikuwaahch chechii waapahtamekw.

¹⁹ Wesh niwiihtamuwaauch wenipayitwaauh anichii kaa saachihiikwaau kaye nikuiskunaauch. Suuhk maak chihchiwe iteyihtamukw e taapweyimiyekw, kweskaatisiikw, nakatamukw chimachihtwaawinawaauh.

²⁰ Nituhtamukw. Niniipuun ishkwaahtemihch e paahpawahiicheyaan. An awen che pehtuukwe piihtakahiite maak nika piihchewaan anite e ihtaat ekw maak che wiich miichisuumituyaahch.

²¹ An awen che shaakuuchihtaakwe taan che ishi kakwechihiikut machi chekwaayuu nika miyaau chechii wiitapimit nichisheuchimaau tehtapuwinihch. Mwehch niya e chii shaakuuchihtaayaan misiwe machi chekwaan Nuuhtaawii nichii miikw chechii wiitapamak uchisheuchimaau tehtapuwinihch.”

²² “Misiwe chiyawaau kaa nituhtamekw suuhk wii nisituhtamekw taan e itaat Kaa payehchisiit Ahchaahkw umaamuuayimihaauh.”