Revelation 22 - Chishemanituu Utayimuwin: Kaa Uskaach Testament

Pimaatisiyuu siipiih

¹ Ekw uu enchil kaa pechi waapahtiit siipiiyuu. An maak nipiih anit an siipiih ekut wehchi miyakanuut awen kaachiche pimaatisiiwiniyuu. Naashch chii waasheyaakamishuu an nipii mwehch asiniish waasenihtaakanaapiskw e ishpish shaapwaau waaseyaapischisit ekun kaa itaakamihch an nipii. Shiipaa Chishemanituu ekw maak an Maanishchaanish uchisheuchimaau tehtapuwiniwaahch ekute kaa uhtaachuuhch uu siipii.

² Tetaauskanuu maak an mistameskanuu anit an ihtaawin ekut pemaachuuhch. Iituukaam maak an siipii chii chimisuuch mistikuch anit wehchi ayaat awen pimaatisiiwiniyuu. Eshikum piisim maak chii nihtaauchin miinsa anit anichii mistikuch, niishushaapwaau peyakw pipun. Aniyuu maak niipisiih ekut wehchi miinuwaachihiisutwaau misiwe e itiskaanesitwaau awenichii.

³ Namui maak ekw miin nihtaa chika uhchi ihtakun anit ihtaawinihch chekwaan chechii itwet Chishemanituu e uhkaateyihtahk. Chishemanituu kaye an Maanishchaanish uchisheuchimaau tehtapuwinawaau chika ihtakuniyuu anit ihtaawinihch. Chika nuuchiishtaakuu maak Chishemanituu utaapachihaakanh.

⁴ Wechiihch chika waapahtamiyuuh utaashtamuhkw. Utishinihkaasuwin chika masinaateyuu uskahtikuwiihch.

⁵ Namui wiiskach chika uhchi tipiskaau anit. Namui kaye kata uhchi nituweyihtamuch waashtenamaakanh kaye namui chika uhchi nitaweyimeuch piisim chechii waashtenamaakutwaau. Wesh aniyuu e ishpish chiihkaayaashtuweyich Chishemanituu eukw uyuu che uwaastenimaakanitwaau. Kaachiche maak kata chisheuchimaauch.

Shaash wiipach chika takushin Jesus

⁶ Ekw an enchil kaa pechi iishit, “Taapwemakaniyuu uyuu kaa itwet kaye cheshtinaateyihtaakuniyuu ekun che ispayihch. Utipeyihchikeu Chishemanituu, an kaa miiyaat uchischiwehiichesuuh wiya Utahchaahkwa chechii piihchishkaakuyich, chii pechi itishahweu utenchilam chechii waapahtiyaayich utaapachihaakanh taan che ispayiyich shaash wiipach.”

⁷ Jesus maak iteu, “Nituhtamukw, shaash wiipach nika takushin. Taapwe kata shaweyimaakanuu awen che nanihiihtahk uyuu ayimuwiniyuu taan kaa ishi waapahtiiweyich Chishemanituu utah masinahiikanihch eshkw che ispayiyich.”

⁸ Niya, John, niya nichii pehten kaye nichii waapahten misiwe uyuuh chekwaayuu. Iskutak maak kaa chiishipayihch e pehtamaan kaye e waapahtamaan uyuuh chekwaayuu ekw kaa nuuchiishtuuk e uchihchiihkunipayihuyaan uhchishkuu e ihtaat an enchil kaa waapahtiit uyuu chekwaayuu.

⁹ Mikw maak nichii itikw, “Ekaa pechi nuuchiishtuuh. Wesh kaye niya nitatushkuwaau Chishemanituu mwehch chii e ihtiyin kaye maak mwehch e ihtitwaau chiichishaanich, anichii kaa chischiwehiichetwaau ekw maak anichii kaa nanihiihtahkwaau taan e itashteyich utah masinahiikanihch. Chishemanituu eukw nuuchiishtuu.”

¹⁰ Ekw miin kaa pechi iishit, “Ekaawii chiimuut kanuweyihtah taan e ishi aayimuutech utah masinahiikanihch eshkw che ispayihch. Wesh shaash peshunaakun che ispayihkwaau uyuuh chekwaayuu.

¹¹ Ekw maak an awen kaa machaatisiit ekush yaapach chika machaatisiyuu. Kaye an awen nitawiin kaa ihtit ekush yaapach nitawiin chika ihtuu. Ekw an awen kaa kuiskutaatisiit ekush yaapach kata kuiskutaatisiyuu. Kaye an awen kaa payehchisiit yaapach che payehchisiit.” Eukw uyuu kaa itwet an enchil.

¹² Jesus iteu, “Nituhtamukw, shaash wiipach nika takushin. Nika petaan maak taan che ishi tipahamuuk misiwe awen mikw taan kaa ihtikwe.

¹³ Eukw niya shaash kaa ihtaayaan eshkw ekaa mitun chekwaan uhchi ihtakuhch kaye eukw niya eshkw che ihtaayaan iskutak misiwe chekwaan chiishipayihche. Eukw niya niishtam kaa ihtaayaan kaye eukw niya maahchishtai che ihtaayaan. Eukw niya misiwe chekwaayuu kaa chihchipayihtaat kaye eukw niya che chiishihtaayaan misiwe chekwaan.

¹⁴ Taapwe kata shaweyihtaakusuuch anichii kaa payehchihtaatwaau uchekwaanimuwaau. Eukw uchii che tepicheyihtaakusitwaau chechii piihchetwaau aniyuu ihtaawiniyuu kaye chechii utinamaasutwaau miinishah anite uhchi aniyuuh mistikw anit wehchi ayaayich aweyuuh pimaatisiiwiniyuu.

¹⁵ Anichii maak kaa wiinisuu pimaatisiitwaau, anichii kaa mateutwaau, anichii wiinisuwinihch kaa ishi pimiihkawaatwaau aweyuuh, anichii kaa nipahiiwetwaau ekw maak anichii kaa nuuchiishtuwaatwaau manituuhkaanh, kaye anichii kaa wiihch nanataitwaau namui kata chii piihcheuch aniyuuh ihtaawiniyuu.

¹⁶ Niya, Jesus, nichii itishahwaau nitenchilam taanite e ati ihtaayekw chechii wiihtamaataakw uyuuh chekwaayuuh, chiyawaau umaamuuayimihaautikw. David e ihtaat nuuhchi aanische pimaatisiin. Eukw niya an waapan achahkush naashch kaa chiihkaayaashtuwet.” Eukw uyuu kaa itwet Jesus.

¹⁷ Kaa payehchisiit Ahchaahkw ekw maak an uschiskwewaan iteuch, “Aashtam.” Kaye an awen kaa pehtahk ekush kaye wiya chika iteu, “Aashtam.” Misiwe chiyawaau kaa nuuhteyaapaakweyekw, “Aashtamukw sehchei pechi minihkwekw an nipii ati wehchi ayaat awen pimaatisiiwiniyuu.”

Maahchishtai e ishi aayimuutech

¹⁸ Niya, John, nitayaakwaamimaau misiwe awen kaa pehtahk taan e ishi niikaan wiihtaakanuyich utah masinahiikanihch, “An awen che ayihchistaakwe chekwaayuu taan e itwemakaniyich utah masinahiikanihch, Chishemanituu chika ayihchistaayuu kaye wiya taan kaa ishi wiihtaakuniyich utah masinahiikanihch che ishi nanehkaateyimut.

¹⁹ An maak awen che achuunamukwe taan e ishi niikaan wiihtaakuniyich utah masinahiikanihch Chishemanituu chika utinamiyuu taan kaa ishi ayaat chechii uhchi miichit miinisha anit aniyuuh mistikw kaa nihtaauchiniyikwaau, ati wehchi ayaayich aweyuu pimaatisiiwiniyuu kaye namui chika chii piihcheu anite Chishemanituu utihtaawiniihch.”

²⁰ An maak awen kaa wiihtahk e taapwemakaniyich misiwe uyuu kaa ishi wiihtaakanuyich iteu, “Cheshtinaash shaash wiipach miin nika takushin.” Amen, Utipeyihchikeu Jesus, aashtam.

²¹ Chika wii ayaawaanaawaau Utipeyihchikeu Jesus misiwe taan e ishi shaweyihchichet, chiyawaau kaa taapwehtamekw. Amen.